1. Choni cho chikwiza munyinong’ono zyinyu nanti mukwinong’ona ivya Yehova?

 NKIMBA muyezizyepo lumo ukwinong’onela mo u Yehova abeleye? Nanti mukunena nawe mulwiputo, ka munyinong’ono zyinyu mukwiza ichoni? Napo u Yehova atakuboneka, loli Ibayibolo likumulongosola muzila izyakupambana-pambana. U Yehova akwitiziwa ukuti ‘lizuba sona ngulu’ nu “moto ghugho ghukulungulizya.” (Sali. 84.11; Hebe. 12.29) Ukubapo ukwa Yehova kukulongosoliwa umwakuyana nibwe ilya safilo, ichijela ichakunyezimila ni chipinga vula ichakuboneka akiza. (Eze. 1.26-28) Vimo mwa vintu vyo vyamulongosola u Yehova, vingatupangisya ukuti tube ni lyogha pamo bakuswigha.

2. Choni cho chingapangisya ukuti twennyanje ukuti chakutamya ukupalamila kwa Yehova?

² Ichifukwa chakuti u Yehova tutakumwennya, chingaba chipala ukuti tusubile ukuti atughanite. Bamo bakwinong’ona ukuti u Yehova atangabaghana ichifukwa cha vintu vyo bakomanitepo navyo pa bumi bwabo. Vingabombiwa ukuti batakabapo nu baba yo akaba wa lughano. U Yehova akwivwisya mo tukwiyivwila na mo vikutukwafizya. Ukuti atwavwe, akuvumbula ubuntu bwache ubwiza ukwendela mu Mazyu ghache.

3. Choni cho tukulondiwa ukumanyila nkani ivya lughano ulwa Yehova?

³ U Yehova lughano. Ibayibolo likunena ukuti, “u Chala we lughano.” (1 Yoha. 4.8) Akubomba chilichosi ichifukwa cha lughano. Ulughano ulwa Chala lwiza sona lwamaka umwakuti akululangizya na ku bantu bo batamughanite. (Mata. 5.44, 45) Munkani iyi inti tunenezannye nkani ivya Yehova nu lughano lo ali nalo. Nanti tukumanyila nkani ivya Chala, inti vitwavwe ukuti tumughanaghe nkani.

U YEHOVA ATUGHANITE SANA

4. Ka ichisa cho u Yehova ali nacho chikubapangisya ukuti mwiyivwange buli-buli? (Ennya sona ichituzi.)

⁴ U Yehova “wachisa sona walupasikizyo.” (Yako. 5.11) Mu Bayibolo u Yehova akwiyanisya nu mama uwachisa. (Yesa. 66.12, 13)  Inong’onela ivya mama yo akumupwelelela umwana wache umwalughano. Akumukola umwalughano nu kumupakata sona akunena nawe umwakufwasa nu tumazyu utwiza. Nanti akulila pamo akwivwa ivyakubaba, umama akwenelezya ukuti amupa umwana wache vyo akulondiwa. Nanti tuli mu ntamyo tungasubila ukuti u Yehova atughanite. Uwa masalimo akanena ukuti: ‘Nanti intamyo zyafyenya umwe mukunsangalusya nu kwikazya umoyo wane pasi.’​—Sali. 94.19.

5. Nkimba ulughano ulusubaliwa ulwa Yehova lukung’anamula ichoni kwa umwe?

⁵ U Yehova musubaliwa. (Sali. 103.8) Atakufwituka nanti twabomba ichintu chimo ichibibi. Akabalilo akinji Abaizilayeli bakamunangilagha u Yehova, loli akabukilila ukubalangizya ulughano umwakubabuzya ukuti: ‘Waba we wapamwanya sana mumaso ghane, wachindikiwa sona une nakughana.’ (Yesa. 43.4, 5) Ulughano ulwa Chala lutasintite. Akabalilo kosi tungamusubalila. Napo tungapanga ubutulanongwa ubukulu, loli u Yehova atakutuleka. Nanti twalapa nu kunyokela kwa Yehova tukwiza pakwennya ukuti achili atughanite. Atulayizizye ukuti ‘akwiza pakutuhobokela nu moyo ghosi.’ (Yesa. 55.7) Ibayibolo likunena ukuti “akwiza pakubapa akabalilo akakutuzikizya.”​—Imbo. 3.19.

6. Nkimba pa Zekariya 2.8 pakutumanyisya ichoni ivya Yehova?

⁶ Belenga Zekariya 2.8. U Yehova akutuyanisya ni mboni iyi lyiso lyache. Ilyiso kachigaba akakulondiwa sona kapamwanya sana pa mubili uwa muntu. Po vili ngati ukuti u Yehova akunena ukuti, ‘Aliwesi yo akubavulazya umwe mwe bantu bane, akuvulazya ichintu cho chapamwanya sana kwa une.’ Ichifukwa chakuti atughanite, u Yehova akwivwisya lubilo mo tukwiyivwila sona akuba wakwisengannya ukutufighilila. Nanti twakomana ni ntamyo vikumubaba sana. Cho chifukwa tungaba nu lusubilo ulwakuti akwamula nanti tukumulaba ukuti: ‘Munfighilile ngati mo mukufighilila imboni iyi lyiso lyinyu.’​—Sali. 17.8.

7. Choni cho tukulondiwa ukusubila ukuti u Yehova atughanite?

⁷ U Yehova akulonda ukuti tusubilaghe ukuti amughanite aliwesi pamwene. Loli akumanya ukuti ichifukwa cha vintu vyo twakomana navyo pa bumi bwitu, vingapangisya ukuti twande pakukayikila ukuti atughanite. Pamo vingaba ukuti pa kabalilo aka, tukukomana ni ntamyo zyo zingatupangisya ukuti twande pakukayikila nanti u Yehova atughanite. Choni cho chingaghomya ulusubilo lwitu? Za tumanyile mo u Yehova akalangizizya ulughano lwache kwa Yesu, mo akulangizizya ku bapakaziwa na kwa uswe.

 MO U YEHOVA AKULANGIZIZYA ULUGHANO LWACHE

8. Choni cho u Yesu akasubilagha ukuti Ubaba wache amughanite?

⁸ U Yehova nu Mwana wache bikalila poka akabalilo akatali sana ukuchila aliwesi. Bakaba pa bumanyani imyaka amabiliyoni aghinji kumwanya, bakabombelagha poka imbombo sona bakaghananagha. Ngati mo tukubelengela pa Matayi 17.5, u Yehova akalangizya pabuzelu mo akumughanilagha u Yesu. U Yehova nge akanena umwabupepe bulo ukuti, ‘Uyu weyo muntu yo namutuma.’ Loli akalondagha ukuti tumanye mo amughaniye u Yesu umwakuti akamwitizya ukuti “Mwana wane, umughaniwa.” U Yehova akahobokagha nu u Yesu sona vyo akaba papipi pakubomba. (Efe. 1.7) Sona u Yesu atakakayikilagha ukuti u Baba wache amughanite sana. U Yehova akamughanagha naloli u Yesu, umwakuti u Yesu atakakayikilagha ukuti u Baba wache amughanite. U Yesu akanena umwakupyanizya-pyanizya ukuti ali nu lusubilo ukuti u Baba wache amughanite.​—Yoha. 3.35; 10.17; 17.24.

9. Nkimba mazyu buli gho ghakulongosola ulughano lo u Yehova ali nalo ku bapakaziwa? Longosola. (Loma 5.5)

⁹ U Yehova akululangizya sona ulughano lwache ku bapakaziwa. (Belenga Aba Loma 5.5.) Ennya amazyu aghakuti “akizuzya amoyo ghitu.” Ibuku limo ilyakulongosola ivya Bayibolo likulongosola amazyu agha ngati ukuti “ghukiza kwa uswe ngati amizi mulusoko.” Amazyu agha ghakulangizya ulughano ulwa maka lo u Yehova ali nalo ku bapakaziwa! Abapakaziwa bakumanya ukuti “baghaniwe nu Chala.” (Yuda 1) Umutumiwa u Yohani akalongosola mo bakwiyivwila po akasimba ukuti: “Ennya namumo u Tata u Chala atughaniye, umwakuti tukwitiziwa bana bache!” (1 Yoha. 3.1) Nkimba u Yehova abaghanite abapakaziwa bene? Awe, u Yehova akulangizya ulughano lwache ku bantu bosi.

10. Nkimba u Yehova alangizizye buli-buli ukuti atughanite nkani?

¹⁰ Ka chintu buli cho u Yehova abombite ukulangizya ukuti atughanite? U Yehova alangizizye ulughano ulukulu nkani ukuchila aliwesi pakutupa isembe iya kutusatula. (Yoha. 3.16; Loma 5.8) U Yehova akatupa Umwana wache uwapamwanya nkani, ukumwitikizya ukuti ize afwe mumalo mwa bantu bosi ukuti imbibi zyitu zihobokeliwe sona ukuti tube bamanyani bache. (1 Yoha. 4.10) Nanti tunginong’onelapo nkani pa vyo u Yehova nu Yesu bakabomba ukuti batusatule, vingatwavwa ukwivwisya akiza ulughano lo bali nalo kwa aliwesi uwa uswe. (Gala. 2.20) Isembe iya kutusatula yitakapelekiwa ichifukwa chakuti u Yehova ilongele bulo. Loli isembe iyi chabupi icha lughano. U Yehova alangizya ukuti atughanite sana pakwiyipa umwakutupa ichintu ichapamwanya sana kukwache​—u Yesu. U Yehova akitikizya ukuti Umwana wache atamiwe nu kufwa mumalo mwa uswe.

11. Nkimba tukumanyilapo ichoni pa Yeremiya 31.3?

¹¹ Ngati mo twenezya, u Yehova atakwiyivwa bulo ukuti atughanite, loli akulangizya mo atughaniye. (Belenga Yeremiya 31.3.) U Yehova atuweseye kukwache ichifukwa chakuti atughanite. (Yanisya nu Ukukumbusya Indaghilo 7.7, 8.) Patalipo nachimo-chimo cho chingatusabulannya ku lughano ulu. (Loma 8.38, 39) Nkimba ulughano ulu lukubapangisya ukuti mwiyivwange buli-buli? Belenga Salimo 23, nu kwennya mo u Devedi akiyivwilagha nu lughano lo u Yehova akamulangizyanga sona mo numwe mungiyivwila.

KA MUKWIYIVWA BULI-BULI NU LUGHANO LO U YEHOVA AKUBALANGIZYA?

12. Ka mungalilongosola buli-buli isimbo ilya Salimo 23?

¹² Belenga Salimo 23.1-6. Pa Salimo 23, u Devedi akalongosola ulusubilo lo akaba nalo ulwakuti u Yehova amughanite sona akumupwelela. U Devedi akalongosola ubumanyani bo akaba nabo nu Yehova umwakumwitizya ukuti Mudimi wache. Pa Salimo 23, u Devedi akiyivwanga wakufighililiwa nanti akukonka ubulongozi ubwa Yehova sona akamusubilagha nu moyo wache ghosi. U Devedi akamanya ukuti u Yehova inti abukilile  ukumulangizya u lughano pa bumi bwache bosi. Choni cho chikamupangisya ukuti abe nu lusubilo?

13. Choni cho u Devedi akasubilagha ukuti u Yehova akamupwelelelagha?

¹³ ‘Intakwiza pakusobapo nachimo-chimo.’ Ichifukwa chakuti akabalilo kosi u Yehova akamupanga vyosi vyo akalondiwanga, u Devedi akiyivwanga ukuti akupweleleliwa. U Devedi akahobokagha sana nu bumanyani bo akaba nabo nu Yehova sona u Yehova akahobokagha nawe. Cho chifukwa akaba wakusimikizya ukuti mulimosi mo ivintu vingize vibele kuntazi pa bumi bwache, u Yehova akwiza pakubukilila ukumupa vyo akulondiwa. Ichifukwa chakuti u Devedi akasubilagha ukuti u Yehova amughanite sona inti abukilile ukumupwelelela, vikamwavwa ukuti atakapasyange na chilichosi mumalo mwache akabanga wakuhoboka nu wakwikutisiwa.​—Sali. 16.11.

14. Ka u Yehova angatupwelelela buli-buli umwa lughano?

¹⁴ U Yehova akutupwelelela umwa lughano nkani-nkani nanti ivintu ivibibi vyabombiwa pa bumi bwitu. U Claire, a yo abombela pa Beteli imyaka iyakupulila 20, akasoba ichakubomba imbumba yabo yati yakomana ni ntamyo umwakukonkana. Ubaba wache akapanga isitiloko, umuzuna wache akepusiwa muchipanga, ibizinesi iya mbumba yabo yikamala sona bakaluza inyumba yabo. Ka u Yehova akalangizya buli-buli ukuti akubapwelelela umwa lughano? U Claire akanena ukuti: “U Yehova akenelezyanga ukuti imbumba yitu akabalilo kosi yili na vyosi vyo yikalondiwanga isiku lililyosi. Akabalilo akinji u Yehova akatupanga ivintu ivyinji ukuchila vyo tukalondiwanga! Akabalilo kosi nkwinong’onelapo pa mo u Yehova akatulangizizya ulughano sona te nkaluvye lumo. Nanti nkukumbukila ifundo izi, zikunavwa ukuti  mbukilile ukumubombela u Yehova napo ni ngakomana ni ntamyo.”

15. Ka u Devedi akasangalusiwa buli-buli? (Ennya sona ichituzi.)

¹⁵ ‘Akunsangalusya.’ Akabalilo kamo, u Devedi akatamiwanga inyinong’ono ichifukwa cha ntamyo ni njelo zyosi zyo akakomanagha nazyo. (Sali. 18.4-6) Loli ulughano lo u Yehova akamulangizyanga nu kumupwelelela vikamusangalusyanga. U Yehova akamutangililagha umumanyani wache uyu ku malo ‘aghisote ilyiza’ sona ku ‘malo aghakutuzyako ko kuli amizi aminji.’ Ivi vikamughomya u Devedi sona vikamwavwa ukuti abukilile ukumubombela u Yehova umwakuhoboka.​—Sali. 18.28-32.

16. Ka ulughano ulwa Yehova lukubasangalusya buli-buli?

¹⁶ Umwakuyana bulo amasiku ghano, ‘ichifukwa cha lughano ulwa Yehova tutamaliye zila’ nanti twakomana ni ntamyo pamo injelo pa bumi bwitu. (Ingu. 3.22; Kolo. 1.11) Inong’onela ichifwakizyo icha Rachel. Akatamiwanga inyinong’ono ichifukwa chakuti umulume wache akamuleka sona akamuleka u Yehova mukabalilo aka COVID-19. Ka u Yehova akamubombela ichoni? Akanena ukuti: “U Yehova akenelezyanga ukuti niyivwange ukuti nganiwe. Akanzingilizya na bamanyani bo bakapaghulagha akabalilo akakwangalila nune, bakantumila amameseji aghakukazya, bakizagha ni chakulya, ukumbelengela amasimbo nu kumwemwetela sona bakabukilila ukunkumbusya ukuti u Yehova achili akumpwelelela. Akabalilo kosi nkumupalizya sana u Yehova ichifukwa chakumpa imbumba iya lughano.”

17. Choni cho u Devedi ‘atakoghopagha nachimo-chimo’?

¹⁷ ‘Intakoghopa nachimo-chimo cho chingavulazya ichifukwa chakuti umwe muli nune.’ Akabalilo akinji ubumi bwa Devedi bukabanga pangozi sona akaba na balwani abinji abamaka. Loli ichifukwa chakuti u Yehova akamulangizyanga ulughano akiyivwanga ukuti wakufighililiwa. U Devedi akiyivwanga ukuti u Yehova akabanga nawe mu ntamyo yiliyosi, ivi vikamupangisyanga ukuti amusubilaghe nkani. Cho chifukwa akimba ukuti: ‘U [Yehova] akampokagha ku vintu vyosi vyo nkoghopagha.’ (Sali. 34.4) U Devedi akaba ni lyogha, loli ulughano lo u Yehova akamulangizyanga lukaba lwamaka nkani ukuchila ilyogha lyo akaba nalyo.

18. Ka ukusubila ukuti u Yehova abaghanite kungabaghomya buli-buli nanti muli ni lyogha?

¹⁸ Nkimba ukumanya ukuti u Yehova atughanite kungatupa buli-buli amaka nanti twakomana ni ntamyo? Umupayiniya yumo izina lyache u Susi, akalongosola mo nu mulume wache bakiyivwila umwana wabo ati ighogha: “Nanti ivintu ivibibi vyabombiwa pabumi bwinyu vingabakwafya sana umwakuti munganda pa koghopa sana ukuti ivintu ivibibi inti vibombiwe kuntazi ukuchila  vyo vyabombiwa. Loli ichifukwa chakuti u Yehova akutupasikizya, vyatwavwa ukuti twiyivwange akiza sona ukuti ukwennya ukuti swe bakufighililiwa.” U Rachel, yo twamutambula kubwandilo akukumbuka ukuti: “Ubusiku bumo po ichitima chikankola, nkapasyanga sona nkaba ni lyogha po nkiputa kwa Yehova umwakukwezya amazyu. Nkati namala bulo pakwiputa u Yehova akanavwa ukuti umoyo wane wikale pasi ngati mo umama akubombela nu mwana wache, po nkaghona utulo. Te nkaluvyepo lumo vyo vikabombiwa pa kabalilo aka.” Usongo yumo izina lyache u Tasos akikala imyaka 4 mujele ichifukwa chakukana ukwingila ubusilikali. Nkimba akennya buli-buli ukuti u Yehova amughanite sona akumupwelelela? Akanena ukuti: “U Yehova akampanga ivintu ivyinji ukuchila vyo nkalondiwanga. Ivi vikakazya ulusubilo lwane ulwakuti mbukilile ukumusubila nkani u Yehova. Sona u Yehova akanavwanga nu muzimu wache umuzelu ukuti imbe ne wakuhoboka napo ku jele te malo amiza aghakwikalako. Ivi vikanavwa ukumanya ukuti nanti nkumusubila nkani u Yehova, vikwiza pakunavwa ukuti nennyanje ukuti anganite. Po nkanda ukumubombela ngati mupayiniya uwa kabalilo kosi po nkaba mujele.”

MUPALAMILE KWA CHALA WINYU UWALUPASIKIZYO

19. (a) Ka inti twiputaghe buli-buli nanti twamanya ukuti u Yehova atughanite? (b) Nkimba mazyu buli aghakulongosola ulughano lo u Yehova ali nalo gho ghabafika nkani pa moyo? (Ennya ibokosi ilyakuti “ Amazyu gho Ghakutwavwa Ukwennya Ulughano lwa Yehova.”)

¹⁹ Ivifwanikizyo vyo twanenezannya mu nkani iyi vikulangizya ukuti u Yehova u Chala “umwenecho uwa lughano”ali nuswe! (2 Koli. 13.11) U Yehova akwennya ukuti aliwesi pamwene wakulondiwa. Tuli nu lusibilo ukuti tuzyunguliliwe nu ‘lughano lwache ulusubaliwa.’ (Sali. 32.10) Nanti tukwinong’onelapo nkani mo akutulangizizya ulughano lwache, vikutwavwa ukuti twande pakumwennya ukuti wanaloli nu kupalamile kukwache. Tungamulaba mu lwiputo umwambula ukoghopa nu kumubuzya mo tukulondela ukuti atulangizizye ulughano lwache. Tungamubuzya intamyo zyitu zyosi nu kuba nu lusubilo ulwakuti akutwivwisya sona wakwisengannya ukutwavwa.​—Sali. 145.18, 19.

20. Ka ulughano ulwa Yehova lungatwavwa buli-buli ukupalamila kukwache?

²⁰ Ngati mo tukupalamilila ku moto isiku lyo kukataye, umwakuyana bulo tungapalamila ku lughano ulwa Yehova. Ulughano ulwa Yehova lwamaka nkani sona lwalupasikizyo. Po akabalilo kosi muhobokaghe sana ichifukwa chakuti u Yehova abaghanite. Nge twebosi twabomba ivintu ukuyana nu lughano lo akutulangizya umwakunena ukuti: ‘Imughanite u Yehova’!​—Sali. 116.1.