INKHANI IYAKUMANYILA 48
ULWIMBO 97 Umoyo Ukuthemba pa Mazgu gha Chiuta
Vyo Tukumanyilako Kuchiswigho Icha Chibama
‘Ane ne chibama ichipela ubumi. Umunthu wesi yuyo akwiza kukwane atakwiza pakubapo nalumolumo ni zala.’—YOHA. 6.35.
IFUNDO INKHULU
Inthi tumanyile inkhani yo yili mwa Yohani chaputala 6, yo yikulongosola mo u Yesu akapangila ichiswigho nu kulyesya ichilundilo icha banthu.
1. Nkhimba ichibama chikwimila choni?
KALE, ichibama chocho abanthu bakalyanga nkhani. (Ubwa. 14.18; Luka 4.4) Cho chifukwa akabalilo kamo Ibayibolo likubombezya amazyu aghakuti “ichibama” pakunena ivya chakulya. (Mata. 6.11; Imbo. 20.7) U Yesu akabombezya ichibama muviswigho vyache vibili. (Mata. 16.9, 10) Ichiswigho chimo chili pa Yohani chaputala 6. Po tukumanyila inkhani iyi, inthi twennye vyo tungamanyilako ku chiswigho ichi.
2. Nkhimba kabalilo buli ko abanthu bakalondiwanga ichakulya?
2 Abamanyili ba Yesu bakati bamala pakulumbilila, u Yesu akabasenda nu kukwela nabo ubwato nu kwenda pa Nyanja iya Galileya ukuti baye batuzye ku malo aghanji. (Mali. 6.7, 30-32; Luka 9.10) Bakafika ku malo agha myee ku Betisayida. Loli pakati penda akabalilo kanandi bulo abanthu amasawuzani aghinji bakafika ku malo agha. U Yesu atakabasula bulo abanthu aba loli akabapelela ichisa umwakupaghula akabalilo nu kubamanyisya ivya Bumwene sona ukupozya ababine. Ichifukwa chakuti kukanda ukwila, abamanyili ba Yesu bakanda ukupasya na vyo abanthu inthi balye. Abanthu bamo babaghiye ukuti bakaba ni chakulya ichidono bulo loli abinji mwa banthu aba, bakalondiwanga ukubuka mutwaya ukuti baye baghule. (Mata. 14.15; Yoha. 6.4, 5) Nkhimba u Yesu akabomba choni?
U YESU AKABAPA ICHIBAMA UMWAKUSWIGHISYA
3. Ka u Yesu akababuzya abamanyili bache ukuti babombe choni? (Ennya sona icha pachifwambo.)
3 U Yesu akababuzya abamanyili bache ukuti: Abanthu aba “batakabwelaye, amwe mwebene mubapanje ivyakulya.” (Mata. 14.16) Loli vikabonekagha ukuti vitangabombiwa ichifukwa chakuti pakaba abanavuli pipipipi 5,000. Sona nanthi tungongannya abakolo na bana pabaghiye ukuti pakaba abanthu pipipipi 15,000 bo bakalondiwanga ichakulya. (Mata. 14.21) U Andileya akati: ‘Alipo yumo umulumendo pano yuyo ali ni vibama 5 ivya balele nu tuswi tubili. Loli vinivi vitangabakwana abanthu bosi banaba.’ (Yoha. 6.9) Akabalilo akinji ivibama ivya balele bakalyanga abanthu abapina na banji sona utuswi utu tubaghiye ukuti bakatupaka imbeya nu kutwanika. Ichakulya cho umulumendo uyu akaba nacho nge chitakakwana ukulyesya abanthu bosi bala, te momumo?
U Yesu akamanyagha vyo abanthu bakalondiwanga ku mubili na mwabuzimu (Ennya indime 3)
4. Nkhimba tukumanyilapo choni pa Yohani 6.11-13? (Ennya sona ivithuzi.)
4 Ichifukwa chakuti u Yesu akaba nu muzimu uwakupokelela abalendo, akababuzya abanthu ukuti bikale mu tumagulu. (Mali. 6.39, 40; belenga Yohani 6.11-13.) Ibayibolo likunena ukuti u Yesu akamupalizya u Baba wache ichifukwa chakuti akabapa ichakulya. Chikaba chakwivwika ukumupalizya u Chala ichifukwa chakuti weyo Mupi uwa chakulya. U Yesu akatumanyisya ifundo iyakulondiwa iyakuti twiputaghe tasi po tuchili pakulya kali tuli pa chilundilo pamo tuli swebene. Pisinda pache, u Yesu akababuzya abamanyili bache ukuti bagabe ichakulya sona abanthu bosi bakalya nu kwikuta. Ivyakulya vikasyala, polelo u Yesu atakalonda ukuti bataghe. Po akababuzya abamanyili bache ukuti babunganike umwakuti babombezye akabalilo akanji. U Yesu akatulangizya ichifwanikizyo ichiza nanthi tukulonda ukubombezya akiza ivinthu vyo tuli navyo. Nanthi mwe bapapi, munenezannye na bana binyu inkhani iyi nu kwennya vyo mungamanyilako pa nkhani iya lwiputo, ukupokelela abalendo nu kugabana ivinthu na banji.
Mwilalusye ukuti, ‘Ka nkhwiputa tasi po ntchili pakulya ngati we Yesu?’ (Ennya indime 4)
5. Ka abanthu bakabomba bulibuli ichifukwa cha vyo u Yesu akabomba sona u Yesu akabomba bulibuli?
5 Abanthu bakaswigha sana ichifukwa chakuti u Yesu akamanyisyanga akiza sona akapangagha iviswigho. Pakumanya ukuti u Mozesi akalayizya ukuti u Chala akwiza pakwimika umulaghuzi yo akwiza pakuba wapalubazu sana, babaghiye ukuti bakanda pakwilalusya ukuti, ‘Ka u Yesu weyo angaba ukuti we mulaghuzi yo u Mozesi akanenagha?’ (Kumbu. 18.15-18) Nanthi momo vikabela, babaghiye ukuti bakanda ukwinong’ona ukuti u Yesu angaba mulaghili umwiza yo angakwanisya ukupeleka ichakulya kwa munthu aliwesi. Po abanthu bakalondagha “pakumulema ukuti bamwikike [u Yesu] pakuba we Mwene.” (Yoha. 6.14, 15) Nanthi u Yesu akitikizyanga ukuti ivi vibombiwe, nge akasendamo ichigaba mu vyandale izya Bayuda bo bakaba pasi pa bulaghili ubwa Loma. Ka akitikizya? Awee. Ibayibolo likunena ukuti u Yesu akafumapo nu ‘kubuka ku maghamba.’ Napo abanthu bakamukakamizyanga loli atakitikizya ukuti ingile mu vyandale. Nuswe bulo tukumanyilako ivyinji!
6. Ka tungalangizya bulibuli ukuti tukulonda ukukonkha ichifwanikizyo icha Yesu? (Ennya sona ichithuzi.)
6 Amasiku ghano abanthu batangatubuzya ukuti tupange ichiswigho ichakuti pabe ivyakulya ivyinji, ukuti tupozye ababine, ukutwimika ukuba bamwene pamo abalaghili abachisu. Mumalo mwache bangatukakamizya ukuti twingililemo mu vyandale umwakuvota pamo ukunena amazyu gho ghangalangizya ukuti tuli kuchigaba icha munthu yumo yo bakwennya ukuti angasintha ivinthu. Loli ichifwanikizyo cha Yesu chingatwavwa. Akakana ukwingililapo pa vyandale sona akanena ukuti: “Ubumwene bwane bute ubwa muchisu ichi awe.” (Yoha. 17.14; 18.36) Amasiku ghano, Abakilisitu bope bakubomba akiza pakukonkha ichifwanikizyo cha Yesu. Tuli ku chigaba icha Bumwene bwache, tukulumbilila sona tukwiputa ukuti bwize. (Mata. 6.10) Pali ivinthu ivyinji vyo tukumanyilako ukufuma ku chiswigho icha vibama cho u Yesu akabomba.
U Yesu atakingililaghapo pa vyandale sona tubaghiye ukukonkha ichifwanikizyo chache (Ennya ndime 6)
‘ICHING’ANAMULO ICHA VIBAMA’
7. Nkhimba u Yesu na bamanyili bache bakabomba ichoni? (Yohani 6.16-20)
7 U Yesu akati achilyesya ichilundilo cha banthu, abatumiwa bache bakakwela iboti nu kunyokela ku Kapelenahumu loli u Yesu akabuka kwighamba ukuti aleghuke abanthu bo bakalondagha ukumukola ukuti abe we mwene. (Belenga Yohani 6.16-20.) Po abamanyili bache bakaba pa nyanja, ichimphepo ichikulu chikanda cho chikapangisya ukuti pabe amayigha amakulu. Pisinda pache u Yesu akendagha pamizi nu kubuka ko bakaba. Po akamubuzya u Pitala ukuti wepe bulo ende pa mizi. (Mata. 14.22-31) U Yesu akati akwela bulo mu boti ichimphepo chikaleka. Abamanyili bache bakaswigha hee sona bakanena ukuti: “Naloli we Mwana uwa Chala.” a (Mata. 14.33) Loli bakaba ukuti bachili batakumanya ukukolelana ko kukabapo pa chiswigho cho chikabombiwa na cho akabombela ichilundilo cha banthu. U Maliko akongelezya sona ukuti: ‘Ichi chikabamala nkhani amahala [abatumiwa] ichifukwa chakuti, batakivwisya ing’anamulo ilya vibama, imitu yabo yikaba yikafu nkhani.’ (Mali. 6.50-52) Momumo bakapotwa ukwivwisya ukuti u Yehova weyo amupiye amaka u Yesu aghakubombela iviswigho. Ivi vikati vyabombiwa, u Yesu akanena sona ivyakukwafannya ni chiswigho icha vibama, sona akatumanyisya ichimanyisyo ichamwabo.
8-9. Choni cho ichilundilo chikamulondagha u Yesu? (Yohani 6.26, 27)
8 Abanthu bo u Yesu akabalyesya, bakabikagha inyinong’ono zyabo pakukwanilisya ivyakulonda ivyakumubili. Muzila buli? Isiku ilyakukonkhapo bakagha ukuti u Yesu na bamanyili bache bafumitepo. Amaboti ghamo ghakati ghafika ukufuma ku Tibeliya, ichilundilo ichi chikakwela nu kumukonkha u Yesu ku Kapelenahumu. (Yoha. 6.22-24) Ka bakabuka pakumulonda u Yesu ukuti bivwe ivyinji ivyakukwafannya nu Bumwene? Awee. Mumalo mwache bakinong’onela bulo izya chakulya cho angabapa. Nkhimba tukumanya bulibuli?
9 Ennya vyo vikabombiwa abanthu aba bakati bamwagha u Yesu ku Kapelenahumu. U Yesu akababuzya pabuzelu ukuti bakamukonkha ichifukwa chakuti bakalondagha ichakulya ichakumubili. U Yesu akanena ukuti mukundonda pa chifukwa ichakuti “mukalya ivibama nu kwikuta ichakulya cho chikunanganika.” Loli akabalimbikisya ukuti balondaghe “ichakulya chicho chikupa ubumi ubwa bwila na bwila.” (Belenga Yohani 6.26, 27.) U Yesu akanena ukuti u Baba wache akwiza pakubapa ichakulya ichi. Abanthu babaghiye ukuti bakaswigha bakati bivwa ukuti pali ichakulya cho chingabavwa ukuti bize baghe ubumi ubwa bwila na bwila! Ka chakulya buli cho nge chikabavwa ukuti baghe ubumi ubwa bwila na bwila sona abanthu aba nge bakabomba bulibuli ukuti bachaghe?
10. Ka abanthu bakalondiwanga ukubomba choni ukuti bize baghe “ubumi ubwa bwila na bwila”?
10 Abayuda aba bakalondagha ukumanya vyo bangabomba ukuti bachaghe ichakulya ichi. Babaghiye ukuti bakinong’onagha vyo Indaghilo izya Mozesi zikababuzya ukuti ‘babombaghe.’ Loli u Yesu akababuzya ukuti: “Imbombo zizyo u Chala akulonda ukuti mubombaye zyakuti mumusubilaye yuyo akamutuma.” (Yoha. 6.28, 29) Tukulondiwanga ukuba nu lwitiko mwa Yesu yuyo u Chala akamutuma ukuti twize twaghe “ubumi ubwa bwila na bwila.” U Yesu akaba ukuti anenapo kale ivya nkhani iyi. (Yoha. 3.16-18, 36) Pisinda pache, akanena sona mo tungabombela ukuti twize twaghe ubumi ubwa bwila na bwila.—Yoha. 17.3.
11. Ka abayuda bakalangizya bulibuli ukuti bakabika inyinong’ono zyabo pa chakulya? (Salimo 78.24, 25)
11 Abayuda batakakolelana ni fundo iyakuti bakalondiwanga ukuba nu lwitiko mwa Yesu.” Po bakamulalusya ukuti: ‘Nkhimba chimanyilo buli cho ungabomba ukuti tuchennye nu kukusubila?’ (Yoha. 6.30) Bakanena ukuti mu kabalilo aka Mozesi abasekulu babo bakapokela amana gho ghakayanagha bulo ni chibama. (Nehe. 9.15; belenga Salimo 78.24, 25.) Ivi vikalangizya ukuti inyinong’ono zyabo zikaba pa chakulya. Bakapotwa na pakumulalusya u Yesu pa vyo akang’anamulagha po akanena izya “chibama icha naloli ichakufuma kumwanya,” cho chikayana bulo nu mana uwakufuma kumwanya. (Yoha. 6.32) Bakabika nkhani amahala pa vyakulondiwa ivya kumubili nu kusula vyo u Yesu akabamanyisyanga. Nkhimba tukumanyilako choni ku nkhani iyi?
CHO CHIBAGHIYE UKUBA CHAKULONDIWA NKHANI KWA USWE
12. Nkhimba u Yesu akalangizya bulibuli ichinthu cho chakulondiwa nkhani?
12 Za twennye ifundo inkhulu yo tukuyagha mwa Yohani chaputala 6. Ichinthu ichakulondiwa nkhani kwa uswe ko kumwivwila u Chala nu kuba nawe pabumanyani ubwiza. Mungakumbuka ukuti u Yesu akanena sona ifundo iyi pa kabalilo ko u Satana akamughelagha. (Mata. 4.3, 4) Sona pa bulumbilili bwache ubwa pighamba akanena ukulondiwa ukwakwikutisya izala yitu iyabuzimu. (Mata. 5.3) Nuswe bulo tukulondiwa ukwilalusya ukuti, ‘Ka mo nkhubombela ivinthu vikulangizya ukuti indi ni chinyonywa ichakulonda ukwikutisya izala yane iyabuzimu ukuchila ivinyonywa ivyakumubili?’
13. (a) Choni cho chiza bulo ukuhoboka ni chakulya? (b) Nkhimba u Pabuli akatuchevya choni? (1 Aba Kolinti 10.6, 7, 11)
13 Te chibibi ukumulaba u Chala ivinthu vyo tukulondiwa nu kuhoboka navyo. (Luka 11.3) Ibayibolo likuti chiza ‘ukuti umunthu alyange nu kungw’ela nu kuba wakuhoboka ichifukwa chakulimbikila imbombo’ sona ivi ‘vikufuma munyobe iya Chala uwabwanaloli.’ (Ndumbi. 2.24; 8.15; Yako. 1.17) Loli tutabaghiye ukubika ivinthu ivya kumubili pa malo aghabwandilo. Tungamanya ivyinji pa fundo iyi ukufuma pa vyo umutumiwa u Pabuli akabasimbila Abakilisitu ababwandilo. Akabakumbusya vyo Abaizilayeli bakabomba pa kabalilo ko bakaba munkholongo na vyo vikabombiwa po bakaba kupipi ni Ghamba ilya Sinayi. Akabachevya Abakilisitu ukuti ‘tuleke pakunyonywa ivinthu ivibibi ukuyana na mumo [Abaizilayeli] bakabombela.’ (Belenga 1 Aba Kolinti 10.6, 7, 11.) Abaizilayeli bakitikizya ukuti ichinyonywa chabo pa nkhani iya chakulya chibapangisye ukwennya ukuti iviswigho vyo u Yehova akababombela vikaba “vibibi.” (Kuba. 11.4-6, 31-34) Sona ivi vikabonekela pa kabalilo ko bakiputagha akana aka ng’ombe aka golide po bakangw’ela, ukulya sona bakahoboka. (Kuso. 32.4-6) U Pabuli akabombezya ivifwanikizyo ivi pakubasoka Abakilisitu pa kabalilo ko Ubulaghili ubwa Bayuda bukamongoliwanga mu 70 C.E. Tukwikala mumasiku aghabumalilo, polelo tukulondiwa ukubwennya ubulongizi ubwa Pabuli ukuti bwakulondiwa sana.
14. Ka Ibayibolo likuti muchisu ichipya, ivinthu vikwiza ukuba bulibuli pa nkhani iya vyakulya?
14 Pakunena ivya chakulya ichi “isiku ni siku,” u Yesu akanena sona akabalilo ko ubwighane bwa Chala bukwiza pakukwanilisiwa “ukuyana na mumo kubeleye kumwanya.” (Mata. 6.9-11) Choni cho chikwiza mu nyinong’ono zyinyu? Ibayibolo likunena ukuti ubwighane bwa Chala bwakuti pachisu pize pabe ichakulya ichinji. Ukuyana nu Yesaya 25.6-8, mu Bumwene bwa Yehova tukwiza pakuhoboka ni chakulya. Pa Salimo 72.16 pakuti: ‘Mukwiza pakuba ichakulya ichinji muchisu; chikwiza pakuba na pamwanya pa maghamba.’ Ka mukulindilila umwachinyonywa ukuti mwize mupiye ichakulya cho mukuchinyonywa? Tuli nu lusubilo ukuti mukulindilila umwachinyonywa ukuti mwize mubyale ivipaso vyo muvighanite nkhani. (Yesa. 65.21, 22) Sona aliwesi pachisu akwiza pakuhoboka ni vinthu ivi.
15. Nkhimba bo bakwiza pakuzyuka bakwiza pakumanyila ichoni? (Yohani 6.35)
15 Belenga Yohani 6.35. Inong’onela sona ivya banthu bo bakalya ichibama ni swi vyo u Yesu akabapa. Muchisu ichipya mungize mukomane na bamo mwa banthu aba. Napo pa kabalilo kala batakaba nu lwitiko mwa Yesu loli bakwiza pakuzyuka. (Yoha. 5.28, 29) Abanthu aba bakwiza ukulondiwa ukumanya ing’anamulo ilya mazyu gha Yesu aghakuti: ‘Une ne chibama ichipela ubumi. Umunthu wesi yuyo akwiza kukwane atakwiza pakubapo nalumo ni zala.’ Bakwiza pakulondiwa ukuba nu lwitiko ukuti u Yesu akiyipa nu kupeleka ubumi bwache ukuba sembe. Abanthu bo bakwiza pakuzyuka sona abana bo bakwiza pakupapiwa, bakwiza ukuba nu lusako ulwakumanyila ubwanaloli ubwakukwafannya nu Yehova nu bwighane bwache. Tukwiza pakuhoboka sana ukusendapo ichigaba pakumanyisya abanthu! Ukwavwa abanthu ukuti babe pabumanyani nu Yehova kukwiza ukupangisya ukuti tube bakuhoboka sana ukuchila ukulya ichakulya ichenecho.
16. Nkhimba tukwiza pakumanyila ichoni mu nkhani iya kukonkhapo?
16 Twamanyila ichigaba chimo cho chikwaghiwa pa Yohani chaputala 6, loli u Yesu akaba ni vyinji ivyakuti amanyisye ivyakukwafannya nu “bumi ubwa bwila na bwila.” Abayuda bo u Yesu akanenagha nabo bakalondiwanga ukuteghelezya vyo akanenagha polelo nuswe bulo momo tubaghiye ukubombela. Munkhani iya kukonkhapo, tukwiza ukubukilila ukumanyila Yohani chaputala 6.
Ulwimbo 20 Mukapeleka Mwana Winu Wakuzirwa
a Ukuti mumanye ivyinji ivyakukwafannya ni nkhani iyi, ennya ibuku ilyakuti Yesu Ni Nthowa, Unenesko, na Umoyo, p. 131, sona ilyakuti, Yezgani Chipulikano Chawo, p. 185.
