Wa thawi yokwaranya chaka, abali wu Beteli koo-inda chito yosaela malo oyi vaze vakale wailesi ya WBBR wu Staten Island, New York City. Kangakakatilevo mitengo vamalovo, koomanga nyumba yoi o-inda chito kakalengamo koma teto nyumba imo-i ira ikale youlusela mawu. Kangamari-ile inda chito inela, koowambeela sonkani-a vipangizo vyo-indi-eda chito “voulusa mawu.” Koma vookala mavuto angasene.

Chito yorucha vinjinji ineyo abalala ka-indileathu yali yopanga wailesi youlusela mawu. Kafuneya panga wailesi youlusela mawu yolapa mamita 91 umatabwa men’li olapa mamita 61. Ulendo owambeela unoyo kashishileathu panga vyevi koolepela. Koma chifukwa yodalila Yehova aliwa kookwakwani-a inda chito inela. M’bali Calvin Prosser, unoyo a-indilena chito inela aongile ira: “Aakale ira viwandeya ulendo owambeela nerenga vitama noonganga ira, ‘Konani vyevyo nikwakwani-ile iyo panga!’” Vyevi vyoopangi-a ira abalala kalemekeze Yehova. Koma mavutwiwa katamalele vevo.

Ulusa mawu vawailesila wali ungakede ambeeleya wene ndipo vipangizo vyoulusela mawu kavyafwanyeya wiliwili. Eno abali koogula tranzimita ineyo athu amo-i ka-indi-edaathu chito. M’malo mogula maikolofoni, aliwa ka-indi-eda chito yoongela va foni. Dambo limo-i ma-iyu mu Febuluwale, abali kooganiza vyoshishedela machini anayo kapangileathwala. Aliwa kafuneya kakaena pologalamu yoi kauluse, eno kooimba nyimbo da Umwene. M’bali Ernest Lowe unoumbuwela vyongo vyotei-a vyevyo vyaireile vevo abalala kaimbaathu. Aliwa koowachela foni kumela wa M’bali Rutherford, b  unoyo ali wu Brooklyn, unoyo wali ulendo wamakilomita 25. M’balila oovwa vawailesi vae vevo abalala kaimbaathu.

M’bali Rutherford angaimbile foniyo aongile ira: “Iyani vyevyo. Vinavweya ngati ula wa anapaka.” Abalayo koonyaswa notimi-a, koma kooiziwa ira kali okozeya ulusa mawu vawailesi.

Va 24 Febuluwale, vevo kaulusileathu ulendo owambeela mawu vawailesila, M’bali Rutherford oowonga ira wailesila yali yoi “itandizenga va vyongo vyokuza Umwene wa Mesiya.” Liye aongile ira: “Yolinga ya wailesila kutandiza athu vwechecha makundo a m’Baibulo okuza thawi ineyo ninakalamo iywela, mo-olandela vyevyo kanaroromelaathu kapena ipembezwiwa.”

Vyevyo vyaireile vadambo leli vyookaana vyo-arelavo vyapama. Wailesi ya WBBR yookala iulusanga mawu wa chaka 33 do-arela.

Mu Julayi 1924, Ofunjeda Baibulo kookaana sonkano wu Columbus wu Ohio. Alendo okumela m’madela o-iyana-iyana vailambo yetene, koovuruwana khani dedo dakambiwe mu Iyarabu, Ifulenchi, Ijeremani, Igiriki, Ihangare, Italiyana, Ilithuaniya, Ipolishi, Isikandinavia, koma teto Iyukireniya. Mbali dimo-i da pologalamwila dooulusiwa vawailesi koma teto vookoziwa vyoi munyuzipepala imo-i yamuilambweyo [Ohio State Journal] ilembenga vyevyo vyaireya vadambo lililetene la sonkanoyo.

Lachinayi va 24 Julayi, abali na arongola okwaranya 5 000 anayo kafwanyeile vasonkanola koolaleela mu mzinda unola. Aliwa koogawela mabuku otamangela 30 000 koma teto ambeeli-a maphuzilo a Baibulo anjinji. Sanja ya Olonda imo-iwa yaongile ira leli lali “dambo losangalasa vinjinji vasonkano unola.”

Yongo imo-i yavadela vasonkanola yaireile Lachisanu va 25 Julayi, vevo M’bali Rutherford awelengile liye molimba murima ilengezo ineyo yaruni-a asogoleli aipembezo. Liye aongile ira: “Asogoleli andale, aipembezo koma teto amalonda kooruni-a athu iziwa choonadi yokuza Umwene wa Mulungu unoyo unaze liye a-indi-ede chito vodalisa athu.” Oowonga teto ira: “Athwayo koolakwi-a vinjinji chifukwa katandiziwa na bungwe la League of Nations noonganga ira, ‘chindila ineyo Mulungu una-indi-eda liye chito volamulela ilambo yavati.’” Ofunjeda Baibulo kafuneya limba murima vinjinji ira kalaleele uthengola wa athu.

Vofotokoza vyasonkanola, khani imo-iwa ya mu Sanja ya Olonda yaongile ira: “Athu anayo kafwanyeile vasonkano wu Columbus koowelela waniwa  kangan’na iroromelo yolimba . . . , kataova iliyetene, ndipo kali okozeya laleela molimba murima ngakale karuni-iwenga.” M’bali Leo Claus, unoyo afwanyeile vasonkanoyo aongile ira: “Noowelela wani-u nangali okozeya gawela mapepala okaana uthenga unola wa athu amugawo li-u.”

Mu Okotobala, Ofunjeda Baibulo koowambe- ela inda chito yogawela mapepala mamiliyoni okaana uthenga unoyo M’bali Rutherford alengezile liye mukhanae. Mutaoni ya Cleveland wu Oklahoma, M’bali Frank Johnson oomari-a gawela mapepala mugawo lelo ava-iwe liye, unga-alile 20 minisi ira ofalisa afwae kaze kamutukule. Vowaembekezela afwae ira kaze kamutukule, kavyali vyoowandeya ira aimele vamalo ooneela chifukwa athu amutaoniyo anayo kali olunduwa chifukwa ya chito yolaleela kali kamusaelanga. Eno M’balila ooganiza vyovitaala muchalichi imo-iwene ineyo yali vakwikwi. Angafwanyile ira kamuli athu, liye oo-iya mapepalala m’ Baibulo la m’busa wa chalichiyo koma teto vapando uliwetene. Angapangile eno, liye ookuma mombaraanya. Voi thawi yali ingalivove oopanga teto chimozimozi dowa iya mapepalala m’machalichi amo-iwa men’li.

Vanduliviwa liye oodowa mombaraanya vamalo vevo kagwilizanileathu ira kagumane na ofalisa afwayale. Liye oovitaala useli wa malo oguli-ela makura a galimoto ira athu anayo kamusaelale katimuone. Athwayo koovira vamalovo kangali vagalimoto koma katamuonile. Athwayo kangavirile, ofalisa afwayale anayo kalaleela vakwikwi koofiya za mutukula vagalimoto.

M’bali m’mo-iwa aongile ira: “Nikumanga mutaoniyo” noovira “m’machalichi maralu anayo M’balila mwa-iile liye mapepalale. Va chalichi iliyetene noofwanya vangaimelile athu otamangela 50. Athu amo-i kali kawelenganga ipepaleyo koma amo-iwa kakede iimecha mudimu vomutonyi-eda m’busiwa. Noovenyamo mombaraanya mudelalo ira kanigumane na mavuto. Koma ninotokoza Yehova chifukwa yoniteteza koma teto niva-a zelu ira adani a Umwene katinilepeli-e gawela mapepalala.”

Muvilambo vimo-i, Ofunjeda Baibulo koolaleela molimba murima. Umpoto wailambo ya France, M’bali Józef Krett oolaleela wa athu okumela muilambo ya Poland wewo a-inda liye chito m’migodi. Vookoziwa vyoi liye akambe khani ya muru woi “Chineneeva okhwa kanoza kavenyi-iwe.” Abali na arongola kangagawele mapepala oitanela athu ira kaze kavuruwane khaniyo, wasembe m’mo-iwa oochenjeza athu amuchalichi mwae ira katidowewo. Koma kai vyevyo vyaireile. Athu okwaranya 5 000 koovuruwana khaniyo tangani-avo wasembeyo. M’bali Kreett oomuvepa wasembeyo ira afotokoze vyevyo unaroromela liye koma ookoonda. M’bali Krett oogawela athwayo mabuku etene anayo an’na liye angaonile ira aliwa kanofuna iziwa vinjinji vyokuza Mawu a Mulungu. — Amo. 8:11.

Wu Africa, M’bali Claude Brown ngunoyo adowile na uthenga wapama wu Gold Coast, wewo vano unaiziweya ira Ghana. Khani dedo akamba liye koma teto mabuku anayo agawela liye vyootandiza ira choonadi ifalikele mombaraanya muilambweyo. John Blankson, unoyo apanga maphuzilo okuzana na vyamirombwe oovuruwana imo-i mwa khani da Brown. Thawi ineyo oozindikila ira ufwanya choonadi. Liye aongile ira: “Choonadi yoondisangalasa vinjinji, moi ndoomuwandela uliwetene vya choonadiyo usukulu.”

Dambo limo-i John oodowa uchalichi ya Anglican ira adowe amufuke wasembe vyokuza Uralu chifukwa ali angavwechechile pama ira likundo leli kai la m’Malemba. Wasembeyo oomutamangi-a  amuwandelanga mokuwa ira: “Choka! Weyo kuli Mkiristu koma uli wa Mdyerekezi!”

Angafiile vande, John oomulembela kalata wasembeyo yomuvepa ira kadowe kakambilane vyokuza Uralu vagulu la athu. Wasembeyo oomusomeda vomuitani-a ira kadowe kagumane wu ofesi ya Mphunzisi mulukulu wavasukulu ya mirombwe wewo afunjedawo liye. Mphunzisi mulukuluyo oomufuka ngati amulembele kalata wasembeyo.

John oosomeda ira “Ee ndoolemba.”

Mphunzisiyo oomulamula John ira amulembele kalata wasembeyo yomupepesa. Ndiye John alembile ira:

“Aphunzisanga koondiwandela ira ndilembe kalata youpepesani ndipo miyo ndili okozeya lemba kalateyo ngati nyo munasomedele ira munafunji-a vyonama.”

Modabwa vinjinji Mphunzisiyo oomufuka John ira, “Blankson, vyoona vyevi pivyevyo unafuna we lemba?”

Liye oosomeda ira, “Ee pivyevyo ndinafuna miyo ndilembe.”

Mphunzisiyo oomuwandela ira: “Unochosiwa vasukulu vano, chifukwa kunakale vasukulwila nonyozanga wasembe wa chalichi ineyo chiyoiziweya na boma.”

Ndiye John oofuka ira: “Koma Aphunzisi, . . . mwanifunji-anga mukalasi, ndiye vakala makundo oyi kaninaavwechecha kodi kaninaufukani mafuso?”

Mphunzisiyo oosomeda ira, “Munofukecha.”

John oosomeda ira: “Vyevi pivyevyo vyaireile. Aliwale kafunji-a Baibulo ndiye miyo ndoowafuka fuso. Ndiye kangalepelile someda fusolo chifukwa n’ni ndinafuneya lemba kalata yopepesa?”

Vamapeto viwa, Blankson kaachosiwe vasukulwiyo ndipo kaalembile kalata yopepesa.

Vofotokoza vyevyo vyaireile mu chakela, Sanja ya Olonda imo-iwa yaongile ira: “Sopano ninokoza onga ngati Davide ira: “Nyo munoza mundiva-e kopolo ira ndikwakwani-e vaza kondo. Munoza mupangi-e ira adananga kagonje.” (Salimo 18:39) Vyevyo vyaireile muchaka inela pivyolimbikisa vinjinji chifukwa nikala nionanga ndanda la Mbwiye linitandizanga . . . Atumikae ororomeleya . . . kookala kapangelanga umboni mosangalala.”

Umapeto wa chaka ineyo, abali koopanga vyoi vakale wailesi imo-iwa youlusela mawu. Nyumba youlusela mawila yamangiwe wu Chicago. Wailesi ishela yaiziweya na zina loi MAWU. Wailesila yookaana vipangizo vyakopolo. Moi athu anayo kali undendai, ngakale umpoto wailambo ya Canada kookwakwani-a vuruwana uthenga wa Umwene.

Mu 1925, mooireya teto vyongo vimo-i vyosangalasa chifukwa Ofunjeda Baibulo koovwechecha pama makundo a mu Chivumbuluso chaputala 12. Wa athu amo-iwa, vyevi vyoopangi-a ira ka-iye tumikela Yehova. Koma anjinji koosangalala vwechecha makundo anayo kafunjedileathu, okuza vyevyo vyaireile udimu koma teto mwemo vyevyo vyakuzeleathu athu vailambwela.