U Yesu apambanite nu muntu aliwesi. Bo atizite pa chisu ichapasi, akaba wantumi kumwanya. Weyo akaba wabwandilo ukupeliwa nu Chala. (Yohani 8.23) Akamwavwanga u Chala pakupela ivintu ivyamwabo vyosi. U Yesu mwene weyo akapeliwa nu Yehova, cho chifukwa akwitizyiwa ukuti “Mwana mwene na mwene uwa Wise.” (Yohani 1.14) Akanenagha mumalo agha Chala, cho chifukwa akwitizyiwa ukuti we “Mazyu.”—Belenga Isya Mbupingamu 8.22, 23, 30; Aba Kolosi 1.15, 16.

 U Chala akamusamya u Yesu ukuti ize apapiwe mwa mulindu u Maliya pa chisu ichapasi. U Maliya atakakumanapo lumo nu mwanavuli. Ubaba wa Yesu atakaba muntu. (Luka 1.30-35) U Yesu akiza pa chisu ichapasi ukuti abombe ivintu ivi: Ichabwandilo, pakumanyisya ubwanaloli ubwa Chala, ichabubili, ukutulangizya mo tungamubombela u Chala napo tuli mu ntamyo, ichabutatu, ukwiyipa ubumi bwache “ukuti abapoke abantu abinji.”—Belenga Matayi 20.28.

 Akabalilo kamo, umuntu akupeleka chimo ukuti atabule ichintu pamo umuntu yo ubumi bwache buli pa ngozi. (Ukusoka 21.29, 30) Butakaba bwighane bwa Chala ukuti abantu bagosipaghe nu kufwa. Tukumanya buli-buli? Ibayibolo likunena ukuti u Chala akamubuzya u Adamu ukuti pala iza ananga akwiza pakufwa. Nanti u Adamu atakanangagha ngali atakafwa. (Ubwandilo 2.16, 17; 5.5) Ukuyana namo Ibayibolo likunenela, ubufwe “bukiza” ukwendela mwa Adamu. Sona u Adamu akambukizya  abana bache imbibi pakuti amalipilo agha mbibi bo bufwe. Tukulondiwa ukusatuliwa ku chilango cha bufwe cho tukambula kwa Adamu.—Belenga Aba Loma 5.12; 6.23.

 Ka wenu yo angatusatula ku bufwe? Aliwesi pamwene akwilipila imbibi zyache nanti afwa. Patalipo nayumo wakufikapo yo angapoka abamwabo ku mbibi.—Belenga Salimo 49.7-9; Matayi 16.26.

 U Yesu akaba wakufikapo ukupambana nuswe. Chitakaba chakulondiwa ukuti afwe, chifukwa atakanangapo. U Yesu akafwila imbibi zyitu. U Chala akalangizya ulughano lwapamwanya nkani pakutuma Umwana wache ukuti ize atufwile. U Yesu wepe akalangizya ulughano pakumwivwila Uwise nu kwiyipa ubumi bwache chifukwa cha mbibi zyitu.—Belenga Yohani 3.16; Aba Loma 5.18, 19.

 Po u Yesu akaba pa chisu ichapasi akapozyanga ababine, akazyusyanga abafwe, sona nukubapoka abantu ku ntamyo izyakupambanapambana. Pakubomba zinizi, akalangizyanga mo akwiza ukubombela na bantu bo bakwivwila. (Matayi 15.30, 31; Yohani 5.28) Bo u Yesu afwa, u Chala akamuzyusya nu mubili uwabuzimu. (1 Pitala 3.18) U Yesu akalindilila kunyobe iyandilo iya Chala, mpaka po u Yehova akamwimika ukuti alaghile ichisu chosi ichapasi. (Aba Hebeli 10.12, 13) Pakabalilo kano, u Yesu akulaghila ngati we Mwene kumwanya. Bo bakumukonka bakulumbilila amazyu amiza pa chisu chosi ichapasi.—Belenga Ubuvumbuli 11.15.

 Pakuba we Mwene, lunulu akwiza pakufumyapo intamyo zyosi na bo bakupangisya. Bo bali nu lusubilo mwa Yesu nu kumwivwila bakwiza pakuhoboka mu paladayiso pa chisu ichapasi—Belenga Salimo 37.9-11.