1-2. Ka ntamyo buli zyo ababombi ba Yehova abasubaliwa bangakomana nazyo?

 IVINTU ivyakuchenusya vingasinta ubumi bwitu mukabalilo akakuchepa. Umwakufwanikizya, umukamu yumo umusubaliwa izina lyache u Luis a bakamwagha ni mbina iya kansa. U dokotala akamubuzya ukuti asyala ni myezi yinandi bulo iyakwikalila nu bumi. U Monika nu mulume wache bakatangwanika sana pakumubombela u Yehova poka. Isiku limo u Monika akamanya ukuti umulume wache yo akaba we songo wa chipanga akapangagha ivintu ivibibi ukwa myaka iyinji. U Olivia, umuyemba yo atasendizwe, akasama pa nyumba yache ichifukwa chakuti ichimpepo ichikulu icha hurricane chikaba papipi ukwiza. Po akanyokelagha akagha ukuti ichimpepo ichikulu ichi chikomanizye inyumba yache. Mukabalilo akanandi bulo, ivintu vikasinta umwakuchenusya sana pa bumi ubwa bantu aba. Ka mukomanitepo ni ntamyo yimo yo yikabombiwa umwakuti yikasinta ubumi bwinyu umwakuchenusya?

² Pakuba swe babombi ba Yehova abasubaliwa, tukukomana ni ntamyo izyakupambana-pambana zyo abantu bosi bakukomana nazyo. Sona akabalilo kamo tukujimba ku bantu abakususya pamo ukupinyiwa na bantu bo bababengite abantu ba Chala. Napo u Yehova atakutufighilila ku ntamyo zyo tukukomana nazyo loli akutulaghizya ukuti inti atwavwe. (Yesa. 41.10) Nubutuli bwache tungabukilila ukuba bakuhoboka, ukupanga ivyakusala ivyiza sona ukubukilila ukuba basubaliwa kukwache na mukabalilo ko tukukomana ni ntamyo. Munkani iyi inti twennye izila 4 izya mo u Yehova akututulila mukabalilo ka ntamyo pa bumi bwitu. Inti twennye sona vyo tubaghiye ukubomba ukuti tupindulaghe nu butuli bo akutupa.

 U YEHOVA AKWIZA PAKUBAFIGHILILA

3. Nanti twakomana ni ntamyo umwakuchenusya, nkimba chingaba chipala ukubomba choni?

³ Intamyo. Nanti twakomana ni ntamyo iyakuchenusya, chingaba chakutamya ukwinong’ona nu kusala akiza ivintu. Chifukwa buli? Ichifukwa chakuti tungaba ni chitima ichikulu sona tungatamiwa inyinong’ono. Tungavulungana inyinong’ono umwakuti tutangamanya ichakuti tubombe. Ennya mo abayemba babili bo twabatambula kubwandilo bakiyivwila pa kabalilo ko bakakomana ni ngelo. U Olivia akanena ukuti: “Ichimpepo icha hurricane chikati chakomannya inyumba yane nkiyivwa ukuti natagha chilichosi sona amaka ghakamalila.” Ukuyana na vyo umulume wache akamubombela, u Monika akanena ukuti: “Vikambaba sana, nkiyivwa ngati ukuti umuntu yumo alasa umoyo wane. Chikaba chipala ukubomba imbombo izipepe bulo izyi siku ni siku ngati mo nkabombelagha. Ivintu vyo ntakasubilagha ukuti vingabombiwa.” Ka u Yehova alayizizye ukuti akwiza pakutwavwa buli-buli nanti twakomana ni ntamyo?

4. Ukuyana na Aba Filipi 4.6, 7, nkimba u Yehova atulayizizye ichoni?

⁴ Vyo u Yehova akubomba. Alayizizye ukutupa “umutende uwakufuma kwa Chala.” (Belenga Aba Filipi 4.6, 7.) Umutende ughu ghukwiza pakwikazya umoyo pasi sona ukufighilila inyinong’ono nu moyo witu ichifukwa chakuti tuli nawe pa bumanyani ubwiza. Umutende ughu, “ghuchilite akivwisizye kosi” umwakuti wakuhobosya sana ukuchila akinong’onele kalikosi ko tungaba nako. Nkimba mukiputa lumo kwa Yehova umwakuti pa bumalilo mukiyivwa ukuti muli nu mutende? Nanti momo mukiyivwila, gho gho “mutende uwakufuma kwa Chala.”

5. Ka umutende uwakufuma kwa Chala ghukusunga buli-buli inyinong’ono ni myoyo yitu?

⁵ Ivesi ili likunena sona ukuti umutende uwakufuma kwa Chala ghukwiza “pakusunga akiza” pamo ukufighilila, “amoyo ghinyu sona ninyinong’ono zyinyu.” Amazyu aghakuti “pakusunga,” bakaghabombezyanga nkani pakulongosola izya basilikali bo bakasungililagha itawuni nu kuyifighilila ku abalwani ukuti batakayipoke. Abantu bobakikalagha mutawuni, bakaghonagha umwamutende pakumanya ukuti pa geti pali abasilikali bo bakubafighilila. Umwakuyana bulo, nanti umutende uwakufuma kwa Chala ghukusungilila imyoyo ni nyinong’ono zyitu, tukwiyivwa ukuti tuli pa mutende pakumanya ukuti twe bakufighililiwa. (Sali. 4.8) Ukuyana ni nkani iya Hana, napo intamyo yo tungakomana nayo yitangamala lubilo, loli tungabukilila ukuba nu mutende. (1 Samu. 1.16-18) Sona nanti tuli nu mutende akabalilo kosi, inti chibe chipepe ukwinong’ona nu kusala ivintu umwamahala.

6. Nkimba tungapindula buli-buli nu mutende uwakufuma kwa Chala? (Ennya sona ichituzi.)

⁶ Vyo tukulondiwa ukubomba. Nanti twakomana ni ntamyo tumubuzye yo akutufighilila. Ka tungamubuzya buli-buli? Twipute mpaka twiyivwe ukuti tuli nu mutende uwakufuma  kwa Chala. (Luka 11.9; 1 Tesa. 5.17) U Luis, yo twamutambula kubwandilo akalongosola vyo bakinong’onagha nu muchi wache u Ana ukuti bangabomba bakati bamanya ukuti u Luis asyala ni miyezi yinandi iya kwikalila nu bumi. U Luis akanena ukuti: “Pa kabalilo ngati aka, chikuba chakutamya sana ukuti umuntu asale akiza ivintu pa nkani iya vyachipatala ni vintu ivyamwabo. Loli tukabanga nu mutende uwa mumoyo pa kabalilo akakutamya aka ichifukwa chakuti akabalilo kosi tukiputagha.” U Luis nu muchi wache bakanena ukuti akabalilo kosi bakiputagha ukufuma pasi pamoyo sona umwakupyanizya-pyanizya, ukumulaba u Yehova ukuti abape umutende uwa munyinong’ono, uwa mumoyo sona amahala ukuti basale akiza ivintu. Bakennya ukuti u Yehova akubavwa. Nanti mwakomana ni ntamyo, mwiputaghe akabalilo kosi, po mukwiza ukwennya ukuti umutende uwakufuma kwa Yehova ghukufighilila amoyo ni nyinong’ono zyinyu.​—Loma 12.12.

U YEHOVA AKWIZA PAKUBAGHOMYA

7. Nkimba tungiyivwa buli-buli nanti twakomana ni ngelo iya koghofya?

⁷ Intamyo. Pa kabalilo ko twakomana ni ngelo, mo tukwiyivwila, mo tukwinong’onela sona mo tukubombela ivintu vitangayana na mo twabombelagha akabalilo kosi. Akabalilo kamo tungennya ukuti ingelo zikukonkana-konkana bulo. U Ana yo twamutambula ku bwandilo akanena ukuti, umulume wache akati afwa akiyivwa ukuti akomana ni ntamyo izya kukonkana-konkana bulo. U Ana akanena ukuti: “Nanti nanda pakutamiwa inyinong’ono nkipelelagha ichisa sona nkakalalagha ukuti afuye. “Akabalilo kamo u Ana akiyivwanga ukuti ali mwene sona vikamutamyanga ukusala ivintu vyo u Luis akasalagha akiza. Akabalilo kamo akiyivwanga ngati ali pa nyanja po pali ichimpepo ichikulu icha koghofya. Nkimba u Yehova akutwavwa buli-buli nanti twanda pakutamiwa inyinong’ono?

8. Ngati mo pakunenela pa Yesaya 33.6, nkimba u Yehova akusimikizya ukuti inti atubombele ichoni?

⁸ Vyo u Yehova akubomba. U Yehova akutusimikizya ukuti akwiza pakutughomya. (Belenga Yesaya 33.6.) Nanti isitima yakomana ni chimpepo ichakoghofya pa nyanja, yinganda ukuyingana nkani. Ukuti yitakayinganaye nkani, isitima izyinji zili ni vintu mulubazu imbali zyosi vyo vikuyavwa. Ivintu ivi vikuyavwa isitima ukuti yitakayinganaye nkani, umwakuti abantu bo bakwelite bakuba bakufighililiwa sona bakuya pakufika ko bakuya. Loli ivintu ivi vikubomba akiza imbombo nanti isitima yikwenda. Umwakuyana bulo u Yehova akwiza pakutughomya nanti twabukilila ukuba basubaliwa pa kabalilo kosi ko twakomana ni ngelo.

9. Ka ivintu ivya kufufuzila vingatwavwa buli-buli ukuti tubukilile ukuba bakughoma? (Ennya sona ichituzi.)

⁹ Vyo tukulondiwa ukubomba. Nanti twakomana ni ntamyo yim tukulondiwa ukubomba chilichosi cho tungakwanisya ukuti tubukilile ukubomba ivintu ivyabuzimu. Ubwanaloli bwakuti  mutangabomba ivintu ngati mo mukabombelagha pa bwandilo, loli mukumbukilaghe ukuti u Yehova atakulonda ukuti tubombaghe ivintu vyo tutangakwanisya. (Yanisya nu Luka 21.1-4) Pandondomeko yinyu iya vintu ivyabuzimu, mupaghulepo akabalilo aka kumanyila pa mwebene nu kwinong’onelapo. Chifukwa buli? Ichifukwa chakuti ukwendela mwigulu lyache, u Yehova atupiye ivintu vyo vili ni fundo izya mu Masimbo zyo zingatwavwa ukuti tubukilile ukuba bakughoma mwabuzimu. Ukuti mwaghe ubutuli bo mukulondiwa, mungalondelezya mu vintu vyo vili muchinenelo chinyu ngati JW Library^®na Buku Lakupenjela Nkani la Bakaboni ba Yehova. U Monika yo twamutambula pa bwandilo akanena ukuti akalondelezyanga ubulongozi mu vintu ivya kufufuzila ivi, pa kabalilo ko akennyanga ukuti intamyo yache yikukula. Umwakufwanikizya, akalondagha amazyu aghakuti “ukukalala.” Akabalilo kamo akalondagha amazyu agha kuti “ukumupeleka” pamo “ubusubaliwa.” Pisinda pache, akabelenga inkani izi mupaka akiyivwako akiza. Akanena ukuti: “Pa kabalilo ko nkalondagha inkani izi, ntakamanyagha cho ni ngabomba, loli po nkabukilila ukubelenga nkennya ngati ukuti u Yehova amvumbatila. Nkazyaghannya ukuti u Yehova akanivwisyanga mo nkiyivwilagha sona akanavwanga.” Ubutuli ubwakufuma kwa Yehova, bungabavwa pa kabalilo ko mwakomana ni ntamyo mupaka po mukwiza pakuyivwila ukuti muli nu mutende uwa mumoyo.​—Sali. 119.143, 144.

U YEHOVA AKWIZA PAKUBAVWA

10. Ka tungiyivwa buli-buli nanti twakomana ni ntamyo inkulu?

¹⁰ Intamyo. Nanti pabombiwa intamyo yimo yo tutinong’onelaghako, amasiku ghamo tungiyivwa ukuti tute namaka sona tunganda ukutamiwa inyinong’ono. Tungiyivwa ngati muntu yo avulala pa nyangalo izya kusamala yo pa bwandilo akasamalagha nkani loli pa kabalilo aka akwendela indisa. Sona chingaba chakutamya ukubomba imbombo zyo pa bwandilo chikaba chipepe bulo ukuzibomba pamo ukuba ni chinyonywa icha kubomba ivintu vimo vyo pa bwandilo tukahobokagha navyo. Ngati we Eliya tungiyivwa ukuti chipala sana ukuti tunyamuke. Tungalonda ukuti tughone bulo. (1 Nyafya. 19.5-7) Nkimba u Yehova akutulayizya ichoni nanti twawa amaka?

11. Nkimba zila buli iyamwabo yo u Yehova akutwavwizya? (Salimo 94.18)

¹¹ Vyo u Yehova akubomba. Alayizizye ukuti akwiza pakutwavwa. (Belenga Salimo 94.18.) Umuntu yo avulala panyangalo iya kuchimbila akulondiwa ubutuli ukuti abukilile ukwenda, nuswe bulo tukulondiwa ubutuli ukuti tubukilile ukumubombela u Yehova. Nanti twakomana ni ntamyo u Yehova akutusimikizya ukuti: ‘Une Yehova u Chala wako, nkukola inyobe yako iya  ndyelo, nkukubuzya ukuti ‘Utakabe ni lyogha. Une nkwiza pakukwavwa.’ (Yesa. 41.13) Umwene u Devedi akapokela ubutuli ngati ubu akati akomana ni ngelo na balwani. Akamubuzya u Yehova ukuti: ‘Inyobe yinyu iya ndyelo yikunavwa une.’ (Sali. 18.35) Loli ka u Yehova akutwavwa buli-buli?

12. Ka u Yehova angabombezya abawenu nanti twawa amaka?

¹² Akabalilo akinji u Yehova akutwavwa umwakubombezya abantu abanji. Umwakufwanikizya, pa kabalilo ko u Devedi akawa amaka umumanyani wache u Jonasani akamwendela nu kumwavwa pakunena amazyu agha kughomya. (1 Samu. 23.16, 17) Umwakuyana bulo u Yehova akasala u Elisha ukuti aye amwavwe u Eliya. (1 Nyafya. 19.16, 21; 2 Nyafya. 2.2) Amasiku ghano u Yehova akubombezya imbumba yitu, abamanyani na basongo abachipanga ukuti batwavwe. Loli pa kabalilo ko twakomana ni ntamyo tutangalonda ukuti tube papipi na banji. Tungalonda ukuti tube pa swebene. Akabalilo kamo aliwesi momo angiyivwila. Nkimba tungabomba ichoni ukuti tupokele ubutuli ukufuma kwa Yehova?

13. Nkimba tukulondiwa ukuti tubombaghe ichoni ukuti tupokele ubutuli ubwakufuma kwa Yehova? (Ennya sona ichituzi.)

¹³ Vyo tukulondiwa ukubomba. Muyezye-yezye ukuti nanti mwakomana ni ntamyo, mutakipaghulaghe ku banji. Nanti tukwipaghula ku banji, vingapangisya ukuti twande ukwiyinong’nela sweka sona intamyo zyo tukumana nazyo. Akinong’onele aka kangakwafya ivyakusala vyitu. (Mbupi. 18.1) Ubwanaloli bwakuti aliwesi akulondiwa akabalilo akakuti abe paweka nkani-nkani nanti akomana ni ntamyo inkulu. Loli nanti twipaghula kubanji ukwakabalilo akatali vingapangisya ukuti tutakapokele ubutuli bo u Yehova akulonda ukutupa. Napo chingaba chipala loli tukulondiwa ukwitikizya ubutuli ubwakufuma ku bamumbumba yitu, ku bamanyani bitu sona ku basongo abachipanga. Mubennyanje ukuti u Yehova akubabombezya imbombo ukuti babavwe.​—Mbupi. 17.17; Yesa. 32.1, 2.

U YEHOVA AKWIZA PAKUBASANGALUSYA

14. Nkimba vintu buli vyo vingatupangisya ukuti tube ni lyogha?

¹⁴ Intamyo. Akabalilo kamo nanti tuli mu ntamyo, tungaba ni lyogha. Mu Bayibolo muli ababombi abasubaliwa aba Chala bo bakanena ukuti akabalilo kamo bakatamiwanga inyinong’ono sona bakaba ni lyogha ichifukwa cha balwani pamo intamyo izyamwabo. (Sali. 18.4; 55.1, 5) Umwakuyana bulo nuswe tungasusyiwa na bamwitu kusukulu, ku mbombo, abamumbumba yitu pamo ababoma. Sona akabalilo kamo tungaba ni lyogha ukuti tungafwa ichifukwa cha bubine. Mukabalilo ngati aka tungiyivwa ngati ukuti tutakutuliwa ngati mo umwana umunandi ukwiyivwila.  Ka u Yehova ukutwavwa buli-buli mukabalilo ngati aka?

15. Ka isimbo ilya Salimo 94.19 likutusimikizya ichoni?

¹⁵ Vyo u Yehova akubomba. Akutusangalusya nu kutughomya. (Belenga Salimo 94.19.) Isalimo ili lingatupangisya ukuti twinong’onele izya kalindu ko kali ni lyogha sona kakupotwa ukughona ichifukwa chakujilimisya ukwa vula. Po munyinong’ono zyitu tube ngati tukwennya ubaba wache akwiza nu kukavumbatila ni nyobe mupaka po kaghonela utulo. Napo ivula yichili yikujilimisya, loli ichifukwa chakuti ubaba wache akanyamuye munyobe, vikukavwa ukwiyivwa ukuti kakufighililiwa. Pa kabalilo ko twakomana ni ngelo izya koghofya, nuswe bulo tungalonda ukuti Ubaba witu uwa kumwanya atukole umwakufwanikizya bulo mupaka po twanda ukwiyivwa akiza. Ka tungasangalusiwa buli-buli nu Yehova?

16. Nkimba tungabomba ichoni ukuti u Yehova atusangalusye? (Ennya sona ichituzi.)

¹⁶ Vyo tukulondiwa ukubomba. Mwiputaghe kwa Yehova nu kubelenga amazyu ghache. (Sali. 77.1, 12-14) Nanti mukutamiwa inyinong’ono, ichintu ichabwandilo cho mungabomba ko kwiputa kwa Baba winyu uwa kumwanya. Mumubuzye u Yehova ivintu vyo vikuboghofya sona vyo mukupasya navyo. Pisinda pache, muteghelezye kukwache umwakubelenga Amazyu ghache nu kwennya mo inti abakazizye. (Sali. 119.28) Po mukubelenga Ibayibolo, mungagha inkani yimo yo yingabaghomya pa kabalilo ko muli ni lyogha. Umwakufwanikizya, mungagha ifundo zimo izyakukazya mu mabuku ngati ilya Yobu, Masalimo, Isya Mbupingamu na mazyu agha Yesu gho ghakwaghiwa pa Matayi chaputala 6. Nanti mukwiputa kwa Yehova nu kubelenga Amazyu ghache, mukwiza pakulimbikisiwa sana.

17. Ka mungaba nu lusubilo buli?

¹⁷ Tungaba nu lusubilo ukuti u Yehova akwiza pakuba nuswe pa kabalilo ko twakomana ni ntamyo pa bumi bwitu. Tutakwiza pakuba sweka. (Sali. 23.4; 94.14) U Yehova alayizizye ukuti akwiza pakutufighilila, pakutughomya, pakutwavwa sona pakutusangalusya. Pakunena ivya Yehova pa Yesaya 26.3 pakunena ukuti: ‘Mukwiza pakubafighilila bosi bo bakubasubila nkani umwe, mukwiza pakubapa umutende uwambula ukumala, ichifukwa chakuti bakubasubalila nkani umwe.’ Mumusubilaghe u Yehova nu kubomba chilichosi cho mungakwanisya ukuti mupindule ni zila zyo akubombezya imbombo pakubavwa. Nanti mungabomba bunubu mukwiza ukwagha amaka pa kabalilo ko mwakomana ni ntamyo.