INKHANI IYAKUMANYILA 4
ULWIMBO 18 Kuwonga Sembe Yakuwombora
Ka Isembe Iyakutusatula Yikutumanyisya Choni?
“U Chala akatulangizya ulughano lwache.”—1 YOHA. 4.9.
IFUNDO INKHULU
Isembe iyakutusatula yikuvumbula inkhalo zyo u Yehova u Chala nu Yesu Kilisitu bali nazyo.
1. Ka tukupindula bulibuli nanthi tukwayiwako pa Kukumbukila Imfwa ya Yesu Kilisitu umwaka ghulighosi?
Mungitikizya ukuti isembe iyakutusatula chabupi chapamwanya sana! (2 Koli. 9.15) Mukuba pabumanyani ubwiza nu Yehova u Chala ichifukwa chakuti u Yesu akiyipa ubumi bwache. Mungaba sona nu lusako ulwakwiza pakuba nu bumi ubwa bwila na bwila. Tubaghiye ukupalizya sana isembe iyakutusatula yo u Yehova akatupa ichifukwa cha lughano! (Loma 5.8) U Yesu akandisya Ukukumbukila Imfwa yache ukuti atwavwe ukubukilila ukupalizya sona ukuti tutakayennyanje isembe umwakupepuka.—Luka 22.19, 20.
2. Nkhimba inthi tunenezannye choni munkhani iyi?
2 Umwaka ughu, inthi tukumbukile imfwa ya Yesu pa Chibelusi, 12 Epulelo 2025. Tutakukayikila ukuti twebosi twe bakwisengannya ukuti twize twaghiwepo. Pa kabalilo ngati aka, tungize tupindule sana nu Kukumbukila Imfwa ya Yesu nanthi tungapaghula akabalilo nu kwinong’onelapo a vyo u Yehova nu Yesu batubombeye. Munkhani iyi, inthi tunenezannye vyo isembe iyakutusatula yikutumanyisya ivyakukwafannya nu Yehova nu Mwana wache. Inkhani iyakukonkhapo yikwiza pakutwavwa ukwivwisya mo tungapindulila ni sembe iyakutusatula sona mo tungalangizizya ukuti tukupalizya.
VYO ISEMBE IYAKUTUSATULA YIKUTUMANYISYA IVYA YEHOVA
3. Ka imfwa iya munthu weka yingabapoka bulibuli abanthu amamiliyoni? (Ennya sona ichithuzi.)
3 Isembe iyakutusatula yikutumanyisya ivyakukwafannya nu bugholosu bwa Yehova. (Kumbu. 32.4) Bulibuli? Inong’onela ifundo iyi: Ichifukwa chakuti u Adamu atakivwila, tukapyana imbibi ni mfwa. (Loma 5.12) Ukuti tusatuliwe kumbibi ni mfwa, u Yehova akapanga indondomeko iyakuti u Yesu apeleke isembe. Loli ka umunthu weka uwakufikapo angasatula bulibuli abanthu amamiliyoni? Umutumiwa u Pabuli akalongosola ukuti: ‘Pakuti ukuyana namumo abanthu abinji bakabela bambibi ichifukwa chakusita ukwivwila ukwa munthu weka [u Adamu], umwakuyana bulo, abanthu abinji bakwiza ukuba bagholosu pamaso pa Chala pachifukwa icha kwivwila ukwa munthu weka [u Yesu].’ (Loma 5.19; 1 Timo. 2.6) Mu mazyu aghanji tunganena ukuti ukusita ukwivwila ukwa munthu weka kukapangisya ukuti tube bazya aba mbibi ni mfwa. Cho chifukwa pakalondiwanga umunthu weka uwakufikapo ukuti atusatule.
Umunthu weka akapangisya ukuti tube bazya ba mbibi ni mfwa. Umwakuyana bulo, umunthu weka akutusatula (Ennya indime 3)
4. Choni cho u Yehova atakitikizya ukuti abana aba Adamu bo bakaba ni myoyo iyiza babukilile ukwikala nu bumi kwa bwila na bwila?
4 Ka u Yesu akalondiwa naloli ukufwa ukuti atusatule? Ka u Yehova nge atakitikizya bulo ukuti abana ba Adamu bo bakaba ni myoyo iyiza bikale nu bumi kwa bwila na bwila? Ku banthu abambula ukufikapo, ivi vingaboneka ukuti koko kukaba kulangizya ichisa sona yoyo yikaba zila inyiza. Loli ichifukwa chakuti u Yehova mugholosu, cho chifukwa atakasulako bulo vyo u Adamu akananga.
5. Choni cho tungasimikizya ukuti akabalilo kosi u Yehova akubomba cho chigholosu?
5 Ka nge vili bulibuli nanthi u Yehova atakapelekagha isembe nu kwitikizya ukuti abana ba Adamu abambula ukufikapo babukilile ukwikala kwa bwila na bwila? Abanthu nge bakanda ukwennya ukuti u Chala aleka ukubomba ivinthu mwabugholosu pa vinthu vimo. Umwakufwanikizya, ka nge akaba ukuti apotwa ukukwanilisya ivinthu vimo vyo akalayizya? Tutakulondiwa ukupasya nanthi momo vikabelagha. U Yehova akabomba ivinthu umwabugholosu pakupeleka Umwana wache umughaniwa ukuba sembe, ukutusimikizya ukuti akabalilo kosi akubomba cho chigholosu.
6. Nkhimba isembe iyakutusatula yikulangizya bulibuli ukuti u Yehova atughanite? (1 Yohani 4.9, 10)
6 Napo isembe yikutwavwa ukwivwisya ukuti u Yehova mugholosu loli nkhaninkhani yikutwavwa nkhani ukwivwisya ulughano lo ali nalo. (Yoha. 3.16, belenga 1 Yohani 4.9, 10) Isembe iyakutusatula yikutumanyisya ukuti u Yehova atakulonda ukuti twize twikale bulo nu bumi kwa bwila na bwila, loli akulonda sona ukuti twikale mumbumba yache. Inong’onela ifundo iyi: U Adamu akati ananga, u Yehova akamwefyamo mumbumba iya babombi bache. Cho chifukwa twebosi tukapapiwa kuzi ku mbumba iya Chala. Loli ukwendela musembe iyakutusatula u Yehova akutuhobokela imbibi zyitu sona lunulu inthi ize ababike abanthu bosi bo bali nu lwitiko sona bakumwivwila mumbumba yache. Napo vili bunubu, na pa kabalilo kano kope bulo tungaba pabumanyani nu Yehova sona Abakilisitu abamwitu. Momumo twebosi u Yehova akulangizya ukuti atughanite!—Loma 5.10, 11.
7. Ka inthamyo zyo u Yesu akakomana nazyo zikutwavwa bulibuli ukwivwisya ulughano lo u Yehova ali nalo kwa uswe?
7 Tungivwisya akiza mo u Yehova atughaniye nanthi tunginong’onelapo umutengo uwa sembe. U Satana akanena ukuti patalipo nayumoyumo umubombi wa Chala yo angabukilila ukuba musubaliwa kwa Chala nanthi angakomana ni nthamyo. Ukuti u Yehova asusye ubumyasi ubu, akitikizya ukuti u Yesu atamiwe po achili atafuye. (Jobu 2.1-5; 1 Pita. 2.21) U Yehova akennyanga po abakususya bakamunenagha kabibibi u Yesu, abasilikali bakamusyemphagha sona pa kabalilo ko bakamukomelelagha pikwi. Sona u Yehova akennyanga po Umwana wache umughaniwa akivwanga ububavu nu kufwa. (Mata. 27.28-31, 39) U Yehova akaba na maka gho nge akapangisya ukuti ivinthu ivi vitakabombiwe. Umwakufwanikizya, po abakususya bakanenagha ukuti: “Po leka twennye nanthi u Chala ukulonda ukumupoka ilelo,” u Yehova nge akamupoka. (Mata. 27.42, 43) Loli nanthi u Chala akabombagha bunubu, isembe iyakutusatula nge yitakapelikiwa sona nge tute lusubilo nalumolumo. Chochobene u Yehova akitikizya ukuti Umwana wache ajimbe ku nthamyo izyakupambanapambana mphaka po akafwila.
8. Ka u Yehova akiyivwa bulibuli pakwennya ukuti Umwana wache akutamiwa? Longosola (Ennya sona ichithuzi.)
8 Tutakinong’onaghe ukuti po u Chala wamakaghosi atakwivwa ububavu! Tupeliwe muchifwani chache, sona atupelite ukuti twiyivwange muzila yiniyi nanthi ivinthu ivibibi vyabombiwa. Ivi vikutwavwa ukwivwisya mo u Yehova akwiyivwila nanthi ivinthu ivibibi vikubombiwa. Ibayibolo likumulongosola ukuti ‘akivwa ububavu mumoyo’ ni ‘ichitima.’ (Sali. 78.40, 41) Inong’onela sona inkhani iya Abulahamu nu Ayizeki. Mungakumbukila ukuti u Abulahamu bakamulamula ukuti apeleke umwana wache weka na weka ukuti abe sembe. (Ubwa. 22.9-12; Hebe. 11.17-19) Nanthi munginong’onelapo, mungivwisya mo u Abulahamu akiyivwilagha po akisengannyanga ukuti aye apeleke ubumi ubwa Ayizeki ukuba sembe umwakumucheka ni chipeni. Tutakukayikila ukuti u Yehova vikamukwafya sana po akennyanga Umwana wache akutamiwa pikwi nu kughoghiwa na banthu bo batakamwiputagha u Chala!—Ennya ividiyo iyakuti, Yezgani Chipulikano Chawo—Abrahamu, Chigaŵa 2 pa jw.org.
Vikamubaba sana u Yehova pakwennya Umwana wache akutamiwa (Ennya indime 8)
9. Ka isimbo ilya Aba Loma 8.32, 38, 39 lyabavwa bulibuli ukwivwisya mo u Yehova abaghaniye umwe na Bakilisitu Abamwinyu?
9 Isembe iyakutusatula yikutumanyisya ukuti patalipo nayumo yo atughanite ngati mo u Yehova atughaniye, napo angaba mukamu witu umughaniwa pamo umumanyani witu uwa pamoyo. (Belenga Aba Loma 8.32, 38, 39.) Tutakukayikila ukuti u Yehova atughanite sana ukuchila namo twighaniye. Ka mukulonda ukuti mwize mwikale kwa bwila na bwila? U Yehova weyo akulonda nkhani ukuchila umwe. Nkhimba mukulonda ukuti imbibi zyinyu zihobokeliwe? U Yehova weyo akulonda nkhani ukuti zihobokeliwe ukuchila umwe. Akutulaba swebosi ukuti tulangizyange ukuti tukupalizya ichabupi ichapamwanya ichi nu kumwivwila. Naloli isembe iyakutusatula yikulangizya ulughano ulwenecho lo u Yehova ali nalo. Sona muchisu ichipya tukwiza pakumanyila ivyinji ivyakukwafannya nu lughano lo u Yehova ali nalo.—Ndumbi. 3.11.
VYO ISEMBE IYAKUTUSATULA YIKUTUMANYISYA IVYA YESU
10. (a) Choni cho u Yesu akaba ni chitima po akatamiwanga? (b) Ka u Yesu akazelufya bulibuli izina lya Yehova? (Ennya sona ibokosi ilyakuti “ U Yesu Akazelufya Izina lya Yehova Ichifukwa Chakuti Akaba Musubaliwa.”)
10 U Yesu akalondagha ukufighilila imbili iya Baba wache. (Yoha. 14.31) U Yesu akaba ni chitima sana ichifukwa chakuti bakamupa inongwa iyakuti akumusamula u Chala, vyo nge vikapangisya ukuti izina lya Baba wache linyoziwe. Chochobene akiputa ukuti: ‘Tata wane, nanthi zingabombiwa efya ulubako ulwa nthamyo ulu kukwane.’ (Mata. 26.39) Ichifukwa chakuti u Yesu akabukilila ukuba musubaliwa mphaka po akafwila, akalizelufya izina lya Baba wache.
11. Ka u Yesu akalangizya bulibuli ukuti abaghanite nkhani abanthu? (Yohani 13.1)
11 Isembe iyakutusatula yikutumanyisya sona ukuti U Yesu akubapasikizya abanthu nkhaninkhani abamanyili bache. (Mbupi. 8.31; belenga Yohani 13.1 ) Umwakufwanikizya, u Yesu akamanyagha ukuti pabulumbilili bwache ubwa pachisu ichapasi inthi ize akomane ni nthamyo sona akwiza ukufwa imfwa iyakubaba. Loli po akabombagha imbombo yache pachisu ichapasi, atakabombagha umwadango bulo. Mumalo mwache akabikaghapo umoyo pakulumbilila, pakumanyisya nu kubavwa abanji. Pisiku lyo akafwilagha, u Yesu akapaghula akabalilo nu kusukuzya ivinama ivya batumiwa bache sona akababuzya amazyu agha bumalilo aghakusangalusya nu kubapa ubulongozi. (Yoha. 13.12-15) Pa kabalilo ko akaba pikwi, u Yesu akapeleka ulusubilo ku chigabenga sona akapanga indondomeko iyakuti umama wache apweleleliwe. (Luka 23.42, 43; Yoha. 19.26, 27) Cho chifukwa u Yesu atakalangizya bulo ulughano lwache ichifukwa chakuti akitikizya ukuti afwe, loli akalangizya ulughano ulu pa vyosi vyo akabombagha po akaba pachisu ichapasi.
12. Nkhimba u Yesu akubukilila bulibuli ukutwavwa?
12 Napo u Yesu akafwa ‘lyoka bulo’ loli achili akutwavwa. (Loma 6.10) Ka vikubombiwa bulibuli? Achili akubukilila ukubikapo umoyo pakutwavwa, ukuti isembe iyakutusatula yibombaghe imbombo mumalo mwa uswe. Ennya vyo akubomba. Akubomba ngati we Mwene witu, Uwasembe Usongo Nkhani, sona mutu wachipanga. (1 Koli. 15.25; Efe. 5.23; Hebe. 2.17) Sona akubomba imbombo iyakubunganika abapakaziwa na chilundilo ichikulu, imbombo yo yikwiza ukumala po inthamyo inkhulu yichili ukumala. b (Mata. 25.32; Mali. 13.27) Akwenelezya sona ukuti ababombi bache abasubaliwa, bakulyesiwa akiza mwabuzimu mumasiku aghabumalilo agha. (Mata. 24.45) Sona mubulaghili bwache bosi ubwa myaka 1,000, akwiza ukubukilila ukutwavwa twe banthu. Naloli u Yehova atughanite sana pakutupa Umwana wache!
MUTAKALEKE UKUMANYILA
13. Ka ukwinong’onelapo pa lughano lo u Chala nu Yesu bakutulangizya kungatwavwa bulibuli ukuti tubukilile ukumanyila?
13 Mungabukilila ukumanyila ivya lughano lo u Yehova u Chala nu Yesu Kilisitu bali nalo kwa uswe nanthi mukubukilila ukwinong’onelapo pa vyo batubombeye. Po tukukumbukila Imfwa ya Yesu umwaka ughu, mungabelenga ibuku lyoka pamo aminji agha Mazyu Amiza. Mutakabelengaghe ivinthu ivyinji pa kabalilo koka loli mubelengaghe panandipanandi nu kwennya ivifukwa ivyamwabo vyo tukumughanila u Yehova nu Yesu. Mungabombezya izila yiliyosi ukuti mubabuzyeko abanji vyo mwamanyila.
14. Ka ukufufuza kungatwavwa bulibuli nanthi tukumanyila ivya sembe iyakutusatula ni nkhani izyamwabo? (Salimo 119.97) (Ennya sona ichithuzi.)
14 Nanthi mwikala mubwanaloli ukwa myaka iyinji, pamo mungaswigha nanthi pangaba ivinthu vimo iviphya ivyakuti mungamanyila ivyakukwafannya ni vinthu vyo muvimenye kale ngati pa nkhani iya bugholosu ubwa Chala, ulughano lwache ni sembe iyakutusatula. Ubwanaloli bwakuti te tukalekepo lumo ukumanyila ivyakukwafannya ni nkhani izi, ni zyamwabo. Polelo ka mungabomba choni? Mubikepo umoyo pakubelenga nu kumanyila inkhani zyo zili mumabuku ghithu izyakukwafannya ni nkhani izi. Nanthi mwabelenga inkhani yimo yo mutakuyivwisya akiza mufufuzaghe. Pisinda pache, isiku lililyosi munginong’onelaghapo pa vyo mwamanyila nu kwennya vyo mwamanyilapo ivyakukwafannya nu Yehova, Umwana wache na mo babaghaniye.—Belenga Salimo 119.97 na mazyu aghamunthende.
Napo tungaba ukuti twikala mu bwanaloli ukwa myaka iyinji, loli tungalangizya ukuti tukupalizya isembe iyakutusatula (Ennya indime 14)
15. Choni cho tukulondiwa ukubikapo umoyo ukuti tumanyile ivinthu ivipya ivya mu Bayibolo?
15 Mutakawange amaka nanthi mutakwagha ivinthu vimo ivipya pamo ivyakuhobosya pa kabalilo kosi ko mukubelenga pamo mukufufuza. Mube ngati munthu yo akulondelezya ugolide. Umwabufisalyoyo angamalila amaawazi aghinji pamo amasiku aminji po akufufuza napo angaba ukuti atamwaghite ugolide nayumoyumo. Loli akubukilila ukubikapo umoyo pakumulondelezya ichifukwa chakuti ugolide wakulondiwa sana kukwache. Ubwanaloli ubwa mu Bayibolo, bwapamwanya nkhani ukuchila ugolide! (Sali. 119.127; Mbupi. 8.10) Chochobene, mukulondiwa ukuba bafisalyoyo nu kubikapo umoyo ukuti mukwanilisyanje indondomeko yinyu iyakubelengela Ibayibolo.—Sali. 1.2.
16. Nkhimba tungamweghelela bulibuli u Yehova nu Yesu?
16 Nanthi mukumanyila, mulondelezyanje izila izya mo mungalangizizya ukuti mukubombezya ifundo zyo mukumanyila. Umwakufwanikizya, mungeghelela ubugholosu bwa Yehova umwakubomba ivinthu na banji umwakusita ukusalila. Mungamweghelela u Yesu pa mo akamughanilagha u Baba wache na banji umwakuba bakwisengannya ukutamiwa ichifukwa chi zina lya Yehova sona ukukomana ni nthamyo mumalo mwa Bakilisitu abamwinyu. Mungamweghelela sona u Yesu umwakubikapo umoyo pakulumbilila ku banji umwakuti bope bulo babe nu lusako ulwakuti bize bapokele ichabupi ichapamwanya nkhani cho u Yehova atupiye.
17. Ka munkhani iyakukonkhapo tukwiza pakunenezannya choni?
17 Nanthi tukwivwisya akiza sona tukupalizya isembe iyakutusatula, vingatwavwa ukuti tumughanaghe nkhani u Yehova nu Mwana wache. Nanthi twabomba bunubu, bope bulo inthi batughane nkhani. (Yoha. 14.21; Yako. 4.8) Polelo, za tubikepo umoyo pakubombezya ivinthu vyo u Yehova akutupa ukuti tubukilile ukumanyila ivyakukwafannya ni sembe iyakutusatula. Munkhani iyakukonkhapo, tukwiza ukunenezannya mo tungapindulila ni sembe iyakutusatula sona mo tungalangiziziya ukuti tukupalizya ulughano lo u Yehova akutulangizya.
ULWIMBO 107 Chiuta Ntchakuwonerapo cha Chitemwa
a AMAZYU GHO GHALONGOSOLIWA: Amazyu aghakuti ukwinong’onelapo, ghakung’anamula ukubika inyinong’ono zyako zyosi pa nkhani yo ukubelenga nu kwinong’onelapo nkhani ifundo zyo ukumanyilapo.
b Ukubungannya ‘ivinthu vyosi ivyakumwanya’ vyo u Pabuli akanena pa Aba Efeso 1.10 kukupambana sana nu kubungannya “abasaliwaʹko u Yesu akanena pa Matayi 24.31 nu Maliko 13.27. U Pabuli akanenagha ivya kabalilo ko u Yehova akusala abana bache ababuzimu umwakubapakazya nu muzimu wache ubuzelu. Po u Yesu akanenagha ivya kabalilo ko akwiza pakubungannya abapakaziwa bo bakwiza ukuba ukuti bachili bali pachisu ichapasi pa kabalilo aka nthamyo inkhulu.
