INKANI IYAKUMANYILA 28
ULWIMBO 123 Kujilambika ku Ndondomeko ya Chiuta
Nkimba Mubumenye Ubwanaloli?
“Po mwimaye nkani, . . . mwavwala ubwanaloli bubo we lamba mumisana yinyu.”—EFE. 6.14.
IFUNDO INKULU
Tumanyile mo tungapambanisizya pakasi pa bwanaloli bo tumanyiye ukufuma kwa Yehova na mabumyasi gho ghakufuma kwa Satana na bantu bo bakutususya.
1. Ka mukwiyivwa buli-buli ichifukwa chakubumanya ubwanaloli?
ABANTU ba Yehova babughanite ubwanaloli bo bukwayiwa mu Mazyu gha Chala. Ulwitiko lwitu luzengiwe mu Mazyu gha Chala. (Loma 10.17) Tukusubila ukuti u Yehova akandisya ichipanga icha Chikilisitu cho chili ngati “mpanda, nu lwalo ulwa bwanaloli.” (1 Timo. 3.15) Sona tukuhoboka pakubivwila “abakulongozi” bo bali pakasi pitu, po bakulongosola ubwanaloli ubwa mu Bayibolo nu kutupa ubulongozi ubwakukolelana nu bwighane bwa Chala.—Hebe. 13.17.
2. Ukuyana nu Yakobo 5.19, choni cho chingabombiwa pisinda apakuti twamanyila ubwanaloli?
2 Napo twabumanya ubwanaloli sona tukwitikizya ukuti igulu lya Yehova lyolyo libaghiye ukutupa ubulongozi ubusubaliwa, loli akabalilo kamo vingabombiwa ukubuleka ubwanaloli. (Belenga Yakobo 5.19.) U Satana akulonda ukuti tuleke ukulisubalila Ibayibolo pamo ubulongozi bo tukupokela ukufuma ku gulu lya Chala.—Efe. 4.14.
3. Choni cho tubaghiye ukuba basubaliwa ku bwanaloli? (Aba Efeso 6.13, 14)
3 Belenga Aba Efeso 6.13, 14. Lunulu, u Satana inti abombezye amabumyasi aghakupambana-pambana ukuti abazimbule abantu ukuti bamusambukile u Yehova. (Ubuvu. 16.13, 14) Tukulindilila sona ukuti u Satana inti abombe chilichosi cho angakwanisya ukuti abazimbule abantu ba Yehova. (Ubuvu. 12.9) Cho chobene chakulondiwa sana ukuti tumanyaghe impambano yo yilipo pakasi pa bwanaloli nu bumyasi, sona ukuti tubanje swe basubaliwa ku bwanaloli. (Loma 6.17; 1 Pita. 1.22) Nanti tubumenye umwanaloli, pa ntamyo inkulu tukwiza pakupona!
4. Nkimba munkani iyi inti tumanyile choni?
4 Munkani iyi, inti twennye inkalo zibili zyo zikulondiwa ukuti zitwavwe ukumanya ubwanaloli ubwa mu Bayibolo sona ukuti twitikizyanje ubulongozi ubwakufuma ku gulu lya Chala. Pisinda pache, inti tunenezannye amasakizyo matatu gho tubaghiye ukukonka ukuti tubukilile ukubulemasya ubwanaloli.
INKALO ZYO ZIKULONDIWA UKUTI TUBUMANYE UBWANALOLI
5. Ka ukumoghopa u Yehova kukutwavwa buli-buli ukumanya ubwanaloli?
5 Ukumoghopa u Yehova. Nanti tukumoghopa u Yehova, vikutwavwa ukuti tumughanaghe sona tuleke ukubomba chilichosi cho chingamukalalizya. Tuli ni chinyonywa ichakulonda ukumanya impambano pakasi pa chiza ni chibibi sona pakasi pa bwanaloli nu bumyasi umwakuti u Yehova ahobokaghe nuswe. (Mbupi. 2.3-6; Hebe. 5.14) Tutakitikizye ukuti ukoghopa abantu kukule nkani ukuchila ulughano lwitu pa Yehova, ichifukwa chakuti ivintu vyo vikubahobosya abantu akabalilo akinji vitakumuhobosya u Yehova.
6. Ka ukoghopa abantu kukapangisya buli-buli abalongozi 10 Abachiizilayeli ukuleka ukunena ubwanaloli?
6 Nanti tukughopa nkani abantu ukuchila u Chala, tunganda ukuleka ukusubila ubwanaloli. Inong’onela ichifwanikizyo icha balongozi 12 bo bakabuka pakutendela ichisu cho u Yehova akalayizya ukuti inti abape Abaizilayeli. Abanavuli 10 bo bakaya pakutendela, bakaboghopagha nkani Abakenani ukuchila mo bakamughanilagha u Yehova. Bakababuzya Abaizilayeli abamwabo ukuti: ‘Te tukwanisye ukulimbana na bantu aba, ichifukwa bamaka nkani ukuchila uswe.’ (Kuba. 13.27-31) Mo abantu bakenezyanga, Abakenani bakaba bamaka nkani ukuchila Abaizilayeli. Loli aliwesi yo akanenagha ukuti Abaizilayeli batangakwanisya ukulwa na balwani babo, atakinong’onagha ivyakukwafannya nu Yehova mu nyinong’ono zyache. Abatendezi 10 bala, nge bakabikagha inyinong’ono zyabo zyosi pa vyo u Yehova akalondagha ukuti Abaizilayeli babombe. Nge bakinong’onelagha sona vyo u Yehova akababombelapo kwisinda. Ivi nge vikabavwa ukumanya ukuti amaka agha Bakenani ghatangayana na maka gha Yehova uwamaka ghosi. Umwakupambana na batendezi bo batakaba nu lwitiko, u Yoshwa nu Kalebi bakalondagha ukuti u Yehova ahobokaghe nabo. Bakababuzya abantu ukuti: ‘Nanti u Yehova akuhoboka nuswe, tutakukayikila ukuti inti aye atwingizye muchisu chila nu kutupa.’—Kuba. 14.6-9.
7. Choni cho chingatwavwa ukuti tubukilile ukumoghopa u Yehova? (Ennya sona ichituzi.)
7 Ukuti tubukilile ukumoghopa u Yehova, tukulondiwa ukubikapo umoyo pakusala akiza ivintu vyo vingamuhobosya. (Sali. 16.8) Po mukubelenga inkani izya Mubayibolo mwilalusyanje ukuti, ‘Nanti nkabangapo pachakubombiwa ichi, nkimba nge nkasala buli-buli ivintu?’ Umwakufwanikizya, inong’onela ukuti mukuteghelezya po abalongozi 10 Abachiizilayeli bakunena ivya lipoti ilibibi lyo bakiza nalyo. Nkimba nge mukasubila ubutenga ubu nu kwanda ukoghopa abantu pamo nge ulughano ni chinyonywa ichakulonda ukumuhosya u Yehova vikakula? Abaizilayeli bosi bakapotwa ukumanya ukuti u Yoshwa nu Kalebi bobo bakanenagha ubwanaloli. Ivi vikapangisya ukuti bapotwe ukwingila Muchisu Icha Layizyo.—Kuba. 14.10, 22, 23.
Ka nge mukamusubalila uwenu? (Ennya indime 7)
8. Nkimba tukulondiwa ukubikapo umoyo ukuti tube ni nkalo buli sona chifukwa buli?
8 Ukwiyisya. U Yehova akuvumbula ubwanaloli ku bantu bo bakwiyisya. (Mata. 11.25) Umwakwiyisya tukitikizya ukuti tumanyile ubwanaloli. (Imbo. 8.30, 31) Loli tukulondiwa ukuba maso ukuti tutakabe swe bakwituvya. Ukwituvya kungatupangisya ukwanda ukwinong’ona ukuti inyinong’ono zyitu zikuyana bulo ni fundo izya mu Masimbo nu bulongozi ubwakufuma ku gulu lya Yehova.
9. Ka tungabukilila buli-buli ukuba bakwiyisya?
9 Tukulondiwa ukukumbukila mo tubeleye badono pakuyanisya nu bukulu bwa Yehova, ukuti tubukilile ukuba bakwiyisya. (Sali. 8.3, 4) Tungalaba sona kwa Yehova ukuti atwavwe umwakuti tube nu muzimu uwakwiyisya nu wakwivwila. U Yehova akutwavwa ukuti tubikaghe inyinong’ono zyache zyo akutupa ukwendela mu Mazyu ghache ni gulu lyache pabwandilo mumalo mwa zyitu. Po mukubelenga Ibayibolo, mulondaghe ifundo zyo zikulangizya mo u Yehova aghaniye ukwiyisya sona mo abengeye ukwituvya, ukwighana nu bukali. Sona muyezya-yezyanje ukuti mubukilile ukuba bakwiyisya nanti mwapokela ulusako ulwakubomba imbombo yo yingapangisya ukuti muchuke.
MO TUNGABOMBELA UKUTI TUBUKILILE UKULEMASYA UBWANALOLI
10. Ka u Yehova akabombezya abawenu ukuti abape indaghilo nu bulongozi abantu bache?
10 Ukubukilila ukusubila ubulongozi ubwakufuma ku gulu lya Yehova. Mukabalilo aka Baizilayeli u Yehova akabombezyanga u Mozesi nu Yoshwa ukuti abape ubulongozi abantu bache. (Yoswa 1.16, 17) Abaizilayeli bakasayiwanga sana nanti bakubennya abantu aba, ukuti bakumwimila u Yehova u Chala. Imyaka amahandiledi yikati yendapo bo ichipanga icha Chikilisitu chanda bulo, abatumiwa 12 bobo bakapelekagha ubulongozi. (Imbo. 8.14, 15) Pisinda pache abasongo aba ku Yelusalemu bakati bingila mukagulu aka, akagulu aka kakakula. Ichifukwa chakuti bakakonkagha ubulongozi ubwakufuma kubanavuli abasubaliwa aba, “ivipanga vikaba na maka mulwitiko nukukula, po isiku ni siku akabukatila kakonjelelagha-konjelelagha.” (Imbo. 16.4, 5) Mukabalilo kitu kano, nuswe bulo tukusayiwa sana nanti tukukonka ubulongozi ubwakufuma ku gulu lya Yehova. Loli ka u Yehova angiyivwa buli-buli nanti tungakana ukwivwila ubulongozi ubwakufuma ku bantu bo abasalite? Tungamula ilalusyo ili nanti tunginong’onelapo pa vyo vikabombiwa ku Baizilayeli pa kabalilo ko bakabukagha Muchisu Icha Layizyo.
11. Choni cho chikabombiwa ku Baizilayeli bo bakasusyanga ukuti u Chala akamusala u Mozesi ukuti abatangililaghe? (Ennya sona ichituzi.)
11 Pa bulendo ubwa Baizilayeli ubwakubuka Muchisu Icha Layizyo, abanavuli abakumanyikwa bakanda ukulimbana nu Mozesi sona ubudindo bo u Yehova akamupa. Bakanena ukuti: ‘Ichilundilo chosi chizelu, [te we Mozesi weka] umuntu aliwesi, sona u Yehova ali pakasi papabo.’ (Kuba. 16.1-3) Napo bwanaloli ukuti mumaso gha Chala ichilundilo chosi chikaba chizelu, loli u Yehova akasala u Mozesi ukuti weyo alongozyanje abantu bache. (Kuba. 16.28) Pakulimbana nu Mozesi abantu abakusambukila aba, bakalimbanagha nu Yehova. Batakabika inyinong’ono zyabo pa vyo u Yehova akalondagha loli bakabika inyinong’ono zyabo pa vyo bakalondagha, ivyakuti babe na maka nu kumanyikwa. U Chala akabaghogha abalongozi abakusambukila aba na bantu bosi bo bakaba kuchigaba chabo. (Kuba. 16.30-35, 41, 49) Amasiku ghano, pope tungaba bakusimikizya ukuti u Yehova atakuhoboka na bantu bo batakuchindika ubulongozi ubwakufuma ku gulu lyache.
Ka nge mukaba ku chigaba chawenu? (Ennya indime 11)
12. Choni cho tukulondiwa ukubukilila ukulisubila igulu lya Yehova?
12 Tukulondiwa ukubukilila ukulisubila nkani igulu lya Yehova. Nanti pakulondiwa ukusinta pa mo tukwivwisizya ubwanaloli bumo ubwa mu Bayibolo, pamo mo tukubombela imbombo iya Bumwene, bo bakutangilila batakuchedwa ukusinta po pakulondiwa. (Mbupi. 4.18) Bakubomba bunubu, ichifukwa chakuti bakulonda ukumuhobosya u Yehova pachilichosi cho bakubomba. Bakubomba sona chilichosi cho bangakwanisya ukuti vyo bakusala vikolelanaghe na Mazyu gha Chala ni fundo zyo abantu ba Yehova bosi bakulondiwa ukuzikonka.
13. Ka “ichimanyisyo ichanaloli” chochoni, sona tungabomba buli-buli umwakukolelana ni chimanyisyo ichi?
13 “Uchilemezyanje ichimanyisyo ichanaloli chicho ukivwa.” (2 Timo. 1.13) “Ichimanyisyo ichanaloli,” chikwimila ivimanyilo ivya Chikilisitu vyo vikwaghiwa mu Bayibolo. (Yoha. 17.17) Ivimanyisyo ivi, bobo bwanaloli ubwa vintu vyosi vyo tukusubila. Igulu lya Yehova lyatwavwa ukuti twenelezyanje ukuti vyo tukusubila vikufuma mu Bayibolo. Nanti akabalilo kosi tukubomba bunubu tukwiza pakusayiwa.
14. Nkimba Abakilisitu bamo bakapotwa buli-buli ukusubila “ichimanyisyo ichanaloli”?
14 Choni cho chingabombiwa nanti tungaleka ukusubila “ichimanyisyo ichanaloli”? Inong’onela ichifwanikizyo ichi. Mukabalilo aka Bakilisitu ababwandilo, pakaneniwanga inkani iyabumyasi iyakuti isiku lya Yehova lyafika. Vikuboneka ukuti pakaba ukalata yo Abakilisitu aba, bakanenagha ukuti umutumiwa u Pabuli weyo akasimba. Mumalo mwakupaghula akabalilo nu kufufuza ubwanaloli, Abakilisitu bamo aba ku Tesalonika bakayisubila inkani iyi nu kwanda ukubabuzyako abanji. Nanti bakakumbukilagha ivintu vyo u Pabuli akabamanyisya po akaba nabo, nge batakabusubila ubumyasi ubu. (2 Tesa. 2.1-5) U Pabuli akababuzya abakamu bache ukuti batakasubilaghe chilichosi cho bivwa. Sona ukuti abavwe pa mo bangize babombele muntazi, u Pabuli akamalizya ukusimba ukalata wache uwakubuka ku Batesalonika na mazyu aghakuti: “Ni nyobe iyane ni yane, inkusimba amazyu aghakuti: Mwaghona. Nene Pabuli. Chinichi cho chimanyilo chane mubakalata bosi. Umu momumo inkusimbila.”—2 Tesa. 3.17.
15. Ka tungifighilila buli-buli ku nkani zyabumyasi zyo zingaboneka ngati zyabwanaloli? Nena ichifanikizyo. (Ennya sona ivituzi.)
15 Nkimba tukumanyilako ichoni ku mazyu gho u Pabuli akababuzya Abatesalonika? Nanti twivwa ivintu vimo, vyo vitakukolelana nu bwanaloli bo tukumanyila ukufuma mu Bayibolo pamo inkani yimo iyakuchenusya, tukulondiwa ukubomba ivintu umwamahala. Mukabalilo akabulaghili ubwa Soviet Union, abalwani bitu bakabapa abakamu ukalata yo akabonekagha ngati ukuti afuma ku likulu lyitu. Ukalata uyu akalimbikisyanga abakamu bamo ukuti bipaghule nu kupanga igulu lyabo. Akabonekagha ngati akunena ivyabwanaloli. Loli abakamu na bayemba bo bakaba basubaliwa batazimbuliwa na vyo vikaba mukalata iyi. Bakazyaghannya ukuti ubutenga bo bukaba mukalata uyu, butakakolelanagha na vyo bamanyisiwe. Mumasiku ghano pope abalwani bitu bakubombezya intaneti ukuti batuvulungannye nu kutugabannya. Mumalo mwakuvulungana pamo “ukuchenukila,” tungifighilila nanti vyo twivwa pamo vyo twabelenga vikukolelana nu bwanaloli bo tumanyiye.—2 Tesa. 2.2; 1 Yoha. 4.1.
Mutakapusikiwe ni nkani izyabumyasi zyo zikuboneka ngati zyabwanaloli (Ennya indime 15) a
16. Ukuyana na Aba Loma 16.17, 18, nkimba tungabomba ichoni nanti bamo banda pakunena inkani zyo te zyabwanaloli?
16 Ukukolelana na bantu bo basubaliwa kwa Yehova. U Chala akulonda ukuti tubanje bakukolelana po tukumwiputa. Tungabukilila ukuba bakukolelana, nanti akabalilo kosi tukumamatila ku bwanaloli. Aliwesi yo akubuleka ubwanaloli akwandisya ukugabinkana muchipanga, cho chifukwa u Chala akutusoka ukuti, “epako kukwabo! Nanti tutangacheba vingapangisya ukuti tuleke ubwanaloli.—Belenga Aba Loma 16.17, 18.
17. Ka tukusayiwa buli-buli nanti twabumanya ubwanaloli nu kubumamatila?
17 Nanti twabumanya akiza ubwanaloli nu kubumamatila, vingatwavwa ukuti tubukilile ukuba bakughoma mwabuzimu. (Efe. 4.15, 16) Tukwiza ukuba swe bakufighililiwa ku mabumyasi agha Satana na vyo akumanyisya sona u Yehova akwiza ukubukilila ukutufighilila pa kabalilo aka ntamyo inkulu. Mubukilile ukumamatila ku cho chabwanaloli “po u Chala umwenecho uwa mutende akwiza pakuba namwe.”—Filipi 4.8, 9.
ULWIMBO 122 Muŵe Ŵakukhora, Ŵambura Kusunkhunyika!
a AMAZYU AGHAKULONGOSOLA ICHITUZI: Ichituzi ichakufwanikizya imyaka iyakwisinda, abakamu mukabalilo aka bulaghili ubwa Soviet Union bapokela ukalata yo akuboneka ngati afuma ku likulu lyitu loli akaba ukuti afuma ku balwani. Mumasiku ghitu ghano, abalwani bitu bakubombezya intaneti ukuti banene inkani izyabumyasi izyakukwafannya ni gulu lya Yehova
