1. Ka lwiputo buli ulwakumanyikwa nkani lo inti tunenezannye?

 ABANTU amamiliyoni aghinji balumenye ulwiputo ulwa Tata pamo ulwa Mwene. U Yesu akabombezya ulwiputo lunulu ukubamanyisya abamanyili bache mo bangiputila. Ka akati biputaye ichoni? Choni cho ulwiputo ulu lwakulondiwa hee amasiku ghano?

2. Ka fundo buli zitatu zyo u Yesu akatumanyisya ukuti tutambulaye pakwiputa?

² U Yesu akanena ukuti: “Bo mukwiputa mutinji: ‘Tata witu uwa kumwanya; itabwa lyako lichindikiwanje. Ubumwene bwako bwizaye, ubwighane bwako bubombiwanje pachisu ichapasi pano ukuyana na mumo kubeleye kumwanya.’” (Belenga Matayi 6.9-13.) Choni cho u Yesu akatumanyisya ukuti pakwiputa tutambulaye ifundo zitatu izi?​—Ennya Ivya Kubumalilo 19.

3. Ka tukwiza ukumanyila ichoni ivyakukwafyannya nu Bumwene ubwa Chala?

³ Tukamanyila ukuti izina ilya Chala we Yehova. Tukanenezannya sona ubwighane ubwa Chala ku bantu sona kuchisu ichapasi. Ka u Yesu akang’anamulagha ichoni po akanena ukuti: “Ubumwene bwako bwizaye”? Tukwiza pakumanyila vyo Ubumwene ubwa Chala bukung’anamula, vyo bukwiza ukubomba sona namo bukwiza ukupangisya ukuti izina ilya Chala lizelupe.

4. Ka Ubumwene ubwa Chala cho choni? Sona ka Umulaghili wache we wenu?

⁴ U Yehova ali ni boma lyo lili kumwanya sona asalite u  Yesu ukuba we Mwene uwa liboma ili. Ibayibolo likutambula iboma ili ukuti Bumwene Ubwa Chala. U Yesu we “Mulaghili mwene, usongo uba basongo, sona nu Mwene uwa bamwene.” (1 Timoti 6.15) U Yesu angabomba ivintu ivyiza ukuchila umulaghili aliwesi sona ali na maka nkani ukuchila abalaghili bosi bo balipo.

5. Ka iboma ilya Chala likwiza ukulaghila ukufuma kwiyi? Ka likwiza ukulaghila ichoni?

⁵ Bo pendapo amasiku 40 ukufuma po u Yesu akazyukila, akakwela kumwanya. Ukufuma apo, u Yehova akamusala ukuti abe we Mwene uwa liboma lyache. (Imbombo 2.33) Iboma ilya Chala likwiza ukulaghila ichisu chosi ichapasi ukufuma kumwanya. (Ubuvumbuli 11.15) Cho chifukwa Ibayibolo likubutambula Ubumwene ubwa Chala ukuti “Bumwene bwache ubwa kumwanya.”​—2 Timoti 4.18.

6, 7. Choni cho u Yesu we Mwene umwiza ukuchila umwene aliwesi?

⁶ Ibayibolo likunena ukuti u Yesu we songo ukuchila abamwene bosi, chifukwa uwene ‘te akafwe lumo.’ (1 Timoti 6.16) Abantu bo bakulaghila abamwabo abene bakufwa, loli u Yesu atalifwapo lumo. Vyosi vyo u Yesu akwiza pakutubombela vikwiza pakuba vya bwila na bwila.

⁷ Ubuchimi ubwa mu Bayibolo bukunena ukuti u Yesu akwiza pakuba we Mulaghili umwiza sona uwa chisa: “Umuzimu uwa Yehova ghukwiza ukuba papache. Akwiza ukuba nu muzimu uwa mahala, uwa kwivwisya, umuzimu uwa kulonga akiza inongwa, uwa bulongozi ubwiza, umuzimu uwakumanya ivintu sona nu wakumoghopa u Yehova. Vyosi vyo akwiza ukubomba vikwiza ukulangizya ukuti akumoghopa u Yehova. Atakwiza ukulonga inongwa umwakwenyezya namaso awe pamo vyo ivwa bulo na makutu. Abapina akwiza pakubalongela akiza inongwa zyabo.” (Yesaya 11.2-4) Ka mungalonda ukuti u mwene winu abe bunubu?

8. Ka tukumanya buli-buli ukuti u Yesu atakwiza pakulaghila mwene?

⁸ U Chala asalite abantu bamo ukuti baye balaghile poka nu Yesu kumwanya. Umwakufwanikizya, umutumiwa u Pabuli  akamubuzya u Timoti ukuti: “Nanti tukwendelela pakujimba, nuswe bulo tukwiza pakulaghila nawe.” (2 Timoti 2.12) Ka balipo balinga bo bakwiza pakulaghila poka nu Yesu?

9. Ka balipo balinga bo bakwiza pakulaghila poka nu Yesu? Ka u Chala akanda liyi ukusala abantu 144,000?

⁹ Ngati mo tukamanyilila mu Mutu 7, umutumiwa u Yohani akennya ichisetuka ukuti u Yesu we Mwene poka na bantu abakukwana 144,000. Ka abantu 144,000 bo bawenu? U Yohani akabalongosola ukuti “pa vyeni vyabo pakasimbiwapo itabwa lyache [ilya Yesu] ni tabwa ilya Wise.” Akonjelezyapo ukuti: “Aba bo bakumukonka u Mwana uwa Ng’ozi yula [yo we Yesu] kosi kuko akubuka. Abantu banaba bakapokiwa pakasi pa bantu bosi.” (Belenga Ubuvumbuli 14.1, 4.) Abantu 144,000 Bakilisitu basubaliwa bo u Chala abasalite ukuti bize ‘balaghile ichisu ichapasi ngati bo bamwene’ poka nu Yesu. Nanti bafwa bulo bakuzyukila kumwanya. (Ubuvumbuli 5.10) U Yehova akanda ukusala aba Kilisitu abasubaliwa abakukwana 144,000 ukwanda mukabalilo akabatumiwa aba Yesu.

10. Choni cho tungati u Yehova akalangizya ulughano pakusala u Yesu na bantu 144,000 ukuti balaghile abantu?

¹⁰ U Yehova akutupasikizya nkani cho chifukwa asalite abantu abakuti bize balaghile poka nu Yesu. U Yesu akwiza pakuba umulaghili umwiza chifukwa akutwivwisya. Wepe bulo akabapo muntu, akumannya akiza intamyo zyo swebantu tukukomana nazyo. U Pabuli akati u Yesu “akutupelela ichisa chifukwa icha budedebazu bwitu” sona “akayeliwa mu vyosi ukuyana na mumo nuswe bulo tukayeliwa.” (Aba Hebeli 4.15; 5.8) Abantu 144,000 bope bakuzimanya akiza intamyo zyo tukukomana nazyo. Bope bakulimbana nu kwananga sona ni mbina. Po tukusubila ukuti u Yesu poka naba 144,000, bakwiza pakwivwisya mo tukuyivwila. Batakwiza pakwivwisya bulo loli bakwiza pakumanya intamyo zyo tukulimbana nazyo.

11. Choni cho u Yesu akabamanyisya abamanyili bache ukuti biputaye ukuti ubwighane ubwa Chala bubombiwanje kumwanya?

¹¹ U Yesu akamanyisya abamanyili bache ukuti biputaye ukuti ubwighane ubwa Chala bubombiwanje kumwanya. Chifukwa buli? Mu Mutu 3 tukamanyila ukuti u Satana Umubibi akamusambukila u Yehova. U Satana akati amusambukila, u Yehova akamwitikizya poka na bantumi bo batakaba basubaliwa ukuti bikale kumwanya pakabalilo kanandi bulo. Te bosi bo bakaba kumwanya bakabombagha ubwighane ubwa Chala. Tukwiza pakumanyila ivinji mu Mutu 10 ivyakukwafyannya nu Satana sona nizya bantumi ababibi.

12. Nkimba vintu buli vibili vyo vikutambuliwa pa Ubuvumbuli 12.10?

¹² Ibayibolo likulongosola ukuti u Yesu bo bamwimika bulo ukuba we Mwene uwa Bumwene ubwa Chala akalwa inkondo nu Satana. (Belenga Ubuvumbuli 12.7-10.) Ivesi 10 likulongosola ivintu vibili ivyakulondiwa. Ichabwandilo u Yesu Kilisitu akanda ukulaghila ngati we Mwene mu Bumwene ubwa Chala. Ichabubili u Satana bakamwefyako kumwanya nukumusumbila pachisu ichapasi. Tukwiza pakumanyila ukuti ivintu ivi vikabombiwa kale.

13. Ka choni cho chikabombiwa kumwanya bo bamusumba u Satana?

¹³ Ibayibolo likulongosola mo abantumi abasubaliwa bakahobokela bo bamusumbila u Satana na bantumi ababibi pachisu ichapasi ukufuma kumwanya. Tukubelenga ukuti: “Polelo hobokagha kumwanya sona namwe mukwikalamo!” (Ubuvumbuli 12.12 NWT) Pakabalilo aka kumwanya kuli umutende nukukolelana chifukwa aliwesi akubomba ubwighane ubwa Chala.

14. Ka choni cho chikubombiwa pachisu ichapasi ichifukwa chakuti u Satana bamuchimbizizye kumwanya?

¹⁴ Ubumi te mo bubeleye pachisu ichapasi. Abantu bakukomana ni ntamyo izyakoghofya ‘chifukwa u Satana ikila  pachisu ichapasi’ bakanena sona ukuti “izuye nubukali nkani, ichifukwa azimenye ukuti asyala na kabalilo akanandi bulo.” (Ubuvumbuli 12.12) Pakabalilo aka u Satana akalalite hee, chifukwa bakamusumba ukufuma kumwanya sona azimenye ukuti lunulu bakwiza pakumunangannya. U Satana akupangisya intamyo, ububavu sona nukutamiwa pachisu chosi ichapasi.

15. Nkimba ubwighane ubwa Chala ku chisu ichapasi bwakuti choni?

¹⁵ Ubwighane ubwa Chala ubwakukwafyannya ni chisu ichapasi butasintite. U Yehova akulonda ukuti abantu abiza bize bikikale bwila na bwila mu paladayiso pachisu ichapasi. (Masalimo 37.29) Ka Ubumwene ubwa Chala bukwiza pakukwanilisya buli-buli ivintu ivi?

16, 17. Nkimba isimbo ilya Danieli 2.44 likutumanyisya ichoni ivyakukwafyannya nu Bumwene ubwa Chala?

¹⁶ Ubuchimi ubwa pa Danieli 2.44 bukuti: “Mumasiku agha bamwene ghala, u Chala akwiza pakwimika ubumwene bo te bukamale nalumo. Ubumwene ubu butakwiza pakulaghililiwa nu muntu aliwesi. Bukwiza pakughanangannya amabumwene ghosi nukughamala loli ubwene bukwiza pakubako bwila na bwila.” Nkimba ubuchimi ubu bukutumanyisya ichoni ivyakukwafyannya nu Bumwene ubwa Chala?

¹⁷ Ichabwandilo, bukutumanyisya ukuti Ubumwene ubwa Chala bukwiza ukwanda ukulaghila “mumasiku agha bamwene ghala.” Ichi chikung’anamula ukuti Ubumwene ubwa Chala bukwiza ukwanda ukulaghila pakabalilo ko amaboma agha chisu ichapasi ghachili ghakulaghila. Ichabubili, bukutumanyisya ukuti Ubumwene ubwa Chala bukwiza ukubako bwila na bwila sona patalipo iboma nalimo lyo likwiza pakwingila mu malo ghache. Ichabutatu, pakwiza ukuba inkondo pakasi pa Bumwene ubwa Chala na maboma agha muchisu ichapasi. Ubumwene ubwa Chala bukwiza pakuwina inkondo iyi. Bobo bukwiza pakwanda pakulaghila  ichisu chosi ichapasi. Ukufuma apo abantu bakwiza ukuba ni boma iliza lyo batakabapo nalyo nalumo.

18. Nkimba izina ilya nkondo iya pakasi pa Bumwene ubwa Chala na maboma agha bantu yikwitiziwa ukuti choni?

¹⁸ Nkimba Ubumwene ubwa Chala bukwiza ukupyana buli-buli ubulaghili ubwa chisu ichapasi? Bo inkondo iya bumalilo yo yikwitiziwa ukuti Alamagedoni yitizite, imizimu imibibi yikwiza “pakubabungannya abamwene bosi aba muchisu ichapasi ukuti bwalwe inkondo pisiku ikulu ilya Chala Uwamaka ghosi.” Amaboma agha bantu ghakwiza pakulwa nu Bumwene ubwa Chala.​—Ubuvumbuli 16.14, 16; ennya Ivya Kubumalilo 10.

19, 20. Choni cho tukulonda ukuti Ubumwene ubwa Chala bwize bulaghile ichisu chosi ichapasi?

¹⁹ Choni cho tukulonda Ubumwene ubwa Chala? Pali ivifukwa vitatu. Ichabwandilo swebosi swe bakwananga, cho chifukwa tukubina sona nukufwa. Loli Ibayibolo likunena ukuti mu Bumwene ubwa Chala tukwiza pakwikala bwila na bwila. Pisimbo ilya Yohani 3.16 pakunena ukuti: “Pakuti u Chala akabaghana nkani abantu aba muchisu ichapasi, umwakuti akabapa u Mwana wache mwene na mwene, kokuti umuntu wesi yuyo akumusubila atakafwanje, loli abanje nu bumi ubwa bwila na bwila.”

²⁰ Ichifukwa ichabubili cho tukulondela Ubumwene ubwa Chala chakuti, tukwikala na bantu ababibi. Abinji bamyasi, te bakwivwila sona bali ni nkalo imbibi. Patalipo nacho tungabomba ukuti tubefyepo loli u Chala umwene akwiza pakubefyapo. Abantu bosi bo bukubukilila ukubomba ivintu ivibibi bakwiza ukughoghiwa pa nkondo iya Alamagedoni. (Belenga Masalimo 37.10.) Ichifukwa ichabutatu cho tukulondela Ubumwene ubwa Chala chakuti, amaboma agha bantu ghatakulaghila akiza, ghankaza sona ghakubomba ukatangale. Amaboma agha ghatakwavwa abantu ukuti bamwivwilaye u Chala. Ibayibolo likunena ukuti “umuntu akumuvulazya uwamwabo pakulaghila.”​—Undumbilili 8.9.

21. Ka Ubumwene ubwa Chala bukwiza ukwenelezya buli-buli ukuti ubwighane ubwa Chala bwabombiwa pachisu?

 ²¹ Ubumwene ubwa Chala bukwiza pakwenelezya ukuti ubwighane ubwa Chala bwabombiwa pachisu chosi ichapasi nanti inkondo iya Alamagedoni yendapo. Umwakufwanikizya, bukwiza pakumwefyepo u Satana poka na bantumi bache ababibi. (Ubuvumbuli 20.1-3) Pakabalilo aka patalibapo nayumo umuntu yo akwiza ukubina pamo ukufwa. Chifukwa chakusatuliwa nu bufwe ubwa Yesu. Abantu bosi abasubaliwa bakwiza pakwikala mu Paladayiso bwila na bwila. (Ubuvumbuli 22.1-3) Ubumwene ubwa Chala bukwiza ukulizelufya izina ilya Chala. Nkimba ichi chikung’anamula ichoni? Chikung’anamula ukuti nanti iboma ilya Chala lyanda ukulaghila pachisu chosi ichapasi, abantu bosi bakwiza ukulichindika izina ilya Chala.​—Ennya Ivya Kubumalilo 20.

22. Ka tukumanya buli-buli ukuti u Yesu atakaba we Mwene pakabalilo ko akaba pachisu ichapasi?

²² U Yesu akababuzya abamanyili bache ukuti biputaye ukuti: “Ubumwene bwako bwizaye.” Tukumanya naloli ukuti iboma ilya Chala likwiza muntazi. U Yehova akapanga iboma nukumwimika u Yesu ukuba we Mwene uwa liboma ili. Ka u Yesu bakamwimika ukuba we Mwene bo anyokela bulo kumwanya? Awe, akalindilila. Pakabalilo kamo bo  u Yesu azyuka, u Pitala nu Pabuli bakaba bo bakaboni bakati bennya ubuchimi bo buli pa Masalimo 110.1 ubwakunena izya Yesu. Mubuchimi ubu u Yehova akanena ukuti: ‘Ikala apa kunyobe yane indilo mupaka papo nababika abalwani bako kuntende ku nyayo zyako.’ (Imbombo 2.32-35; Aba Hebeli 10.12, 13) Ka u Yesu akalindilila kwa butali buli bo u Yehova achili ukumupa Ubumwene?

23. (a) Ka u Yesu akanda liyi ukulaghila ngati we Mwene mu boma ilya Chala? (b) Nkimba tukwiza pakumanyila ichoni mu mutu uwakukonkapo?

²³ Imyaka iyinji bo umwaka uwa 1914 ghutafikite, akagulu kamo akaba Kilisitu kakivwisya ukuti umwaka uwa 1914 ghukwiza ukuba wapalubazu [wapadela] nkani ukuyana nubuchimi ubwa mu Bayibolo. Ivintu vyo vikubombiwa pachisu ichapasi ukwanda mu mwaka uwa 1914 vikulangizya ukuti vyo bakasubila vikaba vya bwanaloli. Chifukwa u Yesu akanda ukulaghila ngati we Mwene mu mwaka uwa 1914. (Masalimo 110.2) Bo ivi vyabombiwa u Satana bakamusumbila pachisu ichapasi po pakabalilo aka “azimenye ukuti asyala na kabalilo akanandi bulo.” (Ubuvumbuli 12.12) Mu mutu uwa kukonkapo tukwiza pakwennya amabukaboni aghakulangizya ukuti tukwikala mu masiku aghabumalilo. Tukwiza ukumanyila sona ukuti lunulu Ubumwene ubwa Chala bukwiza pakupangisya ukuti ubwighane ubwa Chala bubombiwe pachisu ichapasi.​—Ennya Ivya Kubumalilo 21.