Voi ofunjeda 70 anala katalivo vevo Yesu aambeeli-a liye mwambola, kaninafuneya ganiza ira liye kaasangalala na aliwa kapena teto ganizanga ira kali kangamutawile. Liye akeda funa ira akale na atumwae 12 ororomeleya oka vamwambola.

Yesu oosangalala na atumwi 12 koma teto ofunjeda 70 anala. Vowambeela Yesu oosakula alombwana 12 vaari va ofunjedae anjinji nowaromola ira atumwi. (Luka 6:12-16) Liye ali angali wu Galileya vevo “aasonkani-ile liye atumwi 12” ndipo “oowatumiza ira kadowe kalaleelenga vya Umwene wa Mulungu koma teto chili-a athu.” (Luka 9:1-6) Vanduliviwa angali wu Yudeya, Yesu “oosakula athu amo-i 70 nowatumiza ambin’li ambin’li.” (Luka 9:51; 10:1) Vinatonyi-eda ira Yesu ookaana athu omu-arela m’madela o-iyana-iyana wewo uthengae walaleiwaathu.

Ayuda anayo kakalile ofunjeda a Yesu vinaoneya ira chaka iliyetene koopangave Mwambo wa Pasika limo-i na mabanjiwa. (Ekis. 12:6-11, 17-20) Anga-alile vang’ono khwa, Yesu na atumwae koodowa wu Yelusalemu. Koma kaafunile ira ofunjedae etene okumela wu Yudeya, Galileya na Pereya kasonkhane vamo-i nopanga Pasika. Va vinaoneya ira Yesu afuna ira akede kala na atumwae vathawi inela. Liye ooawandela ira: “Ndiikala ndilakalakanga vinjinji ira ndidje Pasika unola limo-i na nyo nda-anambeele zuzuma.” — Luka 22:15.

Yesu ookaana chifukwa yapama yopangela vyevi. Liye ali anga-alile vang’ono khwa ngati “Mwanawakhosa wa Mulungu unoyo unachosa uchimo vailambo.” (Yoh. 1:29) Vyevi vyafuneya ira viireele wu Yelusalemu wewo wathawi yolapa Aizaraeli kapelekelaoathu sembe wa Mulungu. Khwa wa Yesu oomasula athu vinjinji kwaranya mwemo apangele liye mwanawakhosa unoyo mabanja a Izaraeli kamudjileathu vathawi ineyo kakumaathu wu Iguputo. (1 Akor. 5:7, 8) Vyevyo Yesu apangile liyevi vyootandiza atumwi 12 anala ira kakale maziko a pingo wa Ikiristu. (Aife. 2:20-22) Pivyopangi-a chidwi ira Yelusalemu zinda owela waudimu ookaana “mabwe omangela maziko okwakwana 12 ndipo vamabwevo voolembiwa mazina 12 a atumwi 12 a Mwanawakhosa.” (Chiv. 21:10-14) Eno atumwi ororomeleyala kookaana udindo ofuneya vinjinji vokwakwaneli-eda yolinga ya Mulungu. Ndiye pivyovweya ira Yesu afuna ira akede kala na atumwae va Pasikae omari-a koma teto vamwambo wa Yodja Yamazulo ya Mbwiye unoyo auambeeli-ile liye vanduliviwa.

Ofunjeda 70 limo-i na ofunjeda amo-iwa katalivo va yodja yamazulweyo limo-i na Yesu. Koma ofunjedae etene, anayo kapitilizile kala ororomeleya, koopindula na mwambo wa Yodja Yamazulo ya Mbwiye unoyo Yesu auambeeli-ile liye. Etene anayo vanduliviwa kaazoziwe, koovolowa mu pangano la Umwene lelo Yesu aawandelile liye atumwae ma-iyu anayo. — Luka 22:29, 30.