Ubwene ubwa Chala liboma ilya kumwanya. Iboma ili likwiza ukwingila mumalo mwa maboma ghosi. U Chala akwiza ukubombezya iboma ili ukuti akwanilisye vyo akulonda kumwanya na pa chisu ichapasi. Inkani iyakunena izya Ubumwene ubwa Chala nyiza. Abantu bakulonda iboma ilyiza. Lunulu u Chala akwiza pakutupa iboma linili. Likwiza ukupangisya ukuti abantu babe bakukolelana pa chisu.—Belenga 1 Aba Kolinti 15.24; Matayi 6.9, 10; 24.14.

 U Yehova asalite Umwana wache, u Yesu Kilisitu ukuti abe we Mwene.—Belenga Ubuvumbuli 11.15.

 U Yesu abaghiye ukuba we Mwene chifukwa ichakuti wachisa sona te mulili. (Matayi 11.28-30) Ali na maka ghosi ukwavwa abantu chifukwa akwiza pakulaghila chisu uku ali kumwanya. Akati azyuka, akakwela kumwanya nu kwikala kunyobe iyandilo iya Yehova. Pabumalilo, u Chala akamupa amaka ukuti ande pakulaghila.—Belenga Aba Hebeli 10.12, 13.

 Akagulu aka bantu ‘abazelu’ kakwiza pakulaghila poka nu Yesu kumwanya. (Danieli 7.27) Abazelu ababwandilo ukusaliwa bakaba batumiwa aba Yesu. U Yehova achili akusala abazelu, abanavuli na bakolo abasubaliwa, mpaka akabalilo aka. Abantu aba bakuzyusyiwa nu mubili uwabuzimu ngati we Yesu.—Belenga Yohani 14.1-3; 1 Aba Kolinti 15.42-44.

  Ka kumwanya kukwiza ukubuka abantu balinga? U Yesu akakitizya ukuti “kamudimo akanandi.” (Luka 12.32) Bakwiza pakukwana 144,000. Bakwiza ukuba poka nu Yesu pakulaghila ichisu.—Belenga Ubuvumbuli 14.1.

 Ubumwene ubwa Chala bukanda ukulaghila mu 1914. a Bo u Yesu aba we Mwene, akamusumbila u Satana poka na bantumi bache ababibi pa chisu ichapasi. U Satana akizula nu bukali sona akanda pakuvulungannya ichisu chosi. (Ubuvumbuli 12.7-10, 12) Ukufuma po u Satana bakamutaghila pa chisu, intamyo zichili zikongelela. Inkondo, izala, imbina, nu tusenyenta, vyosi ivi vikulangizya ukuti Ubumwene ubwa Chala buli papipi pakwanda ukulaghila.—Belenga Luka 21.7, 10, 11, 31.

 Ubumwene ubwa Chala bukwavwa abantu abinji pa chisu chosi ukuba bakukolelana. Ivi vikubombiwa chifukwa icha mbombo iya bulumbilili. Abantu abinji bakwitikizya ukulaghiliwa nu Bumwene ubwa Chala. Po Bumwene ubwa Chala bukwiza pakunangannya ivintu ivibibi pa chisu ichapasi, abantu aba bakwiza pakufighililiwa. Pala mukulonda ukuti Ubumwene ubu bwize bubavwe, mubaghiye ukumwivwila u Yesu.—Belenga Ubuvumbuli 7.9, 14, 16, 17.

 Pa maka 1000, Ubumwene ubwa Chala bukwiza pakukwanilisya vyo u Chala akalondagha ukubombela abantu pabwandilo. Ichisu chosi chikwiza ukuba paladayiso. Pabumalilo nkani, u Yesu akwiza pakunyosya Ubumwene munyobe izya Wise. (1 Aba Kolinti 15.24-26) Alipo yumo yo mungalonda ukuti mumubuzyeko izya Bumwene ubwa Chala?—Belenga 2 Pitala 3.13.