INKANI IYAKUMANYILA 25
ULWIMBO 7 Yehova Ndiyo Nkhongono Zithu
Mukumbukilaghe Ukuti u Yehova ‘we Chala Uwabumi’
‘U Yehova wabumi!”—SALI. 18.46.
IFUNDO INKULU
Tukupindula sana nanti tukukumbukila ukuti u Chala yo tukumwiputa we Chala uwabumi.
1. Choni cho chikubavwa abantu ba Yehova ukubukilila ukumwiputa napo bakukomana ni ntamyo?
IBAYIBOLO likulongosola ukuti amasiku gho tukwikalamo to tubalilo “utupala-pala nkani.” (2 Timo. 3.1) Ukongelezyapo pa ntamyo zyo abantu bosi bakukomana nazyo, abantu ba Yehova bakujimba ku bo bakubasusya nu kubapinya. Choni cho chikutwavwa ukubukilila ukumwiputa u Yehova napo tukukomana ni ntamyo izi? Ichifukwa choka chakuti tukumanya ukuti u Yehova ‘we Chala uwabumi.’—Yere. 10.10; 2 Timo. 1.12.
2. Ka ukumanya ukuti u Yehova we Chala uwabumi kukutwavwa buli-buli?
2 U Yehova muntu wanaloli, yo akutwavwa nanti twakomana ni njelo sona akulondelezya izila izya mo angatutulila. (2 Syambu. 16.9; Sali. 23.4) Nanti tukumwennya u Yehova ukuti we Chala uwabumi, vingatwavwa ukumalana ni njelo yiliyosi yo tungakomana nayo. Ennya mo ifundo iyi yikabela yabwanaloli kwa Mwene u Devedi.
3. Ka u Devedi akang’anamulagha choni po akanena ukuti ‘u Yehova wabumi’?
3 U Devedi akamumanyagha akiza u Yehova sona akabalilo kosi akamusubilagha. Pa kabalilo ko abalwani bache, ukongelezyapo Umwene u Sabuli bakamulondagha, u Devedi akiputa kwa Yehova ukuti amwavwe. (Sali. 18.6) U Chala akati amula ulwiputo lwache nu kumupoka, u Devedi akanena ukuti: ‘U Yehova wabumi!’ (Sali. 18.46) Amazyu agha, ghakulangizya ukuti u Devedi atakakayikilagha ukuti u Chala aliko. Ilifalesi limo likulongosola ukuti, u Devedi akaba nu lusubilo mwa Yehova ukuti “we Chala uwabumi yo akabalilo kosi akubavwa ababombi bache.” Inga, u Devedi akamanya ukuti u Chala wabumi ichifukwa cha vintu vyo akakomana navyo pa bumi bwache sona ivi vikamupangisya ukuti abukilile ukumupala u Yehova nu kumubombela.—Sali. 18.28, 29, 49.
4. Ka tukupindula buli-buli nanti tukumwennya u Yehova ukuti we Chala uwabumi?
4 Nanti tukusimikizya ukuti u Yehova we Chala uwabumi, vingatwavwa ukuti tubikaghepo umoyo pakumubombela. Tukwagha amaka aghakujimbila ku njelo zyo tukukomana nazyo sona vikutupangisya ukuti tubukilile ukubikapo umoyo pakumubombela. Vikutwavwa sona ukuti tubukilile ukuba pa bumanyani nu Yehova.
U CHALA UWABUMI AKWIZA PAKUBAGHOMYA
5. Choni cho tungaba nu lusubilo nanti twakomana ni ntamyo? (Aba Filipi 4.13)
5 Nanti tukukumbukila ukuti u Yehova wabumi sona alipo ukuti atwavwe, vingatwavwa ukujimba ku ntamyo yiliyosi yo tungakomana nayo. Ukuchila vyosi, intamyo yiliyosi yo tungakomana nayo, yitangamupota u Chala witu. Ichifukwa chakuti we Chala Uwamaka Ghosi sona angatupa amaka gho ghangatwavwa ukuti tujimbe. (Belenga Aba Filipi 4.13.) Cho chifukwa tuli ni vifukwa ivyiza ivyakujimbila ku ntanyo zyo twakomana nazyo nu lusubilo. Nanti tukwennya mo u Yehova akututulila pa kabalilo ko twakomana ni njelo inandi, vikutusimikizya ukuti akwiza pakutwavwa nanti twakomana ni njelo inkulu.
6. Nkimba vintu buli vyo vikabombiwa kwa Devedi po akaba wachinyamata vyo vikamwavwa ukuti amusubilaghe nkani u Yehova?
6 Inong’onela ivyakubombiwa vibili vyo vikabombiwa pa bumi ubwa Devedi vyo vikamupangisya ukuti amusubilaghe nkani u Yehova. Pa kabalilo ko u Devedi akaba munandi akaba mudimi, po kukiza ichikoko ni nkalamu vyo vikakola ing’ozi izya baba wache. Patubalilo tosi tubili utu, u Devedi akavisamazya ivinyamana vibili ivi umwabujimvu nu kuzipoka ing’ozi izya baba wache. Loli atakituvya ukuti abomba ivi paweka. Mumalo mwache, akamanya ukuti u Yehova weyo apangisya ukuti vibombiwe. (1 Samu. 17.34-37) Tukusubila ukuti u Devedi atakaluvyapo ivyakubombiwa ivi. Nanti akwinong’onelapo pa vyakubombiwa ivi, vikamwavwanga ukuba nu lusubilo ulwakuti u Chala uwabumi akwiza pakumupa amaka kuntazi.
7. Choni cho chikamwavwa u Devedi ukuti alimbane nu Goliyati?
7 Pisinda pache, u Devedi po akaba achili wachinyamata akabuka ku malo gho abasilikali aba ku Izilayeli bakaba. Akagha ukuti abasilikali bali ni lyogha sana ichifukwa cha Mufilisiti yumo uwakoghofya izina lyache u Goliyati yo akizagha nu ‘nkubanyoza abankondo Abaizilayeli.’ (1 Samu. 17.10, 11) Abasilikali bakaba ni lyogha ichifukwa chakuti bakabika nkani inyinong’ono zyabo pa mo u Goliyati akabonekelagha na mazyu aghakunyoza gho akabanenagha. (1 Samu. 17.24, 25) Loli u Devedi akennya ivintu umwakupamba umwakuti akabika inyinong’ono zyache pa chintu chimo. U Devedi akennya vyo vikabombiwanga ukuti ntamyo, loli yitakabombiwanga pakulimbana bulo na basilikali aba Chiizilayeli mumalo mwache akanyozagha ‘abankondo aba Chala uwabumi.’ (1 Samu. 17.26) Pa kabalilo aka, u Devedi akinong’onelagha bulo ivya Yehova. U Devedi akasubilagha ukuti u Chala yo akamwavwa pa kabalilo ko akaba mudimi, pa kabalilo aka pope inti amwavwe ukuti alimbane nu muntu uwakoghofya uyu. Ichifukwa chakuti u Devedi akasubilagha ukuti u Chala ali nawe, vikamwavwa ukuti ajimbe po akakomanagha nu Goliyati sona akamupota!—1 Samu. 17.45-51.
8. Choni cho chingatwavwa ukusubila ukuti u Yehova akutwavwa nanti twakomana ni ntamyo? (Ennya sona ichituzi.)
8 Nuswe bulo tungazipota injelo nanti tukukumbukila ukuti u Chala uwabumi wakwisengannya ukuti atutule. (Sali. 118.6) Tungaghomya ulusubilo lyitu ukuti u Yehova angatwavwa, nanti tunginong’onelapo vyo abombapo kwisinda uku. Belenga inkani zimo izya mu Bayibolo zyo zingabakumbusya mo u Yehova akabapokela ababombi bache kwisinda. (Yesa. 37.17, 33-37) Sona mungennya amalipoti gho ghakwaghiwa pa webusayiti yitu iya jw.org, gho ghakulangizya mo u Yehova akubatulila abakamu na bayemba bitu mukabalilo kitu kano. Umwakongelezyapo, mukumbukilaghe mo u Yehova abatulila pa bumi bwinyu. Tutakapasyanje nanti pa bumi bwitu tutakomanitepo ni chakubombiwa chimo ichakoghofya cho chingaba ngati ukulwa ni chikoko pamo ni nkalamu. Chifukwa buli? Ubwanaloli bwakuti, u Yehova ababombeye kale ivyinji pa bumi bwinyu! Akabawesa ukuti mube nawe pabumanyani. (Yoha. 6.44) Mupaka pa kabalilo aka mubaghiye ukuti mukupalizya sana ichifukwa chakuti akubavwa ukuti mubukilile ukuba mubwanaloli. Nkimba mutangamulaba ukuti abavwe ukukumbukila akabalilo ko akamula inyiputo zyinyu, akabavwa pa kabalilo akiza pamo akabavwa ukwikazikisya inyinong’ono zyinyu pa kabalilo ko mukakomana ni ntamyo yimo? Nanti mukwinong’onelapo pa mo u Yehova abatulila pa bumi bwinyu, vingabavwa ukusimikizya ukuti inti abukilile ukubavwa pa bumi bwinyu bosi.
Mo tukubombela nanti twakomana ni njelo, vikukwafya mo u Yehova akwiyivwila (Ennya indime 8-9)
9. Ka tuzyennyanje buli-buli injelo zyo tukukomana nazyo? (Isya Mbupingamu 27.11)
9 Nanti tukumwennya u Yehova ukuti ali ngati Muntu uwabumi, vingatwavwa ukuzyennya akiza injelo zyo tukukomana nazyo. Buli-buli? Inti twande ukwennya injelo zyitu ukuti nkani inkulu yo yili pakasi pa Yehova nu Satana. U Mubibi akunena ukuti nanti twakomana ni ntamyo, tungaleka pakumusubila u Yehova. (Jobu 1.10, 11; belenga Isya Mbupingamu 27.11.) Loli nanti tukujimba ku ntamyo zyo tukukomana nazyo, tukulangizya ukuti tumughanite u Yehova sona ukuti u Satana mumyasi. Ka boma likubasusya, mukukomana ni ntamyo iya vyachuma, mukunyoziwa nanti muli mu bulumbilili pamo mukukomana ni njelo izyamwabo? Nanti vili bunubu, mukumbukilaghe ukuti ivyakubombiwa ivi vikubapa ulusako ulwakuti muhobosye umoyo uwa Yehova. Mukumbukilaghe sona ukuti atangitikizya ukuti muyeliwe ni njelo yo mutangakwanisya ukujimba. (1 Koli. 10.13) Wakwisengannya ukubapa amaka gho ghangabavwa ukuti mujimbe.
U CHALA UWABUMI AKWIZA PAKUBASAYA
10. Nkimba u Chala uwabumi akubomba buli-buli na bo bakumwiputa?
10 U Yehova akubasaya bosi bo bakumwiputa. (Hebe. 11.6) Pa kabalilo aka, akutupa umutende uwa mumoyo sona kuntazi akwiza pakutupa ubumi ubwa bwila na bwila. Tungamusubila u Yehova nu kusimikizya ukuti ali ni chinyonywa na maka vyo vikumupangisya ukuti atusaye. Sona ivi vikutupangisya ukuti tube bakutangwanika pakumubombela, ngati mo bakabombelagha ababombi ba Chala abasubaliwa abakale. Ifundo iyi yabwanaloli nanti tukwennya mo u Timoti akabombela.—Hebe. 6.10-12.
11. Choni cho chikamwavwa u Timoti ukuti alimbikilaghe nkani imbombo muchipanga? (1 Timoti 4.10)
11 Belenga 1 Timoti 4.10. U Timoti akamusubilagha u Chala uwabumi. Cho cho chikamwavwa ukubikapo umoyo pakumubombela u Yehova nu kubavwa abanji. Ka akabomba buli-buli bunubu? Umutumiwa u Pabuli akamulimbikisya ukuti abukilile ukuba mumanyisi umwiza nu wakunena akiza pigulu. U Timoti akalondiwanga sona ukulangizya ichifwanikizyo ichiza ku Bakilisitu abamwabo abachinyamata na basongo. Bakamupa sona imbombo iyakutamya, yo yikongelezyangapo ukupeleka ubulongozi loli umwalughano ku bo bakalondiwanga ubulongozi. (1 Timo. 4.11-16; 2 Timo. 4.1-5) U Timoti akaba wakusimikizya ukuti akabalilo kamo napo imbombo yo akubomba yitangaboneka pamo abanji batangapalizya, loli u Yehova akwiza pakumusaya.—Loma 2.6, 7.
12. Choni cho chingabavwa abasongo ukubukilila ukutangwanika ni mbombo zyabo? (Ennya sona ichituzi.)
12 Amasiku ghano, abasongo bakulondiwa ukusimikizya ukuti u Yehova akwennya nu kupalizya imbombo yabo inyiza yo bakubomba. Ukongelezya pambombo iya budimi, ukumanyisya nu kulumbilila, abasongo abinji bakwavwapo sona pa mbombo iya vyakuzenga-zenga sona bakwavwapo pakupeleka ubutuli ko kwabombiwa imikosi iyachipeliwa. Bamo bakubomba mu Magulu Aghakwendela Ababine pamo mu Komiti Iyakunenezannya na Bachipatala. Abasongo bo bakwiyipa pakubomba imbombo zimo, bakulangizya ukuti bakuchennya ichipanga ukuti ndondomeko yo u Yehova abikite, chitapangiwe ni ndaghilo izya muntu aliwesi. Ivi vikubavwa ukubomba imbombo yo babapa nu moyo ghosi sona bakusubila ukuti u Chala uwabumi akwiza pakubasaya pa vyosi vyo bakubomba.—Kolo. 3.23, 24.
U Chala uwabumi, akwiza pakubasaya nanti mukubikapo umoyo pakwavwa ichipanga (Ennya indime 12-13)
13. Ka u Yehova akwiyivwa buli-buli pa vyosi vyo tukumubombela?
13 Te aliwesi angaba we songo. Loli aliwesi uwa uswe ali na chimo cho angamupa u Yehova. U Chala witu akupalizya sana nanti tukubomba chilichosi cho tungakwanisya pakumubombela. Akumanya vyosi vyo tukubomba ukuti twavwepo pa mbombo iya pachisu chosi ukusita ukusendela ubwinji ubwa vintu vyo tukupeleka. Akuhoboka sana nanti tukubikapo umoyo ukuti tumalane ni soni nu kwimika inyobe ukuti twamulepo pa nkomano, sona nanti tukubikapo umoyo ukuti tumalane na vyo vyatupunuzya nu kubahobokela abanji. Napo mungiyivwa ukuti mutangabomba ivyinji ukuchila vyo mungalonda ukuti mubombe, musubilaghe ukuti u Yehova akwennya ukuti vyo mukubomba vyapamwanya sana. Vyo mukubomba vyovyo vikupangisya ukuti abaghanaghe sona akwiza pakubasaya.—Luka 21.1-4.
MUBUKILILE UKUPALAMILA KWA CHALA UWABUMI
14. Ka ukuba pabumanyani ubwiza nu Yehova, kungatwavwa buli-buli ukubukilila ukuba basubaliwa? (Ennya sona ichituzi.)
14 Nanti tukumwennya u Yehova ukuti wanaloli, vingatwavwa ukuti chibe chipepe ukubukilila ukuba basubaliwa kukwache. Ifundo iyi yikaba yabwanaloli kwa Jozefu. Akakana ukupanga ubulowe. U Chala akaba wanaloli kukwache sona atakalondagha ukumukalalizya. (Ubwa. 39.9) Tukulondiwa ukupaghula akabalilo akakwiputa nu kumanyila Amazyu ghache nanti tukulonda ukuti u Yehova abe wanaloli. Ivi vingatwavwa ukuti ubumanyani bwitu bughome. Ngati we Jozefu, nuswe bulo nanti tuli pa bumanyani ubwiza nu Yehova, tutakwiza ukulonda ukubomba chilichosi cho chingamukalalizya.—Yako. 4.8.
Nanti mukupalamila kwa Chala uwabumi, vingabavwa ukuti mubukilile ukuba basubaliwa (Ennya indime 14-15)
15. Nkimba tukumanyilako ichoni ku vyo vikabombiwa ku Baizilayeli po bakaba munkolongo? (Aba Hebeli 3.12)
15 Bosi bo bakuluvya ukuti u Yehova we Chala uwabumi, chikuba chipepe sana ukuleka ukuba basubaliwa kukwache. Inong’onela vyo vikabombiwa ku Baizilayeli po bakaba munkolongo. Bakamanyagha ukuti u Yehova aliko, loli bakanda ukukayikila nanti angabapa ivintu vyo bakulondiwa. Umwakuti bakafika napakulalusya ukuti: ‘Nkimba u Yehova ali pakasi pitu pamo awe?’ (Kuso. 17.2, 7) Pisinda pache bakamusambukila u Chala. Ubwanaloli bwakuti tutakulonda ukukonka ichifwanikizyo chabo ichibibi.—Belenga Aba Hebeli 3.12.
16. Choni cho chingayela ulwitiko lwitu?
16 Ivintu vyo vikubombiwa muchisu, vikupangisya ukuti chibe chakutamya ukuti tubukilile ukuba pa bumanyani nu Yehova. Abinji bakukana ubwanaloli ubwakuti u Chala aliko. Akabalilo akinji, vikuboneka ukuti bo bakukana ubulongozi bo u Chala akutupa ivintu vikubendela akiza. Nanti tukwennya ivi vikubombiwa, ulwitiko lwitu lungayeliwa. Napo uswe tungaba ukuti tutakukana ukuti u Chala aliko, loli tunganda pakukayikila nanti angatwavwa. Yo akasimba Salimo 73 akakayikilagha ukwa kabalilo ivya nkani iyi. Akennyanga bo bakamuzyungulila ukuti bakukana ukwivwila indaghilo izya Chala loli bakahobokagha nu bumi. Ivi vikamupangisya ukuti ande pakwilalusya nanti chakulondiwa ukumubombela u Chala umwabusubaliwa.—Sali. 73.11-13.
17. Choni cho chingatwavwa ukuti tubukilile ukuba pa bumanyani ubwiza nu Yehova?
17 Choni cho chikamwavwa yo akasimba Salimo ili ukuti asinte akinong’onele kache? Akinong’onelapo vyo vikwiza pakubombiwa ku bantu bo baleka ukumusubila u Yehova. (Sali. 73.18, 19, 27) Akinong’onelapo sona ivisayo vyo vikubapo nanti umuntu akumubombela u Chala. (Sali. 73.24) Nuswe bulo tubaghiye ukwinong’onelapo pa visayo vyosi vyo u Yehova atupiye. Sona tubaghiye ukwinong’onela mo ubumi bwitu nge bubeleye nanti tutakamubombelagha u Yehova. Nanti tungabomba bunubu, vingatwavwa ukuti tubukilile ukuba basubaliwa ngati mo akabombela uwamasalimo yo akanena ukuti: ‘Loli kwa une, ukupalamila kwa Yehova kwiza sana.’—Sali. 73.28.
18. Choni cho tutakulondiwa ukunyila vyo inti tukomane navyo kuntazi?
18 Mumasiku aghabumalilo agha, tungakomana ni ntamyo izyinji ichifukwa chakuti swe babombi aba “Chala uwabumi, sona nu wanaloli.” (1 Tesa. 1.9) U Chala witu ali ngati muntu wanaloli yo akubavwa bo bakumwiputa. Alangizya mo akubombela ku babombi bache abakwisinda sona amasiku ghano pope ali nuswe. Lunulu, inti tukomane ni ntamyo inkulu yo yitabombiwepo lumo pachisu ichapasi. Tutakwiza pakuba sweka, loli u Yehova akwiza pakuba nuswe. (Yesa. 41.10) Swebosi “zagha tunene nu bujivu ukuti, ‘Umwene we mwavwilizi wane, intakwiza pakunyila.’”—Hebe. 13.5, 6.
ULWIMBO 3 Nkhongono na Chigomezgo Chithu
