Bamo ukuti baye bafike ku nkomano bakwenda muntundu, sona amasiku ghamo kukucha akabibi, loli bakuyezyayezya ukukomana na Bakilisitu abamwabo. Abakaboni ba Yehova bakukomana ni ntamyo, sona bakulita ni mbombo, loli bakuyezyayezya ukukomana na Bakilisitu abamwabo. Chifukwa buli?

Tukuba nu bumi ubwiza. Umutumiwa u Pabuli akanena izya bamwitu bo tukukomana nabo mu chipanga ukuti “twinong’onelanaye.” (Aba Hebeli 10.24) Amazyu aghakuti “twinong’onelanaye” ghakung’anamula ukubapasikizya abamwitu, pamo ukubamanya akiza. Amazyu agha Pabuli ghakutughomya ukuti tupelelanaye ichisa. Nanti tukwangala ni mbumba izya Bakilisitu abamwitu, tukumanya intamyo zyo bendamo. Nuswe vingabombiwa ukuti tukukomana ni ntamyo zyo bakakomana nazyo. Tungamanyilako mo tungazipotela.

Ubumanyani bwitu bukughoma. Bo tukukomana nabo te bamanyani bulo, loli bakamu abenecho. Tukuba na kabalilo akakwangalila poka sona nu kuhoboka. Ka ivi vikutwavwa buli-buli? Tukubamanya akiza abamwitu sona ukuti bakulondiwa. Po ulughano lwitu lukughoma nkani, sona pala batamiwa tukubavwa chifukwa bakamu bitu. (Isya Mbupingamu 17.17) Nanti tukwangala na aliwesi mu chipanga, tukulangizya ukuti ‘tukupasikizannya.’—1 Aba Kolinti 12.25, 26.

Tukubaghomya ukuti musale abamanyani bo bakubomba ubwighane ubwa Chala. Abamanyani aba, bakwaghiwa pakasi pa Bakaboni ba Yehova. Mutakitikizye nachimo-chimo ukubakanizya pakwangala nuswe.

• Choni cho tukukomana poka na Bakilisitu abamwitu?

• Inti mwize liyi ukuti mwize mumanyeko ku chipanga chitu?