Ukuti tumuhobosye u Yehova tukulondiwa ukuba nu lwtiko. Loli Ibayibolo likunena ukuti, “bate bantu bosi babo bali nu lwitiko.” (2 Tesa. 3.2) Pa kabalilo ko umutumiwa u Pabuli akanenagha amazyu agha, akanenagha ivya “bantu abambibi sona na kubabibi” bo bakamuyivyanga ukuti akalondiwanga ukupokiwa. Loli vyo akanena ivyakukwafannya nu lwitiko, abantu bosi bangavibombezya imbombo. Abantu bamo bakusala ukukana ubwanaloli ubwakuboneka na maso ubwakuti u Chala weyo Mupeli. (Loma 1.20) Bamo banganena ukuti bali nu lwitiko muchintu chimo ichapamwanya sona ichamaka sana. Loli ukusubila bulo te lwitiko lo lukulondiwa ukuti tumuhobosye u Yehova.

Tukulondiwa ukusimikizya ukuti u Yehova aliko, sona “akubapa umuvwalo” bosi bo bali nu lwitiko ulwakughoma. (Hebe. 11.6) Ulwitiko nkalo yo umuzimu wache ubuzelu bukumwavwa umuntu ukuti abe nayo. Ukumubuzya u Yehova mu lwiputo vyo vili mumoyo, kungamwavwa umuntu ukuti apokele umuzimu wache ubuzelu. (Luka 11.9, 10, 13) Izila yo yingatwavwa ukuti tupokele umuzimu, ko kubelenga Amazyu gha Chala gho umuzimu ubuzelu bukabavwa abantu ukuti baghasimbe. Pisinda pache, tunginong’onelapo pa vyo twabelenga nu kuyezya ukuvibombezya imbombo vyo twamanyila. Umuzimu uwa Yehova, bungatwavwa ukuba nu lwitiko lo lungamuhobosya.