1. Nena ichifwanikizyo cho chikulangizya ukuti tukulondiwa ubulongozi ubwa Yehova.

 INONG’ONELA ukuti muli munkolongo po mwasobela. Mwazyunguliliwa ni vintu ivyakoghofya ngati: ivinyamana ivya munkolongo, utuvibenene to tukwambukizya imbina, ivyakumela vyo vili nu poyizoni, amalo ghache ghavikwezya sona ghali na mabwe. Mungapalizya sana nanti mungamwagha yumo yo aghamenye akiza amalo agha, sona akumanya akiza ko ivintu ivyakoghofya vikwaghiwa nu kumanya vyo mungabomba ukuti muvileghuke ivintu ivi! Ichisu ichi chili ngati nkolongo iyi. Chizuye ni vintu ivyinji ivyakoghofya vyo vingakomannya ubumanyani bwitu nu Yehova. Loli tuli nu Mulongozi uwakufikapo u Yehova. Akutulongozya ukuti tuleghuke ivintu ivyakoghofya sona ukuti tuye tufike ku bumalilo ubwa bulendo bwitu muchisu chipya.

2. Ka u Yehova akutulongozya buli-buli?

² Ka u Yehova akutulongozya buli-buli? Izila iya bwandilo ko kwendela mu Bayibolo. Loli akubombezya sona abantu ukuti batulongozyanje. Umwakufwanikizya, akubombezya ‘uwambombo umusubiliwa nu wamahala’ pakutupa ichakulya ichabuzimu cho chikutwavwa ukuti tusalaghe ivintu umwamahala. (Mata. 24.45) U Yehova akubombezya sona abanavuli abakughoma mwabuzimu ukuti batulongozyanje. Umwakufwanikizya, abakwendela idela na basongo abachipanga bakutughomya sona bakutupa ubulongozi bo bukutwavwa ukuti tujimbe pa kabalilo ko twakomana ni ntamyo muchisu ichibibi ichi. Tukupalizya sana ukuti u Yehova akutulongozya akiza mu kabalilo aka ntamyo aka po tuli kubumalilo ukwa masiku aghabumalilo! Vikutwavwa ukubukilila ukuba pa bumanyani ubwiza nu Yehova umwakuti pa kabalilo aka tukuhoboka nu bumi sona muntazi tukwiza pakuboboka kwa bwila na bwila.

3. Nkimba munkani iyi inti tumanyile ichoni?

³ Napo vili bunubu, loli akabalilo kamo chikuba chakutamya ukukonka ubulongozi ubwa Yehova nkani-nkani nanti bwapelekiwa na banavuli abambula ukufikapo. Chifukwa buli? Ichifukwa chakuti ubulongozi bo bangatupa tutangakolelana nabo. Pamo tunginong’ona ukuti ubulongozi bo bakutupa te bwamahala sona te bwakufuma kwa  Yehova. Pa kabalilo ngati aka popo tukulondiwa ukuba nkani nu lusubilo ukuti u Yehova weyo akulongozya abantu bache sona bo bakukonka ubulongozi bwache bobo bakusayiwa. Ukuti vitwavwe ukughomya ulusubilo lwitu, munkani iyi inti twennye (1) mo u Yehova akalongozezyanga abantu bache mu kabalilo akakale, (2) mo akutulongozezya amasiku ghano, sona (3) mo tukupindulila nanti tukukonka ubulongozi bwache.

MO U YEHOVA AKALONGOZEZYANGA UMUTUNDU UWA BAIZILAYELI

4-5. Ka u Yehova akalangizya buli-buli ukuti akamubombezyanga u Mozesi pakubalongozya Abaizilayeli? (Ennya ichituzi ichapachifwambo.)

⁴ U Yehova akasala u Mozesi ukuti abalongozye Abaizilayeli ukufuma ku Ijiputi. Sona akabapa ubukaboni ubwakuboneka na maso ukuti weyo akabalongozyanga ukwendela mwa Mozesi. Umwakufwanikizya, u Yehova pamusanya akabalongozyanga pakubombezya ibingu sona pabusiku akabombezyanga umoto. (Kuso. 13.21) U Mozesi na Baizilayeli bakakonkagha ivintu ivi vyo vikabalongozezyanga ku Nyanja Inchesamu. Abaijiputi bakabasamalilagha Abaizilayeli umwakuti bakanda pakoghopa ichifukwa chakuti bakinong’onagha ukuti Abaijiputi inti babaghoghe. Ivi vikapangisya ukuti abantu bande pakwinong’ona ukuti u Mozesi akapuvya pakubasenda nu kwiza nabo ku Nyanja Inchesamu. Loli u Mozesi atakapuvya. U Yehova akabukilila ukumubombezya u Mozesi pakubalongozezya abantu bache ku malo gho akalondagha ukuti baye bafike. (Kuso. 14.2) U Chala akabapoka muzila iyakuswighisya sana.—Kuso. 14.26-28.

⁵ Ukwa myaka 40, u Mozesi akabukilila ukusubila ukuti u Yehova akabombezyanga ibingu lyo likabonekagha ngati chipilala pabakulongozya munkolongo. a Ukwakabalilo, u Yehova akabika ibingu pamwanya pitenti ilya Mozesi lyo likabonekelagha akiza ku Baizilayeli bosi. (Kuso. 33.7, 9, 10) Ukwendela mwi bingu lila u Yehova akanenagha nu Mozesi yo akababuzyanga abantu ubulongozi bo u Yehova amubuzya. (Sali. 99.7) Abaizilayeli bakaba nu bukaboni bosi ubwakuti u Yehova weyo akabalongozyanga ukwendela mwa Mozesi.

6. Ka Abaizilayeli bakabupokelela buli-buli ubulongozi ubwa Yehova? (Ukubaligwa 14.2, 10, 11)

⁶ Ichachitima chakuti, Abaizilayeli abinji bakakana ubukaboni ubwakuboneka na maso ubwakuti u Mozesi akanenagha nu Yehova. (Belenga Ukubaligwa 14.2, 10, 11.) Umwakupyanizya-pyanizya, bakakana ukwitikizya ukuti u Yehova akubombezya u Mozesi pakubalongozya. Ichakukonkapo chikaba chakuti u Yehova atakabitikizya ukwingila Muchisu icha Layizyo.—Kuba. 14.30.

7. Nena ivifwanikizyo ivya bantu bo bakakonkagha ubulongozi ubwa Yehova. (Ukubaligwa 14.24) (Ennya sona ichituzi.)

⁷ Ichakuhobosya chakuti Abaizilayeli bamo bakabukonkagha ubulongozi ubwa Yehova. Umwakufwanikizya, u Yehova akanena ukuti: ‘U Kalebi . . . abukilila ukunkonka nu moyo wache ghosi.’ (Belenga Ukubaligwa 14.24.) U Chala akamusaya sana u Kalebi sona akamupa ulusako ulwakuti asale amalo gho angalonda ukwikala Muchisu icha Kenani. (Yoswa 14.12-14) Abaizilayeli bo bakitikiziwa ukwingila Muchisu icha Layizyo, bakalangizya sona ichifwanikizyo ichiza pa nkani iyakukonka ubulongozi ubwa Yehova. Pa kabalilo ko u Yoshwa akingilagha mumalo mwa Mozesi ukuti weyo asaliwa ukuti inti alongozyange, Abaizilayeli ‘bakamuchindika sana amasiku ghosi agha bumi bwache.’ (Yoswa 4.14) Vyo vikapangisya ukuti u Yehova abasaye nu kubingizya muchisu cho akabalayizya.—Yoswa 21.43, 44.

8. Longosola mo u Yehova akabalongozezyanga abantu bache mu kabalilo aka bamwene. (Ennya sona ichituzi.)

⁸ Imyaka yikati yendapo, u Yehova akimika abalongi ukuti babalongozyange abantu bache. Pisinda pache mu kabalilo aka bamwene, u Yehova akasala abalaghuzi ukuti balongozyanje abantu bache. Abamwene abasubaliwa, bakakonkagha ubulongozi ubwakufuma ku balaghuzi. Umwakufwanikizya, Umwene u Devedi umwakwiyisya akitikizya  ubulongozi ubwakufuma kwa mulaghuzi u Natani. (2 Samu. 12.7, 13; 1 Syambu. 17.3, 4) Umwene u Yehoshafati akakonka ubulongozi bo umulaghuzi u Yahaziyeli akamupa sona akalimbikisya abantu aba ku Yuda ukuti ‘mube nu lwitiko mubalaghuzi aba [Chala].’ (2 Syambu. 20.14, 15, 20) Pa kabalilo ko Umwene u Hezekiya akatamiwa inyinong’ono, akalaba umulaghuzi u Yesaya ukuti amwavwe. (Yesa. 37.1-6) Nanti abamwene bivwila ubulongozi ubwa Yehova, akabalilo kosi bakasayiwanga sona abantu babo bakabanga bakufighililiwa. (2 Syambu. 20.29, 30; 32.22) Aliwesi akivwisyanga ukuti u Yehova akabombezyanga abalaghuzi pakubalongozya abantu bache. Napo vikaba bunubu, abamwene na Baizilayeli abinji bakakanagha ukwivwila abalaghuzi ba Yehova.—Yere. 35.12-15.

MO U YEHOVA AKABALONGOZEZYANGA ABAKILISITU ABABWANDILO

9. Ka u Yehova akabombezyanga abawenu pakulongozya Abakilisitu ababwandilo? (Ennya sona ichituzi.)

⁹ Mu 33 C. E. pa Pentekositi, u Yehova akandisya ichipanga icha Chikilisitu. Nkimba akabalongozyanga buli-buli Abakilisitu ababwandilo? Akamwimika u Yesu ukuba mutu uwa chipanga. (Imbo. 15.1, 2) Loli u Yesu atakamubuzyanga umumanyili aliwesi paweka ichakubomba. U Yesu akabombezyanga abatumiwa na basongo ku Yelusalemu ukuti bobo balongozyange. (Imbo. 15.1, 2) Sona akimika abasongo ukuti balongozyange ivipanga.—1 Tesa. 5.12; Titi 1.5.

10. (a) Nkimba Abakilisitu ababwandilo bakabupokelelagha buli-buli ubulongozi? (Imbombo 15.30, 31) (b) Choni cho bamo bakabakanagha abantu bo u Yehova akababombezyanga imbombo? (Ennya ibokosi ilyakuti “ Ivifukwa vyo Bamo Bakukana Ubukaboni Ubwakuboneka na Maso.”)

¹⁰ Nkimba Abakilisitu ababwandilo bakabupokelelagha buli-buli ubulongozi? Abinji bakabupokelelagha akiza nu kububombezya imbombo. Umwakuti “abantu bakahobokagha na mazyu aghalukazyo” gho bakapokelagha. (Belenga Imbombo 15.30, 31.) Ka u Yehova akubalongozya buli-buli abantu bache amasiku ghano?

MO U YEHOVA AKUTULONGOZEZYA AMASIKU GHANO

11. Nena ichifwanikizgo cho chikulangizya mo u Yehova akutangilila bo bakulongozya amasiku ghano.

¹¹ U Yehova akubukilila ukubalongozya abantu bache amasiku ghano. Akubomba bunubu pakubombezya Ibayibolo nu Mwana wache yo mutu uwa chipanga. Nkimba tukwennya ubukaboni bo bukulangizya ukuti u Chala akubukilila ukubombezya abantu pakulongozya amasiku ghano? Inga. Umwakufwanikizya, inong’onela vyo vikabombiwa pisinda pa mwaka uwa 1870. U Charles Taze Russell na bamanyani bache bakanda pakwivwisya  ukuti umwaka uwa 1914 ghukwiza ukuba mwaka uwapamwanya mu Bumwene ubwa Chala. (Dani. 4.25, 26) Bakamanya ifundo iyi ichifukwa chakuti bakasubilagha mabulaghuzi agha mu Bayibolo. Ka u Yehova weyo akabatangililagha pa kabalilo ko bakafufuzagha mu Bayibolo? Inga tutakukayikila. Ivintu vyo vikabombiwa pachisu mu 1914, vikasimikizya ukuti Ubumwene ubwa Chala bukanda pakulaghila. Inkondo iya Bwandilo iya Pachisu Chosi yikati yabombiwa ivyakukonkapo vyache vyakuti kukaba imbina izyakwambukila, utusenyenta sona ichakulya chikasoba. (Luka 21.10, 11) U Yehova akabombezya naloli abanavuli abasubaliwa Abachikilisitu aba ukuti abavwe abantu bache.

12-13. Nkimba pakapangiwa ndondomeko buli ukuti yavwe imbombo iyakulumbilila nu kumanyisya pa kabalilo aka Nkondo iya Bubili iya Pachisu Chosi?

¹² Inong’onela sona ivintu vyo vikabombiwa pa kabalilo ko Inkondo iya Bubili iya Pachisu Chosi yikabombiwanga. Abakamu aba ku hedikota bakati bamanyila isimbo ilya Ubuvumbuli 17.8, bakivwisya ukuti inkondo iyi yitakabalongozezyanga ku Alamagedoni, loli ku kabalilo akamutende ko kakwiza pakupeleka ulusako ulwakuti imbombo iyakulumbilila yibuke pantazi. Napo pa kabalilo kala vikabonekagha ukuti vitangabombiwa, loli abakamu bo bakatangililagha igulu ilya Yehova bakandisya Isukulu iya Giliyadi ukuti babamanyisye abakamu na bayemba ukuti babe bamishonale umwakuti balumbililaghe nu kumanyisya akiza pachisu chosi ichapasi. Napo inkondo yikaba ukuti yichili yikubombiwa, loli igulu lya Yehova likabatumagha abamishonale. Umwakongelezyapo, uwambombo umusubaliwa akandisya isukulu yo yikitiziwanga ukuti Sukulu ya Utumiki wa Mulungu, b yo yikabamanyisyanga abakamu na bayemba muvipanga ukuti balumbililaghe nu kumanyisya akiza. Izila izi zikabavwa abantu aba Chala ukuba bakwisengannya pakubomba imbombo iyakulumbilila yo bakaba nayo muntazi.

¹³ Amasiku ghano nanti tukwennya ivintu mo vikabelagha kwisinda, vikutwavwa ukwagha ubukaboni ubwakulangizya ukuti u Yehova weyo akabalongozyanga abantu bache mu kabalilo akakutamya kala. Ukwanda bulo pa kabalilo ko Inkondo iya Bubili iya Pachisu Chosi yikamalila, abantu aba Yehova muvyisu ivyinji bakuhoboka nu bwabuke bo bali nabo sona bali pamutende uwakubomba imbombo iyakulumbilila. Ukunena ubwanaloli, ichifukwa cha mbombo iyakulumbilila pachisu chosi, abantu abinji bamumanya u Yehova sona baba babombi bache.

14. Choni cho tungasubila ubulongozi ubwakufuma ku gulu ilya Yehova na ku basongo bo asalite? (Ubuvumbuli 2.1) (Ennya sona ichituzi.)

 ¹⁴ Amasiku ghano abakamu bo bali mu Kagulu Akakwenelezya bakubukilila ukulondelezya ubulongozi ubwakufuma kwa Kilisitu. Bakulonda ukuti ubulongozi bo bakupeleka ku bantu, ghukolelanaghe na vyo u Yehova nu Yesu bakulonda. Pisinda pache, abakwendela idela na basongo bakupeleka ubulongozi ughu kuvipanga. c Abasongo abapakaziwa bali “munyobe yache indilo” iya Kilisitu. (Belenga Ubuvumbuli 2.1.) Napo vili bubunu, loli abasongo bosi aba bambula ukufikapo sona akabalilo kamo bakupuvya ivintu. Pa kabalilo kamo u Mozesi nu Yoshwa bope bakapuvyapo ivintu ngati mo bakabombela abatumiwa. (Kuba. 20.12; Yoswa 9.14, 15; Loma 3.23) Loli tuli nu bukaboni bosi bo bukulangizya ukuti u Yesu akubikapo umoyo pakulongozya uwambombo umusubaliwa, abasongo abasaliwa sona inti abukilile ukubomba bunubu “akabalilo kosi mupaka kubumalilo ubwa chisu ichapasi.” (Mata. 28.20) Cho chifukwa tuli ni vifukwa ivyakukwana ivyakusubila ubulongozi bo akutupa ukwendela mu bantu bo asalite ukuti balongozyanje.

TUKUPINDULA SANA NANTI TUKUBUKILILA UKUKONKA UBULONGOZI UBWA YEHOVA

15-16. Nkimba mwamanyilako ichoni ku bantu bo bakakonka ubulongozi ubwa Yehova?

¹⁵ Nanti tukubukilila ukukonka ubulongozi ubwa Yehova, tukwagha amalusayo aghinji pa kabalilo kano. Umwakufwanikizya, u Andy nu Robyn bakabombezya ubulongozi ubwakufuma ku wambombo umusubaliwa ukuti bikale ubumi ubwambula ukulonda ivyinji. Ivi vikapangisya ukuti bakwanisye ukwiyipa umwakuti bavwepo pa mbombo iya vyakuzenga-zenga. U Robyn akanena ukuti: “Pa kabalilo kamo tukikalagha mu tunyumba utunandi utwakuti tutakabanga ni kichini. Sona nkaghuzya amakamela ghane gho nkajambulilagha napo imbombo iya kujambula nkayighanagha hee. Nkati naghulizya nkalila. Loli ngati we Sala umuchi uwa Abulahamu, nkasimikizya ukuti ntakabe ni chitima pa vintu vyo nabomba, loli imbe ne wakuhoboka ni vintu vyo nkukwanisya ukubomba pa kabalilo aka pakumubombela u Yehova.” (Hebe. 11.15) Nkimba imbumba iyi yikapindula buli-buli na vyo yikabomba? U Robyn akanena ukuti: “Swe bakuhoboka sana ichifukwa chakuti tukumanya ukuti tukumupa u Yehova vyosi vyo tuli nacho. Pa kabalilo ko tukubomba imbombo yo u Yehova atupiye nu mulume wane, vikutwavwa ukwennya ichituzi icha mo ubumi bukwiza pakubela muchisu ichipya.” U Andy akakolelana ni fundo iyi po akanena ukuti: “Swe bakuhoboka sana ichifukwa chakuti tukumubombela  u Yehova na kabalilo sona na maka ghitu ghosi.”

¹⁶ Ka tukupindula sona buli-buli nanti tukubukilila ukukonka ubulongozi ubwa Yehova? Umwakufwanikizya, u Marcia akati amalizya isukulu yache ku sekondale, akalondagha naloli ukukonka ubulongozi bo akapokela ubwakuti ande ubupayiniya ubwakabalilo kosi. (Mata. 6.33; Loma 12.11) Umuyemba uyu akanena ukuti: “Nkaba nu lusako ulwakuti inje manyile ku yunivesite ukwa myaka 4 ukwabulele. Loli une nkalondagha ukubomba ivyinji pakumubombela u Yehova. Mumalo mwakusala ukubuka ku yunivesite, nkasala ukuti manyile isukulu iyakumanyisya ivya bizinesi umwakuti yinavwe ukwagha indalama zyo zinganavwa pa kabalilo ko nkupanga ubupayiniya. Ichi chikaba chakusala ichiza cho nkaba ukuti ntasalitepo lumo pa bumi bwane. Pa kabalilo aka nkuhoboka sana pakupanga ubupayiniya ubwakabalilo kosi sona indondomeko yane yikunitikizya ukuti imbombelagheko pa Beteli nu nkuhoboka pakumubombela u Yehova muzila izyakupambana-pambana.”

17. Nkimba tukupindula sona buli-buli nanti tukubukilila ukukonka ubulongozi ubwa Yehova? (Yesaya 48.17, 18)

¹⁷ Akabalilo akinji, tukupokela ubulongozi bo bukutufighilila ukuti tutakaghanaghe nkani indalama sona ukuti tuleghuke ivintu vyo vingatupangisya ukuti tupotwe ukukonka indaghilo izya Chala. Pa kabalilo aka, nuswe bulo tukusayiwa nanti tukubukilila ukukonka ubulongozi bo u Yehova akutupa. Vikutwavwa ukuti tubukilile ukuba nu mabyebye umwiza sona ukuti tuleghuke intamyo izyinji zyo zingabapo. (1 Timo. 6.9, 10) Ivi vikupangisya ukuti tumwiputaghe u Yehova nu moyo witu ghosi, tukuba bakuhoboka, abamutende sona bakwikutisiwa ni vintu vyo tuli navyo.—Belenga Yesaya 48.17, 18.

18. Choni cho mwasimikizya ukuti inti mubukilile ukukonka ubulongozi ubwa Yehova?

¹⁸ Tutakukayikila ukuti u Yehova inti abukilile ukubombezya abantu pakupeleka ubulongozi pa kabalilo aka ntamyo inkulu sona Mubulaghili uwa Myaka 1,000. (Sali. 45.16) Ka inti twize tubukilile ukukonka ubulongozi napo akabalilo kamo tukwiza pakulondiwa ukuti tuvileke ivintu vimo vyo tuvighanite? Chingize chibe chipepe ukwivwila nanti pa kabalilo aka tukwivwila ubulongozi ubwa Yehova. Polelo akabalilo kosi za tubukilile ukukonka ubulongozi ubwa Yehova, ukongelezyapo bo akutupa ukwendela mu banavuli bo abasalite ukuti batulongozyanje. (Yesa. 32.1, 2; Hebe. 13.17) Tungamukonka Umulongozi witu u Yehova nu lusubilo lwitu losi ichifukwa chakuti akutufighilila ku vintu vyo vingananga ubumanyani bwitu nu kutulongozezya ku bumi ubwa bwila na bwila muchisu ichipya.