INKANI IYAKUMANYILA 30
ULWIMBO 36 Tikuvikilira Mitima Yithu
Ivintu vyo Tukumanyilako ku Bamwene aba ku Izilayeli
‘Mukwiza ukwennya impambano pakasi pa muntu umugholosu nu muntu umubibi, pakasi pa muntu yo akumubombela u Chala na yo atakumubombela.’—MALA. 3.18.
IFUNDO INKULU
Tumanyile mo u Yehova akabenezyanga abamwene aba ku Izilayeli, vyo vingatwavwa ukwivwisya vyo u Yehova akulonda ukuti bo bakumwiputa babombaghe amasiku ghano.
1-2. Nkimba Ibayibolo likuvumbula ichoni ivyakukwafannya na bamwene bamo aba ku Izilayeli?
IBAYIBOLO likutambula amazina aghakupululila 40 agha banavuli bo bakalaghilagha ngati bo bamwene Baizilayeli. a Likuvumbula sona ivintu vimo vyo abamwene bamo bakabomba. Umwakufwanikizya, abamwene bamo bo bakaba biza bope bakabomba ivintu ivibibi. Inong’onela ivya Mwene umwiza u Devedi. U Yehova akanena ukuti: ‘Umubombi wane u Devedi akankonkagha nu moyo wache ghosi, akabombagha cho chigholosu mumaso ghane.’ (1 Nyafya. 14.8) Loli umuntu uyu akabomba ubwamalaya nu mukolo yo akaba pa sendwa sona akapanga izila iyakuti umulume wache aye afwe ku nkondo.—2 Samu. 11.4, 14, 15.
2 Loli Ibayibolo likutubuzya sona ukuti abamwene bamo bo batakaba basubaliwa akabalilo kamo bakabomba ivintu ivyiza. Inong’onela ivya Lehobowamu. Mumaso gha Yehova ‘akabomba ivintu ivibibi.’ (2 Syambu. 12.14) Loli u Lehobowamu akamwivwila u Chala po akitikizya ukuti amaluko 10 ghafumeko ku bumwene bwache. Sona umutundu ghosi ghukapindula ichifukwa chakuti akabikapo umoyo pa kufighilila amatawuni.—1 Nyafya. 12.21-24; 2 Syambu. 11.5-12.
3. Nkimba pali lalusyo buli ilyakulondiwa hee, sona munkani iyi inti tunenezannye ichoni?
3 Pali ilalusyo ilyakulondiwa ili. Nanti abamwene aba ku Izilayeli bakabombagha ivintu ivyiza ni vibibi, ka u Yehova akamanyagha buli-buli ukuti umwene uyu musubaliwa mumaso ghache? Uansala uwilalusyo ili inti atwavwe ukwivwisya vyo u Yehova akwennya mwa uswe. Inti tunenezannye ifundo zitatu zyo zikamwavwanga u Yehova ukubamanya abamwene Abaizilayeli: Mo umoyo wabo ghukabela, ukupinduka kwabo, sona nanti bakitikizyanga ukwiputa ukwa bwanaloli.
BAKAMUGHANAGHA U YEHOVA NU MOYO WABO GHOSI
4. Ka abamwene abasubaliwa na bo batakaba basubaliwa bakapambanagha buli-buli?
4 Abamwene bo bakamuhobosyanga u Yehova, bakamwiputagha nu moyo wabo ghosi. b Umwene umwiza u Yehoshafati ‘akamulondagha u Yehova nu moyo wache ghosi.’ (2 Syambu. 22.9) Pakunena ivya Yosiya, Ibayibolo likunena ukuti: ‘Patalipo umwene yo akayanagha nawe, yo akanyokela kwa Yehova nu moyo wache ghosi.’ (2 Nyafya. 23.25) Buli pakunena ivya Solomoni yo imyaka yache iya kubumalilo akabomba ivintu ivibibi? ‘Atakamubombela nu moyo wache ghosi.’ (1 Nyafya. 11.4) Pakunena ivya Abiyamu, Ibayibolo likunena ukuti: ‘atakamubombela u Yehova nu moyo wache ghosi.’—1 Nyafya. 15.3.
5. Longosola vyo vikung’anamula ukumubombela u Yehova nu moyo ghosi.
5 Ka ukumubombela u Yehova nu moyo ghosi kukung’anamula choni? Umuntu yo akwiputa nu moyo wache ghosi atakumwiputa u Chala umwa dango bulo. Mumalo mwache, akumubombela u Yehova ichifukwa chakuti amughanite nkani sona akumuchindika. Umwakongelezyapo akubukilila ukumughana nu kumuchindika u Yehova pa bumi bwache bosi.
6. Ka tungabomba buli-buli ukuti tubukilile ukumubombela u Yehova nu moyo witu ghosi? (Isya Mbupingamu 4.23; Matayi 5.29, 30)
6 Ka tungabeghelela buli-buli abamwene bo bakaba basubaliwa sona bakamughanagha u Yehova nu moyo wabo ghosi? Tungabomba bunubu, umwakuleghuka ivintu vyo vingapangisya ukuti tubombe ivintu ivibibi. Umwakufwanikizya, ivyakusangalusya ivibibi vingagabannya umoyo witu. Tungaba na bamanyani ababibi bo bangatupangisya ukuti twinong’onelaghe nkani ivintu ivyakumubili. Nanti twamanya ukuti ichintu chimo chanda pakutupangisya ukuti tutakamubombelaghe u Yehova nu moyo ghosi, umwalubilo tukulondiwa ukubombapo zimo ukuti tuchifumyemo.—Belenga Isya Mbupingamu 4.23; Matayi 5.29, 30.
7. Choni cho chakulondiwa ukuleghuka chilichosi cho chingapangisya ukuti tuleke ukumughana u Yehova?
7 Tutakitikizye ukuti umoyo witu ghugabinkane. Nanti tutakucheba, tungipusika nu kwanda ukwinong’ona ukuti ichifukwa chakuti tukutangwanika pakubomba ivintu ivyabuzimu, tutakulondiwa ukucheba ukukana ivintu vyo vingatupangisya ukuti tubombe ivintu ivibibi. Umwakufwanikizya, inong’onela ukuti muli kuzi isiku lyo kukataye nkani sona kuli impepo iyakukuka. Mwati mwafika panyumba mwapemba umoto. Choni cho chingabombiwa nanti mungaleka ku mulyango kwakwighula? Munyumba mungakatala mwalubilo. Ka ifundo yache yakuti choni? Tukulondiwa ukubomba ivyinji mumalo mwakulya bulo ichakulya ichabuzimu cho chikutwavwa ukuti ubumanyani bwitu nu Yehova bubukilile. Tukulondiwa sona ukwighalila ulwighi mu moyo witu umwakuti impepo iya kukatala iya muchisu ichibibi ichi, pamo inkalo zyo zitakumuhobosya u Chala ukuti zitakingile mumoyo witu nu kughugabannya.—Efe. 2.2.
BAKAPINDUKA KU MBIBI ZYABO
8-9. Ka Umwene u Devedi nu Mwene u Hezekiya bakabomba buli-buli bati babapa ubulongozi? (Ennya ichituzi
8 Ngati mo twenezya mundime iyabwandilo, Umwene u Devedi akabomba ubutulanongwa ubukulu. Loli umulaghuzi u Natani ati amubuzya ubutulanongwa bo akabomba umwakwiyisya, u Devedi akapinduka. (2 Samu. 12.13) Ukufuma pa vyo alongosoye mu Salimo 51, tukwaghamo ubukaboni ubwakuti u Devedi akapinduka nu moyo wache ghosi. U Devedi atakapinduka umwabuzimbuli umwakuti amupusike u Natani pamo ukuti aleghuke ichilango.—Sali. 51.3, 4, 17, akamutu.
9 Umwene u Hezekiya wepe akamunangila u Yehova. Ibayibolo likunena ukuti: ‘Umoyo wache ghukati witutumula, ivi vikapangisya ukuti u Hezekiya, u Yuda nu Yelusalemu bakomane ni ntamyo.’ (2 Syambu. 32.25) Choni cho u Hezekiya akitutumula? Lumo chingaba ichifukwa chakuti akaba mukabi, akaba wakuhoboka ichifukwa chakuti akawina inkondo po akalwanga na ba Asiliya, pamo ichifukwa chakuti u Chala akamupozya umwakuswighisya kumbina yo akabinagha. Pamo ivi, vyo vyo vikamupangisya ukuti itutumule nu kubalangizya aba Babeloni ichuma chache chosi, pisinda pache umulaghuzi u Yesaya akamupa ubulongozi. (2 Nyafya. 20.12-18) Loli ngati mo akabombela u Devedi, u Hezekiya wepe umwakwiyisya akapinduka. (2 Syambu. 32.26) Pabumalilo, u Yehova akamwennya Umwene umusubaliwa uyu ukuti ‘akabukilila ukubomnba cho chigholosu.’—2 Nyafya. 18.3.
Umwene u Devedi nu Mwene u Hezekiya umwakwiyisya bakapinduka bati bapokela ubulongozi pambibi zyo bakabomba (Ennya indime 8-9)
10. Ka Umwene u Amaziya akabomba buli-buli ati apokela ubulongozi?
10 Umwakupambanako, Umwene u Amaziya uwa ku Yuda akabomba cho chigholosu ‘loli atakabomba nu moyo wache ghosi.’ (2 Syambu. 25.2) Nkimba akapuvya pighi? U Yehova akati amwavwa ukubapota aba Edomu, u Amaziya akanda ukwiputa aba chala babo ababumyasi. c Pisinda pache, umulaghuzi uwa Yehova akati amupa ubulongozi pa vyo umwene uyu akabomba atakamwivwila sona akamuchimbizya.—2 Syambu. 25.14-16.
11. Ukuyana nu 2 Aba Kolinti 7.9, 11, nkimba tukulondiwa ukubomba ichoni ukuti imbibi zyitu zihobokeliwe? (Ennya sona ivituzi.)
11 Nkimba ku vifwanikizyo ivi tukumanyilako ichoni? Nanti twabomba ivintu ivibibi, tukulondiwa ukupinduka nu moyo ghosi sona ukubomba chilichosi cho tungakwanisya ukuti tuleghuke ukupyanizya sona vyo twabomba. Ka tungabomba choni nanti twapokela ubulongozi ukufuma ku basongo aba chipanga napo tungabwennya ukuti te bwakulondiwa nkani? Tutakulondiwa ukwiyivwa ukuti u Yehova pamo abasongo baleka ukuhoboka nuswe. Na bamwene abiza bope aba ku Izilayeli bakalondiwanga ubulongozi. (Hebe. 12.6) Nanti twapokela ubulongozi tukulondiwa (1) ukubupokela umwakwiyisya, (2) ukusinta mwalubilo po pakulondiwa sona (3) butwavwe ukuti tumubombelaghe u Yehova nu moyo witu ghosi. Nanti twapinduka ku mbibi zyitu, u Yehova angatuhobokela.—Belenga 2 Aba Kolinti 7.9, 11.
Nanti twapokela ubulongozi, tukulondiwa (1) ukwiyisya (2) ukusinta po pakulondiwa, sona (3) ukubukilila ukumubombela u Yehova nu moyo ghosi (Ennya indime 11) f
BAKITIKIZYANGA UKWIPUTA UKWA BWANALOLI
12. Choni cho chikapangisyanga abamwene abasubaliwa ukupambana na bamwene bo batakaba basubaliwa?
12 Abamwene bo u Yehova akabennyanga ukuti basubaliwa, bakitikizya ukwiputa ukwa bwanaloli. Sona bakabalimbikisyanga abantu babo ukuti bope babombaghe bunubu. Napo vikaba bunubu, akabalilo kamo bope bakapuvyanga ivintu vimo ngati mo twenezya kubwandilo. Loli bakabikaghapo umoyo pakumwiputa u Yehova nu kubomba vyosi vyo bangakwanisya ukuti befyemo ivifwani muchisu chabo. d
13. Choni cho u Yehova akamulonga u Mwene u Ahabu ukuti te musubaliwa?
13 Buli pakunena ivya bamwene bo u Yehova akabalonga ukuti te basubaliwa? Ubwanaloli bwache bukaba bwakuti, te vintu vyosi vyo bakabomba vikaba vibibi. Umwakufwanikizya, Umwene umubibi u Ahabu akalangizya ukwiyisya ati amanya ukuti u Naboti aghoghiwa ichifukwa cha yuyo. (1 Nyafya. 21.27-29) Sona akazenga amatawuni nu kuwina inkondo po akabalwilagha Abaizilayeli. (1 Nyafya. 20.21, 29; 22.39) Loli u Ahabu akalimbikisyanga ukwiputa ukwa bumyasi umwakwavwiliziwa nu muchi wache. Atakapinduka pa vyo akabomba ivi.—1 Nyafya. 21.25, 26.
14. (a) Choni cho u Yehova akamwennya u Mwene u Lehobowamu ukuti te musubaliwa? (b) Ka nkalo buli yo abamwene bo batakaba basubaliwa bakaba nayo?
14 Inong’onela ivya Lehobowamu umwene uwamwabo yo atakaba musubaliwa. Ngati mo twenezya mundime izya bwandilo, po akalaghilagha akakwanisya ukubomba ivintu ivyinji ivyiza. Loli ubumwene bwache bwati bwikalana, akaleka ukwivwila indaghilo zya Yehova nu kwanda ukwiputa aba chala aba bumyasi. (2 Syambu. 12.1) Pisinda pache, akanda ukwiputa u Yehova nu kwiputa aba chala ababumyasi. (1 Nyafya. 14.21-24) Te we Mwene u Lehobowamu nu Ahabu bene bo bakaleka ukwiputa ukwa bwanaloli. Mumalo mwache pakaba abamwene abinji bo batakaba basubaliwa bo bakiputagha ivifwani nu kubavwa abanji ukuti bope babombaghe bunubu. Ubwanaloli bwakuti mumaso gha Yehova ukwiputa ukwa bwanaloli chikaba chintu chapamwanya sana, cho chikamwavwanga ukumanya nanti umwene uyu mwiza pamo mubibi.
15. Choni cho ukwiputa ukwa bwanaloli kwakulondiwa sana kwa Yehova?
15 Choni cho inkani iya kwiputa yikaba yakulondiwa sana kwa Yehova? Ichifukwa choka chikaba chakuti abamwene bakaba nu budindo ubwa kubavwa abantu ba Chala ukuti bamwiputaghe mubwanaloli. Sona ukwiputa ukwa bumyasi kukapangisyanga abantu ukuti babombe amabutulanongwa aghinji nu kubomba ivintu ukusita ubugholosu. (Hose. 4.1, 2) Umwakongelezyapo, abamwene na Baizilayeli bosi bakaba bakwiyipa kwa Yehova. Cho chifukwa Ibayibolo likuyanisya ukwiputa ukwa bumyasi nu kupanga ubulowe. (Yere. 3.8, 9) Umuntu yo ali pa sendwa loli akupanga ubulowe, akumunangila sana uwamwabo pamo ukuti akulangizya ukuti te musubaliwa ku wamwabo uwamusendwa. Umwakuyana bulo, umubombi wa Yehova uwakwiyipa yo anda pakwiputa ukwa bumyasi akumunangila sana u Yehova. e—Kumbu. 4.23, 24.
16. Mumaso gha Yehova, ka umuntu umugholosu nu muntu umubibi bakupambana buli-buli?
16 Nkimba tukumanyilako ichoni? Tukumanyilapo ukuti, tukulondiwa ukuyezya-yezya ukuleghuka ukwiputa ukwa bumyasi. Loli tubaghiye sona ukubikapo umoyo pakwiputa ukwa bwanaloli nu kubukilila ukubomba ivintu ivyinji ivyabuzimu. Umulaghuzi u Malaki akulongosola akiza mo umuntu umwiza nu mubibi bakupambanila mumaso gha Yehova. Akasimba ukuti: ‘Mukwiza ukwennya impambano pakasi pa muntu umwiza nu mubibi, pakasi pa yo akumubombela u Chala na yo atakumubombela.’ (Mala. 3.18) Cho chifukwa tutakulondiwa ukwitikizya chilichosi napo tungaba bambula ukufikapo ni vintu vyo tukupuvya ukuti vitakatunyosezye mwisinda. Ukuleka ukumubombela u Yehova butulanongwa bukulu sana.
17. Pakusala uwakusendana nawe, ka vingakwafya buli-buli ubumanyani bwinyu nu Yehova?
17 Nanti mutasendite pamo ukusendwa loli mukwinong’onela ivyakuba musendwa, ka mwennya mo amazyu agha Malaki aghakunena ivya kumubombela u Yehova ghakukwafizya pankani iya mo mungasalila umuntu uwakusendana nawe? Umuntu yumo angaba ukuti ali ni nkalo inyiza loli nanti atakumubombela u Yehova uwabwanaloli, ka umukolo pamo umwanavuli uyu angaboneka ngati mugholosu mumaso gha Yehova? (2 Koli. 6.14) Nanti mungasendana nu muntu uyu, ka angabavwa ukuti mubukilile ukubomba ivintu ivyabuzimu? Inong’onela izya Mwene u Solomoni, abachi bache bo bakiputagha abachala ababumyasi babaghiye ukuti bakaba ni nkalo zimo inyiza. Loli batakamwiputagha u Yehova sona bakapangisya ukuti umoyo wa Solomoni wande pakwiputa abachala ababumyasi.—1 Nyafya. 11.1, 4.
18. Ka abapapi bakulondiwa ukubamanyisya choni abana babo?
18 Mwe bapapi, mungabombezya inkani izya mu Bayibolo izyakunena ivya bamwene pakubavwa abana binyu ukuba nu moyo uwakumubombela u Yehova. Mubavwe ukuti bapalizyanje ukuti u Yehova akamwennyanga umwene aliwesi ukuti mwiza pamo mubibi umwakusendela nanti akulimbikisya ukwiputa ukwa bwanaloli. Mubamanyisye abana binyu pakubombezya amazyu sona ivifwanikizyo ivyakukwafannya ni vintu ivyabuzimu ngati ukumanyila Ibayibolo, ukwaghiwapo pa nkomano nu kusendapo ichigaba pa mbombo iya bulumbilili. Bennyanje ukuti ivintu ivi vyakulondiwa sana pa bumi bwabo. (Mata. 6.33) Abana pabeka bakulondiwa ukumanya ukuti bakulondiwa ukuba pa bumanyani nu Yehova ichifukwa chakuti bakulonda ukumubombela mumalo mwakumubombela ichifukwa chakuti abapapi babo bali mu chipanga chinichi. Ichakukonkapo chache chakuti, nanti bakuchennya ichipanga ukuti cha bapapi babo, banganda ukubika u Yehova pamalo aghabubili pamo bangalekela zila ukumubombela.
19. Ka pali lusubilo buli ku bantu bo baleka pakumubombela u Yehova? (Ennya sona ibokosi ilyakuti “Munganyokela kwa Yehova!”)
19 Nanti umuntu aleka ukumubombela u Yehova, ka chikung’anamula ukuti atanganda sona ukumubombela? Awe, ichifukwa chakuti angapinduka nu kwanda sona ukumwiputa mubwanaloli. Ukuti abombe bunubu, akulondiwa ukwiyisya nu kwitikizya ubutuli ubwakufuma ku basongo aba chipanga. (Yako. 5.14) Akulondiwa ukubikapo umoyo pakubomba chilichosi cho angakwanisya ukuti abe sona pabumanyani nu Yehova!
20. Nanti tukubeghelela abamwene bo bakaba basubaliwa, ka u Yehova angatwennya buli-buli?
20 Nkimba twamanyilako ichoni ku bamwene aba ku Izilayeli? Tungaba ngati bo bamwene abasubaliwa nanti tukubikapo umoyo pakumubombela u Yehova. Za tumanyileko ku vyo tukupuvya, tupinduke nu kuyannya vyo twapuvya. Sona nge twabukilila ukukumbukila ukulondiwa ukwakubukilila ukwiputa u Chala weka uwabwanaloli. Nanti pamweka mukubukilila ukumubombela u Yehova umwabusubaliwa, inti abukilile ukubennya ukuti mukubomba cho chigholosu mumaso ghache.
ULWIMBO 45 Maghanoghano gha Mtima Wane
a Munkani iyi, amazyu aghakuti “abamwene aba ku Izilayeli “ ghakwimila abamwene bosi bo bakalaghilagha abantu ba Yehova, kali ghakalaghilagha amaluko mabili agha bumwene ubwa ku Yuda, amaluko 10 agha bumwene ubwa ku Izilayeli pamo amaluko ghosi 12.
b AMAZYU GHO GHALONGOSOLIWA: Akabalilo akinji Ibayibolo likubombezya amazyu aghakuti “umoyo” pakulongosola ubuntu bwitu ubwamukasi, ukongelezyapo ivinyonywa, inyinong’ono na mo tukubombela ivintu, inkalo yo yingakupangisya ukuti ubombe ichintu chimo pamo vyo ukulonda ukubomba.
c Ubwanaloli bwakuti, chikaba chibelezya ku bamwene bo bakiputagha ivifwani ukwanda ukwiputa aba chala abachisu cho bachipota pa nkhondo.
d Umwene u Asa akabomba imbibi izyinji. (2 Syambu. 16.7, 10) Napo vikaba bunubu, loli Ibayibolo likumutambula ukuti akaba muntu umugholosu. Napo vikuboneka ukuti pabwandilo akakana ubulongozi bo akapokela loli pisinda pache akapinduka. U Yehova akennyamo ivintu ivyiza mumwache ukuchila ivibibi. Ichakuhobosya chakuti, u Asa akamwiputagha u Yehova weka sona akabikapo umoyo pakwefyamo ivifwani mu bumwene bwache —1 Nyafya. 15.11-13; 2 Syambu. 14.2-5.
e Mungennya ukuti indaghilo zibili izyabwandilo mu Ndaghilo izya Mozesi, zikukana ukwiputa aliwesi pamo chilichosi loli u Yehova weka.—Kuso. 20.1-6.
f AMAZYU AGHAKULONGOSOLA ICHITUZI, : Usongo uwachipanga uwachinyamata akumubuzya umukamu pa mo akubombela pankani iya kungw’ela ipele. Umwakwiyisya umukamu akwitikizya ubulongozi, akusinta po pakulondiwa, sona akubukilila ukumubombela u Yehova umwabusubaliwa.
