1. Chifukwa buli isiku ilya Kukumbukila Imfwa ya Yesu lya pamwanya nkani pa mwaka? (Luka 22.19, 20)

 KU BANTU aba Yehova isiku ilya kukumbukila Imfwa ya Kilisitu likuba lisiku ilya pamwanya nkani pa mwaka. Cho chakubombiwa chene cho u Yesu akabalamula abamanyili bache ukuti babombaghe. (Belenga Luka 22.19, 20.) Pali ivifukwa ivyiza vyo tukubela ni chinyonywa po tukulindilila Ukukumbukila Imfwa ya Yesu. Za twennye vimo umwavifukwa ivi.

2. Nkimba vifukwa buli ivyamwabo vyo tukulindilila umwa chinyonywa isiku ilya Kukumbukila Imfwa ya Yesu?

² Ukukumbukila Imfwa ya Yesu kukutwavwa ukuti twinong’onelaghepo ukulondiwa ukwa sembe. Kukutukumbusya izila zyo tungalangizizya ukuti tukupalizya isembe iya Yesu. (2 Koli. 5.14, 15) Kukutupa sona ulusako ulwakuhoboka “pakukazannya” na bakamu na bayemba bitu. (Loma 1.12) Umwaka ghulighosi, abakamu na bayemba bitu bo bakaleka pakwiza ku nkomano izya chipanga bakwayiwapo pa Kukumbukila Imfwa ya Yesu. Bamo bakufika na pa kunyokela kwa Yehova ichifukwa cha mo tukubapokelela umwakuhoboka. Sona abantu abinji bo bali ni chinyonywa bakwanda pakwenda pa zila iya kuya kubumi nanti bennya nu kwivwa vyo twamanyila. Vyosi ivi vikupangisya ukuti isiku ilya Kukumbukila Imfwa ya Yesu likuba lyapalubazu nkani kwa uswe.

3. Nkimba Ukukumbukila Imfwa ya Yesu kukupangisya buli-buli ukuti tube swe bakukolelana pachisu chosi ichapasi? (Ennya sona ichituzi.)

³ Inong’onelapo sona mo Ukukumbukila Imfwa ya Yesu kukututulila ukuti tube bakukolelana pachisu chosi ichapasi pisiku ili. Pachisu chosi Abakaboni ba Yehova bakukomana poka po izuba likwingila. Tukwivwisya inkani yo yikulongosola ukulondiwa ukwa sembe iya Yesu. Tukwimba inyimbo zibili izya kulangizya ukupalizya, tukwendesya ichibama nu vinyo sona tukunena nu moyo ghosi ukuti “ameni” pa nyiputo folo zyo zikubapo. Mukasi-kasi mwa maawazi 24, ivipanga vyosi ivya Bakaboni ba Yehova vikuba ukuti vyabomba umwakuyana bulo. Ka munginong’onela mo u Yehova nu Yesu  bakuhobokela sona bakwiyivwila nanti bakutwennya ukuti tukukolelana pakubapala muzila yiniyi?

4. Nkimba munkani iyi inti tunenezannye ichoni?

⁴ Munkani iyi inti tunenezannye amalalusyo agha: Ka tungisengannya buli-buli mu moyo witu pa Kukumbukila Imfwa ya Yesu? Ka tungabavwa buli-buli abanji ukuti bope bize bapindule? Sona ka tungabavwa buli-buli abakamu na bayemba bitu bo bakaleka pakwiza pa nkomano? Amaansala agha malalusyo agha inti ghatwavwe ukuti tube swe bakwisengannya Ukukumbukila Imfwa ya Yesu.

KA TUNGISENGANNYA BULI-BULI MU MOYO WITU PAKUKUMBUKILA IMFWA YA YESU?

5. (a) Choni cho tukulondiwa ukwinong’onelapo nkani ukulondiwa ukwa sembe? (Salimo 49.7, 8) (b)  Nkimba mukumanyilamo choni muvidiyo iyakuti Chifukwa Wuli Yesu Wakafwa?

⁵ Izila yoka iyakulondiwa sana iya mo tungisenganizizya umoyo witu pa Kukumbukila Imfwa ya Yesu, ko kwinong’onelapo ukulondiwa ukwa sembe iya Yesu Kilisitu. Pa swebene nge vitakabombiwa ukuti twipoke ku bunazi nu bufwe. (Belenga Salimo 49.7, 8; Ennya sona ividiyo iyakuti, Chifukwa Wuli Yesu Wakafwa?) a U Yehova akapanga indondomeko iyakuti u Yesu ize apeleke ubumi bwache ukuti atupoke, ivi vikulangizya ukuti bosi babili bakalangizya ukwiyipa ukwapamwanya nkani. (Loma 6.23) Nanti tukwinong’onela nkani pa mo u Yehova nu Yesu bakiyipila ukuti batupoke, inti vitwavwe ukuti tupalizyange isembe. Inti tunenezannye ivintu vinandi bulo vyo u Yehova nu Yesu bakabomba ukuti bapeleke isembe. Loli ichabwandilo, ka isembe yikongannyapo vintu buli?

6. Nkimba isembe yikongelezyapo sona choni?

⁶ Isembe mutengo gho ghukupelekiwa ukuti utabule ichintu chimo. Umuntu uwabwandilo u Adamu po akapeliwanga akaba wakufikapo. Akati ananga, atakaluza mwene ubumi ubwakwikala kwa bwila na bwila loli abana bache bope bakaluza. Ukuti ivintu vyo u Adamu akatagha vinyokelepo, u Yesu akapeleka ubumi bwache ubwakufikapo ngati sembe. Pa kabalilo ko akaba pachisu ichapasi u Yesu “atakabombapo nayimo-yimo imbibi sona nayumo-yumo umuntu yo akamwivwapo akunena ubumyasi pa mulomo wache.” (1 Pita. 2.22) Pa kabalilo ko u Yesu akafwa, ubumi bwache ubwakufikapo bukanyosezyapo ivintu vyosi nu bumi bo u Adamu akatagha.​—1 Koli. 15.45; 1 Timo. 2.6.

7. Nkimba ngelo buli zimo zyo u Yesu akakomana nazyo po akaba pachisu ichapasi?

⁷ Pa kabalilo ko akaba pachisu ichapasi u Yesu akabukilila ukumwivwila u Yehova pa chilichosi napo akabalilo kamo vikabanga vyakutamya ukubomba bunubu. Pakuba mwana, u Yesu yo akaba wakufikapo akalondiwanga ukwivwila abapapi bache bo batakaba bakufikapo. (Luka 2.51) Akati aba wachinyamata akalondiwanga ukujimba ku vintu vyo nge vikamupangisya ukuti aleke ukubivwila abapapi bache pamo ukuleka ukuba musubaliwa kwa Yehova. U Yesu akati akula, akalondiwanga ukujimba ku ngelo zyo u Satana akamughelagha nazyo, ukongelezyapo ukumubuzya pabuzelu ukuti aleke ukuba musubaliwa kwa Chala. (Mata. 4.1-11) U Satana akalondagha ukuti u Yesu anange umwakuti apotwe ukupeleka isembe.

8. NKimba ntamyo buli izyamwabo zyo u Yesu akajimba?

⁸ Pa kabalilo ko u Yesu akalumbililagha pachisu ichapasi akajimba sona ku ngelo izyamwabo. Abalwani bache bakamunyozagha sona bakalondagha ukumughogha. (Luka 4.28, 29; 13.31) Akalondiwanga sona ukujimba ku vintu vyo abamanyili bache bakapuvyanga. (Mali. 9.33, 34) U Yesu bakamunyozagha muzila izyakupambana-pambana sona bakamusekagha umwakukozya isoni. Pisinda pache bakamunyoza ngati chigebenga sona muzila iya kukozya isoni. (Hebe. 12.1-3) Pabumalilo akajimba ku ngelo yache iyabumalilo ukusita ubutuli ubwa Yehova. b​—Mata. 27.46.

9. Nkimba tukwiyivwa buli-buli ichifukwa cha sembe iya Yesu? (1 Pitala 1.8)

 ⁹ U Yesu akatamiwa sana ukuti apeleke isembe. Nanti tukwinong’onelapo pa vintu vyosi vyo u Yesu akiyipa ukuti atusatule vikutwavwa ukuti tumughanaghe nkani​—Belenga 1 Pitala 1.8.

10. Nkimba vintu buli vyo u Yehova akaluza pa sembe iya Yesu?

¹⁰ Buli pakunena izya Yehova? Nkimba akaba wakwisengannya buli-buli ukuti u Yesu apeleke isembe? U Yehova nu Yesu bali pabumanyani ubwiza sana bo bungaba pakasi pa baba nu mwana wache umunyamata. (Mbupi. 8.30) Inong’onela mo u Yehova vikamukwafizya po akennyanga u Yesu akukomana ni ngelo pachisu ichapasi. Tutakukayikila ukuti u Yehova vikamubabagha pakwennya Umwana wache ukuti bakumubombela ivintu ivibibi, bakumukana sona akugheliwa.

11. Bombezya ichifwanikizyo cho chikulangizya mo u Yehova akiyivwilagha po u Yesu akatamiwanga.

¹¹ Umupapi aliwesi yo umwana wache afuye akumanya akiza mo chikubabila pakuluza umwana. Tuli nu lwitiko ulwakughoma ukuti bo bafuye bakwiza pakuzyuka, loli ivi vitakupangisya ukuti tutakivwe ukubaba nanti umuntu yo tumughanite afwa. Ichifwanikizyo ichi chikutwavwa ukwivwisya akiza mo u Yehova akiyivwilagha po akennyanga Umwana wache umughaniwa akutamiwa nu kufwa pa 33 C.E. c​—Mata. 3.17.

12. Nkimba tungabomba ichoni pakabalilo ko tukwisengannya Ukukumbukila Imfwa ya Yesu?

¹² Pa kabalilo aka, sona pa kabalilo ko mukwiza pa Kukumbukila Imfwa ya Yesu, ka mutangapanga indondomeko iyakumanyila pa mweka sona iya pambumba ukuti mwinong’onelaghepo izya sembe iya kutusatula? Bombezya Buku Lakupenjera Nkhani la Ŵakaboni ŵa Yehova pamo amabuku aghanji aghakumanyilila Ibayibolo ukuti mumanye ivyinji. d Sona mwenelezye ukuti mukukonka indondomeko iya kubelenga Ibayibolo mu kabalilo Akakumbukila Imfwa ya Yesu yo yikuba mu Akabuku aka Nkomano–Ubumi Bwitu Ubwachikilisitu nu Bulumbilili. Pisiku ilya Kukumbukila Imfwa ya Yesu mutakize muluvye ukwenelezya ipulogilamu iya palubazu iya kwiputa ukwa pandabi-ndabi. Nanti tukwisengannya mu moyo witu isiku ilya Kukumbukila Imfwa ya Yesu tukuba pa malo aghiza aghakwavwa abanji ukuti bope bapindule.​—Ezra 7.10.

MUBAVWE ABANJI UKUTI BOPE BAPINDULE

13. Ka zila buli iyabwandilo yo tungabatulila abanji ukuti bope bize bapindule nu Kukumbukila Imfwa ya Yesu?

¹³ Ka tungabavwa buli-buli abanji ukuti bope bapindule pa kabalilo aka Kukumbukila Imfwa ya Yesu? Ichintu ichabwandilo, ko kubitizizyako. Umwakongelezya pa bantu bo tukubitizya po tuli mu bulumbilili, tungasimba sona amazina agha  bantu bo tukulonda ukuti tubitizizyeko. Abantu aba bakongelezyapo abakamu bitu, bo tukubomba nabo imbombo, bo tukumanyila nabo isukulu na banji. Nanti tute nu tumapepala utwinji utwakubitizizya abantu, tungabagabila ilinki ukuti bighule pa foni yabo. Wenu yo angamanya bo bangasala ukwiza!​—Ndumbi. 11.6.

14. Nena ichifwanikizyo cho chikulangizya ubwiza ubwakumwitizya umuntu pakubombezya akapepala.

¹⁴ Mutakayennye umwabupepe izila iya kwitizizya umuntu pakumubuzya bulo pa mulomo pamo ukumugabila akapepala. Isiku limo umuyemba yo umulume wache te we Kaboni, akaswigha sana po umulume wache akamubuzya ukuti wakwisengannya sana ukwaghiwapo pa Kukumbukila Imfwa ya Yesu. Choni cho umuyemba uyu akaswigha? Ichifukwa chakuti kwisinda kosi akamwitizyanga loli atakabukapo lumo. Choni cho chikapangisya ukuti akabalilo aka itike ukubuka? Akanena ukuti: “Napokela akapepala akakunitizizya ku lukomano ulwa Kukumbukila Imfwa ya Yesu.” Akalongosola ukuti uwachasongo yumo yo bamanyanite nawe akamwitizizyako. Ukwanda umwaka ghula-ghula umulume wache akanda ukwaghiwapo pa lukomano ulwa Kukumbukila Imfwa ya Yesu.

15. Nkimba tukulondiwa ukuba ni nyinong’ono buli nanti tukubitizya abantu ku lukomano ulwa Kukumbukila Imfwa ya Yesu?

¹⁵ Tube swe bakwisengannya ukuti abantu bo tungabizizyako bangaba na malalusyo nkani-nkani nanti kabwandilo ukwaghiwapo pa nkomano zyitu. Vingaba akiza nanti tunginong’onela zila amalalusyo gho bangize batulalusye nu kwisengannya mo tungize twamulile. (Kolo. 4.6) Umwakufwanikizya, bamo bangaswigha nu kulalusya ukuti: ‘Choni cho chikwiza pakubombiwa pa chakubombiwa ichi?’ ‘Ka chikwiza pakusenda akabalilo katali buli?’ ‘Nkimba ningavwala ichoni?’ ‘Nkimba nkulondiwa ukuti nize ndipile indalama pa lukomano ulu?’ Nanti twamwitizizyako yumo pa lukomano ulwa Kukumbukila Imfwa ya Yesu, tungabomba akiza ukumulalusya ukuti, “Nkimba uli ni lalusyo lililyosi?” Sona nanti ali ni lalusyo tungabomba akiza ukwamulila zila. Tungabombezya sona amavidiyo aghakuti Mukumbukilaghe Imfwa ya Yesu na Vyo Vikubombiwa pa Nyumba Yabumwene umwakuti tubavwe ukwivwisya vyo vikubombiwa pa nkomano zyitu. Mwibuku ilyakuti Mungahoboka nu Bumi Kwa Bwila na Bwila! mu mutu 28 muli sona ifundo inyiza zyo tungababuzya.

16. Nkimba malalusyo buli aghanji gho abantu bo kabwandilo pakwaghiwapo pa Kukumbukila Imfwa ya Yesu bangaba nagho?

 ¹⁶ Nanti twamala ulukomano ulwa Kukumbukila Imfwa ya Yesu, abantu bo kabwandilo ukwayiwapo bangaba sona na malalusyo aghakongelezyapo. Bangaswigha ukuti chifukwa buli abantu banandi bulo pamo nayumo-yumo yo alya ichibama pamo ukugw’ela uvinyo. Bangaswigha sona akabalilo ko twabombela ulukomano ulwa Kukumbukila Imfwa ya Yesu. Sona bangalonda ukumanya nanti inkomano zyosi izya Bakaboni ba Yehova momo zikubelagha. Napo ifundo izi zikuneniwanga kale mu nkani yo yikubanga pa lukomano ulwa Kukumbukila Imfwa ya Yesu, loli abantu bo kabwandilo pakwiza bangalondiwa ukuti tubalongosolele sona akiza. Inkani iyakuti “Chifukwa Wuli Ŵakaboni ŵa Yehova Ŵakupanga Mugonero wa Fumu Mwakupambana na Matchalitchi Ghanyake?” yo yili pa jw.org yingatwavwa ukwamula amalalusyo ghabo. Tukulonda ukubomba chilichosi cho tungakwanisya po tuchili napo twamala pa Kukumbukila Imfwa ya Yesu ukuti tubavwe abantu babo u Chala “akabasala” ukuti bapindule ni chakubombiwa ichi.​—Imbo. 13.48.

MUBAVWE BO BAKALEKA PAKWIZA PA NKOMANO

17. Nkimba abasongo bangabavwa buli-buli bo bakaleka ukwiza pa nkomano? (Ezekieli 34.12, 16)

¹⁷ Mu kabalilo akakukumbukila Imfwa ya Yesu, nkimba abasongo bangabavwa buli-buli bo bakaleka pakwiza pa nkomano? Babaghiye ukubalangizya ukuti babaghanite. (Belenga Ezekieli 34.12, 16.) Po muchili pakupanga ulukomano ulwa Kukumbukila Imfwa ya Yesu mwenelezye ukuti mwabomba chilichosi cho mungakwanisya ukuti mubitizizyeko. Mubabuzye umwakubasimikizya ukuti mukubapasikizya sona mukulonda ukubomba chilichosi cho mungakwanisya ukuti mubavwe. Mubitizizyeko ku lukomano ulwa Kukumbukila Imfwa ya Yesu. Nanti biza baghiwapo pa lukomano ulu mwize mubapokelele ni nyobe zibili. Nanti ulukomano ulwa Kukumbukila Imfwa ya Yesu lwamala, mubukilile ukubendela abakamu na bayemba abaghaniwa aba pamo ukubimbila ifoni sona mungabapako chilichosi cho chingabavwa mwabuzimu ukuti banyokele kwa Yehova.​—1 Pita. 2.25.

18. Ka aliwesi uwa uswe angabavwa buli-buli abantu bo bakaleka ukwiza pa nkomano zyitu? (Aba Loma 12.10)

¹⁸ Aliwesi muchipanga angabavwa bo bakaleka  pakwiza pa nkomano zyitu nanti biza pa lukomano ulwa Kukumbukila Imfwa ya Yesu. Ka bangabavwa buli-buli? Umwakubomba nabo ivintu umwalughano, umwachisa sona umwamuchizi. (Belenga Ezekieli 34.12, 16.) Tukumbukilaghe ukuti lumo chikabanga chipala sana ku bakamu na bayemba aba ukuti banyokele nu kwanda sona ukwiza ku nkomano. Lumo bakoghopagha ivintu vyo abantu mu chipanga banganena na mo bangabenezya. e Tubaghiye ukuleghuka ukubalalusya amalalusyo gho ghangabakozya isoni pamo ukunena ivintu vyo vingabababa. (1 Tesa. 5.11) Abakamu na bayemba aba Bakilisitu abamwitu. Tukuba swe bakuhoboka sana ukwiputa nabo sona!​—Sali. 119.176; Imbo. 20.35.

19. Nkimba tukupindula buli-buli nanti Tukukumbukila Imfwa ya Yesu?

¹⁹ Nkimba tukupalizya ukuti u Yesu akatubuzya ukuti tukumbukilaghe Imfwa yache umwaka ghulighosi sona tukwivwisya ichifukwa cho chakakulondiwa ukubomba bunubu? Nanti tukwaghiwapo pa lukomano ulwa Kukumbukila Imfwa ya Yesu tukupindula sana pa swebene sona abanji bope bakupindula sana muzila izyinji. (Yesa. 48.17, 18) Vikutwavwa ukuti tumughanaghe nkani u Yehova nu Yesu. Tukulangizya ukuti tukupalizya sana pa vyo batubombeye. Tukughomya ubumanyani bwitu na bakamu na bayemba bitu sona tungabavwa abanji ukuti bope bamanye mo bangahobokela ni visayo vyo tukuvyagha ichifukwa cha sembe iyakutusatula. Za tubombe chilichosi cho tungakwanisya ukuti tube swe bakwisengannya ukuti twize twaghiwepo pisiku ilya kulondiwa sana mumwaka ughu, pisiku lyo tukwiza pakupanga ulukomano ulwa Kukumbukila Imfwa ya Yesu!