INKHANI IYAKUMANYILA 49
ULWIMBO 147 Umoyo Wamuyirayira Walayizgika
Vyo Mungabomba Ukuti Mwize Mubwaghe Ubumi Ubwa Bwila na Bwila
‘Abanthu bosi babo bakumwennya umwana nu kumusubila babanje nu bumi ubwa bwila na bwila.’—YOHA. 6.40.
IFUNDO INKHULU
Mo abapakaziwa ni ng’ozi izinji bakupindulila ni sembe ya Yesu Kilisitu
1. Choni cho abanthu bamo bakwinong’ona ukuti batangikala kwa bwila na bwila?
ABANTHU abinji amasiku ghano bakuyezyayezya ukulya ichakulya ichiza sona ukupanga inyangalo izyakughomya umubili ukuti bikale kwa kabalilo akatali. Loli bakumanya ukuti batangikala kwa bwila na bwila. Loli pa Yohani 3.16 sona pachaputala 5.24, u Yesu akanena ukuti vingabombiwa ukuti abanthu bikale kwa “bwila na bwila.”
2. Ka pa Yohani chaputala 6 pakunena choni ivya bumi ubwa bwila na bwila? (Yohani 6.39, 40)
2 Isiku limo u Yesu akapanga ichiswigho umwakubalyesya abanthu amasawuzani aghinji ichibama ni swi. a Ivi vikaba vyakuhobosya, loli vyo akanena isiku ilyakukonkhapo vyovyo vikaba vyakuhobosya nkhani. U Yesu akachibuzya ichilundilo cho chikamukonkha ku Kapelenahumu ukuti abanthu bakwiza pakuzyuka ku bufwe nu kwikala nu bumi kwa bwila na bwila. (Belenga Yohani 6.39, 40.) Ka ifundo iyi yikubakwafya bulibuli abakamu na bamanyani binyu bo bafuye? Vyo u Yesu akanena vikulangizya ukuti abanthu abinji bakwiza pakuzyuka nu kuhoboka nu bumi kwa bwila na bwila! Loli abanthu abinji batakwivwisya vyo akanena. Za twennye vyo u Yesu akanena pa Yohani chaputala 6.
3. Nkhimba u Yesu akanena choni pisimbo lya Yohani 6.51?
3 Ichilundilo cho chikaba ku Kapelenahumu chikennya ukukolelana pakasi pa chibama cho u Yesu akabalyesya nu mana yo u Yehova akabapanga Abaizilayeli. Amasimbo ghakwitizya umana ukuti ‘vibama ivyakumwanya.’ (Sali. 105.40; Yoha. 6.31) Pisinda pache, u Yesu akabombezya inkhani iya mana ukuti abamanyisye ifundo yimo iyakulondiwa sana. Napo u Chala akabapanga Abaizilayeli umana umwakuswighisya, loli akabalilo kakati kendapo bakafwa. (Yoha. 6.49) Umwakupambana nu mana yula, u Yesu akiyitizya ukuti we “chibama ichanaloli ichakufuma kumwanya,” “chibama chicho u Chala akupa,” sona ‘chibama ichipela bumi.’ (Yoha. 6.32, 33, 35) U Yesu akalongosola imphambano yo yilipo pakasi pa yuyo na mana agha mu kabalilo aka Mozesi. Akanena ukuti: ‘Une ne chibama ichipela bumi chicho chikika kumwanya. Nanthi umunthu wesi akulya ichibama chinichi akwiza pakubako bwila na bwila.’ (Belenga Yohani 6.51.) Ifundo iyi yikabavulungannya sana Abayuda. Batakivwisya ichifukwa cho u Yesu akanena ukuti uwene “chibama” cho chikafuma kumwanya cho chikaba chapamwanya sana ukuchila umana. Pisinda pache u Yesu akati: ‘Ichibama chicho nkhwiza pakubapa gho mubili wane.’ Nkhimba akang’anamulagha choni? Tukulondiwa ukwivwisya vyo akang’anamulagha ichifukwa chakuti vikutwavwa ukumanya ukuti uswe na bamanyani bitu tungikala nu bumi kwa bwila na bwila. Zatwennye vyo u Yesu akang’anamulagha.
ICHIBAMA ICHA BUMI SONA UMUBILI WACHE
4. Choni cho bamo bakaswigha na vyo u Yesu akanena?
4 Abanthu bamo bakaswigha po u Yesu akanena ukuti akupeleka ‘umubili wache ukuti ichisu ichapasi chibanje nu bumi.’ Lumo babaghiye ukuti bakinong’ona ukuti u Yesu akulonda ukuti abape umubili wache ubwenecho ukuti balye. (Yoha. 6.52) U Yesu akongelezya sona ifundo yo yikabaswighisya nkhani, akati: ‘Nanthi mutakulya umubili uwa Mwana uwamunthu sona nanthi mutakungw’ela ibanda lyache mutakwiza pakuba nu bumi.’—Yoha. 6.53.
5. Nkhimba tukumanya bulibuli ukuti u Yesu atakang’anamulagha ukuti abanthu babaghiye ukungw’ela ibanda lyache?
5 Mu kabalilo aka Nowa u Chala akabalesya abanthu ukuti manyi balyanje ibanda. (Ubwa. 9.3, 4) Akabalilo kakati kendapo, u Yehova akabapa sona Abaizilayeli Ululaghilo ulwakuti batakalyanje ibanda. Aliwesi yo alya ibanda akalondiwa ‘ukughoghiwa.’ (Levi. 7.27, amazyu aghamunthende.) U Yesu akabamanyisya Abayuda ukuti bivwilaghe Ululaghilo ulu. (Mata. 5.17-19) Po chitakaba chakwivwika ukuti abalimbikisye Abayuda ukuti balyanje umubili wache nu kungw’ela ibanda lyache. Napo akabombezya amazyu aghakutamya loli akalondagha ukubamanyisya abanthu mo bangabwaghila “ubumi ubwa bwila na bwila.”—Yoha. 6.54.
6. Ka tukumanya bulibuli ukuti amazyu gho ghali pa Yohani 6.53 u Yesu akanena mwachili?
6 Nkhimba ifundo ya Yesu yikaba yakuti choni? Apa vikuboneka ukuti u Yesu akanena umwachili ngati mo akanenela po akamubuzya umukolo uwa ku Samaliya ukuti: ‘Umunthu wesi yuyo akungw’ela amizi ghagho nkhwiza pakumupa atakwiza pakubapo na lumolumo ni nyota. Amizi ghagho nkhwiza pakumupa ghakwiza pakuba mumwache ngati yo mbwibi iyamizi amapela bumi nu kumupa ubumi ubwa bwila na bwila.’ (Yoha. 4.7, 14) b U Yesu atakang’anamulagha ukuti umukolo uwa ku Samaliya uyu angabwagha ubumi nanthi angangw’ela bulo amizi. Umwakuyana bulo, u Yesu atakang’anamulagha ukuti abanthu aba ku Kapelenahumu bangikala nu bumi ubwa bwila na bwila nanthi bangalya umubili nu kungw’ela ibanda lyache.
IVYAKUBOMBIWA VIBILI PO U YESU AKANENA AMAZYU AGHAKUYANA
7. Nkhimba bamo bakunena choni pa vyo u Yesu akanena pa Yohani 6.53?
7 Abanthu bamo bakunena ukuti pa Yohani 6.53 u Yesu akalongosola vyo abanthu babaghiye ukubomba pa Chakulya Ichachamabwila icha Mwene. Bakunena bunubu ichifukwa chakuti pivesi ili, akanena amazyu aghakuyanako na gho akanenapo pa kabalilo akanji. (Mata. 26.26-28) Bakunena ukuti aliwesi yo akwaghiwapo pa Chakulya Ichachamabwila icha Mwene abaghiye ukulya ichibama sona ukungw’ela uvinyo. Ka ubu bwanaloli? Chakulondiwa sana ukuti tumanye nanthi bakunena ubwanaloli pamo hagha ichifukwa chakuti umwaka ghulighosi abanthu abinji bakubungana nuswe pa chakubombiwa ichi. Inthi twennye imphambano yo yilipo pa vyo u Yesu akanena pa Yohani 6.53 na vyo akanena pa Chakulya Ichachamabwila icha Mwene.
8. Nkhimba pali mphambano buli pa vyakubombiwa vibili ivi? (Ennya sona ivithuzi.)
8 Za twennye imphambano zibili zyo zilipo. Ichabwandilo, ko kwighi sona kabalilo buli ko u Yesu akanena amazyu gho ghali pa Yohani 6.53-56? Akachibuzya ichilundilo icha Bayuda ku Galileya mu 32 C.E. Akanena ivi bo kwasyala umwaka ghoka ukuti aye andisye Ichakulya Ichachamabwila icha Mwene ku Yelusalemu. Ichabubili, nkhimba u Yesu akanenagha na bawenu? Abinji mwa banthu bo akabamanyisyanga ku Galileya bakalondagha bulo ichakulya mumalo mwa kwikutisya izala yabo iyabuzimu. (Yoha. 6.26) Sona u Yesu akati ababuzya ivinthu vyo batakivwisya bakaleka ukumusubila. Sona abamanyili bache bamo bope bakaleka ukumukonkha. (Yoha. 6.14, 36, 42, 60, 64, 66) Loli za twennye vyo vikabombiwa po u Yesu akandisyanga Ichakulya Ichachamabwila icha Mwene pakati pendapo umwaka ghoka. Pa chakubombiwa ichi abatumiwa bache 11 bakaba nawe napo batakivwisyanga ivinthu vimo vyo akamanyisyanga. Loli umwakupambana na banthu bo bakaba ku Galileya, abatumiwa aba batakakayikilagha ukuti u Yesu akaba Mwana wa Chala yo akika ukufuma kumwanya. (Mata. 16.16) Akabapalizya nu kubabuzya ukuti: “Mwikala nane mumayimba ghane ghosi.” (Luka 22.28) Imphambano zibili izi zikulangizya ukuti pa Yohani 6.53, u Yesu atakalongosola vyo tubaghiye ukubomba pa Chakulya Ichachamabwila icha Mwene. Loli pali sona amabukaboni aghanji.
Pa Yohani chaputala 6 pakulangizya vyo u Yesu akachibuzya ichilundilo cha Bayuda ku Galileya (kumongo). Umwaka ghoka ghukati wendapo, u Yesu akanena na bamanyili bache banandi bulo ku Yelusalemu (kundyelo) (Ennya indime 8)
NUMWE VIKUBAKWAFYA
9. Ka amazyu gho u Yesu akanena pa Chakulya Ichachamabwila icha Mwene ghakukwafya abawenu?
9 Pa kabalilo aka Chakulya Ichachamabwila icha Mwene, u Yesu akabapa abatumiwa bache ichibama ichisita ichilungo sona akababuzya ukuti ichibama ichi chikimilagha umubili wache. Ichakukonkhapo akabapa uvinyo nu kubabuzya ukuti uvinyo uyu akwimila “ibanda lyane ilyakusimikizya ulufingo ulwa Chala.” (Mali. 14.22-25; Luka 22.20; 1 Koli. 11.24) Vyo u Yesu akanena ivyakukwafannya nu lufingo vyakulondiwa sana. Ulufingo ulupya lukupangiwa ni “nyumba [iyabuzimu] iya Izilayeli” bo banthu bene bo bakwiza pakulaghila poka nu Yesu mu ‘Bumwene bwa Chala.’ (Hebe. 8.6, 10; 9.15) Abatumiwa ba Yesu batakivwisya chilichosi ichakukwafyannya nu lufingo pa kabalilo kala, loli pakaba ukuti pasyala akabalilo kanandi bulo ukuti bapakaziwe nu muzimu ubuzelu nu kwingila mu lufingo ulupya ukuti bize balaghile poka nu Yesu kumwanya.—Yoha. 14.2, 3.
10. Ka vyo u Yesu akanena ku Galileya vikupambana bulibuli na vyo akanena pa Chakulya Ichachamabwila icha Mwene? (Ennya sona ichithuzi.)
10 Pa Chakulya Ichachamabwila icha Mwene, u Yesu akanenagha na kagulu aka banthu badono bulo ko “kamudimo akanandi.” Abatumiwa bo akaba nabo pa kabalilo aka, bobo bakaba babwandilo ukuba mugulu ilya kamudimo aka. (Luka 12.32) Abatumiwa aba poka na banji bo babaghiye ukuba mukagulu aka, bobo bakulya ichibama nu kungw’ela uvinyo vyo u Yesu akendesya pa chamabwila chila. Abanthu aba bobo bakwiza pakulaghila poka nu Yesu kumwanya. Vyo u Yesu akanena pachakubombiwa ichi vikupambana sana na vyo akabuzya ichilundilo cha banthu ku Galileya. Vyo akanena pa Chakulya Ichachamabwila icha Mwene vikakwafyanga akagulu aka banthu badono bulo. Loli vyo akanena ku Galileya vikakwafyanga ichilundilo icha abanthu.
Akagulu aka banthu banandi bulo koko kakulya ichibama nu kungw’ela uvinyo loli “aliwesi” angalangizya ulwitiko mwa Yesu nu kwagha ubumi ubwa bwila na bwila. (Ennya indime 10)
11. Ka u Yesu akanena choni ku Galileya vyo vikulangizya ukuti atakanenagha ivya kagulu kanandi bulo?
11 Pa kabalilo ko u Yesu akaba ku Galileya mu 32 C.E., akamanyisyanga Abayuda bo bakalondagha bulo ichakulya. Loli u Yesu akalondagha ukubavwa ukuti babike inyinong’ono zyabo pa chinthu chimo cho chingabavwa ukwagha ubumi ubwa bwila na bwila mumalo mwa chakulya. Sona u Yesu akanena ukuti abanthu bo bafuye bakwiza pakuzyuka pisiku ilyabumalilo nu kwikala nu bumi kwa bwila na bwila. Apa atakang’anamulagha abanthu banandi bulo ngati bo akanena pa Chakulya Ichachamabwila icha Mwene. Mumalo mwache, ku Galileya uku akanenagha ivya malusayo gho abanthu bosi bangize baghaghe. Cho chifukwa akanena ukuti: ‘Nanthi umunthu wesi akulya ichibama chinichi, akwiza ukubako kwa bwila na bwila; . . . Ichibama chicho nkhwiza pakubapa gho mubili wane ukuti ichisu ichapasi chibanje nu bumi.’—Yoha. 6.51. c
12. Ka tukulondiwa ukubomba choni ukuti twize twaghe ubumi ubwa bwila na bwila?
12 Ka u Yesu akaghanamulagha ukuti umunthu aliwesi akwiza pakwagha ubumi ubwa bwila na bwila? Awe. Loli beka babo ‘bakulya ichibama’ sona bakulangizya ulwitiko mumwache. Abanthu abinji bo bakwisenda ukuti Bakilisitu bakwennya ukuti bakwiza pakupokiwa nanthi ‘bakusubila mwa Yesu’ sona nanthi bakumwennya ukuti weyo mupoki wabo. (Yoha. 6.29) Loli tukumbukilaghe ukuti bamo bo bakaba pa chilundilo chila bo bakasubilagha mwa Yesu bakiza bamuleka. Choni cho bakabomba bunubu?
13. Nkhimba choni cho chikulondiwa ukuti umunthu abe mumanyili uwabwanaloli uwa Yesu?
13 Abanthu abinji bo bakaba pa chilundilo pala bakamukonkhagha u Yesu ichifukwa cha vinthu vyo akabapanga. Bakalondagha bulo ukuti abapanje ichakulya, ukubapozya sona ababuzyanje ivinthu vyo vikubahobosya. Loli u Yesu akalangizya ukuti bakalondiwanga ukubomba ivyinji ukuti babe bamanyili bache ababwanaloli. Atakiza pachisu ukuti ize ikutisye bulo ivyakulonda ivya banthu. Bakalondiwanga ‘ukubuka kukwache’ umwakwivwila nu kukonkha vyosi vyo akabamanyisyanga.—Yoha. 5.40; 6.44.
14. Ka tukulondiwa ukubomba ichoni ukuti tupindule nu mubili ni banda lya Yesu?
14 U Yesu akamanyisya ichilundilo chila ifundo iyakuti bakalondiwanga ukuba nu lwitiko. Bakalondiwanga ukusubila ukuti umubili ni banda lyache vikwiza pakubapoka abanthu. Ulwitiko ulu lukaba lwakulondiwa sana ku Bayuda sona luchili lwakulondiwa amasiku ghano. (Yoha. 6.40) Ngati mo pakunenela pa Yohani 6.53, tubaghiye ukuba nu lwitiko mu sembe iya Yesu ukuti tupindule nu mubili sona ibanda lyache. Abanthu bosi bangapindula ni sembe iyi.—Efe. 1.7.
15-16. Nkhimba fundo buli izyakulondiwa zyo twamanyila pa Yohani chaputala 6?
15 Pa Yohani chaputala 6 twamanyila ivinthu vyo vyakulondiwa nkhani sona vyakukazya kwa aliwesi. Twamanyila ukuti u Yesu akupasikizya aliwesi. Po akaba ku Galileya, u Yesu akapozya ababine, akamanyisya ivyakukwafannya nu Bumwene sona akabapa abanthu ichakulya. (Luka 9.11; Yoha. 6.2, 11, 12) Loli ichakulondiwa nkhani chakuti akabamanyisya abanthu ukuti umwene “chibama icha bumi.”—Yoha. 6.35, 48.
16 ‘Abang’ozi izinji’ batakulondiwa ukulya ichibama pamo ukungw’ela uvinyo pa Chakulya Ichachamabwila icha Mwene. (Yoha. 10.16) Napo vili bunubu, loli bope bakupindula nu mubili sona ibanda ilya Yesu Kilisitu. Bakupindula nanthi bakusubila ukuti isembe ya Yesu yo yo yingabapoka. (Yoha. 6.53) Loli bo bakulya ichibama nu kungw’ela uvinyo bakulangizya ukuti bali mu lufingo ulupya sona bali nu lusibilo ulwakwiza pakulaghila kumwanya mu Bumwene bwa Chala. Polelo kali swe bapakaziwa pamo bang’ozi izinji, inkhani yo yili pa Yohani chaputala 6 yakulondiwa sana. Yikutumanyisya ukuti tukulondiwa ukuba nu lwitiko ukuti twize tubwaghe ubumi ubwa bwila na bwila.
ULWIMBO 150 Penjani Chiuta Kuti Mupone
a Munkhani iyapisinda tukamanyila Yohani 6.5-35.
b Amizi gho u Yesu akatambula ghakwimila ivinthu vyo u Yehova atupiye ukuti twize twaghe ubumi ubwa bwila na bwila.
c Pi simbo ilya Yohani chaputala 6 babombezizye amazyu aghakuti ‘umunthu wesi’ sona aghakuti ‘abanthu bosi’ pakunena izya banthu bo bakwiza pakwikala kwa bwila na bwila.—Yoha. 6.35, 40, 47, 54, 56-58.
