Namarumiwa Paulo oowalembela kalata Akiristu awu Tesalonika ira: “Ngati muthu m’mo-iwa kanavwela mawu anayo kali mukalatela, mu-eleni izindikilo.” (2 Ates. 3:14) Vowambeela naonga ira malangizo anala kanadowa wa andimuwa. Ngati muthu kana-arela makundo a m’Baibulo vanduli vova-iwa malangizo moweli-edaweli-eda, andimuwa koomu-ela izindikilo vokamba khani yochenjeza pingo. Vyera eno ofalisa etene koo-iya muwaledana.

Komave vanofuneya chenja mwemo nalivwela iyo lembali. Vinaoneya ira malangizo a Paulo a valemba leli kanaonga vyevyo Mkiristu uliwetene vaekave unafuneya liye panga mogwilizana na mwemo vyongo vililiathu. Eno kavali chifukwa yoi andimuwa kakambenga khani yochenjeza pingo. Chifukwa n’ni vali chenja wa mwemo nafotokozela iyo lemba leli? Tiyemoni nione vyevyo Paulo aonga liye vopeleka malangizo anala.

Paulo oozindikila ira athu amo-iwa mupingo ‘kooenda moolongosowa.’ Aliwa katafuna arela makundo ofwanyeya m’Mawu a Mulungu. Va ulendwae umo-iwa Paulo oopeleka malangizo oyi: “Ngati muthu m’mo-iwa kanafuna inda chito kadje.” Komave vookala athu amo-iwa anayo katafuna inda chito ira kafwanyenga vyongo vyofuneya vamoywiwa ngakale ira kookaana kopolo doi kookwakwani-a panga vyevyo. Koma teto aliwa koovolowela khani da athu amo-iwa. Kodi Akiristu kafuneya panga n’ni na athu anala? — 2 Ates. 3:6, 10-12.

Paulo aongile ira: “Mu-eleni izindikilo.” Mawu a Ikigiriki anayo ka-indi-ediwe chito valembali kanaonga panga vyongo mosamala na muthuyo. Paulo apelekile malangizo anala upingo wetene ookala wa andimuwa oka. (2 Ates. 1:1; 3:6) Eno Mkiristu uliwetene vaekave aona ira Mkiristu m’mo-iwa kana-arela malangizo a m’Malemba, unokoza ‘sakula iya gwilizana’ na muthuyo.

Kodi vyevi vinatapulela ira muthuyo aoniwa ngati ochosiwa? Naari, chifukwa Paulo ooenjedela onga ira: “Pitilizani mulangiza monga m’bali.” Eno vyali vyowandeya ira Mkiristu uliwetene aongi-anenga na muthuyo vamisonkano koma teto volowa muutumiki na muthuyo koma koopewa panga nae vyongo vimo-i monga vyosangalasa. Chifukwa n’ni? Paulo aongile ira: “Ira [muthuyo] anyaswe.” Mu-ela izindikilo oopangi-a ira muthuyo anyaswe nochenja ikalelo yae. — 2 Ates. 3:14, 15.

Kodi Akiristu kana-arele avi malangizwala? Yowambeela ninafuneya simikizela pamapama ira ikalelo ya muthuyo ‘kai yolongosowa’ mogwilizana na vyevyo Paulo aongile liye. Liye kaaonga vya athu anayo ninapangechana iyo vyongo mo-iyana vakhani ya ikumbumtima kapena vyevyo ninaomeliwana iyo. Teto veva kaaonga vya athu anayo kanikumudwi-ile. M’malomwiwa, Paulo aonga vya athu anayo kanasakula mwadala ira kativwelenga malangizo ovweya pama ofwanyeya m’Mawu a Mulungu.

Malambwano teto ngati nimuonile Mkiristu m’mo-iwa unoyo unatonyi-eda ira kanafuna vwela malangizo a Mulungu, a ninokoza sakula ira kaniwaledenga na muthuyo kapena panga vyosangalasa limo-i na liye. Voi uliwetene unafuneya sakula ekave vyoira, kaninafuneya kambilana na uliwetene unoyo kai muthu wa m’banja li-u vyokuza khanila. Koma ninokoza pitiliza panga vyongo limo-i na liye umisonkano na muutumiki. Muthuyo achenja ikalelweyo, ninokoza ambeela panga vyongo limo-i na liye ngati mwemo napangela iyo wale.