Mu vituzi vyo vili mu kabuku aka, mwennya mo Abakaboni ba Yehova bakuvwalila akiza pa nkomano zyabo. Choni cho bakuyezyayezya ukuvwala nu kuboneka akiza?

Tukulonda ukumuchindika u Chala. U Chala akwennya nkani mo umuntu abeleye mumoyo. (1 Samueli 16.7) Loli, pala twakomana ukuti tumwipute, tukulonda ukumuchindika u Chala sona na bamwitu. Nanti mungitizyiwa nu muntu uwapamwanya nkani, mungalonda ukuti muvwale akiza, bati? Umwakuyana bulo, mo tukuvwalila pa nkomano zyitu tukulangizya ukuti tukumuchindika “Umulongi uwa chisu chosi,” u Chala witu Yehova, na malo gho tukumwiputilapo.—Ubwandilo 18.25.

Tukukonka ifundo zyo tukumanyila. Ibayibolo likulimbikisya Abakilisitu ukuti “bavwalaye umwakwichindika, nu mwamahala, sona akiza.” (1 Timoti 2.9, 10) Nanti ‘tukwiyichindika,’ tutangavwala umwakwilangizya sona ukuti abantu batwinong’onele ivibibi. Nanti tuli na ‘mahala,’ inti tusale ivyakuvwala ivyakuyemba sona ivyiza. Ifundo izi, zikwitikizya ukuti umuntu asalaye ivyakuvwala vyo avighanite. Pala tukuvwala akiza, ‘abantu bangadebiwa ni chimanyisyo icha Chala Umupoki witu’ sona “bakwiza pakumuchindika.” (Titi 2.10; 1 Pitala 2.12) Abantu bangennya ubwiza ubwa kumwiputa u Yehova nanti tukuvwala akiza pa nkomano zyitu.

Na po mutangaba ni vyakuvwala ivyiza, loli mwe bakupokeleliwa ku Nyumba iya Bumwene. Ichakulondiwa te malaya aghapamwanya, loli kuchapa akiza.

• Choni cho chakulondiwa ukuvwala akiza nanti tukumwiputa u Chala?

• Nkimba ifundo buli zyo zikutwavwa pakusala ivyakuvwala nu kwiyinozya?