U Yehova akabapa abantu ichisu ichapasi ukuti bikalaghemo. Abantu ababwandilo, u Adamu nu Eva, batakapeliwa ukuti bikalaghe kumwanya, chifukwa u Chala akaba ukuti apelite kale abantumi kumwanya. (Yuda 6) U Chala akamubika mumughunda uwiza nkani uwa Edeni. (Ubwandilo 2.15-17) U Yehova akamupa ubumi ubwiza ukuti ize ahobokaghe na bana bache bwila na bwila pa chisu ichapasi.—Belenga 1 Yohani 2.17; Imbombo 17.26a.

 Pabwandilo, u paladayiso ghukaba mughunda wa Edeni. Abantu babwandilo bakalondiwanga ukupapa abana ukuti bizuzye ichisu chapasi nukuchikuzya ukuba we paladayiso. (Ubwandilo 1.28) Ichisu chitalikomanika lumo. Chikapeliwa ukuti abantu bikalaghemo bwila na bwila.—Belenga Salimo 104.5.

 U Yehova akabasamazya u Adamu nu Eva mu mughunda wa Edeni chifukwa batakamwivwila. U Paladayiso akamala. Patalipo nayumo yo angamunyosezyapo. Ibayibolo likuti ichisu ichapasi chikulaghiliwa na bantu ababibi.—Jobu 9.24.—Belenga Ubwandilo 3.23, 24.

 Ka u Chala alekite ukwinong’onela izya kunyosezyapo u paladayiso? Awe! Atangapotwa chifukwa wamaka ghosi. (Yesaya 45.18) Abantu bakwiza pakwikala pa chisu ichapasi ukuyana namo u Chala akalondelagha pabwandilo.—Belenga Salimo 37.11, 34; Aba Loma 8.21.

 Pakuba we Mwene, u Yesu akwiza pakunyosezyapo u paladayiso pa chisu. Pa nkondo iya Alamagedoni, u Yesu akwiza pakubalongozya abantumi pakughogha bosi bo bakususannya nu  Chala. Pisinda pache, u Yesu akwiza pakumupinya u Satana amaka 1,000. Abantu ba Chala batakwiza pakughoghiwa chifukwa u Yesu akwiza pakubalongozya nu kubafighilila. Bakwiza pakuhoboka mu paladayiso bwila na bwila.—Belenga Ubuvumbuli 20.1-3; 21.3, 4.

 Kabalilo buli ko u Chala akwiza pakufumyapo ivintu ivibibi pa chisu? U Yesu akanena ‘vyo vikwiza pakuboneka’ ukulangizya ukuti ubumalilo buli papipi. Ivintu vyo vikubombiwa akabalilo kano vikubika ubumi ubwa bantu pangozi sona vikulangizya ukuti ‘ubumalilo’ buli papipi nkani.—Belenga Matayi 24.3, 7-14, 21, 22.

 Intamyo zyosi zikwiza pakumala mu bulaghili ubwa Yesu ubwamaka 1,000. (Yesaya 9.6, 7; 11.9) U Yesu akwiza ukuba ni mbombo zibili. Akwiza ukuba we Mwene sona akwiza ukuba Muputi Usongo nkani. Pakuba Muputi Usongo nkani, bo bamughanite u Chala akwiza pakubahobokela imbibi zyabo. Ukwendela mwa Yesu, u Chala akwiza pakupyela imbina, ubugosi, nu bufwe.—Belenga Yesaya 33.24; Ubuvumbuli 21.4.

 Abantu bo bakumwivwila u Chala bakwiza pakwikala mu Paladayiso. (1 Yohani 2.17) U Yesu akatuma abamanyili bache ukuti baye balonde abantu abakwiyisya nu kubamanyisya ukuti babe bakwitikiziwa kwa Chala. Pakabalilo kano, u Yehova akumanyisya abantu amamiliyoni aminji mo bangiza bikalile mu Paladayiso. (Zefaniya 2.3) Mu Nyumba izya Bumwene izya Bakaboni ba Yehova, abantu bakumanyila mo bangabela abalume, abababa, abachi sona na bamama abiza. Abana na bapapi bakwiputila poka sona bakumanyila mo amazyu amiza ghangabavwizya.—Belenga Ubuvumbuli 15.4.