KHANI YOFUNJEDA 43
NYIMBO 90 Tizilimbikitsana
Kodi Ninapange Avi Ira Ni-iye Kaikela?
“Mufufuzenga vyongo vyetene novisimikizela.” — 1 ATES. 5:21.
VYEVYO NINAFUNJEDE IYO
Mukhanila ninokambilana vyevyo ninapange iyo akala ninakaikela ngati Yehova unanikonda.
1-2. (a) Kodi atumiki a Yehova amo-iwa kanakaikela vyongo viivi? (b) Kodi ninakambilana n’ni mukhanila?
MUTHU uliwetene thawi dimo-i unokaikela a vyongo vimo-i. Mwaisazo, zombwe wa Mboni unokoza kaikelanga ngati Yehova unamukonda. Eno unokoza kaikelanga teto vyoi abatiziwe. Isazo imo-iwa inokoza kala ya baba unoyo asakulile angali zombwe ira atumikelenga Yehova m’malo mofwanya chito ya ndalama dinjinji. Vanduli vogumana na mavuto avyachuma, liye unokoza kaikelanga ngati asakulile pama. Kaganizelani vya murongola wachikulile unoyo kan’na kopolo dokwakwanela. Liye unokoza kumudwanga chifukwa yoi kanawande panga vinjinji ngati vowambeela. Kodi nyo moowambeela vifukavo fuso loi: ‘Kodi Yehova unondikonda? Kodi ndoopanga pama sakula ira ndimutumikelenga? Kodi liye unoona ira ndili ofuneyave mpakana vano?’
2 Ngati kaninafwanya mayankho a mafuso ngati anala, ninokoza iya muroromela Yehova ndipo mwina ninokoza iya mulambela. Mukhanila ninokambilana mwemo makundo a m’Baibulo kananitandizeleathu ngati ninakaikela vyoi (1) Yehova unonikonda, (2) ngati nasakulile pama, koma teto (3) ngati Yehova unaonave ira nili ofuneya.
VYEVYO NINAPANGE IYO IRA NI-IYE KAIKELA
3. Chin’ni inanitandize ngati ninakaikela vyongo vimo-i?
3 Ngati ninakaikela vyongo vimo-i, yongo ineyo inanitandize kuwelenga Mawu a Mulungu ira nifwanye mayankho a mafuso anayo nin’na iyo. Napanga eno ninoza nifwanye kopolo, ninoza nikale vausamwali wapama na Yehova koma teto ninoza nikale na iroromelo yolimba. — 1 Akor. 16:13.
4. Kodi ninapange avi ira ‘nifufuzenga vyongo vyetene novisimikizela?’ (1 Atesalonika 5:21)
4 Welengani 1 Atesalonika 5:21. Valembali, Baibulo linonisimikizela ira ‘nifufuzenga vyongo vyetene novisimikizela.’ Kodi ninapange avi vyevi? Ninafuneya simikizela ira vyevyo ninaroromela iyo pivyoona voerekezela na vyevyo Baibulo linaongaathu. Mwaisazo, nierekezele ira zombwe unakaikela vyoi Yehova unomukonda. Kodi liye unafuneya keda roromela ira Yehova kanamukonda? Naari, m’malomwiwa unafuneya fufuza maganizo a Yehova vakhaniyo ira asimikizele.
5. Kodi Yehova unanitandize avi ira nifwanye mayankho a mafuso anayo nin’na iyo?
5 Nawelenganga Mawu a Mulungu vinakala ngati ninaavuruwana vevo Yehova unaonga liye. Koma ninafuneya panga tindi ira nifwanye maganizwae va fuso lelo nin’na iyo. Nawelenganga, ninafuneya ganizela vinjinji vyevyo ninagumanana iyo vyevyo vinapangi-a ira nikaena nkhawa. Ninokoza fufuza vinjinji vakhaniyo vo-indi-eda chito vyongo vyotandiza vofunjeda vyevyo gulu la Yehova liniva-ileathu. (Miya. 2:3-6) Ninokoza muvepa Yehova ira anitandize vathawi ineyo ninafufuza iyo ira niiziwe maganizwae. Nera eno ninokoza fufuza makundo a m’Baibulo anayo kananitandize vakhaniyo. Ninokoza panga pama teto ganizela khani da m’Baibulo da athu anayo kagumanilevo na vuto lofwanafwana na lelo nin’na iyo.
6. Kodi misonkano dinanitandize avi ira ni-iye kaikela?
6 Vamisonkano di-u ninakalecha teto ira ninaamuvwa Yehova aonganga. Ngati thawi detene ninafwanyeya vamisonkano, ninokoza vwa likundo limo-iliwalene mukhani kapena mundemanga ineyo m’bali kapena murongola upelekile liye ineyo inanitandize ira ni-iye kaikela. (Miya. 27:17) Sopano tiyemoni nikambilane vyevyo ninapange iyo ira ni-iye kaikela va makundo maralu anayo nionile iyo mundima diviriledi.
MWAKAIKELANGA VYOI YEHOVA UNOUKONDANI
7. Kodi athu amo-iwa kanavifuka fuso liivi?
7 Kodi moowambeela vifukavo ira, ‘Kodi Yehova unondikonda?’ Ngati munaviona ira muli oofuneya, munokoza ganizanga ira kai vyowandeya ira mukale vausamwali na Mulengi wachilengedwe yetene. Mwina Davide ookaana teto maganizo anala. Oodabwa na likundo loi Yehova unopanga chidwi na athu moi aongile ira: “Nyo Yehova, muthu ngu mbaani ira mumuganizelenga, kodi mwana wa muthu ngu mbaani ira mumuwelengelenga?” (Sal. 144:3) Kodi ninafwanye waani yankho la fuso leli?
8. Mogwilizana na 1 Samuweli 16:6, 7, 10-12, kodi Yehova unaona n’ni mwa muthu?
8 Baibulo linotonyi-eda ira Yehova unoganizela athu anayo kanaoneya ngati oofuneya wa athu. Mwaisazo, Yehova oomuruma Samuweli ira adowe amuzoze m’mo-i mwa a-ima a Jese ira akale mwene wa Izaraeli. Jese oowaitana a-mae 7 ira kagumane na Samuweli koma kaamuitanile Davide, unoyo ali n’ng’onong’ono vinjinji. b Koma Davide ngunoyo Yehova amusakulile liye. (Welengani 1 Samuweli 16:6, 7, 10-12.) Yehova oowona vyevyo vyali m’murimani mwa Davide ndipo oozindikila ira liye ali muthu okonda Mulungu.
9. Chifukwa n’ni kamunafuneya kaikela ira Yehova unouganizelani? (Onani teto ithuzithuzi.)
9 Yehova utonyi-eda wan’le ira unouganizelani. Mwaisazo, unouva-ani malangizo ogwilizana na vyevyo munafuna nyo. (Sal. 32:8) Aakale ira kanauiziwani pama vyevi kavyawandeya. (Sal. 139:1) Mwaambeela indi-eda chito malangizo a Yehova koma teto ona mwemo kanautandizelaniathu, kamunakaikela ira Yehova unoukondani. (1 Lim. 28:9; Vyo. 17:26, 27) Yehova unoona vyetene vyevyo munapanga nyo ira mumutumikelenga. Unoona makalelo apama anayo mun’na nyo ndipo unofuna ira mukale fwae. (Yer. 17:10) Liye unafuna ira musomedele ira mukale fwae.— 1 Yoh. 4:19.
“Wamusaelasaela [Yehova] unoza alole ira umufwanye.” — 1 Lim. 28:9 (Onani ndima 9) c
MWAKAIKELANGA VYEVYO MWASAKULILE NYO
10. Kodi thawi dimo-i ninokoza kaikelanga n’ni naganizela vyevyo nasakulile iyo?
10 Mwina athu amo-iwa koosakula iya bizimezi kapena chito yapama nayolinga yoi kapangenga vinjinji votumikela Yehova. Moi vofiya vano vivira chaka dinjinji ndipo kanoona ira afwiwa anayo kasakulile vyongo vimo-i, katinagumana na mavuto avyachuma. Eno kanokoza ambeela kaikela ngati kasakulile pama va vyongo vimo-i. Mwina kanokoza vifukanga ira: ‘Kodi ndoosakula pama ira nditumikelenga Yehova, kapena ndootatila mwai?’
11. Kodi olemba Salimo 73 avuteya na maganizo aavi?
11 Ngati nanyen’ne teto mwavifukilevo mafuso ngati anala, isazo ya muthu unoyo alembile Salimo 73 inokoza utandizani. Liye oowambeela silila athu anayo kaoneya ira vyongo vinowaendela pama ndipo katakaana nkhawa. (Sal. 73:3-5, 12) Chifukwa yoganizela vyevi, akeda ona ira tumikela Yehova kutatila thawi. Maganizo anala koopangi-a ira avuteyenga dambo lililetene. (Sal. 73:13, 14) Ndiye kodi liye apangile n’ni?
12. Mogwilizana na Salimo 73:16-18, kodi chin’ni yamutandizile olemba Salimoli ira a-iye kaikela?
12 Welengani Salimo 73:16-18. Olemba Salimo leli oodowa vamalo ookala phokoso ukachisi wa Yehova. Angafiile wewo oowambeela ganiza pama. Liye oozindikila ira ngakale ira athu amo-iwa kaoneya ira vyongo vinowaendela pama, koma sogolo liwa kalali lapama. Angaganizele vyevi murimae ookala m’malo ndipo oowona ira oosakula pama ira atumikelenga Yehova. Vyevi vyoomuva-a kopolo ira apitilizenga tumikela Yehova. — Sal. 73:23-28.
13. Kodi munapange avi ira muriminyu ukale m’malo ngati munakaikela vyevyo mwasakulile nyo? (Onani teto ithuzithuzi.)
13 Kodi Mawu a Mulungu kanautandizeni avi ira muriminyu ukale m’malo? Muganizelenga vyongo vyapama vyevyo mufwanyile nyo. Mwaisazo, muerekezelenga madaliso anayo Yehova uulonjezileni liye na vyongo vyevyo ilambwela inauva-eniathu vathawiila. Athu amo-iwa anayo kanaoneya ngati vyongo vinowaendela pama kanokoza roromelanga vyongo vyevyo kakwakwani-ileathu fwanya muilambwela chifukwa yoi katin’na chiyembekezo iliyetene usogolo. Koma nyo, Yehova uulonjezani vyongo vyapama vinjinji kwaranya vyevyo munaviganizele nyo. (Sal. 145:16) Kaganizelani fuso li: Kodi ninokoza onga mosimikiza, mwemo moywi-u wakaleleathu aakale ira noosakula panga vyongo vimo-i m’malo mosakula tumikela Yehova? Munafuneya iziwa ira athu anayo kanasakula vyongo chifukwa yomukonda Mulungu na athu, thawi detene kanofwanyave vyongo vyowatandiza kala osangalala.
Muembekezelenga madaliso anayo Yehova unilonjezile liye (Onani ndima 13) d
NAKAIKELANGA VYOI YEHOVA UNOONAVE IRA NILI OFUNEYA
14. Chifukwa n’ni athu amo-iwa kanakaikela, nanga ti fuso liivi lelo linaavuti-a maganizo?
14 Atumiki amo-iwa a Yehova kanovuteya chifukwa ya marenda, ukalamba kapena mavuto amo-iwa okuza thanzi liwa. Vyevi vinokoza pangi-a ira aliwa kavikaikelenga ngati Yehova unaaonave ira mbofuneya vinjinji. Aliwa kanokoza vifukanga ira, ‘Kodi Yehova unoonave ira ndili ofuneya?’
15. Kodi olemba Salimo 71 kaakaikela vyan’ni?
15 Olemba Salimo 71 naliyene ookaikela ngati Yehova unamuona ira ngofuneya. Liye oopempela ira: “Kamundi-iye vathawi ineyo kopolo danga dimalileathu.” (Sal. 71:9, 18) Koma liye kaakaikela ira ngati unapitilize tumikela Mulungu mororomeleya, Yehova unoza amusogolele koma teto mutandiza. Olemba Salimo unola oozindikila ira Yehova unosangalala na athu anayo kanapitiliza mutumikela ngakale vathawi yoi katinawanda panga vinjinji. — Sal. 37:23-25.
16. Kodi achikulile mbofuneya wa Yehova mundila diivi? (Salimo 92:12-15)
16 Ngati muli wachikulile, munafuneya ganizela mwemo Yehova unauonelani liye. Ngakale ira kopolo dinyu dinoyeva, liye unokoza utandizani ira mukale akopolo mwauzimu. (Welengani Salimo 92:12-15.) M’malo moganizelanga vyongo vyoi kamunavikwakwani-a, muganizelenga vyevyo munavikwakwani-e nyo. Mwaisazo, vyevyo munapanga nyo koma teto muriminyu okonda athu, vinokoza limbikisa athu amo-iwa. Munokoza afotokozela amo-iwa mwemo Yehova ukalile liye autandizelangani wa chaka dinjinji koma teto malonjezo a m’Baibulo anayo munaembekezela nyo vinjinji. Kamukaikelenga ira mapempelwinyu okumela vati vamurima kanokoza tandiza athu amo-iwa. (1 Pe. 3:12) Kaya vyongo vili avi vamoywi-u, etene iyene ninokoza peleka yongo imo-iwene wa Yehova koma teto wa athu amo-iwa.
17. Chifukwa n’ni kaninafuneya vierekezela na athu amo-iwa?
17 Ngati munaona ira kamunapanga vinjinji votumikela Yehova, iziwani ira liye unoyamikela vinjinji vyevyo munakwakwani-a nyo panga. Thawi dimo-i munokoza ambeela erekezela vyevyo munapanga nyo na vyevyo athu amo-iwa kanapangaathu. Chifukwa n’ni munafuneya pewa vyevi? Chifukwa yoi Yehova kanauerekezelani na athu amo-iwa. (Agal. 6:4) Mwaisazo, Mariya oomuva-a Yesu mphaso yamakura antengo wavadimu. (Yoh. 12:3-5) Koma iyana m’mo-iwa wamasiye, oopeleka ukachisi ndalama mbin’li doyeva kopolo. (Luka 21:1-4) Koma Yesu oowona ira a-iyana etene anala kootonyi-eda iroromelo. Ndipo Babae Yehova, unoyamikela vyetene vyevyo munapanga nyo chifukwa yoi moovipeleka wa liye, ndipo munomukonda moi unoyamikela ngakale vikale vyoyeva vinjinji.
18. Chin’ni inanitandize ira ni-iye kaikela? (Onani teto bokosi loi “M awu a Yehova Kanokoza Nitandiza Ira Ni-iye Kaikela.”)
18 Etene iyene thawi dimo-i ninokaikela vyongo vimo-i. Koma mukhanila niona ira Mawu a Mulungu kanokoza nitandiza ira ni-iye kaikela. Eno mupangenga vyetene vyevyo munawande nyo ira mu-iye kaikela ndipo mwapanga eno muriminyu unoza ukale m’malo. Yehova unoona ira nyo vaekinyu muli ofuneya vinjinji. Liye unoyamikela vyetene vyevyo munapanga nyo ira mumutumikelenga ndipo unoza auva-eni mphoto. Kamukaikelenga ira Yehova unokonda koma teto ganizela atumikae etene ororomeleya.
NYIMBO 111 Tili ndi Zifukwa Zambiri Zokhalira Osangalala
a MATANTAUZO A MAWU AMO-IWA: Mukhanila ninakambilana vyokuza kaikela ngati Yehova unanikonda kapena teto ngati nasakulile pama. Kaninakambilana vyokuza kaikela wewo Baibulo linatonyi-edaathu ira nguumboni oyi kaninaroromela Yehova kapena malonjezwae.
b Baibulo kalinaniwandela chaka dedo Davide an’na liye vevo Yehova amusakulile liye, koma mwina ali aanakwakwani-e chaka 20. — Onani Nsanja ya Olonda ya September 1, 2011, takuru 29, ndima 2.
