Kodi thawi dimo-i vinouruchani umbuwela vyevyo mufunjedile nyo? Etene iyene vyevi vinoniireela thawi dimo-i. Ndiye kodi inanitandize chin’ni? Nifunjedenga moweli-edaweli-eda makundo alukulu.

Mwafunjedanga muimelenga vang’ono noona makundo ofuneya vinjinji. Isazo pivyevyo Paulo apangile liye votandiza athu ira kaone makundo alukulu alukulu amukalatae. Liye alembile ira: “Va vyevyo ninaonga iyovi likundo lilukulu ti loi.” (Aheb. 8:1) Mawu anala kootandiza athu anayo kawelenga kalatae, arela likundo liwa koma teto ona gwilizana vaari va makundo ang’onong’ono na muru wakhani.

Mwamari-a funjeda, munopanga pama kala na thawi yoganizela makundo alukulu anayo mufunjedile nyo, mwina wamaminisi 10. Ngati kamunaumbuwela, munokoza ona miru ding’onong’ono kapena viganizo vyowambeela vya ndima iliyetene. Mwafunjeda likundo lisha mushishenga lifotokoza m’mawu enyu enyu. Mwafunjedanga moweli-edaweli-eda makundo alukulu, munoza muwande umbuwela makundwayo koma teto ona mwemo kanautandizeleniathu va moywinyu.