1-2. Nkimba umuntu akulondiwa ukubomba ichoni po achili pakoziwa?

 IMYAKA 5 yo yendapo, abantu abakupululila 1 miliyoni boziwe nu kuba Bakaboni ba Yehova. Ngati mo vikabela kwa mumanyili u Timoti, abinji mwa bantu aba bamanyila ubwanaloli ukufuma “kubwana” bwabo. (2 Timo. 3.14, 15) Bamo bamanyila ivya Yehova mubwasongo po bamo bamanyila mubugosi. Imyaka yo yendapo, umukolo yumo yo akamanyila Ibayibolo na Bakaboni ba Yehova akoziwa po akaba ni myaka 97!

² Nanti we mumanyili uwa Bayibolo pamo abapapi bako bo Bakaboni ba Yehova, nkimba ukwinong’ona ivyakuti ungoziwa? Nanti momo vibeleye, ichi chakwibikila ichiza sana! Po muchili pakoziwa ichabwandilo mukulondiwa ukuti mwiyipe tasi kwa Yehova. Inkani iyi inti yilongosole vyo ukwiyipa kwa Chala kukung’anamula. Sona inti yibavwe ukumanya ichifukwa cho mutakulondiwa ukoghopa ukwiyipa kwa Chala nu koziwa nanti mwisengannya ukubomba bunubu.

NKIMBA UKWIYIPA CHO CHONI?

3. Nena ivifwanikizyo ivya mu Bayibolo ivya bantu bo bakaba bakwiyipa kwa Yehova.

³ Mu Bayibolo ukwiyipa kukung’anamula ukusala ukubomba ichintu chimo ichapalubazu nkani. Abaizilayeli bakaba mutundu gho ghukiyipa kwa Yehova. Loli Abaizilayeli bamo bakiyipa kwa Yehova muzila iya palubazu. Umwakufwanikizya u Aloni akavwalagha ichimanyisyo ‘ichakupaghuliwa ichakulangizya ukwiyipa,’ cho chikabanga na kachijela akakung’azimila ko bakapangila ugolide uwakwengeka akiza ko kakabanga pantazi pampumpu yache. Akachijela aka golide aka, kakalangizyanga ukuti u Yehova akamusala ukuti inti amubombelaghe muzila iya palubazu, yo ko  kuba wasembe usongo nkani. (Levi. 8.9) Abanazili bope bakiyipa kwa Yehova muzila iya palubazu. Izyu ilyakuti ‘Munazili’ lyo lifumite ku lizyu ilya Chihebele ilyakuti “Nazili” likung’anamula “Uwapalubazu” pamo “Uwakwiyipa.” Abanazili bakalondiwanga ukwivwila indaghilo izya palubazu zyo bakabasimbila mundaghilo izya Mozesi.—Kuba. 6.2-8.

4. (a) Choni cho chikubombiwa nanti mwiyipa ubumi bwinyu kwa Yehova? (b) Nkimba ‘ukwikana’ wemwene’ chikung’anamula choni? (Ennya sona ichituzi.)

⁴ Nanti wiyipa kwa Yehova, ukuba ukuti wasala ukuba mumanyili uwa Yesu Kilisitu sona ukwennya ukuti ukubomba ubwighane ubwa Chala cho chintu chapamwanya sana pa bumi bwako. Nkimba ivi vikongelezyapo sona ichoni? U Yesu akanena ukuti: “Nanti umuntu yumo akulonda pakunkonka, ikane mwene.” (Mata. 16.24) Pakuba mubombi uwakwiyipa wa Yehova, mukulondiwa ukuleka ukubomba chilichosi cho chitakukolelana nu bwighane bwache. (2 Koli. 5.14, 15) Ivi vikongelezyapo ukukana ukubomba “imbombo izya buntu bwitu” ngati ubwamalaya. (Gala. 5.19-21; 1 Koli. 6.18) Nkimba ukwivwila indaghilo kukupangisya ukuti ubumi bwinyu bube bupala? Butakuba bupala nanti mumughanite u Yehova sona nanti mukumanya ukuti ukwivwila indaghilo zyache kukupangisya ukuti ivintu vibendelaghe akiza. (Sali. 119.97; Yesa. 48.17, 18) Umukamu yumo izina lyache u Nicholas akanena ukuti: “Ungennya indaghilo izyapamwanya izya Yehova ngati we waya uwa kujele yo angapangisya ukuti upotwe ukubomba vyo ukulonda pamo ukuzyennya ngati vijela vyo vikufighilila ko kuli inkalamu ukuti zitakakuvulazye.”

5. (a) Ka mungiyipa buli-buli kwa Yehova? (b) Nkimba ukwiyipa nu koziwa vikupambana buli buli? (Ennya sona ichituzi.)

⁵ Ka mungiyipa buli-buli kwa Yehova? Umwakumulayizya mulwiputo ukuti inti mumwiputaghe yuyo weka sona inti mubikaghe ubwighane bwache pabwandilo pa bumi bwinyu. Pisinda pache ukumulayizya u Yehova ukuti inti ubukilile  ukumughana “nu moyo wako ghosi nu muzimu wako ghosi ni nyinong’ono zyako zyosi na maka ghako ghosi.” (Mali. 12.30) Ukwiyipa kukubombiwa po uli kwa weka pakasi pa uwe nu Yehova. Loli ulozyo lukubombiwa pabuzelu ukubalangizya abanji ukuti mukiyipa. Ukwiyipa kwinyu kwa palubazu sana, po mubukilile ukusunga ilayizyo lyinyu sona u Yehova akulindilila ukuti inti mubombe bunubu.—Ndumbi. 5.4, 5.

CHONI CHO MUKWIYIPA KWA YEHOVA?

6. Choni cho chikumupangisya umuntu ukuti iyipe kwa Yehova?

⁶ Ichifukwa ichikulu cho chikupangisya ukuti mwiyipe kwa Yehova chakuti mumughanite. Ulughano lwinyu lutakufuma pa mo mukwiyivwila pene. Loli na “amahala” sona “nakivwisizye” aka vintu vyo mukamanyila ivyakukwafannya nu Yehova vyo vikapangisya ukuti mwande pakumughana nkani. (Kolo. 1.9) Ukumanyila Amasimbo kwabavwa ukusimikizya ukuti (1) U Yehova aliko naloli, (2) Ibayibolo Mazyu ghache sona (3) akubombezya igulu lyache pakukwanilisya ubwighane bwache.

7. Nkimba tubombaghe ichoni po tuchili pakwiyipa kwa Chala?

⁷ Abantu bo bakwiyipa kwa Yehova, bakulondiwa ukumanya ivimanyisyo ivyakwanda vyo vikwaghiwa mu Mazyu gha Chala sona bakwikala umwakukolelana ni fundo zyache izyapamwanya. Bakubomba chilichosi cho bangakwanisya ukuti bababuzyeko abanji vyo bakumanyila. (Mata. 28.19, 20) Bakwanda ukumughana nkani u Yehova sona bakuba ni chinyonywa ichakumwiputa yuyo mwene. Ka te momo vibeleye na kwa umwe? Nanti umughanite u Yehova nu moyo wako ghosi, te wize wiyipe nu koziwa ukuti umuhobosye bulo yo akukumanyisya Ibayibolo, abapapi bako pamo ichifukwa chakuti abamanyani bako bosi vyovyo babombite.

8. Ka ukupalizya kungabavwa buli-buli ukuti musale ukwiyipa kwa Yehova? (Salimo 116.12-14)

 ⁸ Ukwinong’onelapo ivyakukwafannya ni vintu vyo u Yehova akubombeye, kungakwavwa ukuti ulonde ukumupalizya nu kwiyipa kukwache. (Belenga Salimo 116.12-14.) Ibayibolo likunena ukuti u Yehova weyo Mupi uwa “chabupi chosi ichiza sona ni chakufikapo.” (Yako. 1.17) Ichabupi ichikulu nkani ukuchila vyosi, sembe iya Mwana wache u Yesu. Inong’onela mo ichabupi ichi chibeleye chakuswighisya! Isembe iyakutusatula yapangisya ukuti mube pa bumanyani ubwiza nu Yehova. Sona yabapa ulusako ulwakuti mwize mwikale kwa bwila na bwila. (1 Yoha. 4.9, 10, 19) Ukwiyipa kwa Yehova, zila yoka yo mungalangizizya ukuti mukupalizya ulughano lo abalangizizye na malusayo aghanji gho abapiye. (Kumbu. 16.17; 2 Koli. 5.15) Mwibuku ilyakuti Mungahoboka nu Bumi Kwa Bwila na Bwila! umutu 46 ifundo 4, muli ifundo izya mo mungalangizizya ukuti mukupalizya sona muli ividiyo iya mamiti ghatatu iyakuti Kupeleka Vyawanangwa Vithu kwa Chiuta.

KA MWE BAKWISENGANNYA UKUTI MWIYIPE NU KOZIWA?

9. Choni cho umuntu atakulondiwa ukukakamiziwa ukuti iyipe?

⁹ Mungiyivwa ukuti te mwe bakwisengannya ukuti mwiyipe nu koziwa. Napo vingaba bunubu, mukulondiwa ukubukilila ukusinta ivintu vimo pa bumi bwinyu ukuti mwikalaghe ukuyana ni fundo izya Yehova pamo mukulondiwa akabalilo akakukwana ukuti mughomye ulwitiko lwinyu. (Kolo. 2.6, 7) Te bamanyili aba Bayibolo bosi bo banganda ukumughana u Yehova pa kabalilo koka sona te bana banandi bosi bo bangaba bakwisengannya ukwiyipa nu koziwa pa myaka iyakuyana. Muyezye ukumanya po mukulondiwa ukusinta, pisinda pache mubombe ivintu vyo mungakwanisya ukubomba ukusita ukwiyanisya na aliwesi.—Gala. 6.4, 5.

10. Nkimba mungabomba ichoni nanti mwagha ukuti te mwe bakwisengannya ukuti mwiyipe nu koziwa? (Ennya sona ibokosi ilyakuti “ Ku bo Bakulila Mubwanaloli.”)

¹⁰ Napo mungamanya ukuti te mwe bakwisengannya ukwiyipa kwa Yehova, loli mubukilile ukuti mwibikile ichakwibikila ichi. Mumulabe u Yehova ukuti abavwe ukukwanisya ukusinta ivintu vyo mukulonda ukusinta pa bumi bwinyu. (Filipi 2.13; 3.16) Mukwiza ukwennya ukuti u Yehova akwivwa inyiputo zyinyu sona akubavwa.—1 Yoha. 5.14.

VYO VIKUPANGISYA BAMO UKUTI BACHEDWE UKWIYIPA NU KOZIWA

11. Ka u Yehova akwiza pakutwavwa buli-buli ukuti tubukilile ukuba basubaliwa kukwache?

¹¹ Abantu bamo bisenganizye kale ukuti bangiyipa loli bakuchedwa ukuti biyipe nu koziwa. Bakoghopa ukuti, ‘Choni cho chikwiza pakubombiwa nanti niza nabomba ubutulanongwa nu kwepusiwa muchipanga?’ Nanti numwe bulo muli ni lyogha ngati linili, mube nu lusubilo ulwakuti u Yehova akwiza pakubapa chilichosi cho mukulondiwa umwakuti “akabalilo kosi mukwiza pakubombagha chicho chikumuhobosya nkani.” (Kolo. 1.10) Akwiza pakubapa sona amaka aghakuti mubombaghe cho chiza. Ichakuhobosya chakuti abatulitepo kale abantu abinji ukuti babombaghe cho chiza. (1 Koli. 10.13) Cho chifukwa muchipanga ichachikilisitu, bantu badono bulo bo bakwepusiwa. U Yehova akubavwa abantu bache ukuti babukilile ukuba basubaliwa.

12. Nkimba tungabomba ichoni ukuti tuleghuke ukubomba ubutulanongwa ubukulu?

¹² Umuntu aliwesi uwambula ukufikapo, akabalilo kamo akugheliwa ukuti abombe ivintu ivibibi. (Yako. 1.14) Napo vili bunubu, loli muli nu bwabuke ubwakusala cho mungabomba pa kabalilo ko mukugheliwa. Ubwanaloli bwakuti umwe mwemwe muli nu bwabuke ubwakusala mo mungikalila. Abantu bamo bakwennya ukuti mutangakwanisya ukubomba bunubu loli  ubu bumyasi, umwe mungakwanisya ukumanyila ukwilema mu vyakubomba vyinyu. Sona napo mungagheliwa, mungasala ukuti mutakabombe ichintu cho chibibi. Isiku lililyosi mwiputaghe ukuti mukwanisye ukubomba bunubu. Mubukilile ukukonka indondomeko yinyu iyakumanyilila Amazyu agha Chala pamweka. Mwaghiwangepo pa nkomano izya Chikilisitu. Mubabuzyanjeko abantu abanji ivya lwitiko lwinyu. Nanti akabalilo kosi mukubomba bunubu, mungagha amaka aghakubukilila ukubomba ivintu ukuyana ni chilapo chinyu ichakwiyipa. Sona mutakaluvyanje ukuti u Yehova akwiza pakubavwa ukuti mukwanisye ukubomba vyo mukulonda.—Gala. 5.16.

13. Nkimba u Jozefu akatulangizya chifwanikizyo buli ichiza?

¹³ Chingaba chipepe ukubukilila ukuba basubaliwa kwa Yehova nanti musaliye zila vyo mungabomba nanti mwagheliwa. Ibayibolo likutubuzya ivya bantu abinji bo bakabomba bunubu, napo bope bakaba bambula ukufikapo. Umwakufwanikizya, umuchi uwa Potifala akamunyengelelagha u Jozefu umwakupyanizya-pyanizya ukuti aghone nawe. Loli u Jozefu akamanyila zila mo angabombela. Ibayibolo likutubuzya ukuti ‘akakana,’ sona akanena ukuti: ‘Ka ningabomba buli-buli ububibi ubukulu ubu nu kumunangila u Chala?’ (Ubwa. 39.8-10) Ivi vikulangizya ukuti naloli u Jozefu akamanyila zila vyo angabomba po umukolo uyu akaba ukuti achili pakumughela. Vyo akabomba ivi vikapangisya ukuti chibe chipepe ukuti abombe cho chiza pa kabalilo ko akagheliwa.

14. Ka tungisengannya buli-buli ukuleghuka injelo?

¹⁴ Ka mungamuyezya buli-buli u Jozefu pakubomba cho chiza pa kabalilo ko mwakomana ni njelo? Mungasalila zila pa kabalilo aka vyo mungize mubombe nanti mwagheliwa. Mumanye mo mungakanila lubilo ivintu vyo u Yehova avibengite nu kuleka ukuvyinong’ona. (Sali. 97.10; 119.165) Nanti mungabomba bunubu, mungapota injelo nanti mwayeliwa. Mukwiza ukuba ukuti mumanyiye zila mo inti mubombele.

15. Ka umuntu angalangizya buli-buli ukuti ‘akumulondelezya’ u Yehova? (Aba Hebeli 11.6)

¹⁵ Tutakukayikila ukuti mukumanya ukuti mubwaghite ubwanaloli sona mukulonda ukumubombela u Yehova nu moyo winyu ghosi, loli muchili mukwiyivwa ukuti te mwe bakwisenganga ukuti mwiyipe nu koziwa. Nanti vili bunubu, mungabomba ngati vyo Umwene u Devedi akabomba. Mungamulaba u Yehova ukuti: ‘Mumfufuze mwe Chala, nu kughumanya umoyo wane. Mufufuze nu kumanya inyinong’ono zyane.  Ukuti mwennye nanti mumwane muli inyinong’ono izibibi sona mundongozezye ku zila iya bwila na bwila.’ (Sali. 139.23, 24) U Yehova akubasaya sana “abantu babo bakumulondelezya.” Ivintu vyosi vyo mukubikapo umoyo pakubomba ukuti mukwanilisye ichakwibikila chinyu ichakuti mwiyipe nu koziwa, mukumulangizya u Yehova ukuti vyovyo mukulonda ukubomba.—Belenga Aba Hebeli 11.6.

MUBUKILILE UKUPALAMILA KWA YEHOVA

16-17. Ka u Yehova akubawesa buli-buli bo abapapi babo Bakaboni ba Yehova? (Yohani 6.44)

¹⁶ U Yesu akanena ukuti u Yehova weyo akabawesa abamanyili bache. (Belenga Yohani 6.44.) Inong’onela mo ifundo iyi yibeleye yapamwanya sona vyo yikung’anamula kwa umwe. U Yehova nanti ennyamo ichintu chimo ichiza mwa muntu aliwesi, akumuwesela kukwache. Akumwennya aliwesi pamwene ukuba ‘chuma chache ichapalubazu.’ (Kumbu. 7.6.) Momo akubenezya numwe bulo.

¹⁷ Mungaba ukuti mwe bana mwe abapapi binyu bo Bakaboni ba Yehova. Munganda ukwiyivwa ukuti mukumubombela u Yehova ichifukwa chakuti vyovyo abapapi binyu bakubomba, te chifukwa chakuti u Yehova weyo abawesela kukwache. Loli Ibayibolo likunena ukuti: “Palamila kwa Chala, po wepe akwiza pakupalamila kukwinyu.” (Yako. 4.8; 1 Syambu. 28.9) Nanti mwanda pakupalamila kwa Yehova, po wepe bulo akwiza pakwanda ukupalamila kukwinyu. U Yehova atakubennya bulo umwe ngati muli bulo chigaba icha gulu ilya bantu. Loli akupalamila kwa aliwesi pamwene ukongelezyapo bo bakulila mubwanaloli. Nanti umuntu yumo anda pakubomba ivintu ivyakuti vimwavwe ukuti apalamile kwa Yehova, u Yehova wepe akubomba ngati mo twenezya pa Yakobo 4.8.—Yanisya na 2 Aba Tesalonika 2.13.

18. Nkimba munkani iyakukonkapo tukwiza pakunenezannya ichoni? (Salimo 40.8)

¹⁸ Nanti wiyipa kwa Yehova nu koziwa, ukuba ukuti babomba ngati mo u Yesu akabombela. Akaba wakwiyipa ukubomba chilichosi cho u Baba wache akamubuzya ukuti abombaghe. (Belenga Salimo 40.8; Hebe. 10.7) Munkani iyakukonkapo, tukwiza pakunenezannya vyo vingabavwa ukuti mubukilile ukumubombela u Yehova umwabusubaliwa pisinda apakuti moziwa.