1, 2. Ka bo bawenu bo bakabapo bamanyani ba Yehova?

 KA WENU yo mungalonda ukuti abe mumanyani winu? Mungalonda ukuba pabumanyani nu muntu yo mumughanite, yo mukukolelana sona nayo inkalo mukuyana.

² U Yehova u Chala asalite bamo ukuba bamanyani bache. Umwakufwakizya, u Abulahamu akaba mumanyani uwa Yehova. (Yesaya 41.8; Yakobo 2.23) U Yehova akamughana sona u Devedi. Akanena ukuti u Devedi ‘akaba umuntu uwa pa moyo wache.’ (Imbombo 13.22) Sona inchimi u Daniyeli wepe akaba “wakulondiwa nkani” kwa Yehova.​—Danieli 9.23.

3. Choni cho u Abulahamu, u Devedi nu Daniyeli bakaba bamanyani ba Yehova?

³ Ka u Abulahamu, u Devedi nu Daniyeli bakabomba ichoni ukuti babe bamanyani ba Yehova? U Yehova akati kwa Abulahamu: “Wivwila amazyu ghane.” (Ubwandilo 22.18) U Yehova akuba pabumanyani na bantu bo bakumwivwila. Abantu aba luko losi bangaba bamanyani bache. U Yehova akalongosola ku luko ulwa Izilayeli ukuti: “Ivwila amazyu ghane po nkwiza pakuba ne Chala winu sona mukwiza pakuba mwe bantu bane.” (Yeremiya 7.23) Numwe bulo ukuti mube pabumanyani nu Yehova mubaghiye ukumwivwila.

4, 5. Ka u Yehova akubafighilila buli-buli abamanyani bache?

⁴ Ibayibolo likunena ukuti u Yehova akulondelezya izila “ukuti alangizye amaka ghache ku bosi bo amoyo ghabo ghali ku kwache.” (2 Syambukulu 16.9) Pisimbo ilya Masalimo 32.8 u Yehova akubalayizya abamanyani bache ukuti: “Inti  nkupe amahala nukukumanyisya izila yo ubaghiye ukwendamo. Inti nkulongozye na maso ghane nukukupa ubulongozi.”

⁵ Tuli nu mulwani uwa maka nkani yo atakulonda ukuti tube bamanyani ba Chala. Loli u Yehova akutufighilila. (Belenga Masalimo 55.22.) Pakuti swe bamanyani ba Yehova, tukumubombela imbombo nu moyo witu ghosi. Tukubukilila ukuba basubaliwa napo tungakomana ni ntamyo inkulu. Nuswe bulo tuli nulusubilo ngati ulwa yo akasimba ibuku ilya Masalimo akaba nalo. Akasimba ivya kukwafyannya nu Yehova ukuti: “Chifukwa ali ku nyobe yane iya ndilo, ntalineng’enapo lumo-lumo.” (Masalimo 16.8; 63.8) Ka u Satana akutukanizya buli-buli ukuti tube bamanyani ba Chala?

6. Ka u Satana akasusya ichoni ivyakufyannya na bantu?

⁶ Mu Mutu 11 tukamanyila ukuti u Satana akamusamula nu kumususya u Yehova. Akati mumyasi sona mwimi ichifukwa ichakuti atakabitikizya u Adamu nu Eva ukuti bisalilaye bene cho chiza sona nacho chibibi. Ibuku ilya mu Bayibolo ilya Yobu likutumanyisya sona ukuti u Satana akususya abantu bo bakulonda ukuba bamanyani ba Chala. U Satana akususya ukuti bakumubombela u Chala ukuti bagheko ipindu, te chifukwa chakuti bamughanite awe. U Satana akanena sona ukuti angakanizya aliwesi ukumubombela u Chala. Zatwennye vyo tungamanyilako kwa Yobu sona namo u Yehova akamufighilila.

7, 8. (a) Ka u Yehova akamwennyanga buli-buli u Yobu? (b) Ka u Satana akanena ichoni ivyakukwafyannya nu Yobu?

⁷ Ka u Yobu akaba we wenu? Akaba muntu umwiza yo akabako imyaka 3,600 yo yendapo. U Yehova akanena ukuti pakabalilo kala-kala pachisu patakabapo umuntu uwa kuyana nu Yobu. U Yobu akamuchindikagha u Chala sona akavibengagha ivintu ivibibi. (Jobu 1.8) Ukunena ubwanaloli, u Yobu akaba mumanyani uwa Yehova.

 ⁸ U Satana akamususya u Yobu ukuti akamubombelagha u Chala ichifukwa cha bulili. U Satana akati kwa Yehova: “Ka mutamufighilile nulupaso nukufighilila inyumba yache sona na chilichosi cho ali nacho? Mwasaya imbombo izya nyobe zyache sona ivitekwa vyache vinyamite pachisu. Loli gholosya inyobe yako nukupalamasya chilichosi cho alinacho po akwiza pakukutuka.”​—Jobu 1.10, 11.

9. Nkimba u Yehova akamwitikizya u Satana ukuti abombe ichoni?

⁹ U Satana akamususya u Yobu ukuti akumubombela u Yehova ukuti aghe ipindu. U Satana akanena sona ukuti inti amukanizye u Yobu ukuti aleke ukumubombela u Yehova. U Yehova atakakolelana na vyo u Satana akanena, loli akamwitikizya ukuti amuyele u Yobu waghe akaba naloli mumanyani uwa Yehova sona waghe amughanite.

10. Ka u Satana akamuyivya buli-buli u Yobu? Ka u Yobu akabomba ichoni?

¹⁰ Ichabwandilo, u Satana akaghogha ivitekwa vyosi ivya Yobu. Ukufuma apo, u Satana akaghogha abambombo aba Yobu. Ivintu vyosi vyo u Yobu akaba navyo vikamala. Pabumalilo u Satana akaghogha abana aba Yobu 10 ni chimpepo ichikulu. Loli u Yobu akabukilila ukuba musubaliwa kwa Yehova. “Pa vyosi vyo vikabombiwa u Yobu atakananga pamo ukumupa inongwa u Chala ukuti weyo abomba ivintu ivibibi.”​—Jobu 1.12-19, 22.

11. (a) Nkimba vintu buli ivyamwabo vyo u Satana akamubombela u Yobu? (b) Ka u Yobu akabomba choni?

¹¹ U Satana atakalekela panapa. U Satana akamubuzya sona u Chala ukuti: “Palamasya umubili wache po akwiza pakukukwelengula.” Ukufuma apo u Satana akamuyivya u Yobu ni ntenda iyakoghofya. (Jobu 2.5, 7) Pope pakabalilo aka u Yobu akabukilila ukuba musubaliwa kwa Yehova. U Yobu akati: “Inti mbukilile ukuba wa bwanaloli mpaka ubufwe bwane.”​—Jobu 27.5.

12. Ka u Yobu akalangizya buli-buli ukuti u Satana akaba mumyasi?

 ¹² U Yobu atakamanyagha chilichosi ichakukwafyannya nu Satana ukuti weyo akapangisyagha ivinthu ivibibi sona ni chifukwa chicho akatamiwanga. Akinong’onagha ukuti u Yehova weyo akupangisya intamyo. (Jobu 6.4; 16.11-14) Napo vikaba bunubu loli u Yobu akabukilila ukuba musubaliwa kwa Yehova. Apa tukusubila ukuti u Yobu atakaba mulili. Akaba mumanyani uwa Chala chifukwa akamughana u Chala. Ivinthu ivibibi vyosi vyo u Satana akanena vikaba vyabumyasi.

13. Ka vyiza buli vyo u Yobu akavyagha chifukwa chakuba musubaliwa?

¹³ Napo u Yobu atakamanyagha vyo vikabombiwanga kumwanya, loli akabukilila ukuba musubaliwa kwa Yehova sona akalangizya ukuti u Satana akaba mubibi. U Yehova akamusaya u Yobu chifukwa ichakuti akaba mumanyani umusubaliwa.​—Jobu 42.12-17.

14, 15. Ka vintu buli vyo u Satana akanena ivyakukwafyannya na bantu bosi?

¹⁴ Tungamanyilapo pa vintu vyo u Yobu akakomana navyo. Amasiku ghano u Satana akunena ukuti tukumubombela u Yehova chifukwa cha bulili. Pisimbo ilya Jobu 2.4 u Satana akati: “Umuntu abaghiye ukuchileka chilichosi ukuti abutabule ubumi bwache.” U Satana atakamunena u Yobu mwene, loli akanena sona ukuti abantu bosi balili. Imyaka amahandiledi bo u Yobu afwa, u Satana akabukilila ukumutuka u Yehova sona nukubasusya ababombi aba Chala. Umwakufwanikizya, pisimbo ilya Isya Mbupingamu 27.11 tukubelenga ukuti: “Wee mwana wane ube we wamahala ukuti ubuhobosye umoyo wane umwakuti imwamule akiza yo akunchombola.”

¹⁵ Musale ukumwivwila u Yehova sona nukuba nawe pabumanyani ukuti mulangizye ukuti u Satana mumyasi. Numwe bulo ukuti mube pabumanyani nu Chala mubaghiye  ukusinta ivintu vimo pa bumi bwinu, nanti mungabomba bunubu mungaba ukuti mwasala ichintu ichakulondiwa. Ukusala akiza yo nkani iyakulondiwa nkani. U Satana akanena ukuti tutangaba basubaliwa kwa Chala nanti twakomana ni ntamyo. U Satana akuyezya-yezya ukuti tutakabe basubaliwa kwa Chala. Ka tungabomba buli-buli vinivi?

16. (a) Nkimba zila buli zyo u Satana akubombezya ukuti abakanizye abantu pakumubombela u Yehova? (b) Ka zila buli yo u Satana angabombezya ukuti akukanizye pakumubombela u Yehova?

¹⁶ U Satana akubombezya injomba izyakupambana-pambana ukukanizya abantu ukuti babe bamanyani ba Chala. U Satana akutukola “ngati yo nkalamu, ukulonda yumo umwakuti amumile.” (1 Pitala 5.8) Mutakaswighaye nanti abamwinyu, aba mu mbumba yinu pamo abantu abanji waghe bakubakanila ukuti mumanyilaye Ibayibolo pamo ukubomba cho chiza. Mungiyennya ukuti mwakoliwa mu chipingo. a (Yohani 15.19, 20) U Satana akwiyennya mwene “ngati po wantumi uwa lukozyo.” Polelo u Satana akuyezya-yezya ukutukola ukuti tutakabe basubaliwa kwa Yehova. (2 Aba Kolinti 11.14) Ichipingo ichamwabo cho u Satana akubombezya imbombo ukuti tuleke ukumubombela u Yehova chakuti, akutupangisya ukuti twinong’onaye ukuti tutangakwanisya ukumubombela u Chala.​—Isya Mbupingamu 24.10.

17. Choni cho tukumwivwila u Yehova?

¹⁷ Nanti tukumwivwila u Yehova tukulangizya ukuti u Satana mumyasi. Choni cho chingatwavwa ukuti tumwivwilaye? Ibayibolo likunena ukuti: “Umughanaye u Yehova u  Chala wako nu moyo wako ghosi nu muzimu wako ghosi na maka ghako ghosi.” (Ukukumbusya Indaghilo 6.5) Tukumwivwila u Yehova chifukwa chakuti tumughanite. Po ulughano ulwa kumughana u Yehova lukukula, tukwiza pakubomba chilichosi cho atulaba ukuti tubombe. Umutumiwa u Yohani akasimba ukuti: “Pakuti ukumughana u Chala kokuti tukukonka amalamulo ghache. Amalamulo ghache ghate nkafu kukwitu.”​—1 Yohani 5.3.

18, 19. (a) Ka vintu buli vyo u Yehova akanena ukuti vibibi? (b) Ka tukumanya buli-buli ukuti u Yehova atangatulaba ukubomba vyo uswe tutangakwanisya?

¹⁸ Ka vintu buli ivyamwabo vyo u Yehova akutubuzya ukuti vibibi? Mu bokosi ilyakuti “ Vibenge Ivintu Vyo u Yehova Avibengite,” muli ivintu vimo vyo u Chala avibengite. Pabwandilo munginong’ona ukuti ivintu vimo vyo vili mu kabokosi aka te vibibi. Loli nanti mukubelenga amavesi mu Bayibolo sona nukwing’ononelapo, mukwiza pakwivwisya ubwiza ubwa kwivwila amalamulo agha Yehova. Mukwiza  ukumanya ukuti mubaghiye ukusinta ivintu vimo pa bumi bwinu. Nangabuli pakabalilo kamo chikuba chitamye, loli nanti mungasinta, mukwiza ukuba nu mutende sona bakuhoboka chifukwa ichakuti muli pabumanyani ubwenecho nu Chala. (Yesaya 48.17, 18) Ka tukumanya buli-buli ukuti tungasinta?

¹⁹ U Yehova atangatulaba ukuti tubombe ivintu vyo uswe tutangakwanisya. (Ukukumbusya Indaghilo 30.11-14) Pakuba mumanyani witu, akutumanya akiza ukuchila namo tungayimanyila swebene. Akumanya vyo tungakwanisya navyo tutangakwanisya. (Masalimo 103.14) Umutumiwa u Pabuli akutughomya ukuti: “U Chala musubaliwa, umwakuti atakwiza pakwitikizya ukuti muyeliwe ukuchila amaka ghinyu, awe. Loli bo mukuyeliwa, umwenecho akwiza pakubayanizya izila iyakuponelamo, umwakuti mungajimba.” (1 Aba Kolinti 10.13) Tuli nu lusubilo ukuti akabalilo kosi u Yehova inti atupe amaka ukuti tubombaye cho chiza. U Yehova inti abape “amaka amakulu” ukuti ghabavwe ukujimba mu ntamyo. (2 Aba Kolinti 4.7) Mukabalilo akantamyo u Yehova  akutwavwa. U Pabuli akanena ukuti: “Ningabomba ichintu chosi ukwendela mumwache yuyo akumpa amaka.”​—Aba Filipi 4.13.

20. Nkimba nkalo buli zyo tubaghiye ukuba nazyo? Chifukwa choni?

²⁰ Nanti tukulonda ukuba mumanyani uwa Yehova, tubaghiye ukuleka ukubomba vyosi vyo u Yehova akuti vibibi, loli tubaghiye ukusinta. (Aba Loma 12.9) Abamanyani ba Chala bakughana ivintu vyo u Chala avighanite. Ivintu ivi vikuneniwa pisimbo ilya Masalimo 15.1-5. (Belenga.) Abamanyani ba Yehova bakuyezya inkalo zyache ukuti balangizye “ulughano, ubuhobosu, nu mutende, nu bufisalyoyo, ni chisa, nu bwiza, nu busubaliwa, nu kwiyisya sona nu kwilema.”​—Aba Galatiya 5.22, 23.

21. Ka mungabomba ichoni ukuti mulangizye inkalo zyo u Yehova ali nazyo?

²¹ Ka mungabomba ichoni ukuti mulangizye inkalo inyiza izi? Mubaghiye ukuvighana ivintu vyo u Yehova avighanite pala mukubelenga nu kumanyila Ibayibolo akabalilo kosi. (Yesaya 30.20, 21) Nanti mungabukilila ukubomba bunubu, ulughano lo muli nalo kwa Yehova lukwiza pakukula sona mukwiza pakuba ninyota iya kumwivwila.

22. Ka u Yehova akwiza pakutupa ichoni nanti tukumwivwila?

²² Vyo mungasinta pa bumi, bwinu vili ngati ukuvula ilaya ilyakale nu kuvwala ilaya ilipya. Ibayibolo likunena ukuti mubaghiye ‘ukuvula ubuntu bwinyu ubukali’ sona muvwale “ubuntu ubupya.” (Aba Kolosi 3.9, 10) Nangabuli te chipepe ukusinta inkalo pamo ukumwivwila u Yehova, loli alayizizye ukutupa “umuvwalo.” (Masalimo 19.11) Musale ukumwivwila ukuti mulangizye ukuti u Satana mumyasi. Mungamubombela u Yehova pachifukwa ichakuti mukwiza pakwagha umuvwalo hagha, loli ichifukwa chakuti mumughanite. Po mukwiza pakuba mumanyani uwa Chala.