1-2. Ka u Zadoki akaba we wenu? (1 Syambukulu 12.22, 26-28)

 INONG’ONELA ichakubombiwa ichi. Abanavuli abakupululila 340,000 bakabungana ukuti bamwimike u Devedi ukuba we mwene uwa Izilayeli. Ukwamasiku matatu, kukivwika ichongo ichakunenezannya, ukwimba inyimbo izyakumupala umwakuhoboka sona kukivwika ichongo ichakuti abantu bakuseka nu moyo ghosi mutumaghamba kupipi na ku Hebuloni. (1 Syambu. 12.39) Uwachinyamata yumo izina lyache u Zadoki, atakalonda ukwilangizya pantazi pa chilundilo ichi. Loli u Yehova akenelezya ukuti uswe tumanye ukuti u Zadoki akabapo pa malo ghala. (Belenga 1 Syambukulu 12.22, 26-28.) Nkimba u Zadoki akaba we wenu?

² U Zadoki akaba wasembe yo akabombelagha poka nu Wasembe Usongo Nkani u Abiyatala. U Yehova akamupa sona u Zadoki amahala na maka aghakwivwisya ubwighane bwache. (2 Samu. 15.27) Abantu bakabukagha kwa Zadoki nanti bakulonda ukulaba ubulongozi ubwamahala. Akaba sona mwanavuli umujimvu. Munkani iyi, inti tumanyile mo u Zadoki akalangizizya ubujimvu.

3. (a) Choni cho ababombi ba Yehova bakulondiwa ukuba bajimvu? (b) Nkimba munkani iyi inti tunenezannye ichoni?

³ Mumasiku aghabumalilo agha, u Satana akubikapo umoyo pakubomba chilichosi cho angakwanisya ukuti abanyamukile abantu ba Chala. (1 Pita. 5.8) Tukulondiwa ukuba bajimvu po tukulindilila ukuti u Yehova amwefyepo u Satana ni vintu vyosi ivibibi. (Sali. 31.24) Za tunenezannye izila zitatu izya mo tungabombela ukuti twegheleleko ubujimvu bo u Zadoki akaba nabo.

MUBE KUCHIGABA ICHA BUMWENE BWA CHALA

4. Choni cho abantu ba Yehova bakulondiwa ukuba bajimvu ukuti babukilile ukuba ku chigaba icha Bumwene bwa Chala? (Ennya sona ichituzi.)

⁴ Pakuba bantu ba Yehova, tukulondiwa ukubikapo umoyo ukuti tube kuchigaba cha Bumwene bwa Chala, loli tukulondiwa ukuba  swe bajimvu ukuti tubombe bunubu. (Mata. 6.33) Umwakufwanikizya, muchisu ichibibi ichi, tukulondiwa ukuba bajimvu ukuti twikalaghe umwakukolelana ni ndaghilo zya Yehova sona ukuti tulumbilile amazyu amiza agha Bumwene. (1 Tesa. 2.2) Tukulondiwa sona ubujimvu ukuti tutakasendaghepo ichigaba pavyandale muchisu cho abantu bakupambana inyinong’ono ichifukwa cha vyandale. (Yoha. 18.36) Abantu ba Yehova abinji, bakukomana ni ntamyo iya vyachuma, bakubakoma pamo ukubapinya nu kubabika mujele ichifukwa chakuti batakwingililapo pa vyandale ni nkondo.

5. Choni cho u Zadoki akalondiwanga ukuba mujimvu ukuti amwavwe u Devedi?

⁵ U Zadoki atakabuka ku Hebuloni ukuti aye abepo bulo palusekelo ulwa kumwimika umwene u Devedi. Loli akabuka na vyosi ivyakulondiwa sona akaba wakwisengannya ukulwa inkondo. (1 Syambu. 12.38) Akaba wakwisengannya ukubuka nu Devedi ku nkondo nu kubafighilila Abaizilayeli kubalwani babo. U Zadoki abaghiye ukuti atakamanyagha nkani ukulwa inkondo cho chifukwa akalondiwanga ukuba mujimvu.

6. Ka u Zadoki akamanyila kubawenu ukuti abe mujimvu? (Salimo 138.3)

⁶ Nkimba uwasembe u Zadoki abaghiye ukuti akamanyila kwa wenu ukuba mujimvu? U Zadoki akazyunguliliwa na banavuli bo bakaba bamaka sona bajimvu. Tutakukayikila ukuti akamanyilaghako ku banavuli aba. Umwakufwanikizya, ichifukwa chakuti u Devedi akaba mujimvu, ‘akabalongozya Abaizilayeli pakulwa inkondo’ vyo vikapangisya ukuti Abaizilayeli bamwavwe nu moyo wabo ghosi. (1 Syambu. 11.1, 2) Ukuti amalane na balwani bache, akabalilo kosi u Devedi akamusubilagha u Yehova. (Sali. 28.7; belenga Salimo 138.3.) U Zadoki akamanyilaghako sona ku banavuli abajimvu ngati u Yehoyada nu mwana wache u Benaya yo akamanyagha ukulwa inkondo na bamwene 22 bo bakaba kulubazu lwa Devedi. (1 Syambu. 11.22-25; 12.26-28) Abanavuli bosi aba, bakaba bakwisengannya ukufighilila ubulaghili ubwa Devedi.

7. (a) Ka vifwanikizyo buli ivya masiku ghano vyo tungamanyilako pa nkani iya bujimvu? (b) Ka twamanyilako ichoni kwa Mukamu u Nsilu ukuyana na vyo vili muvidiyo?

 ⁷ Tukwagha amaka sona tukuba bajimvu nanti tukwinong’onelapo inkani izya bo bakaba bajimvu pakuba ku chigaba cha bulaghili bwa Yehova. Umwene witu u Yesu Kilisitu, po akaba pachisu ichapasi akakana ukuba kuchigaba cha Satana. (Mata. 4.8-11; Yoha. 6.14, 15) Akabalilo kosi, akasubalilagha u Yehova ukuti amupe amaka. Mumasiku ghitu ghano, tuli ni vifwanikizyo ivyiza ivya abachinyamata bo bakanite ukwingila ubusilikali pamo ukwingililapo pa vyandale. Mubelenga inkani zyabo zimo zyo zikwaghiwa pa jw.org. a

MUBAVWANGE ABAKAMU BINYU

8. Nkimba kabalilo buli ko abasongo bakulondiwa ukuba bajimvu ukuti babavwe abakamu na bayemba?

⁸ Abantu ba Yehova, akabalilo kosi bakwavwana. (2 Koli. 8.4) Loli akabalilo kamo bakulondiwa ukuti babe bajimvu ukuti babombe bunubu. Umwakufwanikizya, nanti kuli inkondo abasongo bachipanga bakumanyagha ukuti abakamu na bayemba bakulondiwa ukulimbikisiwa sona bakulondiwa ubutuli ubwabuzimu nu bwa kumubili. Ichifukwa chakuti abasongo bazighanite ing’ozi, vikupangisya ukuti babike ubumi bwabo pangozi umwakuti bapeleke ubutuli bo bukulondiwa. (Yoha. 15.12, 13) Nanti bakubomba bunubu, bakulangizya ukuti bakumweghelela u Zadoki pa nkani iya bujimvu.

9. Ngati mo pakunenela pa 2 Samueli 15.27-29, nkimba u Devedi akamubuzya u Zadoki ukuti abombe choni? (Ennya sona ichituzi.)

⁹ Ubumi bwa Devedi bukaba pangozi. Umwana wache u Abisalomu akabikapo umoyo ukuti afyule ubumwene. (2 Samu. 15.12, 13) U Devedi akalondiwa ukuti afumemo mwalubilo mu Yelusalemu! Po akababuzya ababombi bache ukuti: ‘Nyamuka, za tusamale pakuti nayumo-yumo uwa uswe yo inti apone kwa Abisalomu!’ (2 Samu. 15.14) Bo ababombi bache bakufumamo, u Devedi akamanya ukuti yumo akulondiwa ukuti asyalikile umwakuti amubuzyanje vyo u Abisalomu  akulonda ukubomba. Cho chifukwa akamunyosya u Zadoki na basembe abamwabo ukuti basyalikile mu Yelusalemu ukuti bamubuzyanje vyo vikubombiwa. (Belenga 2 Samueli 15.27-29.) Loli bakalondiwa ukuti babe maso. Vyo u Devedi akababuzya abasembe ukuti babombe, nge vikabika ubumi bwabo pangozi. Inong’onela vyo u Abisalomu umuntu uwakwiyennya, umubibi sona uwakoghofya nge akamubombela u Zadoki na basembe abamwabo nanti akazyaghannyanga ukuti bakumubuzya u Devedi ivintu vyo akulonda ukubomba ukuti bamufighilile!

10. Ka u Zadoki na bo akaba nabo bakamufighilila buli-buli u Devedi?

¹⁰ U Devedi akapanga ipulani iyamwabo yo akamubuzya u Zadoki nu mumanyani wache umusubaliwa u Hushayi. (2 Samu. 15.32-37) Pakukonka ipulani yo u Devedi akabomba, u Hushayi akaba ngati po ali kuchigaba icha Abisalomu nu kumupa ubulongozi ubwa mo angamukolela u Devedi vyo vikamwavwa u Devedi ukuti isengannye. Pisinda pache u Abisalomu akamubuzyanga u Zadoki nu Hushayi vyo akulonda ukubomba. (2 Samu. 17.8-16) Po abanavuli babili aba bakatumagha ubutenga kwa Devedi. (2 Samu. 17.17) U Yehova akamwavwa u Zadoki na basembe abamwabo ukuti bakwanisye ukufighilila ubumi ubwa Devedi.—2 Samu. 17.21, 22.

11. Ka tungamweghelela buli-buli u Zadoki pa nkani iya bujimvu nanti tukubavwa abakamu na bayemba bitu?

¹¹ Nanti abakamu na bayemba bakulondiwa ubutuli mukabalilo akantamyo, nkimba tungalangizya buli-buli ubujimvu ngati we Zadoki? (1) Tukonkaghe ubulongozi. Mukabalilo ngati aka chakulondiwa sana ukuti tubanje bakukolelana. Twivwilaghe ubulongozi ubwakufuma ku ofesi iya nthambi iya muchigaba chitu. (Hebe. 13.17) Abasongo ba chipanga bakulondiwa ukuti bennyange pipi-pipi ubulongozi ubwa mo bangisenganizizya ku ngozi izya chipeliwa na vyo bangabomba nanti ingozi izi zyabombiwa. (1 Koli. 14.33, 40) (2) Tube bajimvu loli tube maso. (Mbupi. 22.3) Twinong’onelaghepo tasi po tuchili tutasalite ichakubomba. Akabalilo kosi tutakabikaghe ubumi bwinyu pangozi. (3) Tumusubilaghe u Yehova. Tukumbukilaghe  ukuti u Yehova akulonda ukuti uswe na bakamu na bayemba tube bakufighililiwa. Angabavwa ukuti mubatule abakamu binyu ukuti babe bakufighililiwa.

12-13. Nkimba mwamanyilako ichoni kwa vyo u Viktor nu Vitalii bakabomba? (Ennya sona ichituzi.)

¹² Inong’onela ichifwanikizyo icha Viktor nu Vitalii, abakamu babili bo bakavwapo pakupeleka ichakulya na mizi ku Bakilisitu abamwabo ku Ukraine. U Viktor akanena ukuti: “Tukalondagha ichakulya kulikosi ko chingaghiwa. Pa kabalilo aka tukivwanga amabomu ghakulila mupipi bulo. Umukamu yumo akapeleka ichakulya. Ukwiyipa ukwa mukamu uyu, kukavwa ukuti abalumbilili babe ni vyakulondiwa pa bumi bwabo kwabalilo. Po tukapakilagha ivintu mugalimoto yitu, ibomu likiza lyapunta papipi napo tukaba umutunda uwa mamita 20. Pisiku ili, nkamulabagha u Yehova umwakupyanizya-pyanizya ukuti anavwe ukuti imbe nu bujimvu bo nkalondiwanga umwakuti mbukilile ukubavwa abalumbilili.”

¹³ U Vitalii akanena ukuti: “Tukalondiwanga ukuti tube swe bajimvu nkani. Ubulendo bwane ubwabwandilo, nkenda amaawazi 12. Nkiputa kwa Yehova zila yosi.” U Vitalii akaba mujimvu loli akalondiwa sona ukuba maso. Akongelezya sona ukuti: “Nkabukilila ukumulaba u Yehova ukuti ampe amahala sona ukuti imbe ne wakwiyisya. Nkendagha bulo mumisebo yeka yo aba boma bakitikizyanga. Nkapindula sana nati nennya mo abakamu na bayemba bakabombelagha poka ivintu umwakukolelana. Bakefyanga ivintu mumusebo, ukupakila ivintu ivyakulondiwa pa bumi nu kutupa ichakulya na malo aghakutuzyako po tukabanga pa bulendo.”

MUBUKILILE UKUBA BASUBALIWA KWA YEHOVA

14. Ka vingatukwafya buli-buli nanti yumo yo tumughanite aleka ukuba musubaliwa kwa Yehova?

¹⁴ Intamyo zinandi bulo zyo zingatunyosezya kwisinda, ukuchila iyakuti weka uwa mumbumba yitu pamo umumanyani witu uwapamoyo aleka ukumubombela u Yehova. (Sali. 78.40; Mbupi. 24.10) Ichifukwa chakuti tukukolelana nkani nu muntu uyu, chingaba chakutamya sana ukuti twitikizye vyo vyabombiwa. Nanti mukakomanapo ni ntamyo iyakubaba ngati iyi, ichifwanikizyo ichiza icha Zadoki chingabaghomya.

15. Choni cho u Zadoki akalondiwanga ukuba mujimvu ukuti abukilile ukuba musubaliwa kwa Yehova? (1 Banyafyale 1.5-8)

¹⁵ U Zadoki akabukilila ukuba musubaliwa kwa Yehova pa kabalilo ko umumanyani wache u Abiyatala akasala ukuleka ukuba musubaliwa. Ivi vikabombiwa kubumalilo ubwa bulaghili ubwa Devedi. Bo u Devedi asyala panandi bulo ukuti afwe, umwana wache u Adonija akalondagha ukuti afyule ubumwene bo u Yehova akalayizya ukumupa u Solomoni. (1 Syambu. 22.9, 10) U Abiyatala akasala ukuti amwavwe u Adonija. (Belenga 1 Banyafyale 1.5-8.) Umwakubomba bunubu, u Abiyatala akalangizya ukuti te musubaliwa kwa Devedi bulo loli na kwa Yehova! Ka mukwinong’ona ukuti u Zadoki akiyivwa buli-buli? U Zadoki nu Abiyatala bakabombelagha poka ngati basembe umwakukolelana ukwa myaka 40. (2 Samu. 8.17) Bakapwelelelagha ‘ibokosi ilya lufingo ilya Chala uwabwanaloli.’ (2 Samu. 15.29) Bosi bakaba kuchigaba icha bumwene bwa Devedi sona bakabomba ivyinji.—2 Samu. 19.11-14.

16. Choni cho chikamwavwa u Zadoki ukuti abukilile ukuba musubaliwa?

¹⁶ U Zadoki akabukilila ukuba musubaliwa kwa Yehova napo u Abiyatala akaleka pakuba musubaliwa. U Devedi atabukayikilapo lumo ubusubaliwa ubwa Zadoki. Ipulani iya Adonija yikati yamanyikwa, u Devedi akasala u Zadoki, u Natani nu Benaya ukuti bamupakazye u Solomoni ukuti abe we mwene. (1 Nyafya. 1.32-34) Pakuba na bantu bo bakaba basubaliwa kwa Yehova ngati we Natani na banji bo bakamwavwanga umwene u Devedi, tutakukayikila ukuti vikamughomya nu kumusangalusya sana u Zadoki. (1 Nyafya. 1.38, 39) U Solomoni akati aba we mwene ‘akamusala u Zadoki uwasembe ukwingila mumalo mwa Abiyatala.’—1 Nyafya. 2.35.

17. Ka mungamweghelela buli-buli u Zadoki nanti umumanyani winyu aleka ukuba musubaliwa kwa Yehova?

 ¹⁷ Ka mungamweghelele buli-buli u Zadoki? Nanti yumo yo mumughanite asala ukumuleka u Yehova, mukulondiwa ukusala akiza ivintu. (Yoswa 24.15) U Yehova akwiza pakubapa amaka sona akwiza pakubavwa ukuti mube bajimvu. Mulangizye ukuti mukumusubila ukwendela munyiputo nu kubukilila ukukolelana na babombi bache bo basubaliwa. U Yehova akwennya ukuti ubusubaliwa bwinyu bwakulondiwa hee sona akwiza pakubasaya.—2 Samu. 22.26.

18. Nkimba mukumanyilako choni kwa Marco nu Sidse pa vyo bakakomana navyo?

¹⁸ Inong’onela ichifwanikizyo icha Marco nu muchi wache u Sidse bo abana babo babili abalindu bakasala ukuleka ubwanaloli. U Marco akanena ukuti: “Ntakukayikila ukuti ukufuma pisiku lyo abana binyu bakapapiwa mubaghiye ukuti mukubaghana sana. Ungabomba chilichosi cho ungakwanisya ukuti ubafighilile ku vintu vyo vingabavulazya. Cho chifukwa nanti basala ukumuleka u Yehova chikuba chakubaba sana.” Akabukilila ukunena ukuti: “Loli u Yehova abukilila ukuba ku lubazu lwitu. U Yehova akwenelezya ukuti nanti une nte na maka, umuchi wane akuba wamaka sona nanti umuchi wane ate na maka une nkuba na maka.” U Sidse akongelezyapo ukuti: “Nanti u Yehova atakatupanga amaka gho tukalondiwanga, nge tutakakwanisya ukujimba. Nkatamiwanga ni nyinong’ono izyakuti nene nkapangisya ukuti ivi vibombiwe, po nkamubuzya u Yehova mo nkwiyivwila. Pakati pendapo akabalilo akanandi bulo, umuyemba yo nkamwenya imyaka iyakwisinda, akiza nu kundema pachipungo sona akanennya kumaso nu kunena ukuti: ‘Sidse ukumbukileghe ukuti te wewe wapangisya ukuti vibe bunubu!’ U Yehova akanavwa ukuti mbukilile ukumubombela umwakuhoboka.”

19. Nkimba mukulondiwa ukubikapo umoyo pakubomba ichoni?

¹⁹ U Yehova akulonda ukuti ababombi bache bosi babanje bajimvu ngati we Zadoki. (2 Timo. 1.7) Loli atakulonda ukuti uswe tusubilaghe amaka ghitu. Akulonda ukuti tumusubilaghe. Cho chifukwa, nanti mwakomana ni ntamyo yo yikulondiwa ukuti mube bajimvu mumulabaghe u Yehova. Mungaba bakusimikizya ukuti u Yehova akwiza pakubavwa ukuti mube mwe bajimvu ngati we Zadoki!—1 Pita. 5.10.