KHANI YOFUNJEDA 42
NYIMBO 103 Abusa Ndi Mphatso
Muyamikelenga ‘Alombwana Anayo Yehova Univa-ile Liye Mupingo’
“Angagwelile vamalo avadimu . . . , oopeleka alombwana ira kakale mphaso.” — AIFE. 4:8.
VYEVYO NINAFUNJEDE IYO
Mukhanila ninoona mwemo atumiki otandiza, andimuwa koma teto oing’anela madela kananitandizelaathu. Ninokambilana teto vyevyo ninapange iyo ira niyamikelenga vyevyo kananipangelaathu.
1. Kodi ti mphaso diivi dedo Yehova univa-ile liye?
YESU ngova-a kwaranya muthu uliwetene. Angali vailambwela oo-indi-eda chito kopolo dedo an’na liye votandiza amo-i. (Luka 9:12-17) Liye ooniva-a mphaso ilukulu vinjinji vonikhwela. (Yoh. 15:13) Yesu ukala aniva-anga teto vyongo vinjinji kumela vevo avenyi-iwe liye nowelela udimu. Liye oolonjeza ira unoza avepe Babae ira aniva-e zimu owela ira unifunji-enga koma teto nilimbikisa ndipo pivyevyo upangile liye. (Yoh. 14:16, 17, mawu a mpedi.; 16:13) Unonifunji-a teto vo-indi-eda chito misonkano da pingo mwemo nina-indele iyo chito yofunji-a athu Baibulo ineyo inaireya vailambo yetene yavati. — Mat. 28:18-20.
2. Mogwilizana na Aifeso 4:7, 8 kodi mba alombwana aavi anayo kapelekiwe ira kakale “mphaso”?
2 Vikala teto mphaso imo-i ineyo Yesu aniva-ile liye. Mtumwi Paulo alembile ira Yesu angadowile udimu, “oopeleka alombwana ira kakale mphaso.” (Welengani Aifeso 4:7, 8.) Paulo oofotokoza ira liye oopeleka alombwana anala ira katandizenga mupingo. (Aife. 1:22, 23; 4:11-13) Malambwano, “Alombwana” anala kanotumikela monga atumiki otandiza, andimuwa koma teto oing’anela madela. a Alombwanala kai angwilo, eno kanolakwi-a vyongo vimo-i. (Yak. 3:2) Koma Mbwii-u Yesu Kiristu unowa-indi-edave chito ira kanitandizenga ndipo kali ngati mphaso dedo univa-ile liye.
3. Kodi ninatandize avi va chito ineyo “alombwanala” kana-indaathu?
3 Yesu oopeleka “alombwana” anala ira katandizenga athu mupingo. (Aife. 4:12) Koma etene iyene ninokoza atandiza va chitwiwa yofuneya inela. Mwaisazo, amo-i kanotandiza va chito domanga Nyumba da Umwene. Koma amo-i kanotandiza vopeleka yodja, maendelo koma teto vyongo vimo-i. Koma vyevyo etene iyene ninaonga iyo kapena panga vinokoza tandiza andimuwa mupingo koma teto oing’anela madela. Mukhanila ninokambilana mwemo ninapindulela iyo chifukwa ya chito ineyo alombwana anala kana-indaathu. Ninokambilana teto mwemo ninatonyi-edele iyo ira ninowayamikela koma teto ninomuyamikela Yesu.
CHITO DEDO ATUMIKI OTANDIZA KANA-INDAATHU
4. Kodi ti chito dimo-i diivi dedo atumiki otandiza ka-indaathu muthawi ya atumwi?
4 Muthawi ya atumwi, abali amo-i koo-eliwa kala atumiki otandiza. (1 Tim. 3:8) Mwina abali anala kali athu anayo kapanga utumiki otandiza, anayo Paulo aalembile liye. (1 Akor. 12:28) Mwina atumiki otandizala koo-inda chito dimo-i dofuneya nayolinga yoi andimuwa ka-elenga maganizwiwa va chito yofuneya yofunji-a noweta khosa. Mwaisazo, atumiki otandiza mwina kootandiza vokopela Malemba kapena gula vipangizo vyo-indela chitwela.
5. Kodi ti chito dimo-i diivi dedo atumiki otandiza kana-indaathu malambwano?
5 Kodi ti chito dimo-i diivi dedo atumiki otandiza kana-indaathu mupingo mwinyu? (1 Pe. 4:10) Aliwa kanosamalela ndalama dapingo, kapena ing’anela magawo, itani-a mabuku ira ofalisa kawachele, samalela vipangizo monga maikolofoni na vyooni-ela mavidiyo, wachela alendo vamisonkano kapena teto inda chito yosamalela va Nyumba ya Umwene. Chito detene dedi dinotandiza ira vyongo viendenga pama vapingo. (1 Akor. 14:40) Atumiki otandiza amo-i kanokamba khani vamisonkano da muwari mwa mulungu kapena teto khani da etene. Atumiki otandiza amo-i kanosakuliwa ira katandizenga abali anayo kanaing’anela magulu autumiki. Thawi dimo-i atumiki otandiza ofwanelela kanodowa na andimuwa umaulendo aubusa.
6. Chifukwa n’ni ninayamikela chito dedo atumiki otandiza kana-indaathu?
6 Kodi chito dedo atumiki otandiza kana-indaathu dinatandiza avi pingo? Murongola m’mo-i, wau Bolivia zina lae Beberly, b aongile ira: “Ndinosangalala na misonkano chifukwa ya chito ineyo atumiki otandiza kana-indaathu. Chifukwa ya chito diwa ndinowanda imba nyimbo, peleka ndemanga, vuruwana khani koma teto onela mavidiyo. Kanoonechecha ira nikale otetezeya koma teto kanotandiza athu anayo kalumikiziwe va vidiyokomfelensi. Misonkano damala kanosogolela va chito yosamalela mu Nyumba ya Umwene, kanosamalela ndalama da pingo koma teto kanoonechecha ira ninowachela mabuku. Ndinowayamikela vinjinji.” Leslie unoyo unakala wu Colombia ndipo mamunae ngu ndimuwa aongile ira: “Mamunanga unodalila atumiki otandiza ira a-inde chito do-iyana-iyana. Aakale ira kavali atumikala erenga tanganisiwa vinjinji. Eno ndinoyamikela vinjinji tindi liwa.” Mwina mu pumwemo nanyen’ne munavwela nyo. — 1 Tim. 3:13.
7. Kodi ninatonyi-ede avi ira ninoayamikela atumiki otandiza? (Onani teto ithuzithuzi.)
7 Ngakale ira m’murimani mwi-u ninokoza ayamikelanga atumiki otandiza, Baibulo linonilimbikisa ira: “Tonyi-edani ira muli oyamikela.” (Akol. 3:15) M’bali Cristovão unoyo ngu ndimuwa wu Finland oofotokoza vyevyo unapanga liye votonyi-eda yamikela. Liye aongile ira: “Ndinomulembelanga mtumiki otandiza kalata kapena meseji yokala na lemba lofotokoza mwemo undilimbikisele liye kapena teto chifukwa iwa ndinamuyamikela.” Pascal na iyanae Jael anayo kanakala wu New Caledonia kanopempelela atumiki otandiza. Pascal afotokozile ira: “Chineneeva, mapempelwi-u kookala katangani-angavo chondelela koma teto yamikela atumiki otandiza anayo kana-inda chito mwatindi mupingo mwi-u.” Yehova unovuruwana mapempelo anala ndipo vinotandiza pingo wetene. — 2 Akor. 1:11.
ANDIMUWA “KANO-INDA CHITO MWATINDI VAARI VINYU”
8. Chifukwa n’ni Paulo alembile ira andimuwa amuthawae ‘koo-inda chito mwantindi’? (1 Atesalonika 5:12, 13)
8 Muthawi ya atumwi, andimuwa koo-inda chito mwatindi ira katandize pingo. (Welengani 1 Atesalonika 5:12, 13; 1 Tim. 5:17) Aliwa koosogolela vyongo mupingo. Mwaisazo, koopangi-a misonkano koma teto sakula vyoira. Koova-a abali na arongola malangizo achikondi koma moovira m’mbali nayolinga yoi kateteze pingo. (1 Ates. 2:11, 12; 2 Tim. 4:2) Abali anala koo-inda chito nayolinga yoi kafwanyelenga mabanjiwa vyongo vyofuneya koma teto atandiza limbi-a usamwaliwa na Yehova. — 1 Tim. 3:2, 4; Tito 1:6-9.
9. Kodi ti chito dimo-i diivi dedo andimuwa kana-indaathu malambwano?
9 Andimuwa kanokala otanganisiwa vinjinji malambwano. Aliwa kano-inda chito yolaleela. (2 Tim. 4:5) Aliwa kanosogolela mwatindi chitwela, onechecha ira chitwela inoireya mugawo la pingwiwa koma teto nifunji-a ira ni-indenga pama chitwela. Aliwa kano-inda teto chito ngati oweluza achifundo koma teto ookaana sakulo. Mkiristu apanga chimo lilukulu, andimuwa kanomutandiza ira akoze nawili usamwalae na Yehova koma vathawi imo-ive ineyo, kanoonechecha ira pingo ukale owela. (1 Akor. 5:12, 13; Agal. 6:1) Andimuwa kanoiziweya ira mba abusa. (1 Pe. 5:1-3) Kanokozeela koma teto kamba khani vamisonkano, iziwa pama muthu uliwetene mupingo koma teto panga maulendo aubusa. Enjedela va chito dimo-i, andimuwa amo-i kanotandiza va chito domanga nosakaeda Nyumba da Umwene, kozeela misonkano dilukulu dilukulu koma teto kala m’Makomiti Oongi-ana na Achipatala koma teto Magulu Oendela Obulela. Andimuwa kano-inda chito mwatindi ira kanitandize.
10. Chifukwa n’ni ninaayamikela andimuwa atindi?
10 Yehova oowonga ira abusa kanoza kanisamalele pama nayolinga yoi ‘kaniovenga yongo.’ (Yer. 23:4) Murongola m’mo-iwa wau Finland zina lae Johanna oosimikizela mawu anala vathawi ineyo am’mae kabulelaathu vinjinji. Liye aongile ira: “Ngakale ira ndinovuteya fotokozela amo-i mwemo ndinavwela miyo, ndimuwa m’mo-i unoyo kandinamuiziwa pama oondilezela murima, pempela limo-i na miyo koma teto ndisimikizela ira Yehova unondiomeliwana. Kandinaumbuwela pamapama vyevyo aongile liye, koma ineyo ndinaumbuwela miyo choi ndoovivwa ira ndili otetezeya. Ndinororomela ira Yehova ngunoyo amurumile ira anditandize vathawi yofwanelela.” Kodi nyo, andimuwa amupingo mwinyu kautandizileni avi?
11. Kodi ninatonyi-ede avi ira ninolemekeza andimuwa? (Onani teto ithuzithuzi.)
11 Yehova unafuna ira niayamikelenga vinjinji andimuwa “chifukwa ya chito diwa.” (1 Ates. 5:12, 13) Henrietta, unoyo unakala wu Finland, aongile ira: “Andimuwa kanotandiza amo-i mofunechecha, koma kavinatantauza ira aliwa kanokala na thawi kapena kopolo davadela. Ndipo naaliwene kanogumana na mavuto vamoywiwa. Thawi dimo-i ndinakedecha awandela ira, ‘Kodi munoiziwa? Nyo muli ndimuwa wapama vinjinji, ndinafuna muiziwe vyevi.’” Murongola m’mo-iwa wau Türkiye c zina lae Sera aongile ira: “Limbikisa andimuwa uli ngati ‘ela’ makura mugalimoto ira ipitilize enda. Eno ninokoza alembela kalata, aitanela yodja kapena volowa na aliwa muutumiki.” Kodi vikala ndimuwa unoyo munayamikela nyo tindi lae? Musaelenga mipata domutonyi-eda ira munomuyamikela. — 1 Akor. 16:18.
Mwaalimbikisanga andimuwa vinakala ngati “munaenjedela” makura mugalimoto nayolinga yoi ipitilize enda (Onani ndima 7, 11, 15)
OING’ANELA MADELA KANOLIMBIKISA MIPINGO
12. Kodi mipingo dalimbikisiwa avi muthawi ya atumwi? (1 Atesalonika 2:7, 8)
12 Yesu Kiristu oopeleka andimuwa amo-i ngati mphaso ira katandizenga mipingo mundila dimo-i. Mosogoleliwa na Yesu, andimuwa awu Yelusalemu koomutumiza Paulo, Baranaba na amo-iwa monga oing’anela oendaenda. (Vyo. 11:22) Koopanga vyevi ira kalimbikisenga mipingo ngati mwemo andimuwa na atumiki otandiza kanapangelaathu malambwano. (Vyo. 15:40, 41) Alombwanala koololela iya vyongo vimo-i, ngakale teto ela moywiwa vangozi, nayolinga yoi kafunji-enga koma teto limbikisa afwiwa. — Welengani 1 Atesalonika 2:7, 8.
13. Kodi oing’anela madela kana-inda chito diivi?
13 Thawi dinjinji oing’anela madela kanakalecha kaendaendanga. Amo-iwa kanoenda makilomita anjinji ira kafiye umipingo dimo-i. Mulungu uliwetene, oing’anela madela kanokamba khani dingasidene koma teto panga maulendo aubusa. Kanopangi-a misonkano da apainiya, da andimuwa koma teto misonkano dokozeela utumiki. Kanotandizana na andimuwa vokozeela misonkano dadela na dachigawo koma teto kamba khani vamisonkano. Kanofunji-a sukulu da apainiya koma teto panga vyoi vakale sonkano wa apainiya amudela liwa ndipo thawi dimo-idiwa kano-inda chito dedo kava-iweathu na ofesi ya thambi.
14. Chifukwa n’ni ninaayamikela oing’anela madela atindi?
14 Kodi mipingo dinapindula avi na chito dedo oing’anela madela kana-indaathu? Voyamikela vyevyo oing’anela madela kanapangaathu, m’bali wau Türkiye aongile ira: “Oing’anela dela uliwetene afiya vinondilimbikisa ira nditandizenga abali na arongolanga. Ndigumanavo na oing’anela madela anjinji koma kalivo unoyo anditonyi-edile ira ngotanganisiwa vinjinji kapena oowaledeya.” Johanna, unoyo nimuromolile iyo walele ooenda muutumiki na oing’anela dela koma katafwanyile athu m’mawaniwa. Ngakale vyali eno, liye aongile ira: “Kandinadiwala vyevyo vyaireile dambo lelo. Adimbilanga kali kangakede tamawene ndiye ndooasauwela vinjinji. Oing’anela deloyo oondilimbikisa vondiwandela ira vano pivyorucha ira nikalenga na abali-u thawi detene. Koma muilambo isha ninoza nikalenga limo-i thawi detene.” Mofwanafwana na vyevi, athu anjinji kanowaomeliwana vinjinji oing’anela madela anayo kaaendelevo koma teto anayo kalimbikisilevo mundulimu. — Vyo. 20:37–21:1.
15. (a) Mogwilizana na 3 Yohani 5-8, kodi ninatonyi-ede avi ira ninoayamikela oing’anela madela? (Onani teto ithuzithuzi.) (b) Chifukwa n’ni ninafuneya ayamikelanga a-iyana a oing’anela madela, nanga ninapange avi vyevi? (Onani bokosi loi “ Muwaumbuwelenga A-iyaniwa.”)
15 Mtumwi Yohani oomulimbikisa Gayo ira aawachelenga pama abali oendaenda ndipo oomuwandela ira: “Athu anala kadowanga, uesaesenga atandiza mundila ineyo Mulungu unasangalalena liye.” (Welengani 3 Yohani 5-8.) Ndila imo-i ineyo ninapangele iyo vyevi kumuitanela oing’anela dela wani-u ira nidjele limo-i. Ndila imo-iwa kuvolowa muutumiki limo-i na pingo vevo unaaledela liye pingwi-u. Leslie, unoyo nimuromolile iyo walele unotonyi-eda teto yamikela mundila dimo-i. Liye aongile ira: “Ndinomuvepa Yehova ira aatandizenga fwanya vyofuneya vamoyo. Miyo na mamunanga ninowalembelecha makalata oawandela mwemo kanitandizeleathu.” Niumbuwelenga ira naaliwene teto oing’anela madela kanogoma koma teto kanogumana na mavuto. Thawi dimo-i kanobulela, kanokaana nkhawa kapena kumudwa. Eno mawu anayo munaonge nyo koma teto mphaso dedo munaava-e nyo vinokoza kala mayankho a mapempelwiwa. — Miya. 12:25.
NINAFUNEYA ALOMBWANA ANAYO KALI NGATI “MPHASO”
16. Mogwilizana na Miyambo 3:27, kodi abali kanafuneya vifuka mafuso aavi?
16 Vailambo yetene, vanofuneya abali oyi katumikelenga m’maudindo o-iyana-iyana. Ngati nyo muli m’bali obatiziwa, kodi ‘munokoza tandiza’ abali na arongola? (Welengani Miyambo 3:27.) Kodi munofuna mungali mtumiki otandiza? Kodi munokoza esaesa ira muwatumikelenga abalinyu monga ndimuwa? d Kodi munokoza chenja vyongo vimo-i nayolinga yoi mudowe mwavolowena Sukulu ya Akiristu Olaleela vya Umwene? Sukulu inela inokoza tandiza ira Yesu au-indi-edeni chito vinjinji. Ngati munaganiza ira muli oofwanelela, munafuneya ipempelela khanila wa Yehova. Mumuvepenga ira auva-eni zimu owela ira mu-indenga chito iliyetene ineyo muva-iwe nyo. — Luka 11:13; Vyo. 20:28.
17. Kodi vyevyo nikambilanile iyovi, vinaniwandela n’ni vyokuza Mweni-u Kiristu Yesu?
17 Vyevyo Yesu apangile liye vosakula “alombwana” amo-iwa ira katumikelenga mupingo nguumboni oyi unonisogolela m’malambo omari-ala. (Mat. 28:20) Ninoyamikela ira nikaana Mwene wachikondi, ova-a koma teto unoyo unaniganizela. Mwenola univa-a athu ofwanelela ira kanitandizenga. Eno tiyemoni nisaelenga mipata doi niayamikelenga abali atindala. Kwaranya vyetene, nimuyamikelenga Yehova, unoyo unaniva-a “mphaso iliyetene yapama na yangwilo ineyo inakumela udimu.” — Yak. 1:17.
NYIMBO 99 Abale Ambirimbiri
a Andimuwa anayo kanatumikela m’Bungwe Lolamulela, m’Makomiti Otandiza Bungwe Lolamulela, m’Makomiti a Thambi koma teto m’mautumiki amo-i, naaliwene ti “mphaso.”
b Mazina amo-i koochenjiwa.
c Vowambeela ilambwela yaromoliwa ira Turkey.
d Ira muiziwe vyevyo munapange nyo ira mukale mtumiki otandiza kapena ndimuwa, onani khani yoi “Kodi Munoesaesa Ira Mukale Mtumiki Otandiza?” koma teto “Kodi Munoesaesa Ira Mukale Ndimuwa?” mu Sanja ya Olonda ya Novembala 2024.
