KHANI YOFUNJEDA 34
NYIMBO 107 Tizitsanzira Chikondi cha Mulungu
Mwemo Ninatonyi-edele Iyo Chikondi na Chifundo Muthu M’mo-iwa Apanga Chimo
“Mulungu unana utonyi-eda oma murima wae ulukulu nayolinga yoi ulape.” — AROM. 2:4.
VYEVO NINAFUNJEDE IYO
Mukhanila ninokambilana mwemo andimuwa kanamukami-eleathu muthu unoyo upangile chimo lilukulu.
1. Kodi chin’ni inaireye wa athu amo-i anayo kapangile chimo lilukulu?
MUKHANI ivirilele noowona vyevyo namarumiwa Paulo apangile liye, muthu m’mo-iwa angapangile chimo lilukulu upingo wau Korinto. Muthu ochimoyo kaalapile moi afuneya chosiwa mupingo. Koma mogwilizana na lemba losogolela khanila, athu amo-i anayo kapangile chimo lilukulu kanokoza kami-iwa ira kalape. (Arom. 2:4) Kodi andimuwa kanakami-e avi athu anayo kapangile chimo ira kalape?
2-3. Kodi ninafuneya panga n’ni naiziwa ira Mkiristu fwi-u upanga chimo lilukulu, nanga chifukwa n’ni?
2 Ira andimuwa kamukami-e muthu, kanafuneya iziwa vuto lelo muthuyo un’na liye. Ndiye kodi ninafuneya panga n’ni naiziwa ira Mkiristu fwi-u upanga chimo lilukulu lelo linapangi-e ira achosiwe mupingo? Ninafuneya mulimbikisa ira adowe wa andimuwa nayolinga yoi kadowe kamukami-e.— Yes. 1:18; Vyo. 20:28; 1 Pe. 5:2.
3 Koma bwanji ngati muthu unoyo upangile chimo unakoonda dowa wa andimuwa? Iyo vano ninafuneya dowa wa andimuwa nayolinga yoi muthuyo akami-iwe. Napanganga vyevi ninotonyi-eda chikondi chifukwa kaninafuna ira m’bali kapena murongoli-u aonongiwe. Muthu ochimwa apitiliza panga vyotakala unoononga usamwalae na Yehova. Unokoza ononga teto limbili la pingo. Eno molimba murima nipangengavo yongo chifukwa ninomuomeliwana Yehova koma teto muthuyo. — Sal. 27:14.
MWEMO ANDIMUWA MUNAKAMI-ELAATHU ATHU ANAYO KAPANGILE CHIMO LILUKULU
4. Kodi yolinga ya andimuwa inakala yoi avi kagumananga na muthu unoyo upangile chimo?
4 Muthu m’mo-iwa apanga chimo lilukulu, bungwe la andimuwa linosakula andimuwa aralu ofwanelela ira kakale mukomiti ya andimuwa yogumana na muthuyo. a Andimuwala kanafuneya kala oviyevi-a kamukami-anga muthu ochimoyo ira alape. Kanozindikila ira katinamukanyi-ede ira achenje. (Doto. 30:19) Andimuwa kanozindikila ira kai athu etene anayo kapangile chimo anayo kana-arele malangizo ngati mwemo mwene Davide apangele liye. (2 Sam. 12:13) Athu amo-iwa anayo kapangile chimo kanokoonda malangizo a Yehova. (Gen. 4:6-8) Ngakale vingali eno, yolinga ya andimuwa kumukami-a muthu unoyo upangile chimo ira alape ngati pivyowandeya. Kodi mbamakundo aavi anayo andimuwa kana-arelaathu kagumananga na muthu unoyo upangile chimo?
5. Kodi andimuwa kana-arela malangizo aavi kagumananga na muthu unoyo upangile chimo? (2 Timoteyu 2:24-26) (Onani teto ithuzithuzi.)
5 Andimuwa kanoona ira muthu unoyo upangile chimo chi khosa yantengo wavadimu ineyo idimeelile. (Luka 15:4, 6) Eno kagumananga na muthuyo katinaonga kapena mupangela vyongo mwankhanza. Katinagumana na muthuyo mwa mwambo nayolinga yoi kakedenga mufuka vyofuka. M’malomwiwa kanotonyi-eda makalelo ofwanyeya va 2 Timoteyu 2:24-26. (Welengani.) Andimuwa kanokala odeka, ofaasa koma teto ooma murima kaesaesanga ira kamufiye vamurima muthu unoyo upangile chimo.
Mofwanafwana na abusa awale, andimuwa kanoesaesa ira kaweli-e khosa yodimeela (Onani ndima 5)
6. Kodi andimuwa kanakozeeli-ede avi mirima diwa kaanagumane na muthu unoyo upangile chimo? (Aroma 2:4)
6 Andimuwa kanokozeeli-a mirima diwa. Aliwa kanoesaesa musazi-eda Yehova kapanganga vyongo na muthu ochimoyo moi kanoumbuwela malangizo a Paulo oi: “Mulungu unana utonyi-eda oma murima wae ulukulu . . . nayolinga yoi ulape.” (Welengani Aroma 2:4.) Andimuwa kanafuneya umbuwela ira aliwa mba abusa anayo kana-arela malangizo a Yesu. (Yes. 11:3, 4; Mat. 18:18-20) Andimuwa anayo kali mukomiti kaanagumane na muthuyo kanopempela koma teto ganizela yolinga iwa ineyo kumukami-a muthu ira alape. Aliwa kanosaela m’malemba koma teto m’mabukwi-u moi kanopempela ira Mulungu aakami-e kala ozindikila. Kanoganizela teto ngati vali vimo-i vyevyo kanafuneyaathu iziwa vyokuza muthuyo, vyevyo vinapangi-a ira aganizenga kapena panga vyongo mundila imo-iwene. — Miya. 20:5.
7-8. Kodi andimuwa kanasazi-ede avi leza murima wa Yehova kakami-anga muthu unoyo upangile chimo?
7 Andimuwa kanosazi-eda leza murima wa Yehova. Aliwa kanoumbuwela mwemo Yehova apangela liye vyongo na athu ochimwa mundulimu. Mwaisazo oowonga na Kaini moleza murima vomuchenjeza vya vyo-arelavo vya chimo koma teto muwandela vyevyo unapange liye ira akale nae nawili vausamwali. (Gen. 4:6, 7) Yehova oo-indi-eda chito namaongela Natani vopeleka malangizo wa Davide vo-indi-eda chito isazo ineyo yamufiile vamurima mwenela. (2 Sam. 12:1-7) Moi Yehova oopitiliza tumiza anamaongelae moweli-edaweli-eda wa Aizaraeli anayo kapanga machimo. (Yer. 7:24, 25) Liye kaadedi-edile ira aliwa kalape era eno aakami-enga. M’malo mwiwa aambeele ngu liye pangavo yongo vowakami-a ira kalape.
8 Andimuwa kanosazi-eda isazo ya Yehova vokami-a muthu unoyo upangile chimo lilukulu. Mogwilizana na 2 Timoteyu 4:2, aliwa kanokambilana moleza murima vinjinji na muthu unoyo unavuteya m’murimani. Andimuwa anayo kana-arela likundo la valembali, thawi detene kanoesaesa viruni-a koma teto kami-a muthu ochimoyo ira akale na murima ofuna panga vyofwanelela. Ngati ndimuwa unatonyi-ede kumudwa kapena lunduwa vinokala vyorucha kami-a muthu ochimoyo ira alape.
9-10. Kodi andimuwa kanakami-e avi muthu unoyo upangile chimo ira aganizele vyevyo ukalile liye apanganga?
9 Andimuwa kanosaela vyevyo vyapangi-ile ira muthuyo apange chimo. Mwaisazo, kodi muthuyo oofooka chifukwa yoi oo-iya funjeda Baibulo vaeka kapena volowa muutumiki? Kodi kanapempela vakwikwi vakwikwi kapena unakeda pempela mwa mwambo? Kodi ukala akedanga landeya na vyevyo unalakalaka liye? Kodi ukala asakulanga molakweya athu owaledana kapena vyosangalasa? Kodi vyevyo unasakula liye vikuzile avi murimae? Kodi unoiziwa mwemo vyoira vyae vikalileathu vikuzanga Babae Yehova?
10 Andimuwa kafukanga vyofuka mwazelu kanokami-a muthu ochimoyo ira amasuwe koma teto aganizele vyevyo ukalile liye apanganga. (Miya. 20:5) Aliwa kanokoza indi-eda chito mafanizo vokami-a muthu ochimoyo ira aganizele vyevyo alakwi-ile liye ngati mwemo Natani apangile liye na Davide. Mwina va ulendo owambeela muthuyo unokoza vwa chisoni na vyevyo ukalile liye airanga moi unokoza lapa.
11. Kodi Yesu apanga avi vyongo na athu ochimwa?
11 Andimuwa kanoesaesa musazi-eda Yesu. Yesu angavenyi-iwe oowonga na Saulo wa wu Tariso moi oomufuka ira: “Chifukwa n’ni unandizuzumi-a?” Va Yesu oomukami-a ganizela vyongo vyolakweya vyevyo apanga liye. (Vyo. 9:3-6) Moi voonga vya muzimai Yezebeli, Yesu eere: “Ndimuva-a thawi ira alape.” — Chiv. 2:20, 21.
12-13. Kodi andimuwa kanapeleka avi thawi wa muthu ochimwa ira alape? (Onani teto ithuzithuzi.)
12 Vosazi-eda Yesu, andimuwa katinambaraanya ganiza ira muthu unoyo upangile chimo kanalape. Athu amo-i kanokoza tonyi-eda murima olapa va thawi yowambeela vevo kagumanileathu na komiti, koma amo-i vanolanda thawi. Eno andimuwa kanokoza vyoi kagumane na muthu ochimoyo maulendo angasene. Mwina vanduli vogumana nae va ulendo owambeela, Mkiristu unoyo upangile chimo unokoza ganizela vyevyo uwandeliwe liye. Unokoza pempela wa Yehova movievi-a. (Sal. 32:5; 38:18) Moi va ulendo o-arela unokoza kaana maganizo o-iyana na anayo an’na liye vowambeela.
13 Andimuwa kanotonyi-eda chifundo nooma murima ira kakami-e muthu ochimoyo ira alape. Aliwa kanopempela wa Yehova moi kanokaana idedi-edo yoi liye unodalisa tindi liwa vokami-a muthu ochimoyo ira azindikile vyevyo ulakwi-ile liye nolapa.— 2 Tim. 2:25, 26.
Andimuwa kanokoza gumana na muthu unoyo upangile chimo maulendo angasene vofuna muva-a m’pata ira alape (Onani ndima 12)
14. Kodi mbaani unoyo unafuneya lemekeziwa muthu ochimwa alapa? Pelekani chifukwa?
14 Vinokala vyosangalasa vinjinji muthu ochimwa alapa. Kodi vyera eno, mbaani unoyo uli ofwanelela lemekeziwa? Kodi mba andimuwa? Umbuwelani vyevyo Paulo alembile liye vyokuza athu ochimwa. Liye eere: “Mwina Mulungu unokoza alola lapa.” (2 Tim. 2:25) Muthu ochimwa achenja maganizo koma teto murimae, ofuneya lemekeziwa kai muthu uliwetene koma Yehova chifukwa ngu liye ukami-ile muthuyo ira achenje. Paulo oofotokoza teto vyongo vimo-i vyapama vyevyo vinaireya muthuyo alapa. Oofotokoza ira muthu ochimoyo unoiziwa choonadi molondola, unokaana zelu koma teto unovulumuwa umisampa da Mdyerekezi. — 2 Tim. 2:26.
15. Kodi andimuwa kanapange n’ni ira kapitilize kami-a muthu ochimwa unoyo ulapile?
15 Muthu ochimwa alapa, andimuwa anayo kali mukomiti ineyo yagumanile na muthuyo kanokoza maulendo aubusa nayolinga yoi kapitilize mukami-a pewa misampa da Satana koma teto ongola ndila dae. (Aheb. 12:12, 13) Andimuwa katinawandela athu amo-i vyotakala vyevyo ochimoyo apangile liye. Koma kodi pivyongo viivi vyevyo pingo unafuneyaathu iziwa?
“UWASUMULULENGA VAMASO VA ETENE”
16. Mogwilizana na 1 Timoteyu 5:20, kodi Paulo aonga vya mbaani vevo aongile liye ira “etene”?
16 Welengani 1 Timoteyu 5:20. Anala mba mawu anayo Paulo alembele liye Timoteyu unoyo ali ndimuwa fwae omuwandela vyofwanelela panga na “athu anayo kali na izolowezi yopanga machimo.” Kodi veva atapulela n’ni? Liye kaatapulela ira athu “etene” mupingo kafuneya iziwa vya khaniyo. Koma aonga vya athu oeva anayo kaiziwa wale vya khaniyo. Kanokoza kala athu anayo kaonile apanganga chimolo kapena anayo muthu ochimoyo aafotokozele liye. Andimuwa kanokoza afotokozela mwazelu ira khaniyo yoosamaleliwa moi muthu ochimoyo ukami-iwa.
17. Ngati chimo liiziweile mupingo kapena linokoza iziweya kodi vanafuneya pelekiwa ilengezo yoi avi, nanga chifukwa n’ni?
17 Koma thawi dimo-i vinakala ira chimolo liiziweya mupingo wetene kapena teto mwina linoza liiziweye. Vyera eno mawu oyi “etene” kanokoza tapulela pingo wetene. Eno ndimuwa unokoza lengeza wu pingo ira m’bali kapena murongola usumululiwa. Chifukwa n’ni vyevi vinafuneya ireya? Paulo oofotokoza ira: “Ira etene anayo kaove nayolinga oyi katipangenga machimo.
18. Kodi andimuwa kanakami-e avi a-ima obatiziwa kapanga chimo lilukulu? (Onani teto ithuzithuzi.)
18 Kodi andimuwa kanakami-e avi a-ima obatiziwa anayo katinakwakwani-e chaka 18 anayo kapangile chimo lilukulu? Bungwe la andimuwa linoza lipange vyoi andimuwa ambiili kagumane na mwanoyo limo-i na makolwae kapena athu amo-i anayo kanamuing’anela ngati kali Akiristu. Andimuwayo kanoza kasaele vyevyo makolwayo kapangileathu vokami-a mwanoyo ira alape. Ngati mwanoyo un’na maganizo apama moi makolwae kanomukami-a, andimuwayo kanokoza sakula ira khaniyo imalele vevo. Moi Mulungu oopeleka wa makolo udindo olangiza a-imiwa mwachikondi. (Doto. 6:6, 7; Miya. 6:20; 22:6; Aif. 6:2-4) Thawi dimo-i andimuwa kanokoza fukanga makolwayo ira kaiziwe ngati mwanoyo unakami-iwa mofwanelela. Koma bwanji ngati mwanoyo kanalapa moi unopitilizave panga vyotakala? Vyera eno komiti ya andimuwa inokoza vyoi igumane na mwanoyo limo-i na makolwae kapena anayo kanamuing’anela.
Mwana mung’onong’ono apanga chimo lilukulu, andimuwa ambin’li kanoza kagumane na liye limo-i na makolwae kapena anayo kanamuing’anela (Onani ndima 18)
“YEHOVA NGWACHIKONDI ILUKULU KOMA TETO WACHIFUNDO”
19. Kodi andimuwa kanamusazi-eda avi Yehova kakami-anga muthu unoyo upangile chimo?
19 Andimuwa anayo kali mukomiti kookana udindo vamaso va Yehova okami-a ira pingo ukale owela. (1 Akor. 5:7) Aliwa teto kanofuna kami-a athu ochimwa ira kalape ngati pivyowandeya. Ira vyevi viwandeye aliwa kanafuneya kala na maganizo apama, nodedi-edanga ira muthuyo unokoza chenja. Chifukwa n’ni? Chifukwa aliwa kanafuna sazi-eda Yehova unoyo ngwa“chikondi ilukulu koma teto wachifundo.” (Yak. 5:11) Namarumiwa Yohani naliyene oowomeliwa abali na arongolae. Liye oolemba ira: “A-imanga oowomeliwana, ndinaulembelani vyongovi ira kamupangenga machimo. Komave, m’mo-i apanga chimo, niikaana onikami-a olungama, Yesu Kiristu, unoyo un’na Ababa.” — 1 Yoh. 2:1.
20. Kodi ninaza nikambilane n’ni mu khani yo-arela
20 Pivyovwi-a chisoni ira thawi dimo-i Mkiristu kanafune lapa. Vyera eno unafuneya chosiwa mupingo. Kodi andimuwa kanasamalela avi khani ngati dedi? Ninokambilana vyevi mumbali yogomi-eda ya khani dedi.
NYIMBO 103 Abusa ndi Mphatso
a Mundulimu andimuwa anala karomoliwa ira komiti yoweluza. Koma voi weluza chi mbali imo-i ya chito dedo kana-indaathu, mawu anala kaninaa-indi-edenga chito. M’malomwiwa ninaongenga ira komiti ya andimuwa.
