U Chala uwa bwanaloli we yo akapela ivintu vyosi. Ate nu bwandilo sona nu bumalilo. (1 Timoti 1.17) Mwenecho uwa mazyu amiza agha mu Bayibolo. (1 Timoti 1.11) Tubaghiye ukumwiputa u Chala weka chifukwa we yo akatupa ubumi.—Belenga Ubuvumbuli 4.11.

 U Chala muzimu. Patalipo nayumo umuntu yo amwenizyepo. Ichi chikulangizya ukuti wapamwanya nkani ukuchila ichipeliwa chosi cho chilipo pa chisu ichapasi. (Yohani 1.18; 4.24) Loli tungamumanya ukwendela mu vintu vyo apelite. U Chala akapela amakwi aghavikomwa na maluba aghakupambanapambana ukulangizya ukuti walughano sona wamahala. Ivipeliwa ivya kumwanya ni vyapasi vikulangizya ukuti ali na maka nkani.—Belenga Aba Loma 1.20.

 Tungamanyila inkalo izyamwabo izya Chala pala tukubelenga Ibayibolo. Tungamanyila vyo u Chala avighanite na vyo avibengite, mo akubombela na bantu, na mo akwiyivwila ukuyana na mo twabombela.—Belenga 1 Yohani 4.8; Yakobo 4.6.

 U Yesu akati: ‘Tata witu uwa kumwanya; izina lyako lichindikiwanje.’ (Matayi 6.9) Napo u Chala ali na mapalo aminji, loli ali ni zina lyoka. Muvinenelo ivinji likwitiziwa umwakupambanapambana. Mu Chilambya likwitiziwa ukuti “Yehova.” Loli abantu bamo bakumwitizya ukuti “Yawe.”—Belenga Salimo 83.18, nwt.

 Mu Mabayibolo aminji bafumizyemo izina ilya Chala nu kubikamo amapalo aghakuti Umwene pamo u Chala. Loli po Ibayibolo likasimbiwanga, izina ilya Chala likaghiwanga mu  malo aghakukwana 7,000. Po u Yesu akamanyisyanga, akavumbulagha izina lya Chala ku bantu.—Belenga Yohani 17.26.

 Twebantu tukukomana ni ntamyo. Ka ichi chikulangizya ukuti u Chala atakutupasikizya? Abantu bamo bakuti u Chala weyo ukupangisya intamyo ukuti atuyele, loli ubu te bwanaloli.—Belenga Yakobo 1.13.

 U Chala atupiye ubwabuke ubwakusala. Ichi chikulangizya ukuti akwinong’onela umuntu wesi pamwene. Tukupalizya ukuti u Chala atupiye ubwabuke ubu. (Yoswa 24.15) Abantu abinji bakusala ukubabombela abamwabo ivintu ivibibi, cho chifukwa abantu abinji bakutamiwa. U Yehova vikumubaba pakwennya vinivi.—Belenga 1 Pitala 5.7.

 U Yehova we Chala yo akutupasikizya. Akulonda ukuti tuhobokaghe. Lunulu akwiza pakufumyapo intamyo na bo bakupangisya. Pali chifukwa cho itikizizye ukuti intamyo zibepo pakabalilo akanandi. Umutu 8 ghukwiza pakutumanyisya ichifukwa chinichi.—Belenga 2 Pitala 2.9; 3.7, 13.

 U Yehova akutulaba ukuti tupalamile kukwache ukwendela mu lwiputo. Akwinong’onela aliwesi pamwene. (Salimo 65.2; 145.18) U Chala waluhobokelo. Akwennya pala tukuyezyayezya ukumuhobosya, napo mu vimo tukupotwa. Tungapalamila kwa Chala napo swe banazi.—Belenga 1 Yohani 1.9; Yakobo 4.8.

 Pakuti u Yehova atupile ubumi, tubaghiye ukumughana ukuchila umuntu aliwesi. (Maliko 12.30) Pala tukumanyila ivya Chala nu kubomba vyo akulonda tukulangizya ukuti tumughanite. Ivi vikutwavwa ukuti ubumanyani bwitu nu Chala bughome.—Belenga 1 Timoti 2.4; 1 Yohani 5.3.