INKHANI IYAKUMANYILA 5
ULWIMBO 108 Chitemwa cha Chiuta
Mo Tukupindulila nu Lughano lwa Yehova
“U Kilisitu u Yesu akiza muchisu ichapasi ichi pakupoka abambibi.”—1 TIMO. 1.15.
IFUNDO INKHULU
Inthi tumanyile mo tungapindulila ni sembe iyakutusatula sona mo tungalangizizya ukuti tukumupalizya u Yehova.
1. Ka tungabomba choni ukuti tumuhobosye u Yehova?
TUFWANIKIZYE ukuti mwamupa umunthu yo mumughanite ichabupi cho chikuboneka akiza sona mukusubila ukuti inthi chimwavwe. Tutakukayikila ukuti mungakalala sana nanthi umunthu yo mwamupa ichabupi achisengula bulo ukusita ukuchibombezya imbombo! Loli mungahoboka sana nanthi angachibombezya akiza ukulangizya ukuti akupalizya. Nkhimba ifundo yache yakuti choni? U Yehova akatupa Umwana wache ukuti afwe mumalo mwa uswe. U Yehova akuhoboka sana nanthi akwennya ukuti tukulangizya ukuti tukupalizya ichabupi ichapamwanya ichi nu lughano lo akatulangizya umwakupeleka isembe!—Yoha. 3.16; Loma 5.7, 8.
2. Nkhimba munkhani iyi inthi tunenezannye choni?
2 Nanthi imyaka yendapo, pamo tungaleka ukwennya ukuti isembe iyakutusatula chabupi chapamwanya sana. Nanthi vingaba bunubu, vingaba ngati ukuti twasengula ichabupi cho u Chala atupiye. Tungaba ukuti tukuhoboka ukuti tuli nacho, loli twachisengula bulo ukusita ukuchibombezya imbombo. Ukuti ivi vitakabombiwe, tukulondiwa ukubukilila ukulangizya ukuti tukupalizya vyo u Chala nu Kilisitu batubombeye. Inkhani iyi inthi yitwavwe ukumanya mo tungabombela. Inthi tunenezannye mo tungapindulila ni sembe iyakutusatula pa kabalilo aka, sona mo tungize tupindulile munthazi. Inthi twennye sona mo tungalangizizya ukuti tukupalizya ulughano lo u Yehova atulangizizye nkhaninkhani pa kabalilo ko Tukukumbukila Imfwa ya Yesu.
MO TUKUPINDULILA PA KABALILO AKA
3. Ka pa kabalilo aka tukupindula bulibuli ni sembe iyakutusatula?
3 Pa kabalilo aka tukupindula kale ni sembe iyakutusatula yo u Kilisitu akapeleka. Umwakufwanikizya, ichifukwa cha sembe iyakutusatula, u Yehova akutuhobokela imbibi zyitu. Nayumo yo angamukakamizya ukuti abombe bunubu loli akutuhobokela ichifukwa chakuti akutulondela ivyiza. Uwamasalimo akimba ukuti: ‘Mwe Yehova, mwe biza sona mwe bakwisengannya ukuhobokela.’—Sali. 86.5; 103.3, 10-13.
4. Choni cho u Yehova akapeleka isembe iyakutusatula? (Luka 5.32; 1 Timoti 1.15)
4 Bamo bangiyivwa ukuti u Yehova atangabahobokela. Ubwanaloli bwakuti swebosi te swe bakwenelela ukuhobokeliwa. Umutumiwa u Pabuli akivwisya ifundo iyi ukuti ‘atakaba wakwenelela ukwitiziwa ukuti mutumiwa.’ Sona akongelezyapo ukuti: “Loli muchisa icha Chala indi mumo imbeleye.” (1 Koli. 15.9, 10) Nanthi twapinduka ku mbibi zyitu, u Yehova akutuhobokela. Choni cho akutuhobokela? Ichifukwa chakuti atughanite. Nanthi mukwiyivwa ukuti te mwe bakwenelela, mukumbukilaghe ukuti u Yehova atakapeleka isembe iyakutusatula ku banthu bo te batulanongwa loli ku banthu bo bakupinduka ku mbibi zyo babomba.—Belenga Luka 5.32; 1 Timoti 1.15.
5. Ka aliwesi wa uswe akulondiwa ukwiyivwa ukuti wakwenelela ukulangiziwa ichisa nu Yehova? Longosola.
5 Nayumoyumo yo angiyivwa ukuti u Yehova angamulangizya ichisa ichifukwa chakuti amubombela ukwa myaka iyinji. Ubwanaloli bwakuti u Yehova akupalizya sana nanthi swe basubaliwa. (Hebe. 6.10) U Yehova atakatupa Umwana wache ngati chabupi ichifukwa cha mbombo yo tukumubombela loli akatupa ngati chabupi ichapabulo. Nanthi tungadaya ukuti tukulondiwa ukulangiziwa ichisa muzila yimo iyapalubazu, tungaba ngati tukunena ukuti pate iphindu nalimo lyo u Kilisitu akafwila.—Yanisya nu Aba Galatiya 2.21.
6. Choni cho u Pabuli akabikaghapo umoyo pakumubombela u Yehova?
6 U Pabuli akamanya ukuti akamubombela ivyinji u Chala loli atangamuhobokela ichifukwa cha vinthu vyo akakwanisya ukubomba. Choni cho akabikaghapo umoyo pakumubombela u Yehova? Atakabomba bunubu ichifukwa chakuti wakwenelela awe loli akabomba bunubu ukuti alangizye u kupalizya ichisa ichikulu cho u Yehova akamulangizya. (Efe. 3.7) Ngati we Pabuli tutakubikapo umoyo pakumubombela u Yehova ukuti atulangize ichisa loli tukulangizya ukuti tukumupalizya pa chisa cho atulangizizye.
7. Nkhimba zila buli iyamwabo yo tukupindulila ni sembe iyakutusatula pa kabalilo aka? (Aba Loma 5.1; Yakobo 2.23)
7 Izila iyamwabo yo tukupindulila ni sembe iyakutusatula pa kabalilo aka, ko kuba pabumanyani ubwiza nu Yehova. a Ngati mo tukamanyilila munkhani iyapisinda, po tukapapiwanga tutakaba pa bumanyani nu Chala. Loli ichifukwa cha sembe iyakutusatula, “tuli nu mutende nu Chala” sona tukupalamila kukwache.—Belenga Aba Loma 5.1; Yakobo 2.23.
8. Choni cho tukumupalizya sana u Yehova ichifukwa chakuba nu lusako ulwakunena nawe mulwiputo?
8 Inong’onela izila yoka yo yingatwavwa ukuba pabumanyani nu Yehova, lo lusako ulwakunena nawe mu lwiputo. U Yehova atakwivwa bulo inyiputo izya banthu bache nanthi bali pachilundilo cha banthu, loli akwivwa inyiputo izya aliwesi napo angaba kwaweka. Ulwiputo lungatwavwa ukwagha umutende uwa mumoyo loli tukupindula sona muzila izinji. Lukutwavwa ukuti tube pabumanyani ubwakughoma nu Chala. (Sali. 65.2; Yako. 4.8; 1 Yoha. 5.14) Pa kabalilo ko akaba pachisu ichapasi, u Yesu akiputagha akabalilo kosi ichifukwa chakuti akamanyagha ukuti u Yehova akamuteghelezyanga sona inyiputo zyo akiputagha zikamwavwanga ukuti abe pa bumanyani ubwakughoma nu Baba wache. (Luka 5.16) Chakuhobosya sana ukuti tuli pa bumanyani ubwiza nu Yehova sona tuli nu bwabuke ubwakunena nawe mulwiputo ichifukwa chakuti u Yesu akapeleka ubumi bwache!
MO TUKWIZA UKUPINDULILA MUNTHAZI
9. Ka ababombi ba Yehova abasubaliwa bakwiza ukupindula bulibuli ni sembe iyakutusatula?
9 Ka ababombi ba Yehova abasubaliwa bakwiza ukupindula bulibuli munthazi ichifukwa cha sembe iyakutusatula? Bakwiza ukupokela ubumi ubwa bwila na bwila. Abanthu abinji bakwinong’ona ukuti ivi vitangabombiwa ichifukwa chakuti ukwa myaka amasaghuzani aghinji gho ghendapo abanthu bakufwa. Loli ubwighane bwa Yehova ukwanda kale bwakuti abanthu bikalaghe nu bumi kwa bwila na bwila. Nanthi u Adamu atakanangagha, nge patalipo nayumoyumo yo nge akwinong’ona ukuti vitangabombiwa ukwikala nu bumi kwa bwila na bwila. Napo pa kabalilo aka vingaboneka ukuti vitangabombiwa ukwikala nu bumi ubwa bwila na bwila, loli u Yehova apangite ichinthu ichapamwanya sana ukuti anyosezyepo ivinthu ngati mo vikabela pabwandilo umwakutupa ichabupi icha Mwana wache umughaniwa.—Loma 8.32.
10. Nkhimba abapakaziwa na bang’ozi izinji bakulindilila ichoni?
10 Napo munthazi tukwiza ukubwagha ubumi ubwa bwila na bwila loli u Yehova akulonda ukuti pa kabalilo aka twinong’onelaghepo izya bumi ubo. Abapakaziwa bakulindilila umwachinyonywa ukuti bize babe nu bumi ubwa bwila na bwila kumwanya po bakwiza ukulaghila ichisu ichapasi poka nu Kilisitu. (Ubuvu. 20.6) Po abang’ozi izinji, bakulindilila ukuti bize bikale Mupaladayiso pachisu ichapasi mo mutakwiza ukuba ivyakubaba pamo inthamyo yiliyosi. (Ubuvu. 21.3, 4) Ka mwe bang’ozi izinji mwe mukulindilila ukuti mwize mwikale nu bumi ubwa bwila na bwila pachisu ichapasi? Umuvwalo ughu, te wapasi pakuyanisya na gho bakwiza ukupokela bo bakuya kumwanya! Chilichosi cho umunthu akunyonywa chilibombiwa. Ubumi bukwiza ukuba bwakuhobosya sana pachisu ichapasi.
11-12. Ka Mupaladayiso tukwiza ukwagha malusayo buli? (Ennya sona ivithuzi.)
11 Inong’onela mo ubumi bukwiza ukubela Mupaladayiso pachisu ichapasi. Mutakwiza ukupasyapo ukuti mungabina pamo mungafwa. (Yesa. 25.8; 33.24) U Yehova akwiza pakubabombela chilichosi cho mukunyonywa. Ka mukulonda ukuti mwize mumanyile ichoni? Ivya sayansi? Ivya nyimbo? Ivya kujambulajambula? Tutakukayikila ukuti Mupaladayiso mukwiza ukulondiwa abakupanga amapulani, abakuzenga na balimi. Pakwiza ukulondiwa sona abanthu abakuti bavwepo pa mbombo izyakupambanapambana ngati abakupiya ichakulya, abakupanga ivinthu ivyakubombela imbombo nu kupwelelela ichisu. (Yesa. 35.1; 65.21) Ichifukwa chakuti mukwiza ukwikala nu bumi kwa kabalilo akatali, mukwiza pakuba na kabalilo akakumanyilila ivinthu vyosi vyo mungalonda.
12 Chikwiza ukuba chakuhobosya sana ukubapokelela abanthu bo bakwiza pakuzyuka! (Imbo. 24.15) Inong’onela sona mo mukwiza pakuhobokela pakumanyila ivyinji ivya Yehova umwakwennya ivinthu vyo apelite. (Sali. 104.24; Yesa. 11.9) Ichinthu ichakuhobosya nkhani ukuchila vyosi chakuti tukwiza ukumwiputa u Yehova ukusita ukwiyipa inongwa! Ka mungapotwa ukuti mwize mwaghe ivisayo vyosi ivi ichifukwa chakulonda ‘ukwilagha ni mbibi pa kabalilo akapimpha bulo’? (Hebe. 11.25) Tutakukayikila ukuti te momo mungabombela! Amalusayo agha, ghapamwanya nkhani ukuchila chilichosi cho mungaba nacho pa kabalilo aka. Mukumbukilaghe akabalilo kosi ukuti ilayizyo ilyakuti kukwiza pakuba u Paladayiso inthi likwanilisiwe mwalunulu. Ivinthu vyosi ivi vikwiza pakubombiwa ichifukwa chakuti u Yehova atughanite nkhani pakutupa Umwana wache ngati chabupi!
Ka chinthu buli cho mukulonda sana ukuti mwize mwennye ukuti chikukwanilisiwa Mupaladayiso? (Ennya indime 11-12)
MUPALIZYANJE ULUGHANO LO U YEHOVA AKUBALANGIZYA
13. Nkhimba tungalangizya bulibuli ukuti tukupalizya ulughano lo u Yehova atulangizizye? (2 Aba Kolinti 6.1)
13 Ka tungalangizya bulibuli ukuti tukumupalizya u Yehova ichifukwa chakuti atupiye isembe iyakutusatula? Umwakubika imbombo yache pabwandilo pa bumi bwitu. (Mata. 6.33) Ichifukwa cho u Yesu akafwila chakuti abanthu “bosi bo bali nu bumi batakabe nu bumi ubwakwihobosya bene, loli bababanje nu bumi ubwakumuhobosya mwene yuyo akatufwila.” (2 Koli. 5.15) Tutakulonda napanandi ukuti tuluze ichisa ichikulu cho u Yehova atulangizizye.—Belenga 2 Aba Kolinti 6.1.
14. Nkhimba tungalangizya bulibuli ukuti tukusubila izila iya mo u Yehova akutulongozezya?
14 Tungalangizya sona ukuti tukupalizya ulughano lo u Yehova akutulangizya, umwakusubila izila yo akutulongozezya. Bulibuli? Pa kabalilo ko tukulonda ukusala ivinthu ngati mo inthi tumanyilile isukulu pamo imbombo yo tungize tubombe, tukulondiwa ukwinong’onelapo tasi vyo u Yehova akulonda ukuti tubombaghe. (1 Koli. 10.31; 2 Koli. 5.7) Nanthi tukubomba ivinthu vyo vingalangizya ukuti tuli nu lwitiko, vingatwavwa ukuti tube pa bumanyani ubwakughoma nu Yehova. Sona ulusubilo lwitu lukughoma sana.—Loma 5.3-5; Yako. 2.21, 22.
15. Ka tungalangizya bulibuli ukuti tukupalizya isembe mu kabalilo Akakukumbukila Imfwa ya Yesu?
15 Pali sona izila iyamwabo yo tungalangizizya ukuti tukupalizya ulughano lo u Yehova atulangizizye. Tungalangizya ukuti tukumupalizya sana u Yehova ichifukwa cha sembe iyakutusatula umwakubomba ivyinji pa kabalilo Akakukumbukila Imfwa ya Yesu. Umwakongelezyapo, nanthi tukwisengannya ukwaghiwapo Pakukumbukila Imfwa ya Yesu, tubitizyanjeko sona abanji ukuti bope bize baghiwepo. (1 Timo. 2.4) Mubalongosolele bo mwabitizya ivinthu vyo vikubombiwa pa kabalilo aka lukomano ulwa Kukumbukila Imfwa ya Yesu. Ividiyo iyakuti Choni cho u Yesu Akafwa? sona Mukumbukilaghe Imfwa ya Yesu gho ghali pa jw.org ghangabavwa ukuti mubalongosolele akiza. Abasongo abachipanga, babaghiye ukubitizyako bo bakaleka ukwiza pa nkhomano zyitu. Inong’onela ukuhoboka ko kukubako kumwanya na pachisu ichapasi, nanthi ing’ozi yoka iya Yehova yo yikasobela yanyokela pa ludimo lwache! (Luka 15.4-7) Pa lukomano ulwa Kukumbukila Imfwa ya Yesu, tutakalamunkhanaghe bulo twebenebene loli tubalamukaghe sona abalendo bo biza pa lukomano ulu pamo bo bakaleka ukwiza pa nkhomano zyitu. Tukulonda ukuti biyivwange ukuti bapokeleliwa ni nyobe zibili!—Loma 12.13.
16. Choni cho tukulondiwa ukubomba ivyinji mu bulumbilili mu kabalilo Akakukumbukila Imfwa ya Yesu?
16 Nkhimba tungongelezyapo ukubomba imbombo zimo izyabuzimu mu kabalilo Akakukumbukila Imfwa ya Yesu? Nanthi tukubomba bunubu, tukulangizya ukuti tukupalizya sana vyosi vyo u Chala nu Kilisitu batubombeye. Nanthi tukubomba ivyinji pakumubombela u Yehova, vikutwavwa ukumanya mo akututulila vyo vikutupangisya ukuti tumusubilaghe nkhani. (1 Koli. 3.9) Sona tukulondiwa ukukonkha indondomeko iyakubelengela Ibayibolo mu kabalilo Akakukumbukila Imfwa ya Yesu yo yili mu kabuku aka Ukumanyila Amasimbo Isiku ni Siku pamo pa tchati cho chikwaghiwa mu kabuku aka nkhomano. Mungasala ukuti mubombezye inkhani izya mu Bayibolo izi po mukumanyila pa mwebene.
17. Choni cho chikumuhobosya u Yehova? (Ennya sona ibokosi ilyakuti, “Mo Tungalangizizya Ukuti Tukupalizya Ulughano lwa Yehova.”)
17 Akabalilo kamo ukuyana na mo ivinthu vibeleye pa bumi bwinyu, vingapangisya ukuti mutakabombe vyosi vyo twanenezannya munkhani iyi. Mukumbukilaghe ukuti u Yehova atakuyanisya vyo mukubomba ni vyabamwinyu, loli akwennya vyo vili mumoyo winyu. Akupalizya sana nanthi akwennya mo mukupalizizya ichabupi icha sembe iyakutusatula.—1 Samu. 16.7; Mali. 12.41-44.
18. Choni cho tukumupalizya u Yehova u Chala nu Yesu Kilisitu?
18 Ichifukwa cha sembe iyakutusatula, tukuhobokeliwa imbibi zyitu, tuli pa bumanyani nu Yehova sona tukwiza ukupokela ubumi ubwa bwila na bwila. Nge twabukilila ukupalizya ulughano lwa Yehova lo lukamupangisya ukuti atupe ivisayo ivi. (1 Yoha. 4.19) Sona nge twabukilila ukumupalizya u Yesu yo akapeleka ubumi bwache ichifukwa cha uswe!—Yoha. 15.13.
ULWIMBO 154 Chitemwa Chikumara Yayi
a U Yehova akabahobokela abanthu bo bakamwiputagha napo u Kilisitu akaba ukuti achili atapelekite isembe. U Yehova akabomba bunubu ichifukwa chakuti akasubilagha ukuti Umwana wache akwiza ukubukilila ukuba musubaliwa mphaka pa bumalilo. Ichifukwa chakuti u Chala akennyanga ngati ukuti isembe iyakutusatula yipelekiwe kale.—Loma 3.25.
