1. Kodi lapa unatapulela n’ni?

 NAPANGA yongo imo-iwene yotakala, ninafuneya lapa. Baibulo linoniwandela ira muthu olapa unowambeela idana na vyotakala vyevyo upangile liyevyo, uno-iya vipanga koma teto unosimikiza m’murimani mwae ira kanaza avipanga nawili.— Onani Matapulelo a Mawu Amo-i, “Lapa.”

2. Chifukwa n’ni etene iyene ninafuneya funjeda vyokuza lapa? (Nehemiya 8:9-11)

² Muthu uliwetene unafuneya funjeda vyokuza lapa. Chifukwa n’ni? Chifukwa etene iyene ninochimwa dambo lililetene. Monga a-ima a Adamu na Hava, etene noolandela uchimo nokhwa. (Arom. 3:23; 5:12) Kavali muthu ookaana uchimo ngakale m’mo-i. Ngakale athu awale anayo kan’na iroromelo yolimba ngati namarumiwa Paulo, koolimbana teto na uchimo. (Arom. 7:21-24) Kodi vyevi vinatapulela ira thawi detene nikedenga kala okumudwa chifukwa ya machimwi-u? Naari, Yehova ngwachifundo moi unafuna ira nisangalalenga. Kaganizelani vyevyo vyaireele Ayuda amuthawi ya Nehemiya. (Welengani Nehemiya 8:9-11.) Yehova kaafuna ira aliwa kavivwelenga chisoni chifukwa ya machimo anayo kapangileathu munduli koma afuna ira aliwa kamulambelenga mosangalala. Yehova unoiziwa ira nalapa ninokala osangalala. Eno liye unonifunji-a vyokuza lapa. Nalapa machimwi-u, ninokala osimikiza ira Babi-u wachifundo unongonikululukela.

3. Kodi ninakambilana n’ni mukhanila?

³ Mukhanila ninokambilana mbali taaru dokuza lapa. Yowambeela, ninoona mwemo Yehova aafunji-ele liye Aizaraeli vyokuza khani inela. Era eno ninoona mwemo ukalile liye  akami-anga athu ochimwa ira kalape. Vomari-a ninokambilana mwemo Yesu aafunji-ele liye o-arelae vyokuza lapa.

VYEVYO YEHOVA AAFUNJI-ILE LIYE AIZARAELI VAKHANI YOKUZA LAPA

4. Kodi Yehova aafunji-ile n’ni Aizaraeli vakhani yokuza lapa?

⁴ Yehova angasakulile tundu wa Izaraeli, oopanga pangano na athwala moi aliwa koolonjeza ira kanongomuvwela. Kavwelanga malamulwae, liye oowateteza koma teto adalisa. Voonga vya malamulwayo, Yehova aongile ira: “Lamulo lelo ndinauva-ani miyo peenoli kai lorucha wanyo li-arela, moi kalili vandendai voi kamunawande lifwanya.” (Doto. 30:11, 16) Koma kakala ira katamuvwela, mwina vosakula lambela milungu dimo-i, liye oo-iya adalisa moi koogumana na mavuto. Ngakale vyali eno, vyali vyowandeya ira Mulungu aambeele nawili aomeliwana. Vyali vyowandeya teto ira aliwa ‘kawelele wa Yehova Mulungwiwa koma teto vwela Mawae.’ (Doto. 30:1-3, 17-20) M’mawu amo-i ninokoza onga ira vyali vyowandeya ira kalape. Moi Yehova ookoza kala vausamwali na aliwa nowambeela nawili adalisa.

5. Kodi Yehova atonyi-edile avi ira ooleza murima na athwae anayo kali oovwela? (2 Mamwene 17:13, 14)

⁵ Aizaraeli koomuchimwela Yehova moweli-edaweli-eda. Enjedela volambela mafano, aliwa koopanga teto makalelo amo-i otakala. Vyevi vyoopangi-a ira kagumanenga na mavuto. Koma Yehova kaagomile na atumikae oovwelala. Moweli-edaweli-eda, oowatumizela anamaongela nayolinga yoi kalape nowelela wa liye. — Welengani 2 Mamwene 17:13, 14.

6. Kodi Yehova a-indi-edile chito avi anamaongela vofunji-a athwae funeya olapa? (Onani teto ithuzithuzi.)

⁶ Thawi detene Yehova oo-indi-eda chito anamaongela vofuna chenjeza koma teto kami-a athwae ira kachenje. Mwaisazo, zela mwa Yeremiya Mulungu aongile ira: “Wela Izaraeli opanduwawe. Kandinaza ndiuing’ana molunduwa chifukwa miyo ndili ororomeleya. . . Kandinaza ndikala olunduwa mpakana walewale. Koma somedelani ira muli  ochimwa chifukwa mupanduwela Yehova.” (Yer. 3:12, 13) Zela mwa Yoweli, Yehova eere: “Welelani wa miyo na murima wetene.” (Yow. 2:12, 13) Oomuwandela teto Yesaya ira alengeze ira: “Viweli-eni. Chosani vyoira vinyu vyotakala vamaso vanga. Iyani panga vyotakala.” (Yes. 1:16-19) Koma teto zela mwa Ezekiyeli liye oofuka ira: “Kodi miyo ndinosangalala nokhwa wa muthu ochimwa? . . . Kodi vyevyo ndinafuna miyo kai vyoi muthu ochimoyo alape nopitiliza kala na moyo? Miyo kandinasangalala nokhwa wa muthu uliwetene, . . . Eno iyani panga vyongo vyotakala ira mupitilize kala na moyo.” (Ezek. 18:23, 32) Yehova unosangalala aona ira athu koolapa chifukwa liye unafuna ira aliwa kapitilize kala na moyo mpakana walewale. Koma Yehova kanakeda embekezela ira athu ochimwayo kachenje ekiwa, koma unowakami-a. Tiyemoni nione umboni wa vyevi.

7. Vo-indi-eda chito khani ya Hoseya na iyanae, kodi Yehova aafunji-ile n’ni athwae?

⁷ Konani vyevyo Yehova afunji-ile liye athwae vo-indi-eda chito isazo ya namaongela Hoseya na iyanae Gomeri. Gomeri oopanga igololo teto oomu-iya Hoseya nodowa wa lombwana m’mo-iwa. Kodi veva Mulungu oowambeela muona iyanola monga muthu oyi kanakoze chenja? Yehova unoyo unaiziwa vyevyo vili m’murimani mwa muthu oomuwandela Hoseya ira: “Dowa waambeele muomeliwana nawili iyana unoyo unamuomeliwana mulombwana m’mo-iwa, unoyo unapanga igololo. Wamuomeliwena ngati mwemo Yehova unaaomeliwana liye Aizaraeli ngakale ira aliwa kanolambela milungu dimo-i.” (Hos. 3:1; Miya. 16:2) Iziwani ira iyana wa Hoseya ali aana-iye panga chimo lilukulu. Koma Yehova oomuwandela Hoseya ira adowe wa iyanoyo nomukululukela koma teto mutukula monga iyanae. a Mofwanafwana na vyevi, Yehova kaa-iile aomeliwana athwae anayo kali oovwela. Ngakale ira aliwa koopanga machimo alukulualukulu, liye oowaomeliwanave koma teto oopitiliza akami-a ira kalape nochenja vyoira viwa. Kodi vyevi vinatapulela ira Yehova unoyo unaiziwa vya m’murimani, unokoza mukami-a muthu unoyo unapitiliza panga machimo alukulualukulu ira alape? (Miya. 17:3) Tiyemoni nione.

MWEMO YEHOVA UNAKAMI-ELA LIYE ATHU OCHIMWA IRA KALAPE

8. Kodi Yehova apangile n’ni vofuna kami-a Kaini ira alape? (Genesesi 4:3-7) (Onani teto ithuzithuzi.)

⁸ Kaini ali mwana owambeela wa Adamu na Hava. Liye ootukulela uchimo kumela wa makolwae. Voonga vya liye Baibulo linaonga ira: “Vyoira vyae vyali vyotakala.” (1 Yoh. 3:12) Mwina chi chifukwa iwa Yehova “kaasangalalile na Kaini koma teto sembae ngakale vang’ono.” M’malo mochenja vyoira vyae, “Kaini ootakaleliwa vinjinji moi kovae yali yolunduwa chifukwa ya chisoni.” Ndiye kodi vanduli viwa Yehova apangile n’ni? Liye oowonga na Kaini. (Welengani Genesesi 4:3-7.) Onani ira Yehova oowonga na Kaini mooma murima, oomuwandela ira unoza amudalise ngati unapange vyapama koma teto oomuchenjeza vyoopi-a wa chimo. Pivyovwi-a chisoni ira Kaini kaavwele. Liye kaalolile ira Yehova amukami-e ira alape. Ndiye kodi Kaini angakoondile vwela Yehova, Yehovoyo oo-iya kami-a athu amo-iwa ira kalape? Naari kaapangile eno.

9. Kodi Yehova amukami-ile avi Davide ira alape?

 ⁹ Yehova oomuomeliwana vinjinji Mwene Davide. Liye oofiya vomuromola ira “muthu wavamurimani vanga.” (Vyo. 13:22) Koma Davide oopanga machimo alukulualukulu monga panga igololo koma teto pha muthu. Mogwilizana na Ilamulo ya Mose, Davide afuneya phiwa. (Lev. 20:10; Num. 35:31) Koma mooma murima Yehova oomukami-a ira alape. b Liye oomutumizela namaongela Natani ngakale ira Davide ali aanatonyi-ede lapa. Natani oo-indi-eda chito fanizo lelo lamufiile vamurima Davide. Angazindikilile ira ukumudwi-a Yehova, Davide oolapa. (2 Sam. 12:1-14) Vanduli viwa oolemba salimo lotonyi-eda vivwela chisoni na vyevyo apangile liye. (Sal. 51, mawu avadimu) Salimoli likala limiyali-anga athu anjinji ochimwa koma teto alimbikisa ira kalape. Kodi kaninayamikela ira Yehova oomukami-a mtumikae Davide unoyo amuomeliwana liye ira alape?

10. Kodi munavwa avi mwaganizela vyoleza murima koma teto kululuka wa Yehova apanganga vyongo na athu ochimwa?

¹⁰ Yehova unoidana na chimo la tundu uliwetene. (Sal. 5:4, 5) Komave liye unoiziwa ira etene iyene nili ochimwa moi chifukwa yoi unoniomeliwana, unofuna nikami-a limbana na uchimoyo. Thawi detene unofunechecha kami-a ngakale athu ochimwa vinjinji ira kalape nokala vausamwali na liye. Vyevi pivyolimbikisa vinjinji. Naganizelanga leza murima koma teto kululuka wa Yehova, ninofunechecha kalave ororomeleya wa liye koma teto lapa mombaraanya nachimwa. Sopano tiyemoni nione mwemo Yesu aakami-ele liye ofunjedae iziwa vinjinji vakhani yokuza lapa.

VYEVYO OFUNJEDA A YESU KAFUNJEDILEATHU VYOKUZA LAPA

11-12. Kodi Yesu a-indi-edile chito fanizo liivi vofuna nikami-a iziwa ira Babae ngokozeya nikululukela? (Onani teto yavatakuru lowambeela.)

¹¹ Sopano thawi yoofiya vevo Mesiya aoneele liye. Monga naonele iyo mukhani ivirilele, Yehova oomu-indi-eda chito Yohani M’batizi  koma teto Yesu Kiristu vofunji-a athu funeya olapa. — Mat. 3:1, 2; 4:17.

¹² Angali vailambo yavati, Yesu oofunji-a athu ira Babae ngokozeya nikululukela nachimwa. Yesu oopanga vyevi vofotokoza fanizo la mwana ovolowela. Mwanoyo oosakula venya vande vamakolwae nodowa panganga vyongo vyotakala. Koma vanduli viwa “zelu ndingamuzele,” oowelela waniwa. Ndiye kodi ababae kapangile n’ni? Yesu aongile ira mwanoyo “angali vandendai, ababae koomuona moi koomupangela chifundo. Vanduli viwa koomutamangela nomukumbarela moi koomukisa mwachikondi.” Mwanoyo oowavepa ababayayo ira kamutukule ngati wachitwiwa, koma ababae koomuromola ira “mwananga,” tonyi-eda ira koomuonave ira ngu mwaniwa. Baboyo eere: “Oodimeela koma ufwanyeya.” (Luka 15:11-32) Mookaikela Yesu aanaze vailambwela, oowona Babae atonyi-edanga chifundo wa athu anjinji anayo kalapile. Fanizo la Yesu linonilimbikisa moi linonisimikizela ira Babi-u Yehova ngwachifundo.

13-14. Kodi namarumiwa Petulo afunjedile n’ni vyokuza lapa, nanga afunji-ile amo-i vyoi avi vakhanila? (Onani teto ithuzithuzi.)

¹³ Namarumiwa Petulo oofunjeda makundo ofuneya kumela wa Yesu vakhani yokuza lapa nokululuka. Thawi dinjinji Petulo oolakwi-a vyongo moi Yesu oomukululukela. Mwaisazo, liye angamukoondile Mbwiyae maulendo maralu, ookumudwa vinjinji. (Mat. 26:34, 35, 69-75) Koma Yesu angavenyi-iwe oowoneela wa Petulo mwina vathawi ineyo ali liye vaeka. (Luka 24:33, 34; 1 Akor. 15:3-5) Mookaikela vathawila, Yesu oomusimikizela namarumiwaela ira oomukululukela. — Maliko 16:7

¹⁴ Voi ooiziwa mwemo muthu unavwela liye alapa nokululukiwa, Petulo oofunji-a amo-i vyokuza khanila. Vathawi imo-iwa va phwando va Pentekosite, Petulo ookambela gulu la  Ayuda khani yofotokoza ira aliwa koomupha Mesiya. Koma mowaomeliwana liye oowalimbikisa ira: “Lapani notembenuwa ira machimwinyu kafafaniziwe, koma teto ira nyengo dosisimula dize kumela wa Yehova.” (Vyo. 3:14, 15, 17, 19) Va Petulo ootonyi-eda ira lapa unokami-a muthu ochimwa ira atembenuwe, tapulela ira a-iye vyotakala vyevyo aganiza liye kapena panga nowambeela panga vyapama vyevyo vinamusangalase Mulungu. Namarumiwola ootonyi-eda teto ira Yehova unokululuka na murima wetene, vyevyo vinakala ngati ufuta machimwayo. Vangavirile chaka dinjinji, Petulo oowasimikizela Akiristu ira: “Yehova . . . unaulezelani murima chifukwa kanafuna ira muthu uliwetene aze aonongiwe, koma unafuna ira athu etene kalape.” (2 Pe. 3:9) Pivyolimbikisa iziwa ira nalapa machimwi-u ngakale kangali alukulu, Yehova unonikululukela.

15-16. (a) Kodi Paulo afunjedile n’ni vyokuza kululuka? (1 Timoteyu 1:12-15) (b) Kodi ninaza nikambilana n’ni mukhani yo-arela?

¹⁵ Saulo wau Tariso oopanga vyotakala vinjinji moi afuneya lapa ira akululukiwe. Liye oozuzumi-a mwankhanza o-arela a Kiristu. Akiristu anjinji mwina kaganiza ira kavinawandeye ira liye alape nochenja. Koma Yesu ooiziwa ira Saulo unokoza chenja. Liye na Babae koowona makalelo apama anayo Saulo an’na liye. Yesu eere: “Muthula chi iwiya yanga yosakuliwa.” (Vyo. 9:15) Yesu oofiya vopanga vyodabwi-a vofuna mukami-a Saulo ira alape. (Vyo. 7:58–8:3; 9:1-9, 17-20) Angakalile Mkiristu, thawi dinjinji Saulo, unoyo vangavirile thawi aiziweya ira namarumiwa Paulo, ooyamikela mwemo Yehova na Yesu kamutonyi-edeleathu chifundo nooma murima. (Welengani 1 Timoteyu 1:12-15.) Namarumiwola aongile ira: “Mulungu unautonyi-eda oma murima wae ulukulu, . nayolinga yoi ulape.” — Arom. 2:4.

¹⁶ Kodi Paulo apangile n’ni angavwile vya chimo limo-i laigololo lelo laireile mupingo wau Korinto? Liye oosamalela khanila mundila ineyo inanifunji-a funeya otonyi-eda chifundo koma teto ira Yehova unonilangiza moniomeliwana nachimwa. Ninokambilana vinjinji mukhani yo-arela.