1. Ka abanthu a binji amasiku ghano bakubikapo umoyo pakubomba choni?

 NKHIMBA mukwennya mo abanthu abinji bakubombela amasiku ghano? Umwakufwanikizya, bamo bakumalila akabalilo akatali pa malo aghakwangalilapo agha pa intaneti ukuti bilangizye pa vyo bakwanisya ukubomba. Loli banthu banandi bulo amasiku ghano bo bakumupa u Yehova u Chala ubuchindamu. Munkhani iyi, inthi tunenezannye vyo ukumupa ubuchindamu u Yehova kukung’anamula sona vyo vingatwavwa ukuti tubombe bunubu. Inthi tumanyile sona mo tungamupela u Chala ubuchindamu bo bumubaghiye na mo akwiza pakulichindikila izina lyache munthazi.

KA UKUMUPA U YEHOVA UBUCHINDAMU KUKUNG’ANAMULA CHONI?

 2. Ka u Yehova akavumbula bulibuli ubuchindamu bwache Pighamba ilya Sinayi? (Ennya sona icha pachifwambo.)

² Ka ubuchindamu chochoni? Mu Bayibolo amazyu aghakuti “ubuchindamu,” ghakwimila chilichosi cho chingamupangisya yumo ukuti ahoboke. U Yehova akalangizya ubuchindamu bwache pakati pendapo akabalilo akanandi bulo ukufuma po akabasatula Abaizilayeli ku buzya ku Ijiputi. Inong’onela ichakubombiwa ichi: Abaizilayeli amamiliyoni aghinji bakabungana munthende Mwighamba ilya Sinayi ukuti bakomane nu Chala wabo. Ibingu ifitu nkhani likakupikila ighamba. Umwakuchenusya, kukabombiwa ichisenyentha ichikulu cho chikaneng’ennya ichisu, utumesya tukamesyanga, kukaba ukujilimisya sona kukivwikagha ukulila ukwa mphembe. (Kuso. 19.16-18; 24.17; Sali. 68.8) Inong’onela mo Abaizilayeli bakiyivwilagha po u Yehova akavumbulagha amaka gho ali nagho mubuchindamu bwache.

 3. Nkhimba ukumupa u Yehova ubuchindamu kukung’anamula choni?

 ³ Buli pakunena ivya banthu? Nkhimba tungamupa u Yehova ubuchindamu? Inga tungamupa. Izila yoka yo tungamupela u Yehova ubuchindamu ko kubabuzyako abanji ivya maka gho ali nagho sona inkhalo zyache izyakuhobosya. Tungamupa sona u Chala ubuchindamu nanthi tukumupalizya pa vinthu vyo atwavwa ukuti tukwanisye ukubomba. (Yesa. 26.12) Umwene u Devedi chifwanikizyo ichiza sana ku bo bakumuchindika u Yehova. Mulwiputo lwache lo akiputa panthazi pa chilundilo icha Baizilayeli akati: ‘Mwe Yehova, ubukulu, amaka, ubuswepu, ubuchindamu nu muchizi vyosi vyinyu sona vyosi vyo vili kumwanya na pachisu ichapasi vyinyu.’ U Devedi akati amala pakwiputa ulwiputo ulu, ‘ichilundilo chosi chikamupala u Yehova.’—1 Syambu. 29.11, 20.

 4. Ka u Yesu akamupa bulibuli u Yehova ubuchindamu?

⁴ Pa kabalilo ko u Yesu akaba pachisu ichapasi, akapelekagha ubuchindamu kwa Baba wache pakulangizya ukuti amaka gho akapangilagha iviswigho weyo akamupanga. (Mali. 5.18-20) U Yesu akamupa sona ubuchindamu u Yehova pa mo akanenelagha ivyakukwafannya nu Baba wache sona mo akabombelagha ivinthu na banji. Isiku limo po u Yesu akamanyisyanga munyumba iyakwiputilamo, pakaba umukolo yumo yo akatamiwanga nu muzimu umubibi ukwa myaka 18. Umuzimu umubibi ghukapangisya ukuti umukolo uyu apetame umusana, vyo vikapangisya ukuti apotwange ukugholoka. Chikaba chachitima sana! U Yesu ichisa chikamulema, po akanena nu mukolo yula umwachisa ukuti: ‘Wee mukolo, wasatuka ku nthamyo zyako.’ U Yesu akabika inyobe zyache pa mukolo yula, umwalubilolubilo akagholoka nu “kumupalizya u Chala” ichifukwa chakuti akamupozya! (Luka 13.10-13) Umukolo yula akaba ni chifukwa ichiza sana ichakumupela u Yehova ubuchindamu sona nuswe bulo momo tubombelaghe.

CHONI CHO TUKUMUPA U YEHOVA UBUCHINDAMU?

 5. Choni cho tukumuchindika u Yehova?

⁵ Tukumupa u Yehova ubuchindamu ichifukwa chakuti tukumuchindika nkhani. Tuli ni vifukwa ivyinji sana ivyakumuchindikila. U Yehova wamakaghosi sona amaka ghache ghate ni mphaka. (Sali. 96.4-7) Amahala ghache ghakubonekela akiza sana mu vinthu vyo apelite. Weyo Chiziba ichabumi sona akutupa vyosi vyo tukulondiwa ukuti tubukilile ukuba nu bumi. (Ubuvu. 4.11) U Yehova musubaliwa. (Ubuvu. 15.4) Akukwanisya ukubomba chilichosi cho akulonda sona akabalilo kosi akukwanilisya amalayizyo ghache. (Yoswa 23.14) Tutakukayikila ukuti cho chifukwa umulaghuzi u Yelemiya pakunena ivya Yehova akati: “Pakasi pa banthu abamahala bosi abamitundu na pakasi pa mabumwene ghabo, patalipo nayumo yo angayana numwe’! (Yere. 10.6, 7) Chochobene, tuli ni vifukwa ivyiza sana vyo tungamuchindikila u Baba witu uwakumwanya. U Yehova akutubombela ivyinji ukuchila mo tukumuchindikila sona akuhoboka nanthi akwennya ukuti tumughanite.

 6. Choni cho tumughanite u Yehova?

⁶ Tukumupa u Yehova ubuchindamu ichifukwa chakuti tumughanite sana. Inong’onela inkhalo zyo u Yehova ali nazyo zyo zikutupangisya ukuti tumughanaghe. U Yehova wachisa sona wachililizi. (Sali. 103.13; Yesa. 49.15) Ichifukwa chakuti wachililizi, vikumubaba sana nanthi tukutamiwa. (Zeka. 2.8) Apangisizye ukuti chibe chipepe sana ukupalamila kukwache pakuba mumanyani witu. (Sali. 25.14; Imbo. 17.27) Sona u Yehova wakwiyisya; ‘akwinama ukuti ennye kumwanya ni chisu ichapasi, akumunyamusya palufumbi umunthu uwapasi.’ (Sali. 113.6, 7) Ka atangabapo nayumo yo akulonda ukumupa ubuchindamu u Chala witu uwapamwanya?—Sali. 86.12.

 7. Nkhimba tuli nu lusako buli?

⁷ Tukumupa u Yehova ubuchindamu ichifukwa chakuti tukulonda ukuti abanthu abanji bamumanye.  Abanthu abinji batamumenye akiza u Yehova. Chifukwa buli? Ichifukwa chakuti u Satana azighite inyinong’ono zyabo nu kubabuzya ivyabumyasi ivyakukwafannya nu Yehova. (2 Koli. 4.4) U Satana akubabuzya abanthu umwakusimikizya ukuti u Yehova akulonda ukubavulazya, atakubapwelelela sona ukuti weyo akupangisya inthamyo zyosi zyo zili muchisu. Loli uswe tukumanya ubwanaloli ubwakukwafannya nu Chala witu! Polelo tuli nu lusako ulwakubavwa abanthu ukuti bamanye ubwanaloli nu kwanda ukumupa ubuchindamu. (Yesa. 43.10) Salimo 96 likunena ukuti tukulondiwa ukubikapo umoyo pakumupa u Yehova ubuchindamu. Po tukunenezannya ifundo zimo izya mwi salimo ili, inong’onela izila izya mo mungabombela ukuti mumupange u Yehova ubuchindamu bo bumubaghiye.

KA TUNGAMUPA BULIBULI U YEHOVA UBACHINDAMU BO BUMUBAGHIYE?

 8. Ka tungamupa bulibuli u Yehova ubuchindamu? (Salimo 96.1-3)

⁸ Belenga Salimo 96.1-3. Tungamupa u Yehova ubuchindamu ukwendela mu vyo tukunena. Amavesi agha, ghakutubuzya ukuti abanthu ba Yehova bakulondiwa ‘ukumwimbila u Yehova, ukulipala izina lyache nu kulumbilila amazyu amiza agha bupoki sona ukulumbilila ivya buchindamu bwache pakasi pa mitundu yosi.’ Ivinthu vyosi ivi, zila zyo tungalangizizya ukuti tukumupa ubuchindamu u Baba witu uwakumwanya. Abayuda abasubaliwa na Bakilisitu ababwandilo, batakazyelazyelagha ukubabuzyako abanji ivinthu ivyiza vyo u Yehova akababombela nu kufighilila imbili yache. (Dani. 3.16-18; Imbo. 4.29) Ka nuswe bulo tungabomba bulibuli bunubu?

9-10. Ka twamanyilako ichoni ku vyo vikabombiwa kwa Angelena? (Ennya sona ichithuzi.)

⁹ Ennya vyo vikabombiwa kwa muyemba yumo izina lyache u Angelena, a yo akwikala ku United States. Akafighilila izina lya Yehova umwabujimvu ku kampani yo akubombako. Akati anda bulo pakubomba imbombo ku kampani iyi, u Angelena bakamwitizya ku miting’i iya bo banda bulo ukubombela pa kampani ukuti babe nu lusako ulwakubabuzyako abamwabo ivya mbili yabo. U Angelena akisengannya ukuti aye alangizye ivinthu vimo ivyakulangizya mo akuhobokela pakuba we Kaboni wa Yehova. Loli pakati pasyala panandi bulo ukuti ilongosole, uwamwabo akilongosola ukuti akakulila mu mbumba iya Bakaboni ba Yehova. Po akanda ukunyoza vyo tukusubila. U Angelena akati: “Umoyo wane ghukanda ukunyamukila mumwanya. Loli nkhilalusya ukuti: ‘Ka nitikizye ukuti yumo amunene  u Yehova ivinthu ivyabumyasi? Pamo mbukilile ukuba ku chigaba cha Yehova?’”

¹⁰ Uwamwabo akati amala pakunena, umwalubilo u Angelena akiputa ulwiputo ulwa mumoyo. Pisinda pache akamubuzya umwachisa ukuti: “Mo nakulila vikuyana bulo na mo uwamwitu uyu akulila. Nune bulo nakulila mu mbumba iya Bakaboni ba Yehova sona ntchili ne Kaboni.” Napo bakamusekagha, loli u Angelena akabukilila ukuba mujimvu nu kubalangizya ivithuzi vyo vikalangizyanga ukuti akuhoboka pakubomba ivinthu ivyabuzimu sona akakwanisya ukufighilila vyo akusubila loli umwamuchizi. (1 Pita. 3.15) Choni cho chikabombiwa pisinda pache? U Angelena akati amala pakwilongosola, umunthu yula akatontha umoyo. Umwakuti akanda ukunena ivinthu ivyiza vyo akukumbukila vyo vikabombiwanga po akaba we Kaboni wa Yehova. U Angelena akati: “Izina lya Yehova likafighililiwa. Chikaba chinthu chapamwanya sana ukunena ubwanaloli ubwakukwafannya ni zina lyache.” Nuswe bulo tungamupa u Yehova ubuchindamu nu kumupala nanthi abanji bakumunyoza.

11. Ka imbili yikulangizya bulibuli ukuti Abakilisitu ababwanaloli bakukonkha ubulongozi bo buli pa Salimo 96.8?

¹¹ Belenga Salimo 96.8. Tungamupa u Yehova ubuchindamu ni vinthu vyo tuli navyo. Abakilisitu ababwanaloli bakumupala u Yehova akabalilo kosi ni vinthu vyo bali navyo. (Mbupi. 3.9) Umwakufwanikizya, Abaizilayeli bakapelekagha ivinthu vyabo pakuzenga nu kuyannya itempeli. (2 Nyafya. 12.4, 5; 1 Syambu. 29.3-9) Abamanyili ba Yesu bamo bakabombezyanga ‘ivinthu vyabo’ pakumwavwa u Yesu na batumiwa bache. (Luka 8.1-3) Abakilisitu ababwandilo bope, bakapelekagha ivinthu vyabo ukuti babavwe abakamu na bayemba babo ababuzimu. (Imbo. 11.27-29) Nuswe bulo amasiku ghano, tungamuchindika u Yehova pakupeleka ivyabupi.

12. Ka ivyabupi vyo tukupeleka, vikumupa bulibuli u Yehova ubuchindamu? (Ennya sona ichithuzi.)

¹² Ennya ichakubombiwa choka bulo cho chikulangizya mo ivyabupi vyo tukupeleka, vikupelekela ubuchindamu kwa Yehova. Ilipoti ilya 2020 likalongosola mo ivinthu vikabela ku Zimbabwe. Abanthu amamiliyoni aghinji ubumi bwabo bukaba pangozi ichifukwa chakuti batakaba ni chakulya ukongelezyapo nu muyemba witu yumo izina lyache u Prisca. Napo ivinthu vikatamya sana, loli u Prisca akabukilila ukukonkha indondomeko yache iyakwingilila mu bulumbilili pa Chitatu na pa Chisano na pa kabalilo akachisiku. Abapalamani bache bakamunyozagha ichifukwa chakuti akingilagha mu bulumbilili mumalo mwakubuka ku mughunda.  Bakanenagha ukuti, “Inthi mwize mufwe ni zala.” U Prisca akamula umwabujimvu ukuti, “U Yehova atakubalekapo lumo ababombi bache.” Patakenda akabalilo akatali, umuyemba uyu akapokela ubutuli ukufuma ku gulu lyitu. Umuyemba witu uyu akapokela ubutuli ubu ichifukwa cha vyabupi vyo tukupeleka. Ivi vikati vyabombiwa vikabakwafya sana abapalamani ba Prisca sona bakamubuzya ukuti, “Naloli u Chala atakulekite, tukulonda ukumanyila ivyinji ivya Yehova.” Pa kabalilo aka, abapalamani bache 7 bakwaghiwapo pa nkhomano izya pachipanga.

13. Ka inkhalo zyitu zingamupa bulibuli u Yehova ubuchindamu? (Salimo 96.9)

¹³ Belenga Salimo 96.9. Tungamupa u Yehova ubuchindamu, ukwendela mu vyakubomba vyitu. Abasembe bo bakamubombelagha u Yehova pa tempeli bakalondiwanga ukuba bakuswepa. (Kuso. 40.30-32) Ichakulondiwa nkhani te ko kuswepa bulo ku mubili loli ukuba ni nkhalo inyiza. (Sali. 24.3, 4; 1 Pita. 1.15, 16) Tukulondiwa ukubikapo umoyo ukuti ‘tuvule ubunthu bwitu ubwakale’ zyo nkhalo ni vyakubomba ivibibi, nu kuvwala ‘ubunthu ubupya’ ko kwinong’ona nu kubomba ivinthu vyo vikulangizya inkhalo inyiza zyo u Yehova ali nazyo. (Kolo. 3.9, 10) U Yehova angamwavwa yo ali ni nkhalo imbibi sona uwankhaza ukusintha nu kuvwala ubunthu ubupya.

14. Nkhimba mwamanyilako ichoni ku vyo vikabombiwa kwa Jack? (Ennya sona ichithuzi.)

¹⁴ Inong’onela ivya Jack, yo akaba wankhaza sana sona uwakoghofya umwakuti bakamwitizyanga izina ilyakuti, Ichimuzimu Ichibibi. Ichifukwa cha nongwa zyo akaba nazyo, bakamupa ichilango ichakuti aghoghiwe bulo. Loli po u Jack akalindililagha isiku ilyakughoghiwa, akanda ukumanyila Ibayibolo nu mukamu yo akabukagha pakulumbilila ku jele ko u Jack akaba. Napo u Jack akabombagha ivinthu ivibibi kwisinda, loli akavula ubunthu bwache ubwakale nu koziwa. Isiku ilyakuti aghoghiwe likati lyakwana, aba polisi bamo bo bakamwelezyanga bakalila po bakalaghanagha nawe ichifukwa chakuti u Jack akaba ukuti asinthite sana. Usongo uwa bapolisi yo akabombagha ku jele ili akati: “U Jack akaba chigabenga ichakoghofya sana pamalo agha. Loli pa kabalilo aka munthu mwiza sana.” Pakati pendapo usabata ukufuma po u Jack akaghoghiwa, abakamu bo bakapangisyanga inkhomano usabata aliwesi ku jele, bakakomana nu kayidi yumo yo kakaba kabwandilo ukwaghiwapo pa nkhomano. Choni cho chikamupangisya ukuti aghiwepo? Ichifukwa chakuti akahoboka na mo u Jack akasinthila inkhalo zyache,  sona akalondagha ukumanya vyo akulondiwa ukubomba ukuti amwiputaghe u Yehova. Naloli, inkhalo zyitu zingapeleka ubuchindamu kwa Baba witu uwakumwanya!—1 Pita. 2.12.

KA U YEHOVA AKWIZA PAKULICHINDIKA BULIBULI IZINA LYACHE MUNTHAZI?

15. Ka u Yehova akwiza pakupeleka bulibuli ubuchindamu kwi zina lyache? (Salimo 96.10-13)

¹⁵ Belenga Salimo 96.10-13. Amavesi aghabumalilo mu Salimo 96, ghakumulongosola u Yehova ukuti Mulongi nu Mwene umugholosu. ka u Yehova akwiza pakulichindika bulibuli izina lyache munthazi? Akwiza pakulichindika izina lyache pa mo akwiza pakupelekela ubulongi. Umwalunulu apa, inthi amulonge u Babeloni Umukulu yo akulisamula izina lyache. (Ubuvu. 17.5, 16; 19.1, 2) Bamo bo bangize bennye ukuti u Babeloni Umukulu akumongoliwa, bangize basinthe nu kwanda ukwiputa nuswe mubwanaloli. Pabumalilo pa nkhondo iya Alamagedoni, u Yehova akwiza pakubupyuta ubulaghili bosi ubwa Satana poka ni vinthu vyosi ivibibi, ukubefyapo bosi bo bakumususya na bo bakusamula izina lyache. Loli akwiza pakubapoka bosi bo bamughanite sona bakumwivwila bo bakuhoboka pakumupa ubuchindamu. (Mali. 8.38; 2 Tesa. 1.6-10) Ukugheliwa ukwabumalilo ko kukwiza ukubapo pisinda pa Bulaghili ubwa Kilisitu ubwa Myaka 1,000, u Yehova akwiza ukuba ukuti akwanisya ukuliswefya izina lyache. (Ubuvu. 20.7-10) Pa kabalilo ako, ‘ichisu chosi ichapasi chikwiza ukwizula na banthu bo bakwiza ukumanya ubuchindamu bwa Yehova ngati mo amizi ghakwizuzizya inyanja.’—Haba. 2.14.

16. Nkhimba inthi mubikepo umoyo pakubomba ichoni? (Ennya sona ichithuzi.)

¹⁶ Tukwiza ukuba bakuhoboka sana nanthi aliwesi iza anda pakumupa u Yehova ubuchindamu bo bubaghiye izina lyache! Loli po tukulindilila akabalilo aka, tukulondiwa ukubomba chilichosi cho tungakwanisya ukuti tumupe ubuchindamu u Chala witu pa lusako lulilosi lo tungalwagha. Chochobene, Akagulu Akakwenelezya kasala ukuti Salimo 96.8 lyolyo libe lisimbo ilya mwaka uwa 2025 lyo likuti: ‘Mumupe u Yehova ubuchindamu bo bubaghiye izina lyache.’