Nkimba Mukubomba Ivintu na Bakolo Ngati mo u Yehova Akubombela?
SWE bakamu tuli nu lusako ulwa kumubombela u Yehova poka na bayemba abasubaliwa abinji. Tubaghanite sona tukubapalizya sana abayemba abasubaliwa aba, abakulimbikila imbombo! a Mwe bakamu mubombaghe ivintu na bayemba umwachisa, umwakubinong’onela sona umwamuchizi. Loli pakuti swebambula ukufikapo akabalilo kamo vingatutamya ukuti tubombe bunubu. Abakamu bamo bakukomana sona ni ntamyo iyamwabo.
Abanavuli bamo bakuliye mukikalile ko abantu bakubomba ivintu na bakolo ngati bapasi. Umwakufwanikizya u Hans uwakwendela ivipanga ku Bolivia, akanena ukuti: “Abanavuli bamo bakuliye mukikalile ko kakupangisya ukuti abanavuli babe bakwighana, ivi vikubapangisya abanavuli aba ukuti biyennyange ukuba bapamwanya sana ukuchila abakolo sona vikupangisya ukuti babombaghe ivintu ukusita ukuchindika abakolo.” Usongo yumo uwa ku Taiwan izina lyache u Shengxian akanena ukuti: “Ko nkwikala umukolo atanganenapo inyinong’ono zyache pa nkani iya bizinesi. Nanti umwanavuli abombezya inyonong’ono izya mukolo pa nkani yimo, abamwabo bakumwennya ukuti umutu wache ghutakwenda akiza.” Abanavuli bamo bakulangizya ukuti batakubachindika abakolo muzila izyakupambana-pambana. Umwakufwanikizya banganda pakunena amazyu aghakunyoza gho ghatakubachindika abakolo.
Ichakuhobosya chakuti umuntu angasinta napo angaba ukuti akulila kumalo ghamo. Angazipota inyinong’ono izyakuti abanavuli bapamwanya nkani ukuchila abakolo. (Efe. 4.22-24) Ivi vingabombiwa nanti angeghelelako ichifwanikizyo ichiza icha Yehova. Munkani iyi inti tunenenzannye mo u Yehova akubombela ivintu na bakolo, mo abakamu bangabombela ivintu na bakolo ngati mo u Yehova akubombela sona mo abasongo bangabombela ukulangizya ichifwanikizyo ichiza ichakuti bakubachindika abayemba.
KA U YEHOVA AKUBOMBA BULI-BULI NA BAKOLO?
U Yehova alangizizye ichifwanikizyo ichiza icha mo akubombela ivintu na bakolo. Pakuba we Baba uwachisa abaghanite abana bache bosi. (Yoha. 3.16) Sona abayemba abasubaliwa akubennya ukuti bana bache abalindu abapamwanya sana. Ennya izila izya kukonkapo izi zyo zikulangizya mo u Yehova akulangizizya ukuti abaghanite sona akubachindika abakolo.
Akubomba nabo ivintu ukusita ukusalila. U Yehova akapela umwanavuli nu mukolo muchifwani chache. (Ubwa. 1.27) Atakapela abanavuli ukuti babe na mahala pamo amaluso aghinji ukuchila abakolo, pamo ukulangizya ukuti abanavuli bobo bapamwanya nkani. (2 Syambu. 19.7) U Yehova akapela abanavuli na bakolo na mahala aghakuti bosi bivwisyange ubwanaloli ubwa mu Bayibolo nu kweghelelako inkalo zyache inyiza. U Yehova akulwennya ulwitiko ulwa banavuli na bakolo umwakuyana bulo napo ulusubilo lwabo lungaba lwakuti bakwiza pakwikala pachisu ichapasi mu paladayiso kwa bwila na bwila pamo bakwiza pakubuka pakulaghila kumwanya ngati bo bamwene na basembe. (2 Pita. 1.1) Naloli u Yehova atakubennya abakolo ukuti bapasi nkani.
Akubateghelezya. U Yehova ali ni chinyonywa na mo abakolo bakuyivwila ni ntamyo zyo bakukomana nazyo. Umwakufwanikizya, akateghelezya nu kwamula inyiputo izya Lakelo nu Hana. (Ubwa. 30.22; 1 Samu. 1.10, 11, 19, 20) Sona u Yehova akababuzya bo bakasimbagha Ibayibolo ukuti basimbe inkani izya banavuli bo bakateghelezya inyinong’ono izya bakolo. Umwakufwanikizya u Yehova akamubuzya u Abulahamu ukuti akonke ubulongozi ubwa kufuma kwa muchi wache u Sala. (Ubwa. 21.12-14) Umwene u Devedi akateghelezya kwa Abigelo. Akennya ukuti u Yehova weyo amutuma u Abigelo ukuti anene nawe. (1 Samu. 25.32-35) U Yesu yo akukonka inkalo izya Baba wache umwakufikapo, akateghelezya kwa mama wache u Maliya. (Yoha. 2.3-10) Ivifwanikizyo ivi vikulangizya izila yoka iya mo u Yehova akulangizizya ukuti akubachindika abakolo umwakubateghelezya.
Akubasubalila abakolo. Umwakufwanikizya, u Yehova akamusubalila u Eva ukuti inti avwepo pakupwelelela ichisu chosi ichapasi. (Ubwa. 1.28) Pakubomba bunubu akalangizya ukuti atakumwennya u Eva ukuti wapasi kwa mwamulume wache u Adamu loli ukuti mwavwilizi wache. U Yehova akamusubalila sona umulaghuzi u Debola nu Hulida ukuti inti babapange abantu ubulongozi ukongelezyapo umulongi nu wasembe. (Balo. 4.4-9; 2 Nyafya. 22.14-20) Amasiku ghano ghope u Yehova akubasubila abakolo aba Chikilisitu ukuti inti babombaghe imbombo zyache. Abayemba abasubaliwa aba bakubomba ngati balumbilili, abapayiniya na bamishonale. Bakwavwapo pakupanga amapulani, ukuzenga nu kuyannya Inyumba izya Bumwene ni vintu ivyakupambana-pambana vyo vikubombiwa pa ofesi. Bamo bakubombela pa Beteli po bamo bakubombela mu ma ofesi aghakung’anamulila amabuku. Abayemba aba bali ngati chilundilo icha basilikali cho u Yehova akuchibombezya imbombo ukuti akwanilisye ubwighane bwache. (Sali. 68.11) Ukunena ubwanaloli, u Yehova atakubennya abakolo ukuti bapasi pamo ukuti te bakulondiwa.
KA ABAKAMU BANGABOMBA BULI-BULI NA BAKOLO NGATI MO U YEHOVA AKUBOMBELA?
Swe bakamu, ukuti tumanye nanti tukubomba ivintu na bayemba bitu aba Chikilisitu ngati mo u Yehova akubombela, tukulondiwa ukwifufuza umwabusubaliwa mo tukwinong’onela na mo tukubombela ivintu. Ukuti tubombe bunubu tukulondiwa ubutuli. Ngati mo u dokotala angabombezezya amashini ukuti amanye waghe umoyo uwa muntu ghuli akiza pamo hagha, umwakuyana bulo abamanyani abiza na Amazyu agha Chala vingatwavwa ukumanya nanti mo tukubenezya abakolo kukumuhobosya u Yehova pamo hagha. Nkimba tungabomba buli-buli ukuti tubwaghe ubutuli ubu?
Tumulalusye umumanyani witu umusubaliwa. (Mbupi. 18.17) Tungabomba akiza ukubuka kwa mumanyani witu umusubaliwa sona yo wachisa nu kumulalusya amalalusyo ngati agha: “Nkimba nkubomba buli-buli ivintu na bayemba? Nkimba bakwennya ukuti nkubachindika? Ka pali chimo cho nkulondiwa ukubomba ukuti mbombaghe nabo ivintu akiza?” Nanti umumanyani winyu ababuzya ivintu vimo vyo mukulondiwa ukuti mubombelepo zimo mutakihobokele, loli mube mwe bakwisengannya ukusinta.
Tumanyilaghe Amazyu agha Chala. Izila iyiza sona iya pamwanya nkani yo yingatwavwa ukumanya mo tukubombela ivintu na bayemba, ko kubombezya Amazyu agha Chala ukuti ghatwavwe ukumanya akinong’onele na kabombele kitu aka vintu. (Hebe. 4.12) Nanti tukumanyila Ibayibolo, tukwagha inkani izya banavuli bo bakabomba akiza ivintu na bakolo sona abanavuli bo batakabomba akiza ivintu na bakolo. Tungayanisya mo bakabombelagha ivintu na mo uswe tukubombela. Umwakongelezyapo tuchebe ukubombezya ivesi lyoka ilya mu Bayibolo ukuti likolelane ni nyinong’ono zyitu izibibi izya mo tukubenezya abakolo. Umwakufwanikizya ukuyana ni simbo ilya 1 Pitala 3.7, umulume abaghiye “ukumuchindika umuchi wache ichifukwa chakuti mudedebazu.” b Nkimba ivi vikung’anamula ukuti umuchi mupotwe ate na mahala pamo ate na maluso ngati mwanavuli? Awe te momo vibeleye! Yanisya amazyu agha Pitala, na vyo isimbo ilya Aba Galatiya 3.26-29 likunena, likulangizya ukuti u Yehova asalite abakolo na banavuli ukuti baye babe balaghili poka nu Yesu kumwanya. Nanti tukumanyila Amazyu agha Chala, ukubalalusya abamanyani bitu bo tukubasubalila sona ifundo zyo bangatubuzya pa mo tukubombela ivintu na bakolo, vingatwavwa ukumanya mo tungalangizizya umuchizi ku bayemba bitu.
NKIMBA ABASONGO BANGALANGIZYA BULI-BULI UKUTI BAKUBACHINDIKA ABAYEMBA?
Abakamu muchipanga bangamanyila sona mo bangabombela ivintu umwamuchizi na bayemba umwakukonka ivifwanikizyo ivyiza ivya basongo abalughano. Ka abasongo bangalangizya buli-buli ukuti chifwanikizyo ichiza pakubachindika abayemba? Ennya zimo mwazila izya kwavwa izi.
Mubapalizyange sana abayemba. Umutumiwa u Pabuli akalangizya ichifwanikizyo ichiza cho abasongo bangeghelelako. Mukalata yo akasimbila ichipanga icha ku Loma akabapalizya abayemba abinji pabuzelu. (Loma 16.12) Nkimba munginong’onela mo abayemba aba bakabela bakuhoboka pa kabalilo ko ikalata iyi yikabelengiwanga muchipanga? Umwakuyana bulo, abasongo bakubapalizya sana abayemba pa nkalo inyiza zyo bali nazyo sona pa mbombo yo bakumubombela u Yehova. Ivi vikubavwa abayemba ukwiyivwa ukuti bakupeliwa umuchizi sona ukuti bope bakulondiwa muchipanga. Amazyu aghakulimbikisya aghakufuma ku basongo ghangabavwa abayemba ukuti babukilile ukumubombela u Yehova umwabusubaliwa.—Mbupi. 15.23.
Bakupalizya
Nanti bakubapalizya abayemba, abasongo bakulondiwa ukubapalizya umwakusita ukubafisa pa vyo babomba. Chifukwa choni? Umuyemba yumo u Jessica akanena ukuti: “Chikuba chakuhobosya nanti abakamu bakubabuzya abayemba amazyu aghakuti ‘mwabomba imbombo inyiza.’ Loli tukukaziwa sana nanti abakamu batwavwa pa chintu cho cha palubazu, ngati ukubamanyisya abana bitu ukuti bikalaghe myee pa kabalilo ko inkomano zili mukasi pamo ukuya pakubasenda abamanyili bitu aba Bayibolo ukuti bize pa nkomano.” Nanti abasongo bakubavwa abayemba pa chintu chimo
icha palubazu, abayemba bakwiyennya ukuti bapamwanya sona bakulondiwa sana muchipanga.Bakubateghelezya abayemba. Abasongo abakwiyisya bakumanya ukuti te bo babo bene bo bali ni nyinong’ono inyiza. Bakubalalusya abayemba ukuti babikepo amasakizyo ghabo sona bakuteghelezya akiza nanti abayemba bakunena. Pakubomba bunubu abasongo bakubakazya abayemba sona bope bakupindula. Ka bakupindula buli-buli? Usongo yumo izina lyache u Gerardo yo akubombela pa Beteli akanena ukuti: “Nazyaghannya ukuti nanti nkubalalusya abayemba vikunavwa ukuti mbombe akiza imbombo yane. Sona abayemba bamo babomba imbombo yimo kwa kabalilo akatali ukuchila abakamu. Ichifukwa chakuti abayemba abinji bakubomba ngati bapayiniya muchipanga, vikubavwa ukubamanya akiza abantu aba muchigaba chabo. Usongo yumo izina lyache u Bryan akanena ukuti: “Abayemba bitu bali ni vintu ivyinji vyo bangavwa navyo igulu lyitu. Po zatumanyileko ivyinji kubayemba aba!”
Bakuteghelezya
Abasongo bo bakubomba ivintu umwamahala batakusamalila ukususya amasakizyo agha bayemba. Chifukwa buli? U songo yumo izina lyache u Edward akanena ukuti: “Inyinong’ono izya bayemba na vyo bakomana navyo vingamwavwa umukamu ukwivwisya akiza inkani yosi mo yibeleye sona mo abanji bakwiyivwila.” (Mbupi. 1.5) Napo usongo atangabombezya amasakizyo agha bayemba loli abaghiye ukubapalizya ichifukwa chakunenapo inyong’ono zyabo na mo bakwenezya ivintu.
Bakubamanyisya abayemba. Abasongo bo bakubomba ivintu umwamahala, bakulondelezya izila izya mo bangamanyisizya abayemba. Umwakufwanikizya bangabamanyisya abayemba mo bangabombela pakwisengannya ukuti bingile mu bulumbilili nanti umukamu uwakoziwa nayumo. Bangabamanyisya sona abayemba mo bangabombezezya ivintu ivya kubombezya imbombo pakuzenga ngati amashini umwakuti bavwanjepo pa mbombo iya kuyannya nu kuzenga mugulu lyitu. Bo bakwenelezya pa Beteli, babamanyisizye abayemba mo bangabombela pakuyannya ivintu vyo vyakomanika, ukughula ivintu, ukubelengela indalama, ivya makompyuta ni vinji ivyamwabo. Nanti abasongo bakubamanyisya abayemba bakulangizya ukuti bakubennya ukuti bakulondiwa sona bakubasubalila.
Bakumanyisya
Abayemba abinji bakubombezya vyo abasongo bakabamanyisya ukuti babavwe abanji. Umwakufwanikizya, abayemba bamo bakubombezya amaluso gho bamanyiye pa nkani iya vyakuzenga-zenga ukuti babavwe abanji ukuzenga sona inyumba zyabo nanti kwabombiwa ingozi izya chipeliwa. Abayemba bamo bakubombezya amaluso gho bakamanyila mu bulumbilili ukuti babavwe abayemba abinji mo bangabombela mu bulumbili. Ka abayemba bakubennya buli-buli abasongo bo bakabamanyisya imbombo? Umuyemba yumo izina lyache u Jennifer akanena ukuti: “Po tukazengagha Inyumba iya Bumwene uwakutwenelezya akapabulagha akabalilo nu kumanyisya. Akennya mo nkabombelagha imbombo nu kumpalizya mo nkubombela. Nkahobokagha ukubomba nawe ichifukwa chakuti nkiyivwanga ukuti ne wakulondiwa sona akunsubalila.”
AMAPINDU GHO GHAKUBAPO NANTI TUKUBOMBA IVINTU NA BAYEMBA NGATI BA MUMBUMBA YITU
Tubaghanite sana abayemba bitu abasubaliwa ngati mo u Yehova abaghaniye! Cho chifukwa tukubomba nabo ivintu ngati bantu aba mumbumba yitu. (1 Timo. 5.1, 2) Chintu chapamwanya sana sona chakuhobosya ukubombela poka na bayemba. Tukuba sona swe bakuhoboka nanti twamanya ukuti bakwennya ukuti tukubaghana sona tukubavwa. Umuyemba yumo izina lyache u Vanessa akanena ukuti: “Nkumupalizya sana u Yehova pakuba mu guli ili, lyo lili na bakamu abinji bo bakunkazya sana.” Umuyemba yumo uwa ku Taiwan akanena ukuti: “Nkumupalizya sana u Yehova ni gulu lyache ichifukwa chakuti bakwennya abayemba ukuti bakulondiwa sona mo bakuchindikila inyinong’ono zyitu. Ivi vikunavwa ukughomya ulwitiko lwane sona ukuti mpalizyange nkani ulusako lo ndinalo ulwa kuba mugulu ilya Yehova.”
U Yehova akuhoboka sana pakwennya abanavuli abasubaliwa aba Chikilisitu ukuti bakuyezya-yezya ukubennya nu kubomba ivintu na bakolo ngati mo umwene akubombela! (Mbupi. 27.11) Usongo uwa chipanga yumo uwa ku Scotland izina lyache u Benjamin, akanena ukuti: “Ichisu chikubennya abakolo ukuti bapasi. Cho chifukwa tukulonda ukuti nanti abayemba bitu bali ku nkomano biyivwange ukuti bakuchindikiwa sona bakughaniwa.” Nge swebosi twabomba vyo tungakwanisya ukuti tumweghelele u Yehova umwakubomba ivintu na bayemba bitu abaghaniwa umwalughano nu mwamuchizi gho ghubabaghiye.—Loma 12.10.
a Mu nkani iyi amazyu aghakuti “abayemba “ ghakunena ivya bayemba bitu aba Chikilisitu, ghatakunena ivya bayemba bitu abakumubili.
b Ukuti mumanye ivyinji pa nkani iya mazyu aghakuti “badedebazu,” ennya inkani iya mutu uwakuti “Mtengo wa ‘Chotengera Chochepa Mphamvu’” mu Ichitembe cha Mulindilili icha Chichewa Meyi 15, 2006 sona iyakuti “Ulongozgi Wavinjeru kwa Ŵakutorana” mu Ichitembe cha Mulindilili icha Chitumbuka Malichi 1, 2005.