Ka umwaka ughu mwabelengite inkhani izya mu Ichitembe cha Mulindlili umwakubikapo umoyo? Nanthi momo mwangubombela, ennya nanthi mungakwanisya ukwamula amalalusyo aghakukonkhapo agha:

Ka u Yehova akulangizya chifwanikizyo buli pa mo akubombela ivinthu na bakolo?

Akubomba nabo ivinthu umwachisa sona atakwennya ukuti abanavuli bapamwanya nkhani ukuchila abakolo. U Chala akuteghelezya ku bakolo, akubikapo umoyo pakwivwisya mo bakwiyivwila sona akuchindika inyinong’ono zyabo. Sona abasubaliye sana ukuti bakukwanisya ukubomba imbombo yache.—w24.01, pp. 15-16.

Ka tungabombezya bulibuli amazyu gho ghali pa Aba Efeso 5.7, gho ghakuti: “Mutakamanyanaye nabo”?

Umutumiwa u Pabuli akutusoka ukuti tutakabanje pa bumanyani na banthu bo bangapangisya ukuti chibe chipala ukubukilila ukukonkha ifundo izya Chala. Abanthu bamo tungangala nabo pamaso na pamaso sona bamo tungangala nabo pa vibombelo ivya tekinoloje.—w24.03, pp. 22-23.

Nkhimba tukulondiwa ukwifighilila bulibuli ku nkhani izyabumyasi?

Tukulondiwa ukucheba ni nkhani zyo zite nu bukaboni zyo abamanyani bitu bakutubuzya, amameseji gho ghakufuma ku banthu bo tutabamenye, sona abakususya bo bakulangizya ngati bali ni chinyonywa nu buthenga bwitu.—w24.04, p. 12.

Ka tukumanya choni sona tutakumanya choni ivya mo u Yehova akwiza pakulongela Umwene u Solomoni na bo bakafwa mu Sodomu nu Gomola na pa Chigumula?

Tutakumanya waghe u Yehova asalite ukuti akwiza akabapyutila zila. Loli tuzimenye ukuti weyo akumanya vyosi sona wachisa nkhani.—w24.05, pp. 3-4.

Nkimba u Chala pakuba ‘Lyalabwe’ akutusimikizya choni? (Kumbu. 32.4)

Tungaghagha amalo aghakumwamamo mwa Yehova. Ichifukwa chakuti musubaliwa sona akabalilo kosi akukwanilisya vyo alaghizya. Sona atakusintha ubwighane bwache ni vyakubomba vyache.—w24.06, pp. 26-28.

Choni cho chingabavwa ukuti mubelele muchipanga ichipya?

Mumusubililaghe u Yehova yo angabavwa ngati mo akabombela na babombi bache abakale. Mutakayanisyange abamanyani bo mukaba nabo muchipanga ichakale na kuchipanga ichipya. Musendaghemo ichigaba muchipanga ichipya sona mubikepo umoyo ukuti mwaghe abamanyani abapya.—w24.07, pp. 26-28.

Nkimba tukumanyilako choni ku vyili vyo vikwaghiwa mwa Matayi chaputala 25?

Ichili icha ng’ozi ni mbuzi chikulangizya ukulondiwa ukwa kuba basubaliwa. Ichili ichabalindu abapunganu na bamahala chikulangizya ukwa kuba bakwisengannya nu kuba maso. Ichili icha matalenthi chikulongosola ubwiza ubwakuba wakulimbikila.—w24.09, pp. 20-24.

Ka ivelanda ilya tempeli ilya Solomoni likaba litali buli?

Pa 2 Syambukulu 3.4, imipukutu yimo iyakale yikunena ukuti ivelenda lyosi likakwanagha imikono ‘120’ vyo vikulangizya ukuti mubutali likaba amamita 53. Loli amabuku ghamo ghakunena ukuti likaba imikono ‘20,’ vyo vikulangizya ukuti mubutali likaba amamita 9. Vikuboneka ukuti ulubumba ulwa velanda vikakolanagha akiza nu lwa tempeli.—w24.10, p. 31.

Nkimba ifundo iyakuti umwavwilizyi uwa chipanga abaghiye ukuba nu muchi weka yikung’anamula choni? (1 Timo. 3.12)

Yikung’anamula ukuti umwanavuli abaghiye ukuba nu mukolo weka sona atabaghiye ukupanga ubwamalaya. Umwakongelezyapo, atakulondiwa ukunyonywa umukolo uyunji.—w24.11, p. 19.

Choni cho tukunena ukuti pa Yohani 6.53 patakunena vyo vibaghiye ukubombiwa pa Chakulya Ichachamabwila icha Mwene?

Pa Yohani 6.53 vyo umunthu abaghiye ukubomba ukuti alye mubili wa Yesu nu kungw’ela ibanda lyache. U Yesu akanena amazyu agha ku Bayuda bo bakalondiwanga ukuba nu lwitiko mumwache mu 32 C.E po akaba ku Galileya. Loli ukwanda ukulya Ichakulya Ichachamabwila icha Mwene kukanda umwaka uwakukonkhapo ku Yelusalemu. Apa u Yesu akanenagha na banthu bo akwiza pakulaghila nabo poka kumwanya.—w24.12, pp. 10-11.