Napo vili bunubu loli u Yehova akulonda ukuti tubukilile ukulindilila akabalilo ko asalite. Choni cho u Yehova akusubila ukuti inti tubombe bunubu? Choni cho chingatwavwa ukuti tube bakuhoboka po tukulindilila?

CHONI CHO U YEHOVA AKUSUBILA UKUTI INTI TUKWANISYE UKULINDILILA?

Ibayibolo likunena ukuti: ‘U Yehova akulindilila ukuti abalangizye ubwiza sona akwiza pakunyamuka nu kubalangizya ichisa. Pakuti u Yehova we Chala umugholosu. Bakuhoboka bosi bo bakumulindilila.’ (Yesa. 30.18) Amazyu agha Yesaya agha ghakanenagha nkani izya Bayuda bo bakaba na madinko. (Yesa. 30.1) Loli pakasi pabo pakaba Bayuda bamo bo bakaba basubaliwa sona amazyu agha ghakabapanga ulusubilo. Amazyu ghanagha ghakubapa sona ulusubilo ababombi ba Yehova abamasiku ghano.

Polelo tubaghiye ukuba bafisalyoyo po tukulindilila, ichifukwa chakuti u Yehova wepe akulindilila umwabufisalyoyo. Asaliye zila akabalilo ko akwiza ukwefya ivintu vyosi ivibibi sona akulindilila isiku na kabalilo ko asalite. (Mata. 24.36) Pa kabalilo ako, ivintu vyosi vyo u Satana akumunena u Yehova na babombi bache vikwiza pakumanyikwa ukuti vyabumyasi. Akwiza pakumwefyapo u Satana na bantu bosi bo bali ku chigaba chache, loli akwiza ‘ukutupelela ichisa.’

Pa kabalilo aka u Yehova atangefyapo intamyo zyosi zyo tukukomana nazyo, loli akutusimikizya ukuti tungaba twe bakuhoboka po tukulindilila. Ngati mo u Yesaya akanenela, tungaba swe bakuhoboka po tukulindilila ichintu chimo ichiza cho tukuchilonda kumaka ukuti chibombiwe. (Yesa. 30.18) a Ka tungaba buli-buli swe bakuhoboka? Za twennye izila 4 zyo zingatwavwa.

MO TUNGABELA BAKUHOBOKA PO TUKULINDILILA

Mwinong’onelaghe ivintu ivyiza vyo vikubombiwa pa bumi bwinyu. Umwene u Devedi akakomana ni vintu ivibibi nkani pa bumi bwache. (Sali. 37.35) Napo vikaba bunubu akasimba ukuti: ‘Ikala mye pamaso pa Yehova nu kulindilila umwabufisalyoyo. Utakakalalaghe nu muntu yo ivintu vikumwendela akiza.’ (Sali. 37.7) U Devedi akabombezya ubulongozi ubu  nu kusubila ukuti u Yehova inti amupoke. Akaba sona wakupalizya pa vintu vyosi ivyiza vyo u Yehova akamubombela. (Sali. 40.5) Nanti nuswe bulo tukwennya ivintu ivyiza vyo vikubombiwa pa bumi bwitu nu kusita ukwennya ivintu ivibibi vyo vikubombiwa, chikwiza ukuba chipepe ukumulindila u Yehova.

Mubombezyange ulusako losi lo mungaba nalo pakunena ivya Yehova. U Devedi yo akasimba Salimo 71, akanena ukuti: ‘Inti mbukilile ukulindilila, inti mbukilile ukubapala.’ (Sali. 71.14) Ka u Devedi akamupala buli-buli u Yehova? Akababuzyanga abanji ivyakukwafannya nu Yehova nu kwimba inyimbo izyakumupala. (Sali. 71.16, 23) Ngati we Devedi, nuswe bulo tungaba bakuhoboka po tukumulindila u Yehova. Tukumupala nanti tukulumbilila, mu vyakunena vyitu ivyi siku ni siku sona nanti tukwimba inyimbo izyakumupala. Pakabalilo ko mukwiza ukwimba ulwimbo lwitu lumo, mwize mwinong’onelepo nkani amazyu agha mu lwimbo ulo nu kwennya mo ghakubatulila ukuti mube bakuhoboka.

Mungalimbikisiwa nanti mukupaghula akabalilo akakwangalila na bakamu na bayemba. Akabalilo ko u Devedi akakomana ni ntamyo, akamubuzya u Yehova ukuti: ‘Pamaso pa basubaliwa binyu, inti nsubile mwi zina lyinyu.’ (Sali. 52.9) Nuswe bulo tungalimbikisiwa nanti tukuba poka na bakamu na bayemba bitu. Te po pakabalilo aka nkomano kene pamo mu bulumbilili po tungakazannya, loli na pa kabalilo ko tukwangala bulo.—Loma 1.11, 12.

Mughomye ulusubilo lwinyu. Pa Salimo 62.5 pakunena ukuti: ‘Nkumulindilila u Chala umwachimyamya pakuti ulusubilo lwane luli mumwache.’ Chakulondiwa sana ukuba nu lusubilo ulwakughoma nkani-nkani nanti ubumalilo bukuchedwa ukwiza ukuyana na mo twinong’onelagha. Tube bakusimikizya ukuti vyo u Yehova atulayizizye vikwiza pakukwanilisiwa napo tungalindilila ukwa kabalilo akatali. Tungaghomya ulusubilo lyitu umwakumanyila Amazyu gha Chala, ukumanyila amabulaghuzi nu kwennya ukukolelana ko kulipo pa bantu bo bakasimba Ibayibolo ni vintu vyo u Yehova akuvumbula. (Sali. 1.2, 3) Sona tukulondiwa ukubukilila ukwiputa ‘ukwendela mu maka agha muzimu umuzelu’ ukuti tubukilile ukuba pa bumanyani ubwiza nu Yehova po tukulindilila ukuti ilayizyo ilyakwiza ukuba nu bumi kwa bwila na bwila likwanilisiwe.—Yuda 20, 21.

Ngati we Mwene u Devedi, mube nu lusubilo ukuti u Yehova akubennya bosi bo bakumulindilila nu kubalangizya ulughano lwache ulusubaliwa. (Sali. 33.18, 22) Mubukilile ukumulindilila u Yehova umwabufisalyoyo umwakubika inyinong’ono pa vintu ivyiza vyo vikubombiwa pa bumi bwinyu, umwakumupala sona umwakulimbikisiwa na bakamu na bayemba nu kubukilila ukughomya ulusubilo lwinyu.