Ibeteli lizina ilya Chihebeli lyo likung’anamula inyumba iya Chala. (Ubwandilo 28.17, 19) Izina ili likukolelana ni nyumba zyo Abakaboni ba Yehova bazengite pa chisu chosi. Uku koko kukufuma ubulongozi bo bukwavwa ukuti imbombo iya bulumbilili yendaghe akiza. Akagulu Akakwenelezya kakubombela imbombo yache ku hedikota ku New York, U.S.A. Akagulu aka kakwenelezya imbombo yo yikubombiwa mu mabulanchi ofesi mu vyisu ivinji. Bosi bo bakubombela mu Mabeteli bakwitiziwa ukuti imbumba iya Beteli. Ngati mbumba, bakwikala nukubombela poka, bakulyela poka, sona bakumanyila Ibayibolo umwakukolelana.—Salimo 133.1.

Malo ghapalubazu, bo bakubombapo bakwiyipa bene. Pa Beteli yiliyosi pali Abakilisitu abanavuli na bakolo bo bakwiyipa ukubomba ubwighane ubwa Chala sona akabalilo kosi bakubika ivintu ivya Bumwene pabwandilo. (Matayi 6.33) Batakulipiliwa, loli bakubavwa ichakulya na pakughona sona na kandalama akanandi bulo ukuti kabavwe. Aliwesi yo ali pa Beteli bakumupa imbombo. Bamo bakubomba mu ofesi, ku kichini pamo kuchipinda ichakulyelako. Bamo bakubomba ko bakupulinta pamo ko bakufwapikila amabuku, bakuswefya inyumba, bakuchapa, bakuyannya ivintu sona ni mbombo izyamwabo.

Malo gho kuli imbombo inkulu yo yikwavwa pakulumbilila izya Bumwene. Ifundo iyikulu pa Beteli yiliyosi yakuti abantu abinji bamanye ubwanaloli ubwa mu Bayibolo. Kope akabuku kanaka kakafuma ku Beteli. Akagulu Akakwenelezya koko kakenelezya imbombo iya kusimba akabuku aka. Akabuku aka bakakatumizya pa kompyuta ku magulu aghakusanuzya amabuku pa chisu chosi. Bakapulinta mu Mabeteli aghakupambanapambana nu kutumizya mu vipanga ivyakupululila 110,000. Pa mbombo yosi yo yikubombiwa, imbumba izya Beteli zikwavwapo ukuti amazyu amiza ghalumbililiwanje.—Maliko 13.10.

• Bo bawenu bo bakubomba pa Beteli? Nkimba bakutuliwa buli-buli?

• Nkimba mbombo buli iyamwalubilo yo Ibeteli yiliyosi yikwavwapo?