1, 2. Ka choni cho ulwiputo chabupi ichapamwanya nkani sona ukumanya vyo Ibayibolo likunena pa nkani iya lwiputo?

 ICHISU chinandi nkani pakuyanisya navyo u Chala apelite kumwanya. Nanti u Yehova akwennya ichisu ichapasi, abantu bo bakwikalamo bakuwoneka ngati akantonyezi akamizi gho ghakutonya. (Masalimo 115.15; Yesaya 40.15) Nangabuli swe bantu tukuboneka ukuti swe badono nkani pakuyanisya ni vipeliwa ivyakumwanya, loli isimbo ilya Masalimo 145.18, 19 likunena ukuti: “U Yehova ali papipi na bosi bo bakumwitizya, bosi bo bakumwitizya mubwanaloli. Akwikutisya aliwesi yuyo akumoghopa, akwivwa ukulila kwabo ukuti abavwe sona akubapoka.” Tuli nu lusako ulwakunenezannya nu Chala. Chifukwa u Yehova Umupeli uwa maka ghosi, akulonda ukuti apalamile kukwitu sona akulonda ivwanje inyiputo zyitu. Ubwanaloli bwakuti ulwiputo chabupi ichapamwanya nkani cho u Yehova atupile.

² U Yehova akwiza pakwivwa inyiputo zyitu nanti tukunenezannya nawe muzila yo akwitikizya. Ka tungiputa buli-buli? Zatwennye vyo Ibayibolo likunena pa nkani iya lwiputo.

3. Choni cho mubaghiye ukwiputa kwa Yehova?

³ U Yehova akulonda ukuti mwiputaye pamo ukunenezannya nawe. Ka tukumanya buli-buli? Belenga isimbo ilya Aba Filipi 4.6, 7. Umulaghili uwa chipeliwa chilichosi kumwanya na pachisu ichapasi ali nichinyonywa numwe sona akulonda ukuti mumubuzyanje chilichosi cho chili kusingo.

4. Ka ukunenezannya kabili-kabili nu Yehova kungabavwa buli-buli?

 ⁴ Ulwiputo lukutwavwa ukuti tube pabumanyani nu Yehova. Nanti abantu bakunenezannya kabili-kabili ivyakukwafyannya ni nyinong’ono zyabo, ivyakupasya vyabo sona namo bakwiyivwila, ubumanyani bwabo bukughoma nkani. Ivi vikuyana bulo nu kwiputa kwa Yehova. Ukwendela mu Bayibolo u Yehova akubabuzya inyinong’ono zyache, mumo akwiyivwila sona akubabuzya vyo inti abombe muntazi. Pala mukunenezannya nawe kabili-kabili mungamubuzya chilichosi cho chili kusingo kwinyu. Nanti mukubomba bunubu ubumanyani bwinu nu Yehova bukwiza pakughoma.​—Yakobo 4.8.

5. Ka tukumanya buli-buli ukuti u Yehova atakwivwa inyiputo zyosi?

⁵ Ka u Yehova akwivwa inyiputo zyosi? Awe. Mukabalilo aka nchimi u Yesaya, u Yehova akababuzya aba Izilayeli ukuti: “Napo mungiputa inyiputo izyinji, ntakwivwa; inyobe zyinu zizuye ni banda.” (Yesaya 1.15) Nanti tutakucheba  tungabomba ivintu vyo vingatupangisya ukuti tutakabe papipi nu Yehova, sona ukuti manyi ivwanje inyiputo zyitu.

6. Choni cho ulwitiko lwakulondiwa? Ka tungalangizya buli-buli ulwitiko lwitu?

⁶ Nanti tukulonda ukuti U Yehova ivwe inyiputo zyitu, tubaghiye ukuba nu lusubilo mumwache. (Maliko 11.24) Umutumiwa u Pabuli akalongosola ukuti: “Ukusita pakuba nu lwitiko, chipala nkani pakumuhobosya u Chala, pakuti umuntu wesi yuyo akwiza kukwache asubilaye ukuti u Chala aliko, sona nukuti akubapa umuvwalo abantu babo bakumulondelezya.” (Aba Hebeli 11.6) Te chakulondiwa ukuti tunenaye bulo ukuti tuli nu lwitiko. Tungalangizya ukuti tuli nu lwitiko nanti tukumwivwila u Yehova akabalilo kosi.​—Belenga Yakobo 2.26.

7. (a) Choni cho tubaghiye ukuba abakwiyisya sona abamuchizi nanti tukwiputa kwa Yehova? (b) Ka tungiputa buli-buli?

⁷ Tubaghiye ukuba bakwiyisya sona bamuchizi po tukwiputa kwa Yehova. Chifukwa buli? Nanti tukunenezannya nu mwene pamo u pulezidenti, tunganenezannya nawe umwamuchizi. U Yehova we Chala uwa Maka ghosi, ka tutabaghiye ukulangizya umuchizi sona ukwiyisya nanti tukunenezannya nawe? (Ubwandilo 17.1; Masalimo 138.6) Tubaghiye ukuba swe babwanaloli sona twiputaye ukufuma pasi pa moyo witu, ukusita ukupyanizya amazyu ghoka-ghoka.​—Matayi 6.7, 8.

8. Nanti tukumulaba chimo u Yehova, ka tubaghiye ukubomba ichoni?

⁸ Nanti tukulaba kwa Chala ichintu chimo, tubaghiye ukubomba chilichosi cho tungakwanisya ukuti vilemelelane navyo twalaba. Umwakufwanikizya, nanti tukumulaba u Yehova ivintu vyo tukulonda pa bumi bwitu ubwisiku ni siku, tutakalindililaye bulo ukuti u Yehova inti atupe vyosi vyo tukulonda ukusita ukubombapo zimo. Tubaghiye ukwiyula pakubomba imbombo yiliyosi yo yingaboneka. (Matayi 6.11; 2 Aba Tesalonika 3.10) Nanti tukumulaba u Yehova  ukuti atwavwe ukuti tuleke ukubomba ivintu ivibibi, tubaghiye ukulebuka chilichosi cho chingatupangisya ukuti twingile mu ntamyo. (Aba Kolosi 3.5) Pakabalilo kano zatumanyile amalalusyo ghamo aghakukwafyannya nu lwiputo.

9. Ka twiputaye kwa wenu? Ka isimbo ilya Yohani 14.6 likutumanyisya ichoni ivyakukwafyannya nu lwiputo?

⁹ Ka twiputaye kwa wenu? U Yesu akabamanyisya abamanyili bache ukuti biputaye ukuti “Tata witu uwa kumwanya.” (Matayi 6.9) Akanena sona ukuti: ‘Une ne zila, ne ubwanaloli sona ne bumi. Nayumo umuntu yuyo akubuka kwa Tata ukusita ukwendela mumwane.’ (Yohani 14.6) Tubaghiye ukwiputa kwa Yehova ukwendela mwa Yesu. Ka ukwiputa ukwendela mwa Yesu kukung’anamula ichoni? Ukuti u Yehova itikizye inyiputo zyitu, tubaghiye ukulangizya umuchizi kwa Yesu pabudindo bo u Yehova amupiye. Ngati mo tukamanyilila, u Yesu akiza pachisu ichapasi ukuti atupoke ku mbibi na kubufwe. (Yohani 3.16; Aba Loma 5.12) U Yehova amusalite sona u Yesu ukuba we Muputi Usongo nkani sona Mulongi.​—Yohani 5.22; Aba Hebeli 6.20.

10. Ka tubaghiye ukuba pamalo buli nanti tukwiputa? Mungalongosola.

¹⁰ Ka tubaghiye ukuba pa malo buli nanti tukwiputa? U Yehova atakutulamula ukuti tufughamaghe, ukwikala pasi pamo ukwimilila po tukwiputa. Ibayibolo likutumanyisya ukuti tunganena nu Yehova umwamuchizi. (1 Syambukulu 17.16; Nehemiya 8.6; Danieli 6.10; Maliko 11.25) Ichakulondiwa nkani kwa Yehova te malo gho tukwayiwapo nanti tukwiputa, loli ukunenezannya nawe muzila yo akulonda. Tungiputa umwakufumya amazyu pamo umwachimyamya pa malo ghalighosi sona pakabalilo kosi, pangaba pamusanya pamo pachamabwila. Nanti tukwiputa kwa Yehova, tukusubila ukuti akwivwa napo umuntu yumo atangivwa.​—Nehemiya 2.1-6.

11. Ka vintu buli vyo tunganenezanya nu Yehova?

 ¹¹ Ka tungiputa ichoni? Tungalaba mulwiputo chilichosi cho chikulemelelana nu bwighane ubwa Yehova. Ibayibolo likunena ukuti: “Akutwivwa nanti tukumulaba ichintu chimo, ukuyana nu bwighane bwache.” (1 Yohani 5.14) Ka tungamulaba ivintu ivyo vyakulondiwa pa bumi bwitu? Eee. Ukwiputa kwa Yehova kuli ngati ukunenezannya nu mumanyani wako uwa pa moyo. Tungamubuzya u Yehova chilichosi cho tukwinong’ona sona nachosi cho chili mu moyo witu. (Masalimo 62.8) Tungamulaba u Yehova ukuti atupe umuzimu umuzelu ukuti ghutwavwe ukubomba cho chiza. (Luka 11.13) Tungamulaba sona u Yehova ukuti atupe amahala aghakuti ghatwavwe ukusala akiza ivintu, sona ukuti atupe amaka aghakuti ghatwavwe ukujimba mu ntamyo. (Yakobo 1.5) Tungamulaba sona u Yehova ukuti atuhobokele imbibi zyitu. (Aba Efeso 1.3, 7) Tungabiputila abamwitu, ngati abamumbumba yitu sona abakamu na bayemba abamuchipanga chitu.​—Imbombo 12.5; Aba Kolosi 4.12.

12. Ka vintu buli vyo tubaghiye ukuvitambula nanti tukwiputa?

¹² Ka vintu buli ivyakulondiwa vyo tungavitambula munyiputo zyitu? U Yehova sona nu bwighane bwache. Tubaghiye ukupalizya u Yehova pa vintu vyosi vyo atubombeye. (1 Syambukulu 29.10-13) Po u Yesu akaba pachisu ichapasi, akabamanyisya abamanyili bache mo bangiputila. (Belenga Matayi 6.9-13.) U Yesu akanena ukuti ichabwandilo, babaghiye ukwiputa ukuti izina ilya Chala lichindikiwanje sona nukulwennya ukuti lyakulondiwa sona lizelu. U Yesu akanena sona ukuti biputaye ukuti Ubumwene ubwa Chala bwizaye sona nu bwighane ubwa Yehova bubombiwanje pachisu chosi ichapasi. Ivi vyovyo u Yesu akanena ukuti nanti tukwiputa tutambulaye, ukufuma apo po tutambulaye ivintu vyo vikulondiwa pa bumi bwitu. Munyiputo zyitu nanti tukumubika u Yehova sona nu bwighane bwache pabwandilo,  tukulangizya ukuti vyovyo vyakulondiwa nkani kwa uswe.

13. Ka ulwiputo lubaghiye ukuba lutali buli?

¹³ Ka tubaghiye ukwiputa kwa butali buli? Ibayibolo litakunena akabalilo akenecho ko tungiputila. Ulwiputo lwitu lungaba lutali pamo ulufupi ukuyana namo ivintu vibeleye. Umwakufwanikizya, tungiputa ulwiputo ulufupi nanti tutandite pakulya ichakulya loli tungiputa  ulwiputo ulutali nanti tukulonda ukumupalizya u Yehova pamo ukumubuzya vyo vili mu moyo witu. (1 Samueli 1.12, 15) Tutakulonda ukwiputa ulwiputo ulutali ukuti tubahobosye abamwitu ngati mo bakabombelagha abantu bamo mukabalilo aka Yesu. (Luka 20.46, 47) U Yehova atakulonda inyiputo ngati izi. Ichakulondiwa kwa Yehova chakuti twiputaye ukufuma pasi pa moyo.

14. Ka tubaghiye ukwiputa kalinga sona ivi vikutumanyisya ichoni izya Yehova?

¹⁴ Ka tubaghiye ukwiputa kalinga? U Yehova akulonda ukuti tunenezannyanje nawe kabili-kabili. Ibayibolo likunena ukuti “bukilila pakwiputa,” “mwiyulaye pakwiputa” sona “mwiputaye akabalilo kosi.” (Matayi 26.41; Aba Loma 12.12; 1 Aba Tesalonika 5.17, NWT) Akabalilo kosi u Yehova akwivwa inyiputo zyitu. Tungamupalizya ichifukwa chakuti  atughanite sona wachisa. Tungamulaba sona ukuti atulongozyanje, atupe amaka, sona nukutughomya. Nanti tukwennya ukuti ukwiputa kwa Yehova kwa kulondiwa tukwiza pakubombezya ichabupi ichi pakunenezannya nawe.

15. Choni cho tubaghiye ukunena ukuti “ameni” pabumalilo pa lwiputo?

¹⁵ Choni cho tukunena ukuti “ameni” nanti twamala pakwiputa? Amazyu aghakuti “ameni” ghakung’anamula ukuti “vibe bunubo” pamo “momumo.” Iyi zila yo tukulangizizya ukuti vyo vyaneniwa mulwiputo vyakulondiwa. (Masalimo 41.13) Ibayibolo likutumanyisya sona ukuti chiza ukunena ukuti “ameni.” Tunganena umwachimyamya pamo umwakufumya amazyu pabumalilo pa lwiputo, ukulangizya ukuti tukwitikizya vyo vyaneniwa.​—1 Syambukulu 16.36; 1 Aba Kolinti 14.16.

16. Ka u Yehova akwamula naloli inyiputo izyitu? Mungalongosola.

¹⁶ Ka u Yehova akwamula naloli inyiputo zyitu? Eee, akwamula. Ibayibolo likuti u Yehova “Wakwivwa inyiputo.” (Masalimo 65.2) U Yehova akwivwa sona nukwamula inyiputo izya bantu abasubaliwa amamiliyoni aghinji. Akubomba bunubu muzila izyakupambana-pambana.

17. Ka u Yehova akubombezya buli-buli abantumi na babombi bache pakwamula inyiputo zyitu?

¹⁷ U Yehova akubombezya abantumi sona na babombi bache aba pachisu ichapasi ukuti amule inyiputo zyitu. (Aba Hebeli 1.13, 14) Pali ivifwanikizyo ivinji ivya bantu bo bakalaba ubutuli ukuti balivwisye akiza Ibayibolo. Bo penda akabalilo akanandi bulo, bakapokela abalendo bo bakaba Bakaboni ba Yehova. Ibayibolo likulangizya ukuti abantumi bope bakubomba imbombo iyakulumbilila “amazyu amiza” pachisu chosi ichapasi. (Belenga Ubuvumbuli 14.6.) Nuswe bulo tulabitepo lumo kwa Yehova ukuti atutule pa  ntamyo yimo yo tukakomana nayo, po tukapokela ubutuli ukufuma ku Mukilisitu uwamwitu umuyemba pamo umukamu.​—Isya Mbupingamu 12.25; Yakobo 2.16.

18. Ka u Yehova akubombezya buli-buli umuzimu wache umuzelu sona ni Bayibolo pakwamula inyiputo zyitu?

¹⁸ U Yehova akubombezya umuzimu wache umuzelu ukuti amule inyiputo zyitu. Nanti tukwiputa ukuti atwavwe pa ntamyo zyo twakomana nazyo, u Yehova akubombezya umuzimu wache umuzelu ukutulongozya sona nu kutughomya. (2 Aba Kolinti 4.7) U Yehova akubombezya sona Ibayibolo ukuti amule inyiputo zyitu sona nu kutwavwa ukuti tusalaye ivintu umwamahala. Nanti tukubelenga Ibayibolo tukughagha amasimbo gho ghangatwavwa. U Yehova angabombezya sona ifundo yimo yo Umukilisitu uwamwitu pamo u songo uwa chipanga angamula pa nkomano ukufuma mu Bayibolo yo yingatughomya.​—Aba Galatiya 6.1.

19. Ka choni cho tungennya ngati u Yehova atakwamula inyiputo zyitu?

¹⁹ Akabalilo kamo, tungaswigha ukuti, ‘Choni cho u Yehova atakwamula inyiputo zyitu?’ Tukumbuke ukuti u Yehova akumanya akabalilo ko angamula namo angamulila inyiputo zyitu. U Yehova akumanya vyo tukulonda. Tungabukilila ukumulaba pakabalilo kosi ukuti tulangizye ukuti tukulonda naloli ukunenezannya nawe sona ukuti tulangizye ukuti tuli nu lwitiko mumwache. (Luka 11.5-10) Akabalilo kamo u Yehova akwamula inyiputo zyitu muzila yo uswe tutinong’onelaghako. Tungamulaba ukuti atwavwe pa ntamyo yo tuli nayo, loli mumalo umwakuti efyepo intamyo, angatwavwa nukutughomya ukuti tujimbe pa ntamyo iyo.​—Belenga Aba Filipi 4.13.

20. Choni cho tukwiputa kwa Yehova?

²⁰ Tuli nu lusako ulukulu nkani ulwa kwiputa kwa Yehova. Tukusubila ukuti akwiza pakwivwa inyiputo zyitu. (Masalimo 145.18) Pakabalilo ko tukwiputa kwa Yehova ukufuma pasi pa moyo witu, ulusubilo lwitu lukwiza pakughoma.