INKANI IYAKUMANYILA 23
ULWIMBO 28 Kuŵa Ŵabwezi ŵa Yehova
U Yehova Akutwitizya Ukuti Tube Balendo Bache
‘Itenti lyane likwiza ukuba pakasi pabo sona Une nkwiza ukuba ne Chala wabo.’—EZE. 37.27.
IFUNDO INKULU
Tubukilile ukumupalizya u Yehova ichifukwa chakuti atwitizizye ukuti tube balendo mwitenti lyache ilyakufwanikizya bulo ni zila yo akubombezya imbombo pakutupwelelela pakuba balendo bache.
1-2. Choni cho u Yehova akubitizya ababombi bache abasubaliwa?
KA MUKUMWENNYA buli-buli u Yehova pa bumi bwinyu? Mungamula ukuti ‘u Yehova we Baba wane, we Chala wane sona mumanyani wane.’ Pali sona ivintu ivyinji vyo munganena pamo ukutambula ivyakukwafannya nu Yehova. Loli ka mukumwennya sona ukuti wakubapokelela?
2 Umwene u Devedi akayanisya ubumanyani ubwa pakasi pa Yehova na bamanyani bache na bo bukubapo pa mulendo na yo amupokelela. Akalalusya ukuti: ‘Mwe Yehova, ka wenu yo angaba mulendo mwitenti lyinyu? Wenu yo angikala mwitenti lyinyu ilizelu?’ (Sali. 15.1) Ukuyana na mazyu agha, tukumanyila ukuti tungaba balendo ba Yehova, cho chikung’anamula ukuba bamanyani bache. Ka ukwitizya ukwa Yehova uku te kwapamwanya nkani?
U YEHOVA AKULONDA UKUTI TUBE BALENDO BACHE
3. Ka wenu yo akaba mulendo uwa Yehova uwabwandilo sona ka u Yehova nu mulendo wache bakiyivwanga buli-buli?
3 Bo achili atapelite chilichosi, u Yehova akikalagha weka. Loli pa kabalilo kamo akamupokelela Umwana wache ukatote, mwitenti lyache ilyakufwanikizya. U Yehova akahoboka sana pakuba nu budindo ubupya ubwakupokelela umulendo. Ibayibolo likunena ukuti u Yehova ‘akahobokagha sana’ nu Mwana wache. Umulendo wache uwabwandilo uyu, wepe ‘akahobokagha sana pamaso pa [Yehova] akabalilo kosi.’—Mbupi. 8.30.
4. Ka u Yehova akalikuzya buli-buli itenti lyache?
4 Pisinda pache, u Yehova akapela abantumi nu kubitizya ukuti babe balendo bache. Abantumi aba bakwitiziwa ukuti ‘bana ba Chala’ sona Ibayibolo likulongosola ukuti bakuhoboka sana pakuba poka nu Yehova. (Jobu 38.7; Dani. 7.10) Ukwa kabalilo akatali, u Chala akaba pabumanyani na bantumi bo akikalagha nabo kumwanya. Pisinda pache, akakuzya itenti lila nu kubitizya abantu pachisu ichapasi ukuti bope bingilemo. Bo akabalilo kendapo, abantu bo bakaba nu lusako ulwakwingila mwitenti lila akaba we Enoki, u Nowa, u Abulahamu nu Yobu. Abamanyani bache aba, bakitiziwanga ukuti bamanyani ba Chala pamo ukuti bakendagha nu ‘Chala uwabwanaloli.’—Ubwa. 5.24; 6.9; Jobu 29.4; Yesa. 41.8.
5. Nkimba tukumanyilako ichoni ku bulaghuzi bo bukwaghiwa pa Ezekieli 37.26, 27?
5 Ukwa myaka iyinji, u Yehova abukilila ukubitizya abamanyani ukuba balendo bache. (Belenga Ezekieli 37.26, 27.) Umwakufwanikizya, mubulaghuzi ubwa Ezekiyeli, tukumanyila ukuti u Chala akulonda ukuti ababombi bache babanje nawe pabumanyani. Akubalayizya ukupanga nabo ‘ipangano ilya mutende.’ Ubulaghuzi ubu, bukunena ivya kabalilo ko bo bali nu lusubilo ulwakwiza ukwikala kumwanya na bo bali nu lusubilo ulwakwiza ukwikala pachisu ichapasi, bakwiza ukukolelana mwitenti ilyakufwanikizya bulo pakuba “mudimo ghoka.” (Yoha. 10.16) Ivintu ivi, vikubombiwa pa kabalilo aka!
U CHALA AKUTUPWELELELA KULIKOSI KO TUNGABA
6. Ka umuntu angaba buli-buli mulendo mwitenti lya Yehova sona ka itenti ili likwaghiwa pamalo ghoka?
6 Kwisinda uku, itenti ghakaba malo aghakutuzyamo na ghakwilamo. Umulendo yo iza mwitenti akamanyagha ukuti inti apweleleliwe akiza. Nanti twiyipa nu kuba pabumanyani nu Yehova, tukuba ukuti twaba mulendo mwitenti lyache ilyakufwanikizya bulo. (Sali. 61.4) Tukuhoboka sana ni chakulya ichinji nu kuba pa bupanyani na banji bo bope basalite ukuba bamanyani ba Yehova. Itenti lyache ilyakufwanikizya bulo lite pamalo ghoka. Nanti mungabuka kuchisu ichinji ukuti mube mupange ulukomano, mungaye mukomane na bantu bo bope basayiwe nu kuba mwitenti lya Chala. Likwaghiwa kulikosi ko kukwaghiwa ababombi bache.—Ubuvu. 21.3.
7. Choni cho tunganena ukuti abasubaliwa bo bafuye bachili balendo mwitenti ilya Yehova? (Ennya sona ichituzi.)
7 Buli pakunena izya bantu abasubaliwa bo bakafwa? Ka tungasimikizya ukuti bachili balendo mwitenti lya Yehova? Inga! Choni cho tunganena bunubu? Ichifukwa chakuti u Yehova achili akubakumbukila. U Yesu akalongosola ukuti: ‘Loli nizya kuzyuka ukwa bantu kubufwe, u Mozesi akasimikizya pa buyo bubo bukunena nizya ukwaka ukwa chivwati. Akamwitizya u Mwene ukuti, ‘U Chala uwa Abulahamu, nu Chala uwa Ayizeki, sona nu Chala uwa Yakobo.’ Kokuti we Chala uwa bantu abumi, ate wa bantu abafwe, pakuti kukwache bosi babumi.’—Luka 20.37, 38.
Na bantu bulo abasubaliwa bo bafuye bope balendo mwitenti lya Chala (Ennya indime 7)
TUKUPINDULA SONA TUKUBA NA MABUDINDO
8. Ka abalendo ba Yehova bo bali mwitenti lyache bakupindula buli-buli?
8 Ngati mo itenti ilyenecho likubela malo aghakutuzyako na ghakufighilila, umwakuyana bulo u Yehova akubafighilila abalendo bo bali mwitenti lyache ku vintu vyo vingabavulazya mwabuzimu na ku vintu vyo vingabapangisya ukuti batakabe nu lusubilo. Nanti tukubukilila ukuba pabumanyani nu Yehova, u Satana atangatuvulazizya zila. (Sali. 31.23; 1 Yoha. 3.8) Muchisu ichipya, u Yehova atakwiza ukubafighilila bulo abamanyani bache abasubaliwa ku vintu vyo vingabavulazya mwabuzimu loli akwiza ukubafighila na kubufwe.—Ubuvu. 21.4.
9. Ka u Yehova akulindilila ukuti abalendo bache inti babombaghe buli-buli ivintu?
9 Ubwanaloli bwakuti, chapamwanya sana ukuba mulendo mwitenti lya Yehova mo tukuhoboka sona tukuba pabumanyani ubwiza nu Yehova. Ka tukulondiwa ukubomba choni nanti tukulonda ukubukilila ukuba balendo bache? Nanti yumo abitizya ukuti muye mube mulendo kunyumba yache, mungalonda ukumanya vyo akulonda ukuti inti mumubombele. Umwakufwanikizya, angalonda ukuti muvule isapato po muchili pakwingila munyumba sona tutakukayikila ukuti mungaba bakwisengannya ukubomba bunubu. Umwakuyana bulo, tukulondiwa ukumanya vyo u Yehova akulonda ukuti abalendo bo bakulonda ukubukilila ukuba mwitenti lyache, babombaghe. Ichifukwa chakuti tumughanite u Yehova, vikutupangisya ukuti tubombe chilichosi cho tungakwanisya na maka ghitu, “pakubomba cho chikumuhobosya nkani.” (Kolo. 1.10) Sona nanti tukumwennya u Yehova ngati mumanyani witu, tukumanya sona ifundo iyakuti we Chala nu Baba witu yo akuhoboka sana nu muchizi gho tukumupa. (Sali. 25.14) Po tuli ni fundo iyi munyinong’ono zyitu, akabalilo kosi tumupanje amaka ghitu sona tutakaluvyange mo abeleye. Ichifukwa chakuti tukumuchindika, vingatwavwa ukuti tutakabombaghe ivintu vyo vingamukalalizya. Akabalilo kosi tukulondiwa ‘ukwenda umwakwiyisya’ nu Chala witu.—Mika 6.8.
U YEHOVA ATAKASALILAGHA MUCHIMANYANI
10-11. Ka mo u Yehova akabombela na Baizilayeli mulungala-ngala ulwa Sinayi vikulangizya buli-buli ukuti atakusalila?
10 U Yehova atakusalila muchimanyani nanti akubomba ivintu na balendo bache. (Loma 2.11) Tungamanya mo u Yehova atakusalila muchimanyani nanti tungamanyila inkani iya mo akabombelagha ivintu na Baizilayeli mulungala-ngala ulwa Sinayi.
11 Akati abafumya abantu bache ku buzya ku Ijiputi, u Yehova kasala abasembe ukuti babombaghe pachihema. Abalevi bakasaliwa ukuti babombaghe imbombo izyamwabo pachihema. Ka abantu bo bakabombagha pachihema, pamo bo bakikalagha kupipi bobo u Yehova akabapwelelelagha akiza ukuchila abanji? Awe! U Yehova atakusalila.
12. Ka u Yehova akalangizya buli-buli ukuti atakusalila po akabombagha ivintu nu mutundu uwa Izilayeli? (Ukusoka 40.38) (Ennya sona ichituzi.)
12 Umuizilayeli aliwesi akaba nu lusako ulwakuba pabumanyani ubwiza nu Yehova ukusita ukusendela ukuti akwikala pachihema pamo akwikala kupipi ni chihema. Umwakufwanikizya, u Yehova akapangisya ukuti Umuzilayeli aliwesi akwanisyange ukwennya ichiswigho icha chipilala ichibingu ni chipilala icha moto lyo likabanga pamwanya pachihema. (Belenga Ukusoka 40.38.) Nanti ibingu lyanda ukwenda nu kwingilila ku malo aghanji, Umuizilayeli aliwesi akennyanga vyo vikubombiwa, nu kwanda ukusengannya ukatundu, ukufumya ivimatenti nu kwanda ukwenda ubulendo poka na Baizilayeli abamwabo. (Kuba. 9.15-23) Aliwesi akivwanga ukulila ukwa mapati mabili gho ghakabamanyisyanga ukuti bangandako ubulendo. (Kuba. 10.2) Ubwanaloli bwakuti, ukwikala kupipi ni chihema vitakalangizyanga ukuti umuntu ali pabumanyani ubwiza nu Yehova. Mumalo mwache, Umuizilayeli aliwesi akaba nu lusako ulwakuba mulendo wa Yehova sona akaba wakuti angamulongozya nu kumufighilila. Umwakuyana bulo amasiku ghano, kulikosi ko tungaba pachisu ichapasi tungapindula nu lughano lwa Yehova, ukupweleleliwa nu kufighililiwa.
Indondomeko iya Chala iyakupanga ichihema yikulangizya ukuti atakusalila (Ennya indime 12)
AMASIKU GHANO POPE U YEHOVA ATAKUSALILA
13. Ka zila buli yoka yo u Yehova akulangizizya ukuti atakusalila amasiku ghano?
13 Amasiku ghano abantu ba Yehova bamo bakwikala kupipi ni likulu lyitu ilya pachisu chosi pamo kupipi ni ofesi iya Bakaboni ba Yehova. Bamo bakubombela pamaofesi agha. Ivi vikwavwa ukuti babe nu lusako ulwakubomba imbombo izyinji zyo zikwaghiwa pamalo agha sona bakuba pabumanyani na bo bakulongozya. Bamo bakubomba ngati bakwendela idela, po bamo bakubomba imbombo izyamwabo izyakabalilo kosi. Nanti muli pigulu ilya bantu bo batakubombako imbombo izi ukuyana na mo ivintu vibeleye pa bumi bwinyu, mumanye ukuti u Yehova yo akutupokelela ukuba balendo bache alangizizye ukuti atughanite swebosi. Sona akumupwelelela aliwesi pamwene. (1 Pita. 5.7) Abantu bosi aba Chala bakupokela ichakulya ichabuzimu, ubulongozi sona bakuba bakufighililiwa.
14. Ka chifwanikizyo buli ichamwabo cho chikulangizya ukuti u Yehova pakuba wakupokelela abalendo atakusalila?
14 Ichifwanikizyo ichamwabo cho u Yehova akulangizya ukuti atakusalila amasiku ghano, pakuba wakupokelela abalendo chakuti, itikizizye ukuti Ibayibolo lyaghiwange na bantu abinji pachisu chosi ichapasi. Pabwandilo Ibayibolo likasimbiwa muvinenelo vitatu bulo: Ichihebeli, Ichialamu, ni Chigiliki. Ka bo bakubelenga Ibayibolo lyo lili muvinenelo ivyabwandilo ivi, bali pabumanyani ubwiza ukuchila bo batakuvibelenga? Awe te momo vibeleye.—Mata. 11.25.
15. Choni cho tungaba nu lusubilo ukuti u Yehova atakusalila? (Ennya sona ichituzi.)
15 Ukuti u Yehova ahoboke nuswe, vitakusendela mo tumanyiliye isukulu pamo ukumanya ivinenelo ivyinji. Mumalo mwakuti apeleke amahala ghache ku bantu bo bamanyiye nkani, u Yehova akupeleka amahala kwa muntu aliwesi pachisu chosi ichapasi. Amazyu ghache Ibayibolo, ghang’anamuliwe muvinenelo amasawuzani aghinji, cho chifukwa abantu abinji pachisu chosi ichapasi bangapindula na vyo likumanyisya sona bangamanyila mo bangabela bamanyani bache.—2 Timo. 3.16, 17.
Ka ukwaghiwa ukwa Bayibolo amasiku ghano kukutwavwa buli-buli ukusubila ukuti u Chala atakusalila? (Ennya indime 15)
MUBUKILILE UKUBA BALENDO BA YEHOVA
16. Ukuyana ni Imbombo 10.34, 35 ka tungabukilila buli-buli ukuba balendo ba Yehova?
16 Chapamwanya sana ukuba balendo ba Yehova, mwitenti lyache ilyakufwanikizya. U Yehova wachisa nkani, walughano nkani sona akubapokelela abalendo bache nu moyo ghosi. Umwakongelezyapo atakusalila, akupokelela aliwesi ukusita ukusendela ko tukwikala, ko twakulila, mo twamanyilila isukulu, umutundu witu, uluko lwitu, umusinku pamo ukuti twe banavuli pamo abakolo. Mumalo mwache, beka bo bakwitikizya ifundo zyache bobo bakwitikiziwa ukuba balendo bache.—Belenga Imbombo 10.34, 35.
17. Nkimba twikwiza pakuzyagha kwighi ifundo izyakongelezyapo izya mo tungabela balendo mwitenti lyache?
17 Ngati mo pakunenela pa Salimo 15.1, u Devedi akalalusya amalalusyo aghakuti: ‘Mwe Yehova, ka wenu yo angaba mulendo mwitenti lyinyu? Wenu yo angikala mwighamba lyinyu ilizelu?’ U Yehova akamwavwa uwamasalimo uyu ukuti amule amalalusyo agha. Mu nkani iyakukonkapo, tukwiza pakumanyila ivintu vyo vingatwavwa ukuti tubukilile ukuba pabumanyani nu Yehova.
ULWIMBO 32 Muŵe ku Chigaŵa cha Yehova!
