Umutumiwa u Pabuli akamusimbila usongo awamwabo u Timoti ukuti: ‘Panthazi pa Chala, na pamaso pa Kilisitu u Yesu, sona na pamaso pa banthumi bosi abasaliwa, inkhukulamula ukuti ukonkhaghe indaghilo zinizi nu bwanaloli pamo ukusita ukwennya icheni icha munthu mu vinthu vyosi vivyo uli pakubomba.’—1 Timo. 5.21.

Ichabwandilo, inthi tunenezannye ivya banthumi bo batangalaghila poka na banthumi aba. Ubwanaloli bwakuti abanthumi aba, bate pigulu ilya ba 144,000. Pakabalilo ko u Pabuli akamusimbilagha u Timoti, Abakilisitu abapakaziwa bakaba ukuti bachili batandite ukwuzyukila kumwanya. Abatumiwa na bapakaziwa abanji bakaba ukuti bachili ukuba vipeliwa ivyabuzimu, cho chifukwa batangaba ‘abanthumi bosi abasaliwa.’—1 Koli. 15.50-54; 1 Tesa. 4.13-17; 1 Yoha. 3.2.

Sona ‘abanthumi bosi abasaliwa’ batangaba abanthumi bo bakasambuka pakabalilo aka Chigumula. Abantumi bala bakaba ku lubazu lwa Satana nu kuba imizimu imibibi yo u Yesu akayisusya. (Ubwa. 6.2; Luka 8.30, 31; 2 Pita. 2.4) Kunthazi, bakwiza ukubasumbila ku chiliba ko bakwiza ukwikalako imyaka 1,000 sona pisinda pache bakwiza pakubapyuta poka nu Satana kwa bwila na bwila.—Yuda 6; Ubuvu. 20.1-3, 10.

‘Abanthumi bosi abasaliwa’ bo u Pabuli akanenagha, babaghiye ukuti banthumi abasubaliwa bo bakumwavwa ‘u Chala nu Kilisitu u Yesu.’

Pali abanthumi abasubaliwa amasaghuzani aghinji sana. (Hebe. 12.22, 23) Tutakulondiwa ukwinong’ona ukuti bosi bakubomba imbombo yoka pakabalilo akakuyana bulo. (Ubuvu. 14.17, 18) Umwakufwanikizya, u Yehova akamupa uwanthumi weka bulo imbombo iyakuti aghoghe abasilikali 185,000 aba ku Asiliya. (2 Nyafya. 19.35) Abanthumi abinji babaghiye ukuti babapiye imbombo ‘iyakwefya ivinthu vyosi mu Bumwene ubwa [Yesu] vyo vikupangisya inthamyo sona abanthu bosi bo bakubomba ivibibi.’ (Mata. 13.39-41) Abanji babaghiye ukuti babapiye imbombo ‘iyabungannya abanthu abasaliwa’ abakuti babuke kumwanya. (Mata. 24.31) Sona pali abanji bo babapiye imbombo ‘iyakutufighilila pa vyosi vyo tukubomba.’—Sali. 91.11; Mata. 18.10; yanisya nu Matayi 4.11; Luka 22.43.

‘Abanthumi bosi abasaliwa’ bo bakutambuliwa pa 1 Timoti 5.21, babaghiye ukuti bo banthumi bo bakubomba imbombo izyapalubazu pakubavwa abanthu ba Chala. Inkhani yosi yikulangizya ukuti u Pabuli akapeleka ubulongozi bo bungabavwa abasongo sona mo ichipanga chingalangizizya ukuti chikubachindika. U Pabuli akanena ukuti abasongo, babaghiye ukukwanilisya amabudindo ghabo ‘ukusita ukwennya icheni icha munthu’ mu vinthu vyosi vivyo bakubomba sona batabaghiye ukusala ivinthu pamo ukulonga umwakusalila. Bakalondiwanga ukubikapo umoyo pakukonkha ubulongozi ubwa Pabuli ichifukwa chakuti nge bukabavwa ukuti babombe akiza ‘panthazi pa Chala, na pamaso pa Kilisitu u Yesu, sona na pamaso pa banthumi bosi abasaliwa.’ Cho chifukwa chakwivwika naloli ukuti abanthumi bamo babapiye imbombo iyakuti batulaghe ichipanga muzila izyakupambanapambana, ukuchifighilila, ukwenelezya imbombo iya kulumbilila nu kumubuzya u Yehova vyo bakwennya.—Mata. 18.10; Ubuvu. 14.6.