1-2. Kodi lengiwa mundila yoi nisangalalenga chifukwa yova-a ookala wachela unanitandiza avi?

 YEHOVA anilengile mundila yoi nikalenga osangalala vinjinji nakala ova-a. (Vyo. 20:35) Komave kodi vyevi vinatantauza ira kaninakala osangalala nawachela yongo? Naari. Etene iyene ninoiziwa mwemo ninasangalalela iyo nawachela mphaso. Komave, ninosangalala vinjinji nava-a athu amo-iwa vyongo. Ndipo Yehova anilengile mundila inela ira vinitandizenga kala osangalala. Chifukwa n’ni ninaonga eno?

² Ndila ineyo Yehova anilengele liye inonitandiza ira niandenga enjedela imwemwi-u. Ninokoza enjedela imwemwi-u nafufuzanga mipata doi nipeleke vyongo wa athu amo-iwa. Onga vyoona, ndila ineyo Yehova anilengele liyela chiyapama vinjinji. — Sal. 139:14.

3. Chifukwa n’ni ninaonge ira Yehova ngu “Mulungu waimwemwe”?

³ Malemba kanonisimikizela ira va-a unonitandiza ira nikale osangalala, eno kai vyodabwi-a ira malembala kanofotokoza ira Yehova ngu “Mulungu waimwemwe.” (1 Tim. 1:11) Liye ngova-a mulukulu koma teto unoyo aambeeli-ile va-a. Mtumwi Paulo aongile ira chifukwa ya liye, “nikaana moyo, ninoenda ndipo nikalavo.” (Vyo. 17:28) Ndipo “mphaso iliyetene yapama na yangwilo” inakumela wa Yehova. — Yak. 1:17.

4. Chin’ni inanitandize ira nisangalalenga vinjinji?

⁴ Etene iyene ninofuna kala osangalala vinjinji chifukwa yova-a. Ira vyevi viwandeye, ninafuneya musazi-eda Yehova vakhani yova-a. (Aife. 5:1) Ninokambilana teto vyevyo ninapange iyo ngati athu amo-iwa katinayamikela vyevyo niava-ile iyo. Vyevi vinonitandiza ira nipitilize kala osangalala, mwina teto enjedela imwemwi-u chifukwa yova-a.

 NIMUSAZI-EDENGA YEHOVA VAKHANI YOVA-A

5. Kodi pivyongo vimo-i viivi vyevyo Yehova unaniva-a liye?

⁵ Kodi Yehova utonyi-edile mundila diivi ira ngova-a? Tiyemoni nikambilane vifukwa vingasi vyene. Yehova unoniva-a vyongo vyofuneya vamoyo. Pivyoona ira kaninakale na vyongo vyetene vyevyo ninalakalaka iyo. Koma Yehova unoniva-a vyongo vyofuneya vinjinji vamoyo. Mwaisazo, unoniva-a yodja, vyowara koma teto malo ogona. (Sal. 4:8; Mat. 6:31-33; 1 Tim. 6:6-8) Kodi Yehova unakeda niva-a vyongovi chifukwa yoi nguudindwae? Naari. Ndiye chifukwa n’ni unaniva-a vyongo vyevi?

6. Kodi ninafunjeda n’ni va Mateyu 6:25, 26?

⁶ Mwachidule ninokoza onga ira Yehova unoniva-a vyongo vyofuneya vamoyo chifukwa yoi unonikonda. Kaganizelani mawu anayo Yesu aongile liye va Mateyu 6:25, 26. (Welengani.) Yesu oofunji-a vo-indi-eda chito vyongo vyamuchilengedwe. Voonga vya mbalame, Yesu aongile ira: “Vale kadinafesa mbewu kapena anda kapena teto sunga yodja munyumba dosungelamo vyongo.” Vanduli viwa liye aongile ira: “Koma Babinyu waudimu unodidji-a.” Ndiye oofuka ira: “Kodi nyo kamuli antengo wavadimu kwaranya mbalame?” Veva likundo tiloi Yehova unoona ira atumikae mbantengo wavadimu kwaranya vinyama. Ndiye ngati Yehova unasamalela vinyama, kaninafuneya kaikela ira unoza teto anitandize fwanya vyongo vyofuneya. Liye uli ngati baba wachikondi unoyo unaesaesa fwanyela banja lae vyofuneya chifukwa ya chikondi. — Sal. 145:16; Mat. 6:32.

7. Kodi ninamusazi-ede avi Yehova vakhani yova-a? (Onani teto ithuzithuzi.)

⁷ Mofwanafwana na Yehova, na-iyene ninokoza va-a athu amo-iwa vyongo chifukwa yowakonda. Mwaisazo, kodi munomuiziwa Mkiristu m’mo-iwa unoyo unafuneya yodja kapena vyowara? Yehova unokoza u-indi-edani chito nyo ira mumutandize ira afwanye vyevyo unafuneya liye. Athu a Yehova kanoiziweya ira kanotandizana vaireya soka. Mwaisazo, vathawi ya mulili wa COVID-19, abali na arongola koopeleka yodja, vyowara koma teto vyongo vimo-i wa athu anayo kavuteya. Ndipo anjinji koopeleka ndalama dotandiza vachito yavailambo yetene. Vyevi vyootandiza ira gulu lipelekenga tandizo vailambo yetene. Abali na arongola koopanga vyongo mogwilizana na lemba la Aheberi 13:16, lelo lini: “Kamudiwale panga vyapama koma  teto gawela athu amo-iwa vyevyo mun’na nyo, chifukwa Mulungu unosangalala na sembe dedo.”

8. Kodi kopolo da Yehova dinanitandiza avi? (Afilipi 2:13)

⁸ Yehova unopeleka kopolo. Yehova ukaana kopolo dookaana malile, ndipo unosangalala peleka kopolo dae wa atumikae. (Welengani Afilipi 2:13.) Kodi moowambeela pempelavo ira Yehova auva-eni kopolo nayolinga yoi mukoonde maeselo kapena teto ira muvilele vuto lilukulu? Mwina teto moomuvepavo ira auva-eni kopolo doi muwande panga vyofuneya vadambo lelo. Ngati liye auva-ileni kopolo mungamuvepile, munokoza somedela vyevyo mtumwi Paulo alembile liye. Liye eere: “Va vyongo vyetene, ndinofwanya kopolo kumela wa Mulungu unoyo unandiva-a kopolo dedo ndinafuneya miyo.” — Afil. 4:13.

9. Kodi ninamusazi-ede avi Yehova votandiza amo-i na kopolo di-u? (Onani teto ithuzithuzi.)

⁹ Ngakale ira kanili angwilo, ninokoza musazi-eda Yehova votandiza amo-iwa na kopolo di-u. Pivyoona ira kaninawande muva-a muthu kopolo koma ninokoza indi-eda chito kopolo di-u ira niatandize. Mwaisazo, ngati vali Mkiristu unoyo uli wachikulile kapena unoyo unabulela, ninokoza mutandiza chito davande kapena dowa mugulela vyongo. Ngati ninakwakwani-e ninokoza indela limo-i chito yosamalela nosakaeda Nyumba ya Umwene. Na-indi-edanga chito kopolo di-u mundila dedi, ninotandiza amo-iwa anayo kanalambela Yehova.

10. Kodi ninalimbikise avi athu amo-i na mawi-u?

¹⁰ Muumbuwelenga ira mawu mbakopolo. Kodi vikala muthu m’mo-iwene unoyo munaiziwa nyo ira unokoza vivwa pama mungamuyamikele kumela vati vamurima? Kodi munomuiziwa muthu uliwetene unoyo unafuneya limbikisiwa? Ngati chi eno, munopanga pama onga na muthuyo. Munokoza panga vyevyo, vodowa ongi-ana na liye waniwa, muimbela foni, mulembela kalata, imelo kapena mulembela meseji. Yofuneya kai onga mwaluso vinjinji. Mawu oyeva koma okumela vati vamurima kanokoza mutandiza Mkiristu fwinyuyo ira akaleve ororomeleya kapena ira aambeele vivwa pama va mavuto anayo unagumanana liye. — Miya. 12:25; Aife. 4:29.

11. Kodi Yehova una-indi-eda chito avi zelu dae?

¹¹ Yehova unopeleka zelu. Yakobo alembile ira: “Ngati muthu unasauwela zelu, avepenga wa Mulungu ndipo unoza amuva-e, chifukwa liye unopeleka na murima wetene wa etene koma teto unopeleka mo-ofwanyela athu vifukwa.” (Yak. 1:5) Lembali linatonyi-eda ira Yehova kanakaamela zelu dae. Liye unodipeleka wa athu na murima wetene. Ndipo  lembali liongile ira Yehova apelekanga zelu, unopanga vyevi “mo-otonza” kapena ira “mo-ofwanyela athu vifukwa.” Liye kananipangi-a ira nivionenga ngati o-ofuneya chifukwa yoi nimuvepa ira anisogolele. Ndipo unonilimbikisa ira nimuvepenga zelu. — Miya. 2:1-6.

12. Kodi pivathawi iivi vevo ninaava-e iyo athu amo-iwa zelu?

¹² Kodi na-iyene ninokoza musazi-eda Yehova vakhani yova-a athu amo-iwa zelu? (Sal. 32:8) Athu a Yehova kanokaana mwai oinjiva ofunji-a amo-iwa vyevyo kanaiziwaathu. Mwaisazo, ninowafunji-a athu asha ira kaiziwe mwemo kanapangeathu ira kalaleelenga. Andimuwa mupingo kanotandiza moleza murima atumiki okami-a koma teto abali obadiziwa ira kasamalelenga pama maudindwiwa mupingo. Koma teto amo-iwa anayo kan’na luso lomanga kanofunji-a afwiwa ira ka-indengana chito domangamanga da gulu li-u.

13. Vofunji-a amo-i, kodi ninasazi-ede avi mwemo Yehova munapelekela liye zelu?

¹³ Athu anayo kanafunji-a afwiwa kanafuneya sazi-eda mwemo Yehova munapelekela liye zelu. Umbuwelani ira Yehova unopeleka zelu na murima wetene. Na-iyene naafunji-anga amo-iwa vyevyo ninaiziwa iyo, ninafuneya panga vyevyo na murima wetene. Kaniovenga funji-a amo-iwa voova ira kanoza kaniwake malo. Kai pama teto ganizanga ira, ‘Miyo ndafunjedile meka, naliyene teto afunjede ekave.’ Murima unoyo kai ofuneya vaari va athu a Mulungu. M’malomwiwa, ninopanga vyetene vyevyo ninawande iyo ira niafunji-e iliyetene ineyo ninaiziwa iyo. Nikalenga ngati ‘ninaava-a miyoyo di-u.’ (1 Ates. 2:8) Ninoembekezela ira “naaliwene teto kanoza kakale ofwanelela funji-a amo-iwa.” (2 Tim. 2:1, 2) Napanganga eno ninotandiza ira amo-iwa kakale ova-a namurima wetene koma teto kakale osangalala.

NGATI AMO-IWA KATINAYAMIKELA NAAVA-A VYONGO

14. Kodi athu amo-i kanapanga avi naava-a vyongo?

¹⁴ Napeleka vyongo simbwasimbwa wa abali na arongoli-u, thawi dinjinji kanoyamikela. Kanokoza nilembela kalata kapena niyamikela mundila imo-iwa. (Akol. 3:15) Muthu ayamikela eni vinonisangalasa vinjinji.

15. Kodi ninafuneya umbuwela n’ni ngati athu amo-i katiniyamikele?

¹⁵ Pivyoona ira kai thawi detene vevo athu kanayamikelaathu vyevyo nipangile iyo. Thawi dimo-i ninokoza peleka thawi, kopolo na vyongo vi-u koma vanduli viwa kala vyodabwi-a ona ira muthuyo kanayamikela vyevyo nimupangele iyo. Ngati vyevi vinaniireele, kodi ninapange avi ira kanilunduwe, koma nipitilizeve kala osangalala? Niumbuwelenga mawu amulemba lelo vakumele murula, la Vyoira 20:35. Kaninasangalala chifukwa ya vyevyo muthu unapanga liye namuva-a vyongo. Ninokoza sangalalangave ngakale akala ira muthuyo kanayamikela. Kodi chin’ni inanitandize? Tiyemoni nione vyongo vingasi vyene.

16. Kodi niganizelenga vyan’ni nava-anga athu amo-iwa vyongo?

¹⁶ Maganizwi-u kakalenga omusazi-eda Yehova. Liye unopeleka vyongo vyapama wa athu kaya aliwa kayamikele kapena katiyamikele. (Mat. 5:43-48) Yehova unolonjeza ira napelekanga vyongo “o-oembekezela wachela yongo iliyetene” ndiye kuti ‘mphoto ineyo ninaze iyo nifwanye chiilukulu.’ (Luka 6:35) Mawu oyi yongo “iliyetene” kanokoza tantauza teto vyevyo amo-iwa kanapangeathu votonyi-eda yamikela. Kaya kooniyamikela kapena naari, thawi detene Yehova unoza aniweli-ede chifukwa ya vyapama vyevyo ninapangela iyo amo-iwa koma teto chifukwa ‘yopeleka mosangalala.’ — Miya. 19:17; 2 Akor. 9:7.

17. Chin’ni inanitandize ira nikale na maganizo ofwanelela? (Luka 14:12-14)

 ¹⁷ Likundo lava Luka 14:12-14, linokoza nitandiza ira nikale na maganizo ofwanelela vopeleka vyongo. (Welengani.) Kai chimwa peleka vyongo wa athu oyi kanokoza teto zaniva-a vyongo usogolo. Koma bwanji ngati nizindikilile ira thawi dimo-i ninopeleka vyongo vofuna ira nize nifwanye yongo imo-iwene usogolo? Ninopanga pama esaesa panga vyevyo Yesu aongile liye. Ninokoza esaesa peleka vyongo wa muthu unoyo ninaiziwa iyo ira kananiva-e yongo. Napanga eno ninoza nisangalale chifukwa ninakala nimusazi-edanga Yehova. Maganizo anala kanokoza nitandiza ira nikaleve osangalala ngakale ira athu amo-iwa katinaniyamikela.

18. Kodi ninafuneya pewa panga n’ni?

¹⁸ Nipewenga kaikela vyolinga vya athu amo-iwa. (1 Akor. 13:7) Ngati muthu katonyi-edile yamikela vyevyo nimupangele iyo, ninokoza vifuka ira: ‘Kodi ngu muthu o-oyamikela, kapena ukede diwala yamikela?’ Mwina vikala vyongo vyevyo vipangi-ile ira kayamikele mundila ineyo naganizela iyo. Amo-iwa kanakalecha kayamikelanga m’murimani koma kanolepela tonyi-eda vamaso yamikelawo. Amo-iwa kanokoza panganga manyazi katandiziwa simbwasimbwa ngati mundulimu aliwa mbanayo katandiza athu amo-iwa. Kaya vyongo vili avi, chikondi chineyo inanitandize ira kanikaikelenga vyolinga vya Akiristu afwi-u ndipo ninopitilizave kala osangalala. — Aife. 4:2.

19-20. Kodi leza murima unanitandize avi napelekanga vyongo wa athu amo-iwa? (Onani teto ithuzithuzi.)

¹⁹ Mukalenga oleza murima. Vakhani yova-a na murima wetene, Mwene Solomo alembile ira: “Vocheda nkate vama-inje chifukwa vavira malambo anjinji unoza uufwanye.” (Nam. 11:1) Lembali linatonyi-eda ira athu amo-iwa kanokoza yamikela vyevyo niapangele iyo vavira thawi yolapa, kapena ira vavira “malambo anjinji.” Tiyemoni nikambilane isazo vakhanila.

²⁰ Chaka dinjinji mundulimu, iyana wa oing’anela dela m’mo-iwa ootumiza kalata  wa murongola m’mo-iwa unoyo ali angakede badiziwa wene yomulimbikisa ira akaleve ororomeleya. Vangavirile chaka 8, murongoloyo oomulembela kalata iyana wa oing’anela delole yomuwandela ira: “Ndiganizile vyoi ndiulembeleni kalatela ira ndiuwandeleni ira mukala munditandizanga wa chaka dinjinji, ngakale ira nyo kamunaiziwa.” Oopitiliza ira: “Uthenginyu wali olimbikisa, koma lemba lelo mwa-elilemo nyo ti lelo landifiile vamurima moi kandinadiwala.” a Angafotokozile mavuto anayo agumanilena liye, murongoloyo aongile ira: “Thawi dimo-i ndakeda funa ira ndi-iye iliyetene tangani-avo choonadi, koma lemba lelo mwa-elilemo nyo loondilimbikisa moi kandiwelele munduli.” Ooenjedela teto onga ira: “Va chaka 8 detene dedi, kavali yongo imo-iwa ineyo indilimbikisile vinjinji kwaranya lemba leli.” Iyana wa oing’anela deloyo oosangalala vinjinji wachela kalata inela ‘vangavirile malambo anjinji.’ Na-iyene ninokoza zayamikeliwa vangavirile thawi yolapa kumela vevo nimuva-ile iyo muthu m’mo-iwene vyongo.

21. Chifukwa n’ni munafunechecha pitiliza musazi-eda Yehova vakhani yova-a?

²¹ Mukhanila, niona ira Yehova oonilenga mundila yavadela. Ngakale ira ninosangalala nawachela, koma ninosangalala vinjinji nava-a athu amo-iwa vyongo. Ninovivwa pama natandiza Akiristu afwi-u ndipo ninosangalala kaniyamikela. Koma kaya muthu unoniyamikela kapena naari, iyo ninosangalala napanga vyongo vyofwanelela. Kamudiwalenga ira mwapeleka vyongo “Yehova unokoza uva-ani vinjinji kwaranya vyevyo.” (2 Lim. 25:9) Kaninapeleke vyongo kwaranya vyevyo Yehova unaniva-e liye. Ndipo kavali yongo yosangalasa ngati weli-ediwa vyongo na Yehova. Eno tiyemoni nipitilize musazi-eda Babi-u waudimu unoyo uli ova-a.