INKANI IYAKUMANYILA 4
U Yehova Akutusaya Pala Tukuyezya-yezya Ukwaghiwapo Pakukumbukila Imfwa iya Yesu
“Mubombaye zinizi ukuti munkumbukilayepo.”—LUKA 22.19.
ULWIMBO 19 Mugonero wa Fumu
VYO INTI TUMANYILE a
1-2. Choni cho tukukumbukila imfwa iya Yesu umwaka ghulighosi?
IMYAKA 2,000 yo yendapo, u Yesu akapeleka ubumi bwache chifukwa cha bantu bosi, ukuti bize babwaghe ubumi ubwa bwila na bwila. Ubusiku ubwabumalilo, akabalamula abamanyili bache ukuti bakumbukilaye ulughano lo akabalangizya umwakubombezya imbombo ichibama sona ni vinyo.—1 Kol. 11.23-26.
2 Akabalilo kosi, tukwivwila vyo u Yesu akanena chifukwa tumughanite nkani. (Yohani 14.15) Twebosi tukulangizya ukuti tukupalizya vyo u Yesu akatubombela, nanti tukwayiwapo pakukumbukila imfwa yache. Pakabalilo akakukumbikila imfwa iya Yesu, tubaghiye ukwinong’onelapo sona nukwennya mo imfwa yache yikubatulila abantu. Pakabalilo aka tukuba swe bakuhoboka sana ichifukwa chakuti, tukubitizyako abamwitu ukuti bize ku chakubombiwa ichapamwanya ichi. Sona tutakwitikizya nachimo-chimo ukuti chitupotwesye ukwayiwapo pa kukumbukila imfwa iya Yesu.
3. Ka mu nkani iyi inti tumanyile ichoni?
3 Mu nkani iyi, inti tumanyile izila zitatu zyo abantu ba Yehova bakuyezya-yezya ukubomba ukuti ulukomano ulwa kukumbukila imfwa iya Yesu lwize lwende akiza: (1) Pakubomba pamo ukonka izila zyo u Yesu akababuzya ukuti babombaghe, (2) bakubitizyako abamwabo ukuti bize bakumbukile poka imfwa iya Yesu sona (3) nangabuli pangaba ivintu vyo vingabapotwesya ukuti bayiwepo loli bakuyezya-yezya ukuti baghiwepo.
ICHAKUBOMBIWA CHO U YESU AKANDISYA
4. Ka fundo buli zyo tukumanyila pakukumbukila imfwa iya Yesu? Sona choni cho tutakubwennya ubwanaloli ubu umwakupepuka? (Luka 22.19, 20)
4 Umwaka ghulighosi po tukukumbukila imfwa iya Yesu, tukwivwisya inkani iya mu Bayibolo. Inkani iyi yikwamula amalalusyo aghingi gho tungaba nagho, sona tukumanyila mo imfwa iya muntu weka yingatulila abantu abinji ukuti imbibi zyabo zihobokeliwe. Tukukumbusyiwa sona vyo ichibama nu vinyo vikwimila na bantu bo babaghiye ukulya. (Belenga Luka 22.19, 20.) Pakabalilo aka, tukwinong’onela sona amalusayo gho tukwiza pakupokela mu chisu ichipya. (Yes. 35.5, 6; 65.17, 21-23) Ubu bwanaloli bo tutakulondiwa ukubwennya umwakupepuka. Abantu amabiliyoni aghinji batabumenye ubwanaloli sona batakupalizya isembe iya Yesu. Batakupalizya ukulondiwa kwa sembe iya Yesu. Abantu abanji batakukumbukila imfwa iya Yesu ngati mo u Yesu akanenela. Chifukwa buli?
5. Ka abamanyili ba Yesu aba bwanaloli bakubavwa buli-buli abantu pankani iyi?
5 Akabalilo kati kendapo, muchipanga icha bwanaloli mukingila abakilisitu ababumyasi bo abatumiwa ba Yesu bafwa. (Mat. 13.24-27, 37-39) Abantu aba bakanenagha ubumyasi nu kubadeba abamanyili ukuti babakonke (Imbo. 20.29, 30) Abene bakasusya ichimanyisyo ichakuti ‘u Kilisitu akabikiwa lyoka bulo ukuba chakwiyipa ukwefya imbibi izya bantu abinji,’ bakanenagha sona ukuti isembe iya Yesu yibaghiye ukupelekiwa umwakupyanizya-pyanizya. (Heb. 9.27, 28) Ichachitima chakuti, abantu abingi bakusubila ubumyasi ubu amasiku agha. Bamo bakukomana usabata aliwesi, bamo isiku lililyosi ukuti baye bapeleke isembe iya misa. b Ivipanga vimo vikukomana poka ukuti vikumbukile imfwa iya Yesu, nangabuli abantu babo batakumanya ukuti imfwa iya Yesu yikung’anamula choni. Bamo bakwilalusya ukuti: Ka imfwa iya Yesu yingapangisya naloli ukuti imbibi zyane zihobokeliwe? Choni cho bakwilalusya ilalusyo ili? Bakwilalusya ilalusyo ili ichifukwa chakuti, bakuzimbuliwa na balongozi babo bo bakubamanyisya ukuti isembe iya Yesu yitangabavwa ukuti imbibi zyabo zihobokeliwe.
6. Ka chamuma 1872 akagulu akakumanyila Ibayibolo kakivwisya ichoni?
6 Cha muma 1800 akagulu ko kakalongoziwanga nu Charles Taze Russel, kakanda ukumanyila Ibayibolo ukuti balivwisye akiza. Bakalondagha ukumanya ubwanaloli ubwakukwafannya ni sembe iya Yesu sona namo bangabombela pakukumbukila imfwa yache. Ukufika cha muma 1872, bakivwisya ubwanaloli ubwakuti u Yesu akiyipa ukupoka abantu bosi. Bakati bamanya ubwanaloli ubu, batakabusunga bulo loli bakanda ukulumbilila pakubombezya amabuku, ama nyuzipepala sona namagazini. Bakati bamanya ubwanaloli ubu bakanda pakukumbukila imfwa iya Yesu ngati mo aba Kilisitu ababwandilo bakabombelagha.
7. Ka tukupindula buli-buli navyo abamanyili aba Bayibolo bakafufuza?
7 Amasiku ghano, tukupindula sana navyo aba Kilisitu abasubaliwa aba bakafufuza. Buli-buli? Nubutuli bwa Yehova, twighuka kumaso nukumanya ubwanaloli ubwakukwafannya ni sembe iya Yesu sona navyo yikwiza pakutubombela. (1 Yohani 2.1, 2) Twamanya sona ukuti, Ibayibolo likulongosola ivya bantu bo bakwiza pakwikala pachisu ichapasi, sona ni vya bantu bo bakuya pakwikala kumwanya nubumi ubwambula ukufwa. Pakumanya ulughano lo u Yehova nu Mwana wache batulangizizye, namo tukupindulila ni sembe iya Yesu vikutwavwa ukuti tube pabumanyani ubwiza nu Yehova. (1 Pit. 3.18; 1 Yohani 4.9) Ngati ba Kilisitu aba bwandilo, nuswe bulo tukubitizizyako abamwitu ukuti twize tukumbukile poka imfwa ya Yesu nu kubomba vyo akanena.
ABANTU ABA YEHOVA BAKUBITIZYAKO ABAMWABO UKUTI BIZE BAKUMBUKILE IMFWA IYA YESU
Ka mungabomba ichoni ukuti mube na kabalilo akakukwana akakwitizizya abantu pakukumbukila imfwa iya Yesu? (Ennya indime 8-10) e
8. Ka abantu ba Yehova babomba ichoni ukuti babitizyeko abamwabo pakukumbukila imfwa iya Yesu? ( Ennya ichituzi.)
8 Kwakabalilo akatali, abantu ba Yehova bakubitizyako abamwabo ukuti bize bakumbukile imfwa iya Yesu. Mu 1881, abakamu na bayemba ku United States bakapangana ukuti baye bakomane poka mu nyumba ku Allegheny Pennsylvania ukuti bapangile poka ichakubombiwa ichapadela ichi. Ukufuma apo, ichipanga chilichosi chikanda ukupanga pachene. Mu Malichi 1940, abalumbilili bakanda ukwitizyako abantu bo bangalonda ukuti bapangile poka ichakubombiwa ichapadela ichi. Mu 1960 kakaba kabwandilo ukuti Ibeteli yipeleke utupepala kuvipanga, utwa kwitizizya abantu ku lukomano ulwa kukumbikila imfwa iya Yesu. Ukufuma pakabalilo kala, pagabiliwa utumapepala amabiliyoni aghinji utwakwitizya abantu ukuti bize bakumbukile imfwa iya Yesu. Choni cho tukulimbikila ukubitizyako abanji?
9-10. Ka wewenu yo akupindula, pala tukubikapo umoyo pakubitizyako abantu ku lukomano ulwa kukumbukila imfwa iya Yesu?
9 Ichifukwa choka cho tukubitizizyako abamwitu ukuti bize bayiwepo pakukumbukila imfwa ya Yesu chakuti, tukulonda ukuti pala biza baghiwapo, bize bamanyile vyo u Yehova nu Yesu batubombeye ukuti twize tubwaghe ubumi ubwa bwila na bwila. (Belenga Yohani 3.16.) Tukusubila ukuti vyo bakwiza pakwennya nukumanyila palukomano ulu, vingabavwa ukuti babe babombi ba Yehova loli twebosi tukupindula.
10 Tukubitizyako sona bo bakaleka ukumubombela u Yehova. Tukubomba bunubu ukuti tubakumbusye ukuti achili abaghanite. Tukuba bakuhoboka sana pala twabennya bo twabitizizye bafika. Ukwaghiwapo kukubakumbusya mo bakahobokelagha kunyuma pakumubombela u Yehova. Umuyemba yumo izina lyache u Monica, c andite sona pakulumbilila mukabalilo aka COVID-19. Mu 2021 akati afika palukomano ulwa kukumbukila imfwa iya Yesu akanena ukuti: “Ulukomano ulu lwapadela nkani kukwane. Pamyaka 20 yo yendapo ntakalumbililagha nukwitizyako abantu ku lukomano ulwa kukumbukila imfwa iya Yesu. Nkabikapo umoyo pakubomba vyosi vyo ningakwanisya pakwitizyako abamwitu, ichifukwa nkupalizya vyo u Yehova nu Yesu bambombeye pabumi bwane.” (Salimo 103.1-4) Napo bamo bakane pamo bitike pala tukubitizya pakukumbukila imfwa iya Yesu, loli tukubikapo umoyo ukubomba vyosi vyo tungakwanisya ichifukwa tukumanya ukuti u Yehova akupalizya sana pavyo tukubomba.
11. Ka u Yehova akutusaya buli- buli pambombo iya kwitizya abantu pakukumbukila imfwa iya Yesu? (Haga. 2.7)
11 U Yehova akusaya vyosi vyo tukuyezya-yezya ukubomba pakubitizizyako abantu kulokomano ulwa kukumbukila imfwa iya Yesu. Mu 2021 abantu abakukwana 21,367,603 bakaghiwapo pakumbukukila imfwa iya Yesu nangabuli pakabalilo aka pakaba intamyo zimo ichifukwa cha mulili uwa COVID-19. Abakaboni ba Yehova pachisu chosi ichapasi bakwingilamo kabili nu hafu muchibelengelo ichi. U Yehova akahoboka nkani ukuti abantu abingi bakiza pakukumbukila imfwa iya Yesu, loli ichakukolondiwa nkani kukwache chakuti akwennya umuntu aliwesi pamwene. (Luka 15.7; 1 Tim. 2.3, 4) U Yehova akutwavwa ukwagha abantu aba moyo umwiza, ukwizila mumbombo iya kwitizya abantu iyi.—Belenga Haga. 2.7.
TUKUKUMBUKILA IMFWA IYA YESU NAPO TUKUKOMANA NI NTAMYO
U Yehova akutusaya pala tukuyezya-yezya ukwayiwapo pakukumbukila imfwa iya Yesu. (Ennya indime 12) f
12. Choni cho chingaba chakutamya ukwayiwapo pakukumbukila imfwa iya Yesu? (Ennya ichituzi)
12 U Yesu akanenela zila ukuti mu masiku aghabumalilo tukwiza pakukomana ni ntamyo izyakupambana-pambana ngati ukususannya naba mu nyumba yitu,ukupinyiwa, inkondo imilili sona nivinji ivyamwabo. (Mat. 10.36; Mlko. 13.9; Luka 21.10, 11) Pakabalilo kamo ivintu ivi vingapangisya ukuti chibe chakutamya ukuti ukwayiwapo pakukumbikila imfwa iya Yesu. Nkimba abakamu na bayemba bakubomba buli-buli pakulimbana nintmyo ngati izi? Sona ka u Yehova akubavwa buli-buli?
13. Ka u Yehova akamusaya buli-buli u Artem pa vyo akayezya-yezya ukubomba ukuti akumbukile imfwa iya Yesu napo akaba mu jele?
13 Ukupinyiwa. Abakamu bitu bo bali mujele ichifukwa cha lwitiko lwabo, bakubomba chilichosi cho bangakwanisya ukuti bakumbukile imfwa iya Yesu. Inkani iya Artem yikutwavwa ukwivwisya mo babombela. Mu 2020 pakabalilo akakumbukila imfwa iya Yesu umukamu uyu akaba ukuti ali ku jele, bakamubika mukachipinda akanandi mo mukaba abakayidi abakukwana 5. Napo umukamu akaba mu jele loli akavyagha vyosi ivyakulondiwa ivyakuti abombezye pakukumbukila imfwa iya Yesu. Ukufuma apo akisengannya pakunena inkani iyakukumbukila imfwa iya Yesu, na mapindu gho tukughagha. Abakayidi abamwabo bakwebagha itumba sona bakatukanagha. Ka umukamu uyu akabomba buli-buli? Akabalaba ukuti baleke ukukweba itumba nu kutukana kwa 1 awala. U Artem’s akaswigha chifukwa bosi bakivwila, bakaleka ukukweba nu kutukana mpaka pabumalilo ubwa kukumbukila imfwa iya Yesu. U Artem’s akati: “Nkisengannya ukubabuzya vyosi ivyakukwafannya nu kukukmbila imfwa iya Yesu.” Nangabuli bakanena ukuti batakulonda ukwivwa, loli pabumalilo bo u Artem amala pakunena inkani, bakamulalusya amalalusyo aghakukwafannya nichakubombiwa ichi.
14. Ka abantu ba Yehova bakabomba buli-buli mu kabalilo aka COVID-19 pakukumbukila imfwa iya Yesu?
14 Imbina iya COVID-19. Abantu ba Yehova bakapotwa ukuti bakomane poka pakukumbukila imfwa iya Yesu, bo imbina iya COVID-19 yatamya nkani. Loli ivi vitakapangisya ukuti bapotwe ukukumbukila imfwa iya Yesu. d Ivipanga ivyinji vyo vikaba nu lusako ulwa intaneti vikapangila pa vidiyo komfelesi pakukumbukila imfwa iya Yesu. Loli ka bantu mamiliyoni bo batakaba nu lusako ulwa intaneti bakabomba buli-buli? Mu vyisu vimo bakapanga indondomeko iyakuti inkani iyakukumbukila imfwa iya Yesu yibikiwe pa TV napa wayilesi. Umwakongelezyapo, bakamu ku Beteli bakajambula inkani mu vinenelo ivyakupululila 500 ukuti bakamu na bayemba bo bwakwikala mutwaya nkani kokutangaghiwa intaneti, ukuti bope bakumbukile imfwa iya Yesu. Abasongo abachipanga bakasendagha inkani nu kugabila abakamu na bayemba.
15. Ka tukumanyilako ichoni kwa Sue?
15 Nanti abamumbumba yitu bakutususya. Ku bantu bamo chikuba chipala ukuti baghiwepo pa malo aghakukumbukila imfwa iya Yesu, ichifukwa chakuti abamumbumba yabo bakubasusya. Umwakufwanikizya, mu 2021 umumanyili uwa Bayibolo yumo izina lyache u Sue, akamubuzya yo akamanyilagha nawe Ibayibolo ukuti, te ize akwanisye ukwayiwapo pakukumbukila imfwa iya Yesu, pachifukwa chakuti abamumbumba yache bakamususyanga. Yo akamayilagha nawe Ibayibolo akamubelengela isimbo ilya Luka 22.44 nu kumubuzya ukuti: “Pala ukukomana ni ntamyo, ubaghiye ukubomba ngati we Yesu umwa kwiputa kwa Yehova nu kumusubila nu moyo wako ghosi.” Isiku ilyakukonkapo u Sue akalonda ichibama sona ni vinyo ukuti abombezye pukukumbukila imfwa iya Yesu. Akenelezya ipulogilamu iya Kwiputa ukwa pandabi-ndabi pa jw.org. Ichamabwila akakumbukila imfwa iya Yesu pa foni yache. Pabumalilo u Sue akamusimbila yo akamumanyisyanga Ibayibolo ukuti: “Wangomizye sana mabwila, umwakuti nakwanisizye ukukumbukila imfwa iya Yesu, nkupotwa nukulongosola mo ghobokeye.” Ka numwe mukusubila ukuti u Yehova angabavwa ngati we Sue?
16. Choni cho tukusubila ukuti u Yehova inti izi atusaye pala tukwaghiwapo pakukumbukila imfwa iya Yesu?
16 U Yehova vikumughobosya hee pala tukwaghiwapo pakukumbukila imfwa iya Yesu. Tukuba nu lusubilo losi ukuti, u Yehova inti ize atusaye pala tukupalizya pa vyo atubombeye. (Belenga Aba Loma 8.31, 32.) Twize tube nivyakubomba ivyinji mukabalilo akakumbukila imfwa iya Yesu.
ULWIMBO 18 Kuwonga Sembe Yakuwombora
a Pa Chibili, Epulelo 4, 2023, abantu ama miliyoni aghinji bakwiza pakukomana poka ukuti bakumbukile imfwa iya Yesu. Abantu bo kabwandilo ukwayiwapo sona nabo bakaleka ukumubombela u Yehova akabalilo akatali, bope bakwiza pakwayiwapo. Bamo bakukomana ni ntamyo zyo zingabapangisya ukuti manyi bafikeko ku lukomano ulu, loli bakuyezyayezya ukuti bize baghiweko. Mulimosi mo ivintu vingabela pabumi bwinyu tukumanya ukuti mukwiza pakuyezya-yezya ukuti mwize mwaghiwepo. Sona u Yehova akwiza pakuhoboka nkani ichifukwa icha kwipeleka kwinyu.
b Bo abatumiwa ba Yesu bafwa, choni cho chikanda pakubombiwa pakukumbukila imfwa iya Yesu? Pakabalilo akakukumbukila imfwa iya Yesu, abantu abinji bakwinong’ona ukuti ichibama nu vinyo vikusinta naloli nukuba mubili sona ni banda ilya Yesu. Bakwinong’ona ukuti umubili ni banda ilya Yesu vikulondiwa ukupelekiwa akabalilo kosi ko bakomana.
c Amazina ghamo mu nkani iyi ghasinta.
d Ennya inkani yo yili pa jw.org iya mutu uwakuti “Kukumbukira Nyifwa ya Yesu Khristu mu 2021.”
