Ka mukulonda ukongelezyapo ukumanya Ibayibolo? Ka pali isimbo, umuntu, amalo, pamo ichintu chimo cho chikutambuliwa mu Bayibolo cho mutakwivwisya akiza? Pamo mukupasya ni chintu chimo, ka Amazyu agha Chala ghangabavwa? Mungabombezya ilayibulale iya ku Nyumba iya Bumwene.

Yili ni vintu ivyakwavwa pakulondelezya. Mubaghiye ukuti mute na mabuku ghosi agha Bakaboni ba Yehova muchinenelo chinyu. Loli mu layibulale iya ku Nyumba iya Bumwene, mukwaghiwamo amabuku aminji amapya. Mungaghagha sona Amabayibolo gho ghasanuziwe umwakupambanapambana, amadikishonale amiza, sona ni vinji vyo vingabavwa. Mwe bakusatuka ukubombezya ilayibulale iyi pala inkomano zichili ukwanda na pabumalilo. Nanti ikompyuta yilimo mu layibulale, mungaghiwamo Watchtower Library. Iyi yo pulogilamu iya pa kompyuta yo yili na mabuku aminji. Ipulogilamu iyi yipepe pakulondela umutu, ilizyu, pamo isimbo.

Yikwavwa abamanyili bo bali ni nkani mulukomano ulwa Ubumi Bwitu Ubwa Chikilisitu nu Bulumbilili. Mungabombezya ilayibulale iya pa Nyumba iya Bumwene nanti mukunozyekela inkani. Yo akwenelezya ulukomano ulwa Ubumi Bwitu Ubwa Chikilisitu nu Bulumbilili we yo akwenelezya sona ilayibulale. Ali nu budindo ubwa kwennya ukuti amabuku amapya ghalimo sona ghabikiwe akiza. Yo akwenelezya ilayibulale pamo umumanyisi winyu angabavwa mo mungaghila vyo mukulonda. Loli mutakasendaghe amabuku agha mu layibulale nu kubwela nagho kunyumba. Tubaghiye ukughakola akiza amabuku sona mutakasimbaghemo hagha!

Ibayibolo likuti, ukuti tughaghe amahala agha Chala, tubaghiye ukughalondelezya ngati bukabi bo bufisamite. (Isya Mbupingamu 2.1-5) Ilayibulale iya ku Nyumba iya Bumwene yingabavwa ukuti mwande ukulondelezya.

• Nkimba vintu buli vyo vili mu layibulale iya mu Nyumba iya Bumwene?

• Wenu yo angabavwa ukuti mubombezye akiza ilayibulale?