U Chala akasala abantu abaluko ulwa Abulahamu ukuba bantu bache sona akabapa indaghilo. Abantu banaba, akabitizya ukuti Izilayeli. Abaizilayeli bo bakiputagha mubwanaloli nu kukonka amazyu ghache. (Salimo 147.19, 20) U Chala akalondagha ukuti abantu abamaluko ghosi bize basayiwe ukwendela muba Izilayeli.—Belenga Imbombo 3.25.

 U Chala akasala Abaizilayeli ukuba bakaboni bache. Ulumbili lwabo lukulangizya ukuti abantu bakusayiwa nanti bakwivwila indaghilo izya Chala. (Ukukumbusya Indaghilo 4.6) Ukwendela mu Baizilayeli, abantu bakaba nu lusako ulwakumumanya u Chala uwabwanaloli.—Belenga Yesaya 43.10, 12.

 Bo akabalilo kendapo, Abaizilayeli bakatagha ulusako ulwakuba bantu ba Chala. Po u Yehova akasalilapo Abakilisitu ababwanaloli ukuba bantu bache. (Matayi 21.43; 23.37, 38) Abakilisitu ababwanaloli bakumubombela u Yehova ngati bakaboni bache.—Belenga Imbombo 15.14, 17.

 U Yesu akabatuma abamanyili bache ukuti babuke baye balumbilile ku bantu abamaluko ghosi nu kubavwa ukuba bamanyili bache. (Matayi 10.7, 11; 24.14; 28.19, 20) Imbombo iyi yapalamila ukuti yifike apenecho mu masiku aghabumalilo agha. Kabwandilo ukuti abantu abinji pa chisu chosi bakukolelana ukumwiputa u Yehova mubwanaloli. (Ubuvumbuli 7.9, 10) Abakilisitu ababwanaloli bali mu gulu lyoka ukuti bakazyannyanje sona nu kwavwana. Pa chisu chosi ichapasi, abene bakumanyila ifundo izya mu Bayibolo izyakuyana bulo pa nkomano zyabo.—Belenga Aba Hebeli 10.24, 25.

 M’ma 1870, abantu bamo bo Bakamanyilagha Ibayibolo bakanda ukubumanya ubwanaloli. Bakamanya ukuti u Yesu akababuzya abamanyili bache ukuti balumbililaye. Po bakanda ukulumbilila izya Bumbwene ubwa Chala pa chisu chosi. Mu 1931, bakanda ukumanyikwa ni zina ilyakuti Bakaboni ba Yehova.—Belenga Imbombo 1.8; 2.1, 4; 5.42.

 Kale kukaba abasongo bamo bo bakenelezyanga ivipanga ivya Bakilisitu pa chisu chosi ichapasi. Igulu ilyakwenelezya ili, likamanyagha ukuti u Yesu yo Mutu uwa chipanga. (Imbombo 16.4, 5) Umwakuyana bulo, bope Abakaboni ba Yehova pa chisu chosi bakutuliwa na Kagulu Akakwenelezya. Aba, bo basongo bo bakumanya ivyinji. Bakwenelezya mo imbombo yikwendela mu maofesi ghosi agha Bakaboni ba Yehova. Mu maofesi agha, bakusanuzya amabuku muvinenelo ivyakupululila 800 nu kughatumizya. Abasongo aba mu Kagulu Akakwenelezya bakughomya nu kwavwa ivipanga ivyakupululila 100,000 pa chisu chosi. Mu chipanga chilichosi muli abasongo bo beneleye. Abasongo aba bakupasikizya ing’ozi izya Chala.—Belenga 1 Pitala 5.2, 3.

 Abakaboni ba Yehova bakukolelana pakulumbilila amazyu amiza nu kubavwa abantu ukuti babe bamanyili. Ngati batumiwa, nuswe tukulumbilila amazyu agha Chala ku nyumba ni nyumba. (Imbombo 20.20) Sona tukumanyila na bantu bo bakulonda ukumanya ubwanaloli. Abakaboni ba Yehova te ligulu bulo, loli mbumba yo yili nu Baba weka uwalughano. Twe bakamu na bayemba bo bakupasikizannya. (2 Aba Tesalonika 1.3) Abakaboni ba Yehova bakukolelana pakumuhobosya u Chala nu kwavwa abamwabo, cho chifukwa mbumba iyakuhoboka nkani pa chisu chosi.—Belenga 1 Pitala 2.9; Imbombo 20.35.