Inyumba iya Bumwene yiliyosi iya Bakaboni ba Yehova pakusimbiwa izina ilizelu ilya Chala. Nanti tukubombela poka pakuyannya Inyumba iya Bumwene ukuti yibonekaye akiza, tukwennya ukuti lusako. Aliwesi angavwapo.

Pala ulukomano lwamala tukwiyipa pakuswefya. Abakamu na bayemba bakuhoboka pakuswefya Inyumba iya Bumwene nanti ulukomano lwamala. Usabata aliwesi, tukuba nisiku ilyakuswefya. Usongo uwachipanga pamo umwavwilizi yo akwenelezya imbombo iyi. Akuba nu lubatiko ulwa vintu vyo vikulondiwa ukuyannya. Ukuyana namo ivintu vibeleye, bamo pakwiyipa pakupyela, ukukolopa, ukukung’untha ulufumbi, ukuyannya imipando, ukupuputa amawindo, ukuyannya ku vimbuzi, ukutagha iviswaswa nu kwesa pamusolo. Tukuba nisiku lyoka pamwaka lyo tukuba ni mbombo iyakuswefya inyumba yosi. Nanti tukubombela poka na bana bitu imbombo zimo, tukubamanyisya ukuti bachindikaghe amalo ghitu aghakwiputilapo.—Undumbilili 5.1.

Mwiyipe pakuyannya vyo vyakomanika. Umwaka ghulighosi, tukwennya chilichosi cho chikulondiwa ukuyannya, mukasi na kuzi. Ukufuma apo, tukuba ni mbombo iyakuyannya po pakomanikite. Vinivi vikwavwa ukuti tutakataghe indalama inyinji. (2 Inongwa sya Mbukulu 24.13; 34.10) Nanti Inyumba iya Bumwene yikuboneka akiza, ghakuba amalo amiza aghakwiputilapo u Chala. Pala tukwavwapo pambombo iyi, tukulangizya ukuti tumughanite u Yehova nukuchindika amalo ghitu aghakwiputilapo. (Salimo 122.1) Ivi vikwavwa sona ukuti abantu batuchindikaghe.—2 Aba Kolinti 6.3.

• Choni cho tukubikako amahala pakuyannya amalo gho tukwiputilapo?

• Nkimba lubatiko buli lo lukubapo pakuswefya Inyumba iya Bumwene?