“Ngali mwaba mwe bamanyisi.” (Hebe. 5.12) Inong’onela ifundo iyi! U Yehova Umumanyisi umwiza nkani akutulaba ukuti tube swe bamanyisi abakumanyisya abanji ivyakukwafyannya na yuyo! Ukumanyisya ubwanaloli ubwakukwafyannya nu Yehova mumbumba, muchipanga pamo mu bulumbilili, lusako ulwapamwanya nkani sona budindo ubukulu. Ka tungakwanilisya buli-buli?

Uansala tukumwagha mu mazyu gho umutumiwa u Pabuli akamusimbila u Timoti aghakuti: “Ubikepo umoyo pakuchibelengela ichilundilo amazyu agha Chala, ukuchilumbilila nu kuchimanyizya [kuchimanyisya].” U Pabuli akongelezyapo ukuti: “Pakubomba bunubu, u Chala akwiza pakukupoka, sona na bantu babo bakuteghelezya amazyu ghako.” (1 Timo. 4.13, 16) Umwe muli nu butenga ubwakupoka ubumi bo bukulondiwa ukuti mubabuzye abantu. Ivi vikulangizya ukuti mukulondiwa ukongelezya uluso lwinyu pakubelenga nu kumanyisya. Akabuku aka kasimbiwa ukuti kabavwe ukubomba bunubu. Ennya ivintu ivinandi bulo vyo vili mukabuku aka.

U Yehova weyo ‘Mumanyisi Umukulu.’ (Yesa. 30.20) Napo akabuku aka kangabavwa ukuti mongelezye uluso ulwa kubelenga nu kumanyisya, loli mutakaluvyanje ukuti u Yehova weyo Mwenecho wa butenga bwitu sona weyo akuguza abantu. (Yoha. 6.44) Pa chifukwa ichi mwiputaye kabili-kabili pakulaba umuzimu umuzelu. Akabalilo kosi mubombezyanje Amazyu gha Chala. Mutakisubalile mwebene loli mumusubalilaghe u Yehova. Sona mubikaghepo umoyo pakubavwa abantu ukuti bamughanaghe nkani u Yehova.

Mumanye ukuti muli nu lusako ulwakumanyisya abantu ubutenga ubwakulondiwa nkani. Tuli nu lusubilo ukuti mungakwanisya ukubomba imbombo iyi nanti mukusubila ‘amaka gho u Chala akubapa.’—1 Pita. 4.11.

Swe bamanyisi abamwinyu,

Akagulu Akakwenelezya aka Bakaboni ba Yehova