1-2. Kodi chin’ni inapangi-a ira atumiki a Mulungu kasangalalenga? (Yakobo 1:22-25)

 YEHOVA na Mwanae kanafuna ira nisangalalenga. Unoyo alembile Salimo 119:2 aongile ira: “Osangalala mba athu anayo kanasunga vikumbuso vyae, anayo kanamusaelasaela na murima wetene.” Yesu oowonga teto ira: “Osangalala mba athu anayo kanavwa mawu a Mulungu nowasunga.” — Luka 11:28.

² Chifukwa n’ni iyo anayo ninalambela Mulungu ninakala osangalala? Vikala vifukwa vinjinji, koma chifukwa imo-i chiyoi ninowelenga Mawu a Mulungu thawi detene ndipo ninoesaesa arela vyevyo ninafunjeda iyo. — Welengani Yakobo 1:22-25.

3. Kodi indi-eda chito vyevyo ninawelenga iyo m’Mawu a Mulungu unanitandiza avi?

³ ‘Panga vyevyo Mawu’ a Mulungu kanaongaathu unonitandiza mundila dinjinji. Yowambeela, napanganga vyevyo ninafunjeda iyo ninosangalasa Yehova. Ndipo naiziwa ira ninosangalasa Yehova ninosangalala vinjinji. (Nam. 12:13) Na-indi-edanga chito vyevyo ninafunjeda iyo m’Mawu a Mulungu ninokala na mabanja apama koma teto ninogwilizana na Akiristu afwi-u. Mwina nyo muona wan’le ira vyevi pivyoona. Enjedela vevo, ninopewa mavuto anayo athu anayo katina-arela makundo a Yehova kanagumananaathu. Ninogwilizana na vyevyo Mwene Davide aongile liye. Angaongile vya malamulo na vigamulo vya Yehova, oomari-a nyimbwae na mawu oyi: “Muthu osunga vigamulovyo unofwanya mphoto ilukulu.” — Sal. 19:7-11.

4. Chifukwa n’ni panga vyevyo Mawu a Mulungu kanaongaathu korucha?

 ⁴ Onga vyoona, panga vyevyo Mawu a Mulungu kanaongaathu kai okweya. Ngakale ira ninotanganisiwa, ninafuneya welenga koma teto funjeda Baibulo na yolinga yoi nivwechechenga vyevyo Yehova unafuna liye ira nipangenga. Tiyemoni nikambilane makundo amo-iwa anayo kananitandize ira niwelengenga Baibulo dambo lililetene. Ninoona teto vyevyo ninapange iyo ira niganizelenga vyevyo niwelengile iyo koma teto mwemo ninavi-indi-edele iyo chito vamoywi-u.

MUFWANYENGA THAWI YOWELENGA MAWU A MULUNGU

5. Kodi pivyongo vimo-i viivi vyevyo ninatanganisiwana iyo?

⁵ Athu a Yehova anjinji kanotanganisiwa. Thawi dinjinji ninakala nisamalelanga maudindwi-u mogwilizana na vyevyo Mawu a Mulungu kanaongaathu. Anjinji kano-inda chito na yolinga yoi kafwanyenga vyofuneya va moywiwa na wabanja liwa. (1 Tim. 5:8) Akiristu anjinji kanosamalela abaliwa okalamba kapena anayo kanabulela. Koma teto etene iyene ninofuneya thawi injinji yosamalela thanzi li-u. Enjedela va vyetene vyevi ninova-iwa vyoira upingo. Ndipo chito imo-iwa yofuneya vinjinji ineyo ninafuneya iyo inda chi yolaleela. Ndiye ngakale ira ninotanganisiwa eni, kodi ninapange avi ira nifwanyenga thawi yowelenga Baibulo, ganizela vyevyo niwelengile iyo koma teto vi-indi-edanga chito?

6. Kodi munapange avi ira muonenga ira welenga Baibulo kofuneya vinjinji? (Onani teto ithuzithuzi.)

⁶ Baibulo chi imo-i mwa vyongo ‘vyofuneya vinjinji’ wa iyo Akiristu, eno ninafuneya esaesa ira niliwelengenga. (Afil. 1:10) Voonga vya muthu osangalala, salimo lowambeela laongile ira: “Unoomeliwa vinjinji ilamulo ya Yehova, ndipo unoiwelenga noisinkhasinkha tana na ma-iyu.” (Sal. 1:1, 2) Vi vinatantauza ira ninafuneya fwanyanga thawi yowelenga Baibulo. Koma kodi thawi yapama yowelenga chiivi? Uliwetene unokoza sakula thawi ineyo ili yapama wa liye. Mwachidule, munokoza sakula thawi ineyo munakwakwani-e nyo welenganga thawi detene. M’bali m’mo-iwa  zina lae Victor aongile ira: “Miyo ndinoomeliwa welenga Baibulo mamawa. Ngakale ira kandinaomeliwa venya mamawa vinjinji, ndinoona ira vathawila vyosokoneza vinakala vyoyeva. Ndinokala cheru ndipo ndinowanda ela maganizwanga va vyevyo ndinawelenga miyo.” Kodi mu pumwemo teto nyo munaonelanyo? Munokoza vifuka ira, ‘Kodi thawi yapama wa miyo yoi ndiwelengenga Baibulo chiivi?’

MUGANIZELENGA VYEVYO MUWELENGILE NYO

7-8. Kodi chin’ni inanilepeli-e pindula na vyevyo niwelengile iyo? Pelekani isazo.

⁷ Onga vyoona, ninokoza welenga vyongo vinjinji koma lepela vivwechecha pamapama. Kodi moowelengavo khani imo-iwene koma vaanavire thawi yolapa nyo diwala vyevyo muwelengile nyo? Etene iyene vyevi vyooniireelavo. Pivyovwi-a chisoni ira vyevi vinokoza ireya teto vowelenga Baibulo. Mwina moosakula ira muwelengenga machaputala angasene va dambo. Akala chi eno moopanga pama. Ninafuneya kala na vyolinga noesaesanga vikwakwaneli-eda. (1 Akor. 9:26) Koma keda welenga Baibulo chichiyambi chabe ndipo chichiyambi yapama. Vanofuneya vinjinji ira nipindulenga nawelenganga Mawu a Mulungu.

⁸ Kaganizelani isazo ila: Vyomela vinjinji vinofuneya zongwe. Koma ngati zongwe oinjiva unarumbwe vathawi yoyeva, theya inokoza zaala na ma-inje. Vyera eno zongwe munjinji kanatandiza. Vanofuneya thawi injinji ira ma-inje kavolowe mutheya nosungeya ira vyomela vi-indi-ede chito. Na-iyene ninafuneya pewa welenga Baibulo motamanga vinjinji mpakana fiya volepela ganizela vyevyo niwelengile iyo, viumbuwela kapena teto lepela vi-indi-eda chito. — Yak. 1:24.

9. Kodi ninapange avi ngati niambeele izolowezi yowelenga Baibulo mombaraanya?

⁹ Kodi thawi dimo-i munoona ira munowelenga Baibulo mombaraanya vinjinji? Akala chi eno, kodi munafuneya panga n’ni? Munafuneya yevi-a liwilo. Muesaesenga ganizela vyevyo munawelenga nyo kapena ganizela vyevyo muwelengile nyo. Panga vyevi kai worucha.  Munokoza enjedela thawi ineyo munafunjeda nyo ira mufwanyenga thawi yoganizela vyevyo muwelengile nyo. Munokoza teto sakula ira muwelengenga mavesi oyeva no-indi-edanga chito thawi yo-aleyo ira muganizele vyevyo muwelengile nyo. Victor unoyo nimuromolile iyo umaambeelelo ule aongile ira: “Ndinakeda welenga wa thawi yoyeva mwina chaputala imo-i. Chifukwa yoi ndinawelenga mamawa vinjinji, dambo letene ndinoganizela vyevyo ndiwelengile miyo.” Kaya muna-arela ndila diivi, yofuneya vinjinji choi muwelengenga va liwilo lelo linautandizeni va vyevyo munawelenga nyo. — Sal. 119:97; Onani bokosi loi “ Mafuso Ofuneya Aganizela.”

10. Pelekani isazo yotonyi-eda mwemo muna-indi-edele nyo chito vyevyo muwelengile nyo. (1 Atesalonika 5:17, 18)

¹⁰ Kaya munawelenga Baibulo va thawi iivi kapena wathawi yolapa moi avi, muonechechenga ira munofwanya ndila yo-indi-eda chito vyevyo muwelengile nyo. Mwawelenga chigawo imo-iwene ya Mawu a Mulungu, muvifukenga ira, ‘Kodi ndina-indi-ede avi chito vyevi vathawiila kapena usogolo?’ Mwaisazo, nierekezele ira munawelenga Baibulo va 1 Atesalonika 5:17, 18. (Welengani.) Vanduli vowelenga mavesi men’li anala munokoza imela noganizela akala munapempela vakwikwi vakwikwi koma teto kumela vati vamurima. Munokoza ganizela teto vyevyo munayamikela nyo. Mwina munoganizela vyongo viraalu vyevyo Yehova uupangeleni liye ndipo munofuna muyamikela. Akala munapanga vyevi ngakale wa thawi yoyeva, munokoza pindula vinjinji mwapanganga vyevi dambo lililetene va mavesi a m’Baibulo anayo munawelenga nyo. Mwera eno munoza mukale muthu unoyo unapanga vyevyo Mawu kanaongaathu. Koma kodi munapange n’ni ngati munaona ira vikala ndila dinjinji dedo munafuneya nyo chenja?

MUKALENGA NA VYOLINGA VYEVYO MUNAVIKWAKWANELI-EDE NYO

11. Chin’ni ineyo inapangi-e ira thawi dimo-i nikumudwenga? Pelekani isazo.

¹¹ Thawi dimo-i mwawelenganga Baibulo munokoza kumudwa chifukwa yoona ira vikala vyongo vinjinji vyevyo munafuneya nyo chenja. Nierekezele ira peeno muwelenga Baibulo ndipo mufwanya malangizo okuza pewa sakulana. (Yak. 2:1-8) Ndiye munaganizela mwemo munapangela nyo vyongo na athu amo-iwa ndipo munaona ira munafuneya chenja. Va ndiye mupanga pama. Mecheloliwa muwelenga khani yotonyi-eda funeya oviruni-a voonga. Muzindikila ira thawi dimo-i kamunaonga pama. (Yak. 3:1-12) Ndiye munaganiza ira muongenga molimbikisa  thawi detene. Dambo lo-arela muwelenga m’Baibulo malangizo oyi mupewenga kala vausamwali na ilambwela. (Yak. 4:4-12) Muzindikila ira munafuneya sakula pama vyosangalasa. Vofiya dambo la 4 munokoza kumudwa mwaganizela injiva wa vyongo vyevyo munafuneya nyo chenja.

12. Chifukwa n’ni kamunafuneya kumudwa ngati vowelenga Baibulo munaona ira munafuneya chenja vyongo vimo-i? (Onani teto mawu a mpedi.)

¹² Ngati mufwanyile ira vikala vyongo vyevyo munafuneya nyo chenja kamukumudwenga. Unola ngu umboni oyi mukaana murima wapama. Muthu unoyo ngoviyevi-a koma teto oona murima, unowelenga Malemba na yolinga yoi aone vyongo vyevyo unafuneya liye chenja. a Umbuwelani teto ira wara “umuthu usha” kunamala. (Akol. 3:10) Kodi chin’ni inautandizeni panga vyevyo Mawu a Mulungu kanaongaathu?

13. Kodi munapange avi ira muzindikile vyolinga vyevyo munavikwakwaneli-ede nyo? (Onani teto ithuzithuzi.)

¹³ M’malo moesedela chenja vyongo vyetene vathawi imo-ive, musakulenga vyolinga vingasi vyene vyevyo munavikwakwaneli-ede nyo. (Miya. 11:2) Munokoza shisha panga vi: Mulembenga vyevyo munafuna nyo chenja ndipo era eno musakulenga yongo imo-i kapena vin’li vyevyo munaambeelele nyo no-iya vimo-iviwavyo ira muze muvipange vathawi imo-iwa. Ndiye kodi munaambeele na yolinga iivi?

14. Kodi munaambeele na vyolinga viivi?

¹⁴ Munokoza ambeela na yolinga ineyo munaona nyo ira chiyo-orucha ikwakwaneli-eda. Kapena munokoza ambeela na vyongo vyevyo munaona nyo ira munafuneya chenja vinjinji. Mwafwanya yolinga ineyo munafuna nyo  ikwakwaneli-eda mufufuzenga m’mabukwi-u, mwina vo-indi-eda chito Watch Tower Publications Index kapena Buku la Mboni da Yehova Losaelela Khani. Muipempelelenga yolinginyu ndipo mumuvepenga Yehova ira auva-eni “murima ofuna panga vyevyo unaomeliwana liye koma teto kopolo dopangela vyongovyo.” (Afil. 2:13) Era eno mu-indi-edenga chito vyevyo mufunjedile nyo. Mwaesaesa kwakwaneli-eda yolinga yowambeela vinoza viulimbikiseni ira muwambeele teto vwechecha vyongo vimo-i. Ndipo mwakwakwani-a chenja ikalelo imo-iwene, vinoza vikale vyo-orucha ira muchenje vyongo vimo-i.

MULOLENGA IRA MAWU A MULUNGU ‘KA-INDENGA CHITO MWA NYO’

15. Kodi athu a Yehova kana-iyana avi na athu amo-iwa anayo kanawelenga Baibulo? (1 Atesalonika 2:13)

¹⁵ Athu amo-i kanaonga ira koowelengavo Baibulo maulendo anjinji. Koma kodi kanororomela vyevyo linaongaathu? Kodi kano-indi-eda chito vyevyo kanawelengaathu koma teto lola ira vichenje moywiwa? Pivyovwi-a chisoni ira katinapanga eno. Vi pivyo-iyana vinjinji na vyevyo athu a Yehova kanapangaathu. Mofwanafwana na Akiristu amuthawi ya atumwi, ninoona Baibulo ‘mwemo lililiathu, monga mawu a Mulungu. — Welengani 1 Atesalonika 2:13.

16. Kodi chin’ni inanitandize ira nipangenga vyevyo Mawu a Mulungu kanaongaathu?

¹⁶ Kai thawi detene vevo welenga koma teto indi-eda chito vyevyo niwelengile iyo m’Mawu a Mulungu unakalaathu okweya. Thawi dimo-i vinokoza nirucha ira nifwanye yongo yoi niwelenge. Kapena ninokoza welenga mombaraanya vinjinji nolepela fwanya thawi yoganizela vyevyo niwelengile iyo. Mwina teto ninokoza kumudwa naganizela vyevyo ninafuneya iyo chenja. Eno kaya nyo munalimbana na vuto loi avi, iziwani ira munokoza kwakwani-a ligonji-a. Yehova unokoza utandizani. Eno tiyemoni nilole ira anitandize ira kanikale athu ovwa nodiwala koma anayo kanapanga vyevyo Mawu a Mulungu kanaongaathu. Kai vyoira fuka ira nawelenganga vinjinji koma teto indi-eda chito Mawu a Mulungu va moywi-u, pavevo teto ninakala iyo osangalala vinjinji. — Yak. 1:25.