INKANI IYAKUMANYILA 24
ULWIMBO 24 Zaninge ku Phiri la Yehova
Tubukilile Ukuba Mulendo wa Yehova kwa Bwila na Bwila!
‘Mwe Yehova, ka wenu yo angaba mulendo mwitenti lyinyu?’—SALI. 15.1.
IFUNDO INKULU
Inti twennye vyo tukulondiwa ukubomba ukuti tubukilile ukuhoboka nu bumanyani bwitu nu Yehova sona vyo akulonda ukuti tubabombelaghe abamanyani bache.
1. Ka tungapindula buli-buli ni Salimo 15.1-5?
MUNKANI iyapisinda tukamanyila ukuti ababombi ba Yehova abakwiyipa, bangaba balendo mwitenti lyache ilyakufwanikizya bulo nanti bakubukilila ukuba pabumanyani nawe. Loli ka tungabomba buli-buli ukuti tube nawe pabumanyani? Salimo chaputala 15 chikunena ivyinji pa nkani iyi. (Belenga Salimo 15.1-5.) Isalimo ili, lili na masakizyo gho ghangatwavwa ukupalamila kwa Chala.
2. Choni cho chingaba ukuti chikamupangisya uwamasalimo u Devedi ukutambula itenti lya Yehova?
2 Salimo chaputala 15, chikwanda ni lalusyo ilyakuti: ‘Mwe Yehova, ka wenu yo angaba mulendo mwitenti lyinyu? Wenu yo angikala mwighamba lyinyu ilizelu?’ (Sali. 15.1) Pa kabalilo ko akatambulagha ivyi ‘tenti’ lya Yehova, uwamasalimo u Devedi abaghiye ukuti akinong’onelagha ivya chihema cho chikaba ku Gibiyoni ukwa kabalilo. U Devedi akatambula sona ivyi ‘ghamba ilizelu’ ilya Chala, lumo akinong’onelagha ighamba ilya Ziyoni lyo likaba ku Yelusalemu. Pali amakilomita aminji ukufuma kumwela kwa Gibiyoni, ko u Devedi akazenga itenti lyo akabikamo ilikasa ilya pangano mupaka po bakiza bazengela amalo aghenecho aghakuti ilikasa lyikalaghemo.—2 Samu. 6.17.
3. Choni cho chakulondiwa ukwivwisya akiza Salimo chaputala 15? (Ennya sona ichituzi.)
3 Loli te Baizilayeli bosi bo bakitikiziwanga ukuti babombelaghe pachihema, nkani-nkani mumalo aghamukasi mo ilikasa ilya pangano likasungiwanga. Loli ababombi ba Yehova bosi abasubaliwa nanti bangalonda nu bakubukilila ukuba bamanyani bache, bangaba balendo mwitenti lyache ilyakufwanikizya. Ivi vyovyo swebosi tukulonda. Isalimo chaputala 15, chikulongosola inkalo zimo zyo tukulondiwa ukuba nazyo umwakuti tubukilile ukuba pabumanyani nu Yehova.
Abaizilayeli aba mukabalilo aka Devedi bakamanyagha mo bangabela balendo mwitenti lya Yehova (Ennya indime 3)
MWENDAGHE UKUSITA UKUNANGA SONA MUBOMBAGHE CHO CHIGHOLOSU
4. Ka tukumanya buli-buli ukuti u Yehova atakulonda ukuti toziwe bulo? (Yesaya 48.1)
4 Pa Salimo 15.2, umumanyani wa Chala akulongosoliwa ukuti ‘muntu yo akwenda ukusita ukunanga sona akubomba cho chigholosu.’ Amazyu aghakuti ‘akwenda’ nu ‘kubomba, ghakulongosola ivintu vimo vyo tukulondiwa ukubomba akabalilo kosi. Loli ka tungakwanisya ukwenda ukusita ukunanga chilichosi? Inga tungakwanisya. Napo nayumo-yumo umuntu yo wakufikapo, loli u Yehova angatwennya ukuti ‘tukwenda ukusita ukunanga’ nanti tukuyezya-yezya ukubomba chilichosi cho tungakwanisya ukuti tumwivwilaghe. Nanti twiyipa ubumi bwitu nu koziwa, tukuba ukuti twanda bulo ubulendo bwitu ubwakwenda nu Chala. Mumanye ifundo iyakuti, Ibayibolo litakunena ukuti umuntu aliwesi akabanga mulendo wa Yehova ichifukwa chakuti akaba Muizilayeli. Bamo bakamwiputagha, loli batakamwiputagha ‘mubwanaloli na mubugholosu.’ (Belenga Yesaya 48.1.) Abaizilayeli abasubaliwa, bakalondiwanga ukumanyila vyo u Yehova akulonda nu kuvibombezya imbombo. Umwakuyana bulo, amasiku ghano ukuti tumuhobosye u Chala, pakulondiwa ukuti tubombe ivyinji ukuchila ukoziwa bulo nu kukolelana ni chipanga cha Chikilisitu. Tukulondiwa ukubukilila ‘ukubomba cho chigholosu.’ Nkimba tungabomba buli-buli bunubu?
5. Nkimba ukumwivwila u Yehova mu vintu vyosi kukongelezyapo ichoni?
5 Mumaso gha Yehova, ‘ukwenda ukusita ukunanga’ ‘nu kubomba cho chigholosu’ kukung’anamula ivyingi ukuchila bulo ukuti akabalilo kosi tubombaghe imbombo izyakupambana-pambana izya pa Nyumba ya Bumwene. (1 Samu. 15.22) Tukulondiwa ukuyezya-yezya ukumwivwila u Chala pa chilichosi cho tukubomba pabumi bwitu na po tungaba kwa swebene. (Mbupi. 3.6; Ndumbi. 12.13, 14) Chakulondiwa sana ukuyezya-yezya ukumwivwila u Yehova na pa vintu ivinandi bulo. Nanti tukubomba bunubu, tukulangizya ukuti tumughanite naloli sona wepe inti atughane sana.—Yoha. 14.23; 1 Yoha. 5.3.
6. Ukuyana na Aba Hebeli 6.10-12, choni cho chakulondiwa nkani ukuchila ivintu vyosi vyo tukabomba kwisinda?
6 U Yehova akupalizya sana vyo twamubombela kwisinda. Loli ivintu vyo tukamubombela kwisinda umwabusubaliwa, te vyovyo vingatupangisya ukuti tube balendo mwitenti lyache. Ifundo iyi yikuboneka akiza pa Aba Hebeli 6.10-12. (Belenga.) U Yehova atakuluvya ivintu ivyiza vyo tukamubombela kwisinda. Loli akulonda ukuti tubukilile ukumwiputa nu moyo witu ghosi “mupaka pa bumalilo.” “Nanti tutakuwa amaka,” akwiza pakutusaya kwa bwila na bwila.—Gala. 6.9.
MUNENAGHE UBWANALOLI MUMOYO WINYU
7. Nkimba ukunena ubwanaloli mumoyo witu kukongelezyapo ichoni?
7 Yo akulonda ukuba mulendo mwitenti lya Yehova, akulondiwa ukunena ‘ubwanaloli mumoyo wache’. (Sali. 15.2) Ifundo iyi yikung’anamula ivyinji ukuchila ukuleka bulo ukunena ubumyasi. U Yehova akulonda ukuti tubanje babwanaloli mu vyo tukunena nu kubomba. (Hebe. 13.18) Ichakulondiwa chakuti u Yehova ‘akuseluka nu muntu yo mumyasi loli akuba pabumanyani ubwiza nu muntu yo mugholosu.’—Mbupi. 3.32.
8. Nkimba vintu buli vyo tukulondiwa ukuvileghuka?
8 Bo ‘bakunena ubwanaloli mumoyo wabo’ batakupanga ubuzimbuli ukuti bakwivwila indaghilo izya Chala nanti bali pigulu loli po bali kwa beka batakuzyivwila. (Yesa. 29.13) Bakuleghuka ukubomba ivintu umwabuzimbuli. Umuntu yo muzimbuli anganda ukukayikila ukuti amahala gha Yehova pa fundo zimo ghatakwivwika. (Yako. 1.5-8) Angaleka ukumwivwila u Yehova pa vintu vimo vyo vingaboneka ukuti te vyakulondiwa nkani ku kwache. Nanti akwennya ukuti patakubombiwa nachimo-chimo nanti aleka ukwivwila, anganda ukuleka ukwivwila indaghilo zya Chala, vyo vingapangisya ukuti ukwiputa kwache kube kwabuzimbuli. (Ndumbi. 8.11) Po tukulondiwa ukuba babwanaloli mu vintu vyosi.
9. Ka tukumanyilapo ichoni pa vyo vikabombiwa u Yesu ati akomana nu Nataniyele akabwandilo? (Ennya sona ichituzi.)
9 Tungamanya ukulondiwa ukwa kuba nu moyo ubusubaliwa, nanti tungennya ukunenezannya ko kukabapo pakasi pa Yesu nu Nataniyele bati bakomana bulo. Po u Filipu akiza nu mumanyani wache u Nataniyele ukuti akomane nu Yesu, pakabombiwa ichintu chimo ichakuswighisya. Na po u Yesu akaba ukuti atakomanite lumo nu Nataniyele, loli akanena ukuti: “Uyu we muntu uwa Izilayeli naloli. Mumwache butalimo nabumo-bumo ubumyasi.” (Yoha. 1.47) Ubwanaloli bwakuti u Yesu akabennyanga abamanyili bache bamo ukuti babwanaloli, loli ati amwennya u Nataniyele, akennya ukuti ubwanaloli bwache bukaba bwapalubazu sana. U Nataniyele wepe akaba muntu uwambula ukufikapo ngati sweswe. Loli atakaba muzimbuli sona akaba wabwanaloli mu vintu vyosi. U Yesu akamanya ifundo iyi sona akamupalizya u Nataniyele. Chingaba chapamwanya sana nanti nuswe bulo u Yesu angatwennya bunubu!
U Filipu akumolongosola umumanyani wache u Nataniyele kwa Yesu, umuntu yo atakaba nu buzimbuli. Ka mungalonda ukuti numwe bulo mube bunubu? (Ennya indime 9)
10. Choni cho tukulondiwa ukubombezya akiza ichabupi ichakunena? (Yakobo 1.26)
10 Ifundo izyinji zyo zikwayiwa mu Salimo chaputala 15 zikulongosola pa mo tukubombela ivintu na banji. Pa Salimo 15.3 pakunena ukuti umulendo wa Yehova yo ali mwitenti lyache, ‘atakunena iyebo nu lulimi lwache, atakumubombela ivintu ivibibi umupalamani wache sona atakubakozya isoni abamanyani bache.’ Nanti tukunena ivintu ivibibi, abanji bangapunula vyo vingapangisya ukuti tuleke ukuba mulendo mwitenti lya Yehova.—Belenga Yakobo 1.26.
11. Ka iyebo chochoni, sona choni cho chikubombiwa ku bantu bo bakubukilila ukuyeba?
11 Uwamasalimo umwapalubazu akatambula amazyu aghakuti ukuyeba. Ka ukuyeba chochoni? Ukuyeba ko kunena inkani yo yingananga imbili iya muntu yumo. Abantu bo bakubukilila ukunena iyebo, bakwepusiwa muchipanga icha Chikilisitu.—Yere. 17.10.
12-13. Nkimba vyakubombiwa buli vimo vyo vingapangisya ukuti tubakozye isoni abamanyani bitu? (Ennya sona ichituzi.)
12 Pa Salimo 15.3 pakutukumbusya sona ukuti abalendo ba Yehova, batakubabombela ivintu ivibibi abapalamani babo sona batakubakozya isoni abamanyani babo. Ka tungabakozya buli-buli isoni abamanyani bitu?
13 Akabalilo kamo tungamukozya yumo isoni umwakusita ukumanya umwakumunena ivintu ivibibi. Umwakufwanikizya: (1) nanti umuyemba yumo aleka ubupayiniya ubwakabalilo kosi, (2) nanti imbumba yimo yaleka ukubombela pa Beteli pamo (3) nanti mukamu aleka pakubomba ngati we songo pamo umwavwilizyi. Ka chakulondiwa ukufufuza ukuti mumanye ichifukwa cho ivi vyabombiwa nu kubabuzyako abanji inyinong’ono zyinyu? Pangaba ukuti pali ivifukwa vyo vyapangisya ukuti ukusinta uku kubombiwe vyo uswe tutavimenye. Umwakongelezyapo, umulendo yo ali mwitenti lya Yehova atakumubombela umupalamani wache ivintu ivibibi sona ‘atakubakozya isoni abamanyani bache.’
Chipepe bulo ukusasya inkani zyo zingabakozya isoni abanji, zyo zingapangisya ukuti ulumbili lwabo lunangike (Ennya indime 12-13)
TUBACHINDIKAGHE BO BAKUMOGHOPA U YEHOVA
14. Longosola mo abalendo ba Yehova bakukanila ‘aliwesi yo mupopo.’
14 Pa Salimo 15.4, pakunena ukuti umumanyani wa Yehova ‘akukana aliwesi yo mupopo.’ Ka tungabomba buli-buli bunubu? Pakuti swe bantu bambula ukufikapo, tute nu budindo ubwakumanya ukuti umuntu uyu mupopo mwabuzimu. Chifukwa buli? Akabalilo akinji tukuhobokagha ukuba pabumanyani na bantu bo bali ni nkalo inyiza, sona abantu bamo bangatupangisya ukuti tube pabumanyani na bantu bamo. Loli tukulonda ukukana abantu beka bo u Yehova akubennya ukuti ‘bapopo.’ (1 Koli. 5.11) Abantu aba bakongelezyapo bo batakuleka ukubomba ivintu ivibibi, batakuchindika vyo tukusubila sona bakuyezya-yezya ukutupangisya ukuti tunyokele kwisinda mwabuzimu.—Mbupi. 13.20.
15. Nkimba zila buli yoka yo tungabachindikila bo ‘bakumoghopa u Yehova?’
15 Pa Salimo 15.4 amazyu aghakukonkapo ghakutubuzya ukuti, ‘tubachindikaghe bo bakumoghopa u Yehova.’ Cho chifukwa tukulondelezya izila izya mo tungalangizizya ichisa nu muchizi ku bamanyani ba Yehova. (Loma 12.10) Buli-buli? Izila yoka yo yili pa Salimo 15.4 yakuti, abalendo bo bali mwitenti lya Yehova ‘batakusinta vyo balayizya na po ivintu vitangaba akiza pabumi bwabo.’ Nanti tutangakwanilisya vyo tulayizizye, vingabavulazya abanji. (Mata. 5.37) Umwakufwanikizya, u Yehova akulindilila ukuti abantu bo bali musendwa inti babukilile ukusunga ichilapo chabo icha sendwa. Sona akuhoboka sana nanti abapapi bakuyezya-yezya, ukubomba chilichosi cho bangakwanisya ukuti bakwanilisye vyo babalayizizye abana babo. Ichifukwa chakuti tumughanite u Chala na bapalamani bitu, vikutupangisya ukuti tubukilile ukukwanilisya vyo tulayizizye ukuyana na mo tungakwanisizya.
16. Ka zila buli iyamwabo yo tungabachindikila abamanyani ba Yehova?
16 Izila iyamwabo yo tungabachindikila abamanyani ba Chala, ko kubapokelela akiza sona ukubapa ivintu vyo bakulondiwa. (Loma 12.13) Akabalilo ko tukwangalila poka, kakutwavwa ukuti tube bakukolelana, tughomye ubumanyani bwitu na bakamu na bayemba sona nu Yehova. Ukuchila vyosi nanti tukupokelelana akiza, tukumweghelela u Yehova.
MUTAKAZIGHANAGHE NKANI INDALAMA
17. Choni cho mu Salimo chaputala 15 chikunene inkani iyandalama?
17 Pa Salimo ili, tukubelenga sona ukuti umulendo wa Yehova ‘atakukongozya indalama zyache ukuti babikepo izyapamwanya, sona atakwitikizya ukupokela amabeko ukuti bamulongele akabibi umuntu yo ate ni nongwa.’ (Sali. 15.5) Choni cho Isalimo ipimpa bulo ili likutambula ivya ndalama? Ichifukwa chakuti nanti tutakuzyennya umwakwenelela indalama vingavulazya abanji, sona zingakomannya ubumanyani bwitu nu Yehova. (1 Timo. 6.10) Mu kabalilo aka kwisinda, abantu bamo bakaghilaghapo ulusako ku bakamu babo bo bakaba bapina umwakubalipilisya indalama izyapamwanya pa ndalama zyo bakongola. Sona abalongi bamo bakapokelagha amabeko ukuti batakalonge akiza inongwa iya muntu yo ate ni nongwa. Ivintu ivi vitamuhobosyanga u Yehova.—Eze. 22.12.
18. Nkimba malalusyo buli gho ghangatwavwa ukumanya mo tukwenezya indalama? (Aba Hebeli 13.5)
18 Chiza sana ukwifufuza umwakuti tumanye mo tukwenezya indalama. Mwilalusye ukuti: ‘Ka akabalilo kosi nkwinong’onela bulo ivya ndalama na vyo ningaghula?’ Nanti nakopa indalama, ka nkukaba ukunyosya nu kwinong’ona ukuti umuntu yo akankopezya atakuzilonda pa kabalilo aka? Nkimba nanti naba ni ndalama, nkwiyennya ukuti ne wapamwanya sana umwakuti chikuba chipala ukubatulako abanji? Ka nkubalonga abakamu na bayemba ukuti bakughana ivintu ivyakumubili ichifukwa chakuti bali ni ndalama? Ka nkuba pabumanyani na bantu abakabi nu kulangizya ukuti ntangaba pabumanyani na bantu bo bapina?’ Tuli nu lusako ulwakuba balendo ba Yehova. Tungalufighilila ulusako ulu umwakubukilila ukuba nu moyo uwakusita ukughana nkani indalama. Nanti tungabomba bunubu u Yehova atakwiza pakututaghapo nalumo!—Belenga Aba Hebeli 13.5.
U YEHOVA ABAGHANITE SANA ABAMANYANI BACHE
19. Nkimba vintu buli vyo u Yehova akulonda ukuti tubombaghe?
19 Isalimo chaputala 15 likumalizya ni layizyo ilyakuti: ‘Wesi yo akubomba ivintu ivi atakwiza ukuyinganapo nalumo.’ (Sali. 15.5) Mu chaputala ichi, uwamasalimo akavumbula ivintu vyo u Chala akulonda ukuti tubombaghe. U Yehpva akulonda ukuti tuhobokaghe. Cho chifukwa akutupa ubulongozi bo bukupangisya ukuti tusayiwe nu kufighililiwa.—Yesa. 48.17.
20. Nkimba abalendo ba Yehova bakulindilila ichoni?
20 Abalendo ba Yehova bangaba na muntazi umwiza. Abapakaziwa bakwiza ukwitikiziwa kuti baye bikale ku ‘malo aghinji’ gho u Yesu akabanozezya kumwanya. (Yoha. 14.2) Bosi bo bali nu lusubilo ulwakwikala pachisu ichapasi, bakulindilila umwachinyonywa ukuti isimbo ilya Ubuvumbuli 21.3 lyize likwanilisiwe. Swebosi tukwennya ukuti twachindikiwa, ichifukwa chakuti u Yehova atwitizya ukuti tube bamanyani bache nu kubukilila ukuba balendo mwitenti lyache kwa bwila na bwila!
ULWIMBO 39 Pangani Zina Liwemi na Chiuta
