U Yesu akabuzya bo bakamukonkagha ukuti: “Ulukozyo lwinyu lulamaye pa bantu, ukuti bennyanje imbombo zyinyu inyiza nukumupala Utata winyu uwa kumwanya.” (Matayi 5.16) Ukuti ivi vibombiwe, tukubombezya itekinoloje ngati Intaneti. Iwebusayiti yitu iyenecho iya jw.org, yoyo yikulingannya akiza vyo tukusubila sona ni mbombo izya Bakaboni ba Yehova. Nkimba pali ivyoni?

Pali amaansala aghakufuma mu Bayibolo agha malalusyo gho tukwilalusya. Pali amaansala aghakufuma mu Bayibolo pa malalusyo ghakulondiwa gho abantu bakwilalusya. Amalalusyo ghamo ghakwamuliwa mu matilakiti ngati ilya mutu uwakuti Intamyo Zilimala Lumo? sona ni lyakuti Abafwe Bangazyuka Naloli? Amatilakiti agha ghakwaghiwa pa webusayiti muvinenelo ivyakupululila 600. Mungagha sona Ibayibolo ilya New World Translation muvinenelo ivyakupululila 130. Pali sona amabuku aghakwavwa pakumanyila Ibayibolo, ngati ibuku ilyakuti Nkimba Ibayibolo Likutumanyisya Choni? na magazini amapya agha Gongwe la Mulinda nu Wukani! Amabuku aminji mungabelenga pamo ukwivwisya pa webusayiti sona mungapanga dawunilodi MP3, PDF, pamo EPUB. Nanti umuntu yumo akulonda ibuku muchinenelo chache, mungapulinta amapeji ghamo nu kumupa! Pakwaghiwa amavidiyo agha mabuku aghinji muvinenelo ivyanyobe. Mungapanga dawunilodi inkani izya mu Bayibolo zyo zyabelengiwa ngati lidilama, amadilama agha mu Bayibolo, ni nyimbo inyiza izyakwivwisya bulo.

Pali ivyakukwafannya na Bakaboni ba Yehova. Pakuba inkani zyo zyafuma lunulu na mavidiyo gho ghakulingannya imbombo yitu pa chisu chosi, vyo vyabombiwa ku Bakaboni ba Yehova, na vyo tukubabombela abamwitu bo bakomana ni mikosi. Mungamanya ivya nkomano inkulu sona na maadilesi agha maofesi ghitu.

Pakubomba bunubu, ubwanaloli bukulama mpaka kubumalilo ubwa chisu. Abantu aba mu vyisu vyosi bakupindula, ukongannyako nu Antarctica. Tukwiputa ukuti “amazyu agha Mwene ghendelelaye pakusata umwalubilo-lubilo” mu chisu chosi ukuti u Yehova apaliwanje.—2 Aba Tesalonika 3.1.

• Ka jw.org yikwavwa buli-buli abantu ukuti bamanye ubwanaloli ubwa mu Bayibolo?

• Nkimba choni cho mungaghana ukwennya pa webusayiti yitu?