Umupayiniya muntu yo akwighula izila ku chigaba ichipya ukuti abamwabo bakonke. U Yesu wepe akabomba imbombo ngati mupayiniya. Akiza pa chisu ichapasi ukuti ababombelaye abantu nukwighula izila iyakwaghila ubumi. (Matayi 20.28) Akabalilo aka, bo bakumukonka bope bakubomba vyo akabombagha. Akabalilo akatali, bakwavwa abantu “pakuba bamanyili.” (Matayi 28.19, 20) Bamo bakwiyipa ukuba bapayiniya.

Umupayiniya akulumbilila akabalilo kosi. Abakaboni ba Yehova bosi balumbilili aba mazyu amiza. Loli bamo bakwiyipa ukuba abapayiniya abakabalilo kosi. Umwezi ghulighosi, abene bakubomba imbombo iyakulumbilila amaawala 70. Ukuti bamo bakwanisye, bakuchepesya imbombo zyo bakubomba ukuti baghe akabalilo akakukwana akakulumbilila. Bamo bakusaliwa ukuti babe bapayiniya abapalubazu. Banaba bakuya ko kukulondiwa abalumbilili abinji. Umwezi ghulighosi bakulumbilila amaawala 130 pamo ukupululila apa. Abapayiniya bakwikutisiwa na vyo bali navyo. Abene bakusubila u Yehova ukuti inti abavwe pa vyo bangasobelwa. (Matayi 6.31-33; 1 Timoti 6.6-8) Bo batangakwanisya ubupayiniya ubwakabalilo kosi, bangapanga ubupayiniya ubwakabalilo ubwa maawala 30 pamo 50 pa mwezi.

Cho chikumutuma chakuti aghanite u Chala sona na bantu. Tukubafwila ubwila abantu, ngati mo u Yesu akabombelagha. Tukumanya ukuti abantu bakulondiwa ukumumanya akiza u Chala nu bwighane bwache. (Maliko 6.34) Loli uswe tumenye ivintu vyo tungabavwa navyo. Bope bangaba nu lusubilo ukuti ivintu vikwiza ukuba akiza muntazi. Ulughano lolo lukumutuma umupayiniya ukuti iyipe ukwavwa abapalamani bache. Pakubomba ivi pakulondiwa akabalilo sona namaka. (Matayi 22.39; 1 Aba Tesalonika 2.8) Chifukwa icha mbombo iyi, umupayiniya akuba nulusubilo ulwakughoma, akupalamila kwa Chala, sona akuba wakuhoboka nkani.—Imbombo 20.35.

• Ka mungamulongosola buli-buli umupayiniya?

• Choni cho chikubatuma bamo ukuba bapayiniya?