INKANI IYAKUMANYILA 18
ULWIMBO 1 Makhaliro gha Yehova
Mumusubilaghe ‘Umulongi Uwachisu Chosi’ Uwachisa!
‘Nkimba umulongi uwachisu chosi atangabomba ivintu mubugholosu?’—UBWA. 18.25.
IFUNDO INKULU
Twivwisye akiza ichisa nu bugholosu ubwa Yehova pakunena ivya bantu abasita ubugholosu bo bakwiza pakuzyuka.
1. Nkimba u Yehova akamumanyisya ichoni u Abulahamu vyo vikamusangalusya?
IMYAKA iyinji yo yendapo, u Chala akamubuzya u Abulahamu ukwendela mu wantumi ukuti akulonda ukupyuta itawuni iya Sodomu nu Gomola. Ivi vikapangisya ukuti chibe chipala kwa Abulahamu ukwivwisya napo akaba nu lwitiko ulwakughoma mwa Chala. Akalalusya ukuti: ‘Ka mukulonda naloli ukupyuta abagholosu na babibi? . . . Ka Umulongi uwachisu chosi atangabomba ivintu mubugholosu?’ U Yehova umwabufisalyoyo akamwavwa u Abulahamu ukuti amanyile ichintu chimo ichakulondiwa ichakuti: U Chala atangapyuta abantu abagholosu. Nuswe bulo amasiku ghano ifundo iyi, tungapindula nayo sona yingatusangalusya.—Ubwa. 18.23-33.
2. Choni cho chikutusimikizya ukuti ubulongi ubwa Yehova bugholosu sona bwachisa?
2 Ka tungasimikizya buli-buli ukuti nanti u Yehova akupeleka ubulongi akubomba ivintu umwabugholosu nu mwachisa? Ichifukwa chakuti tukumanya ukuti ‘u Yehova akwennya mumoyo’ uwa muntu. (1 Samu. 16.7) Ubwanaloli bwakuti akumanya ‘umoyo uwa muntu aliwesi.’ (1 Nyafya. 8.39; 1 Syambu. 28.9) Ubwanaloli ubu bwakuswighisya sana. Ubulongi bwa Yehova bwapamwanya nkani ukuchila akivwisizye kitu. Umutumiwa u Pabuli, akanena ivyakukwafannya nu Yehova u Chala ukuti: “We wenu yuyo angalingannya ubulongi bwache?”—Loma 11.33.
3-4. Nkimba akabalilo kamo tungaba na malalusyo buli sona ka munkani iyi inti tunenezannye ichoni? (Yohani 5.28, 29)
3 Napo tukumanya ukuti akabalilo kosi u Yehova akubomba ivintu mubugholosu, loli akabalilo kamo tungaba na malalusyo ngati gho u Abulahamu akaba nagho. Lumo tungaswigha nu kwilalusya ukuti: ‘Ka vingabombiwa ukuti abantu bo u Yehova akabapyuta ngati aba ku Sodomu nu Gomola bangize babe sona nu bumi? Ka vingabombiwa ukuti bamo mwa bantu aba bangaba mwigulu ilya ‘bantu abasita ubugholosu bo bakwiza pakuzyuka kubufwe’?’—Imbo. 24.15.
4 Za tunyokelemo mo tukwivwisizya ivyakukwafannya nu kuzyuka. Umwalunulu tukalongosola sona mo tukwivwisizya ivyakukwafannya nu “kuzyuka kubufwe nu kuba nu bumi” sona nu “kuzyuka kubufwe nukulongiwa.” a (Belenga Yohani 5.28, 29.) Akalongosolele aka kasinta mo tukivwisizyanga pa nkani iya kuzyuka, ko inti tunenezannye munkani iyi ni yakukonkapo. Ichabwandilo, inti tunenezannye vyo tutavimenye na vyo tuvimenye pa nkani iya mo u Yehova akupelekela ubulongi bwache umwabugholosu.
IVINTU VYO TUTAVIMENNYE
5. Nkimba kwisinda uku amabuku ghitu ghakalongosolagha ichoni ivyakukwafannya na bantu aba ku Sodomu nu Gomola bo u Yehova akabapyuta?
5 Kwisinda uku, mu mabuku ghitu tukanenezannya ilalusyo ilyakuti, choni cho chikwiza pakubombiwa ku bantu bo u Yehova abalonga ukuti basita ubugholosu? Tukanena ukuti abantu bo bakapyutiwa nu Yehova ngati bo bakikalagha ku Sodomu nu Gomola batakwiza pakuzyuka. Loli tukati twiputa nu kumanyila sona izya nkani iyi, pakiza ilalusyo ilyakuti, Ka tunganena umwakusimikizya ukuti batakwiza pakuzyuka?
6. Nkimba vifwanikizyo buli ivya mu Bayibolo vyo vikulangizya mo u Yehova akalongelagha abantu abasita ubugholosu, sona vintu buli vyo tutavimennye?
6 Inong’onela amalalusyo gho ghangabapo. Mu Bayibolo muli inkani izyinji zyo zikulongosola ukuti u Yehova akabalonga abantu abasita ubugholosu. Umwakufwanikizya, akabapyuta abantu abinji pa kabalilo ko Ichigumula chikabombiwa sona akabombezya Abaizilayeli pakupyuta imitundu 7 iya bantu bo bakikalagha Muchisu Icha Layizyo. Pisinda pache, akabombezya uwantumi weka pakughogha abasilikali aba Asiliya abakukwana 185,000 mubusiku boka. (Ubwa. 7.23; Kumbu. 7.1-3; Yesa. 37.36, 37) Pa vyakubombiwa vyosi ivi, ka Ibayibolo likusimikizya ukuti u Yehova asalite ukuti abantu bo bakafwa pa kabalilo aka, bafwiliye zila umwakuti te bize bazyuke? Awe te momo vibeleye. Chifukwa buli tukunena bunubu?
7. Nkimba vintu buli vyo tutavimenye ivyakukwafannya na bantu bo bakaghoghiwa ni Chigumula, pamo bo bakaghoghiwa pa kabalilo ko Abaizilayeli bakafyulagha ichisu icha Kenani? (Ennya icha pachifwambo)
7 Pa nkani zyo twatambula izi, tutakumanya mo u Yehova akalongela aliwesi pamwene sona tutakumanya nanti abantu bo bakaghoghiwa, bakaba nu lusako ulwakuti bamanyile ivya Yehova nu kupinduka. Nanti Ibayibolo likunena ivya kabalilo ko Ichigumula chikabombiwanga, likunena ivyakukwafannya nu Nowa ukuti, “akalumbililagha nizya bugholosu.” (2 Pita. 2.5) Loli litakunena ukuti pa kabalilo ko akazengagha ichingalaba, akakwanisyanga sona ukulumbilila kwa muntu aliwesi pachisu ichapasi yo akafwa pa kabalilo aka Chigumula. Umwakuyana bulo, tutakumanya nanti abantu ababibi bo bakikalagha mu Kenani bakaba nu lusako ulwakumanyila ivya Yehova nu kusinta ivyakubomba vyabo.
U Nowa ni mbumba yache bali pakuzenga ichingalaba. Vitakumanyikwa nanti u Nowa ni mbumba yache bakakwanisya ukulumbilila ku muntu aliwesi pachisu ichapasi, pa kabalilo ko bakazengagha ichingalaba bo Ichigumula chichili pakubombiwa (Ennya indime 7)
8. Nkimba vintu buli vyo tutavimenye ivyakukwafannya na bantu aba ku Sodomu nu Gomola?
8 Buli pakunena ivya bantu bo bakaghoghiwa pa kabalilo ko u Yehova akapyutagha u Sodomu nu Gomola? Umuntu umugholosu izina lyache u Loti akikalagha pakasi pa bantu aba ku Sodomu. Loli ka tukumanya ukuti u Loti akakwanisya ukulumbilila kwa aliwesi? Awe. Naloli abantu aba bakaba babibi, loli ka aliwesi akamanyagha ichintu cho chiza ni chibibi? Mukumbukile ukuti ichilundilo icha banavuli chikiza kwa Loti ukuti chikolelele abalendo bache. Ibayibolo likunena ukuti pachilundilo ichi pakaba ‘abanavuli abachinyamata na bachasongo.’ (Ubwa. 19.4; 2 Pita. 2.7) Ka tukumanya akiza ukuti u Chala uwachisa u Yehova akabaghogha abantu bosi aba umwakuti atakwiza pakubazusya? U Yehova akamubuzya u Abulahamu umwakusimikizya ukuti abantu abagholosu mutawuni yila batakakwanagha 10. (Ubwa. 18.32) Ubwanaloli bwakuti abantu aba batakaba bagholosu, ivi vyovyo vikapangisya ukuti u Yehova abaghoghe bosi. Ka tunganena umwakusimikizya ukuti patalipo nayumo-yumo uwa bantu aba yo akwiza pakuzyuka ukuti ize abe mwigulu ilya ‘basita ubugholosu bo bakwiza pakuzyuka kubufwe’? Awe, tutanganena umwakusimikizya!
9. Nkimba vintu buli vyo tutakumanya ivyakukwafannya nu Solomoni?
9 Mu Bayibolo muli sona inkani izya bantu bo pabwandilo bakaba bagholosu, loli pisinda pache bakasinta nu kuba basita ubugholosu. Ichifwanikizyo choka we Mwene u Solomoni. Umwene uyu, pabwandilo akivwilagha ubulongozi bwa Chala nu moyo ghosi sona u Yehova akamusaya sana loli pisinda pache akanda ukwiputa aba chala aba bumyasi. Ivi vikapangisya ukuti u Yehova akalale sona umutundu uwa Izilayeli ghukatamiwa sana ukwa myaka iyinji ichifukwa cha mbibi zyo u Solomoni akabomba. Ubwanaloli bwakuti Amasimbo ghakunena ukuti u Solomoni bakamusyila poka ‘na banyenya bache’ ukongelezyapo abanavuli abasubaliwa ngati Umwene u Devedi. (1 Nyafya. 11.5-9, 43; 2 Nyafya. 23.13) Loli ichifukwa chakuti bakamusyila poka na banyenya bache, ka vikulangizya ukuti akwiza pakuzyuka? Ibayibolo litakunena chilichosi pa nkani iyi. Bamo banginong’ona ukuti “pakuti bo umuntu afwa asatuliwa ku bulaghili ubwa mbibi.” (Loma 6.7) Loli ubwanaloli bwache bwakuti, ifundo iyi yitakung’anamula ukuti aliwesi yo afuye akwiza pakuzyuka ichifukwa chakuti asatuka ku mbibi zyo akabombagha. Ukuzyuka chabupi ichakufuma kwa Chala witu uwalughano. Akwiza pakubapa ichabupi ichi abantu bo alonda ukuti bize babe nu lusako ulwakumubombela kwa bwila na bwila. (Jobu 14.13, 14; Yoha. 6.44) Ka u Solomoni akwiza pakupokela ichabupi ichi? Uswe tutakumanya loli u Yehova weyo akumanya akiza. Ifundo yo tukumannya yakuti akwiza pakubomba cho chiza.
IVINTU VYO TUVIMENYE
10. Ka u Yehova akwiyivwa buli-buli pa nkani iya kupyuta abantu? (Ezekieli 33.11) (Ennya sona ichituzi.)
10 Belenga Ezekieli 33.11. Pa nkani iya mo u Yehova akulongela abantu, akutuvumbulila umwachisa mo akwiyivwila. Umwakuyana na vyo umulaghuzi u Ezekiyeli akasimba, u Pitala wepe akanena ukuti, “Umwene atakulonda ukuti nayumo umuntu azimile.” (2 Pita. 3.9) Ukuyana ni fundo iyi, tukumanya ukuti u Yehova atakuchimbilila ukupyuta abantu loli angabomba bunubu nanti ali ni vifukwa ivyakwivwika. U Yehova wachisa sona akulangizya ichisa chache paliposi po pakulondiwa ukuti abombe bunubu.
Ukuzyuka ukwa bantu abasita ubugholosu, kukwiza ukupeleka ulusako ku bantu abinji ukuti bamanyile ivyakukwafannya nu Yehova (Ennya indime 10)
11. Ka bo bawenu bo batakwiza pakuzyuka, sona tukumanya buli-buli?
11 Nkimba tukumanya ichoni ivyakukwafannya na bantu bo batakwiza pakuzyuka? Ibayibolo likutambula ivifwanikizyo vinandi bulo. b U Yesu akalangizya ukuti u Yudasi Sikaliyoti atakwiza pakuzyuka. (Mali. 14.21; ennya sona Yohani 17.12.) U Yudasi akamanyagha ukuti vyo akabombagha vikaba vyakususannya nu bwighane bwa Yehova u Chala nu Mwana wache loli atakabombapo zimo. (Ennya Maliko 3.29.) Umwakuyana bulo, u Yesu akanena ukuti abalongozi bamo abavipanga bo bakamususyanga batakwiza pakuzyuka. (Mata. 23.33.) Sona umutumiwa u Pabuli akabasoka abakusambuka bo batakusinta ukuti batakwiza pakuzyuka.—Hebe. 6.4-8; 10.29.
12. Nkimba tukumanya ichoni ivyakukwafannya ni chisa cho u Yehova ali nacho? Nena ivifwanikizyo.
12 Nkimba tukumanya ichoni ivyakukwafannya ni chisa cho u Yehova ali nacho? Ka alangizizye buli-buli ukuti “atakulonda ukuti nayumo umuntu azimile”? Ennya mo akalangizizya ichisa bamo bo bakapanga ubutulanongwa ubukulu. Umwene u Devedi, akapanga amabutulanongwa aghinji ukongelezyapo ubulowe nu kughogha. Loli u Devedi akapinduka cho chifukwa u Yehova akamuhobokela. (2 Samu. 12.1-13) Umwene u Manase, akabomba ivintu ivibibi nkani pa bumi bwache. Napo vikaba bunubu, loli u Yehova akamulangizya ichisa umwakumuhobokela ichifukwa chakuti akapinduka. (2 Syambu. 33.9-16) Ivifwanikizyo ivi, vikutukumbusya bulo ukuti u Yehova akulangizya ichisa pa kabalilo kalikosi ko ennya ukuti pali vifukwa ivyakubombela bunubu. Akwiza ukubazusya abantu ngati banaba ichifukwa chakuti bakati bazyaghannya ukuti bananga bakapinduka.
13. (a) Choni cho u Yehova akabalangizya ichisa abantu aba ku Ninive? (b) Nkimba pisinda pache, u Yesu akanena ichoni ivyakukwafannya na bantu aba ku Ninive?
13 Tukumanya sona ivyakukwafannya ni chisa cha Yehova, nanti tukwennya mo akabombela na bantu aba ku Ninive. U Chala akamubuzya u Yona ukuti: ‘Nennya imbibi zyo bakubomba.’ Loli bakati bapinduka ku mbibi zyabo, u Yehova akabahobokela. U Yehova akaba ni chisa nkani ukuchila cho u Yona akaba nacho. U Chala akamukumbusya umulaghuzi uwakukalala uyu ukuti, ‘abantu aba ku Ninive batakamanyagha ukupambanisya pakasi pa chibibi ni chiza.’ (Yona 1.1, 2; 3.10; 4.9-11) Pisinda pache, u Yesu akabombezya ichifwanikizyo ichi ukuti amanyisye ivyakukwafannya nu bugholosu ni chisa cha Yehova. U Yesu akanena ukuti “pisiku lilyo u Chala akwiza pakubalonga” abantu aba nkulilo iyi, abantu aba mu Ninive bakwiza pakuzyuka kubufwe ichifukwa chakuti bakapinduka.—Mata. 12.41.
14. Nkimba ‘ukuzyukila ku bulongi’ chikwiza ukung’anamula ichoni ku bantu aba ku Ninive?
14 Nkimba tukung’anamula ichoni nanti tukunena ukuti abantu aba ku Ninive bakwiza “pakuzyuka kubufwe nukulongiwa”? Apa u Yesu akamanyisyanga ivyakukwafannya nu kuzyuka “kubufwe nukulongiwa” ukwa muntazi. (Yoha. 5.29) Akang’anamulagha ukuti vikwiza pakubombiwa mu Bulaghili Bwache Ubwa Myaka 1,000 pa kabalilo ko ‘abagholosu na basita ubugholosu’ bakwiza pakuzyuka. (Imbo. 24.15) Abantu bo te bagholosu bakwiza ‘pakuzyuka ku bufwe nu kulongiwa.’ Ivi vikung’anamula ukuti nanti abantu aba biza bazyuka, u Yehova nu Yesu bakwiza pakwennya nanti abantu aba bakwivwila sona bakubombezya ifundo zyo bamanyila. Nanti yumo uwa ku Ninive iza azyuka nu kwanda ukukana ukwiputa ukwa bwanaloli akwiza pakulongiwa ukuti atakikale kwa bwila na bwila. (Yesa. 65.20) Loli bo biza basala ukumwiputa u Yehova umwabusubaliwa, bakwiza ukulongiwa akiza sana. Bakwiza ukuba nu lusako ulwakwikala nu bumi kwa bwila na bwila!—Dani. 12.2.
15. (a) Choni cho tutakulondiwa ukunena umwakusimikizya ukuti nayumo-yumo yo akikalagha ku Sodomu nu Gomola akwiza pakuzyuka? (b) Ka tungaghivwisya buli-buli amazyu gho ghali pa Yuda 7? (Ennya ibokosi ilyakuti “ Nkimba u Yuda Akang’anamulagha Ichoni?”)
15 Pakunena ivya bantu aba ku Sodomu nu Gomola, u Yesu akanena ukuti “pisiku lilyo u Chala akwiza pakubalongela abantu” angize abapelele ichisa abantu aba ku Sodomu nu Gomola ukuchila abantu bo bakamukana nu kukana ivimanyisyo vyache. (Mata. 10.14, 15; 11.23, 24; Luka 10.12) Nkimba u Yesu akang’anamulagha ichoni? Lumo tunginong’ona ukuti u Yesu akanenagha bulo umwachili pa kabalilo aka. Loli te momo vibeleye po akanenagha ivya bantu aba ku Ninive. c Apa vikuboneka ukuti akang’anamulagha naloli vyo akanena. “Pisiku lilyo u Chala akwiza pakubalongela abantu” lyo u Yesu akanenagha muvyakubombiwa vyosi vibili ivi likuyana bulo. Ngati bantu ba ku Ninive, abantu aba ku Sodomu nu Gomola bope bakabombagha ivintu ivibibi. Loli abantu aba ku Ninive bakaba nu lusako ulwakuti bapinduke. Umwakongelezyapo, kumbukila vyo u Yesu akanena ivyakukwafannya nu “kuzyuka ku bufwe nu kulongiwa.” Ukuzyuka uku kukongelezyapo ‘abantu babo bakabombagha imbibi.’ (Yoha. 5.29) Ifundo izi zikulangizya ukuti pangaba ulusubilo ulwakukwafannya na bantu aba ku Sodomu nu Gomola. Vingabombiwa ukuti pamo bamo mwa bantu aba bangize bazyuke nu kuba nu lusako ulwakumanyisiwa ivyakukwafannya nu Yehova nu Yesu Kilisitu!
16. Nkimba tukumanya ichoni pa nkani iya mo u Yehova akwiza ukusalila abantu bo angize abazusye? (Yeremiya 17.10)
16 Belenga Yeremiya 17.10. Ivesi ili likutwavwa ukumanya ivintu vyo tuvimenye ivyakuti akabalilo kosi u Yehova ‘akufufuza mumoyo witu sona akumanya inyinong’ono zyitu izyamukasi.’ Nanti akusala abantu bo angize abazusye, akabalilo kosi u Yehova ‘akumupa aliwesi ukuyana ni mbombo zyache.’ U Yehova atakusinta loli akulangizya ichisa chache nanti pakulondiwa ukubomba bunubu. Cho chifukwa tutanganena umwakusimikizya ukuti umuntu yumo atakwiza pakuzyuka, peka-peka nanti twamanya umwakusimikizya ichifukwa cha vyo Ibayibolo likumanyisya!
‘UMULONGI UWACHISU CHOSI AKWIZA PAKUBOMBA CHO CHIGHOLOSU’
17. Choni cho chikwiza pakubombiwa ku bantu bo bafuye?
17 Ukufuma bulo po u Adamu nu Eva bakakolelana nu Satana pakumusambukila u Yehova u Chala, abantu amabiliyoni aghinji bakufwa. “Ubufwe mulwani” uwabumalilo uwakutamya sana! (1 Koli. 15.26) Choni cho chikwiza pakubombiwa ku bantu bosi aba? Akagulu akanandi bulo aka bantu abakukwana 144,000 bo bakumukonka u Kilisitu umwabusubaliwa bakwiza ukuzyukila ku bumi ubusita ukufwa kumwanya. (Ubuvu. 14.1) Ichilundilo ichikulu icha banavuli na bakolo bo bamughanite u Yehova, babo bakabombagha ivyiza bakwiza ukuba kuchigaba icha bantu ‘babo babombite inyiza bo bakwiza pakuzyuka kubufwe’ sona bakwiza ukwikala nu bumi kwa bwila na bwila pachisu ichapasi nanti biza babukilila ukuba bagholosu mu Bulaghili Ubwa Kilisitu Ubwa Myaka 1,000 na pakugheliwa ukwa bumalilo. (Dani. 12.13; Hebe. 12.1) Sona mu Bulaghili Ubwa Kilisitu Ubwa Myaka 1,000, abantu bo ‘te bagholosu’ ukongelezyapo bo batamubombeyepo lumo u Yehova pamo bo bakabombagha ivintu ivibibi, bakwiza pakubapa ulusako ulwakuti basinte inkalo zyabo nu kuba babombi aba Yehova abasubaliwa. (Luka 23.42, 43) Loli abantu bamo bakaba babibi sana umwakuti bakamusambukila u Yehova nu bwighane bwache, cho chifukwa u Yehova asalite ukuti abantu aba batakwiza pakuzyuka kwa bwila na bwila.—Luka 12.4, 5.
18-19. (a) Choni cho tungaba nu lusubilo ulwakukwafannya na mo u Yehova akwiza pakulongela abantu bo bafuye? (Yesaya 55.8, 9) (b) Nkimba munkani iyakukonkapo tukwiza pakunenezannya ichoni?
18 Ka pa kabalilo aka, twaba ni vifukwa ivyiza ivyakusubila ukuti akabalilo kosi nanti u Yehova akubalonga abantu akubalonga mubugholosu? Inga! Ngati mo u Abulahamu akivwisizya akiza, ukuti u Yehova wakufikapo, wamahala nkani, wachisa sona ‘mulongi uwachisu chosi.’ U Yehova amumanyisezye akiza sana Umwana wache sona amupiye ubudindo ubwakulonga umuntu aliwesi. (Yoha. 5.22) Ubaba nu Mwana, bosi bakuvimanya akiza vyo vili mumoyo wa muntu aliwesi. (Mata. 9.4) Cho chifukwa tunganena umwakusimikizya ukuti akabalilo kosi nanti bakwiza pakumulonga umuntu aliwesi bakwiza ukubomba ‘cho chigholosu’!
19 Za tubukilile ukumusubila nkani u Yehova na mo akusalila ivintu. Twamanya ukuti uswe tutangakwanisya ukupeleka ubulongi loli u Yehova weka! (Belenga Yesaya 55.8, 9.) Cho chifukwa tukumusubila u Yehova nu Mwana wache yo we Mwene uwakufikapo, yo akweghelela inkalo izya Baba wache ngati ichisa nu bugholosu ukuti bobo bize bapeleke ubulongi bosi. (Yesa. 11.3, 4) Nkimba ivintu vikwiza ukuba buli-buli pa kabalilo akantamyo inkulu po u Yehova nu Yesu bakwiza pakulonga abantu? Nkimba vintu buli vyo tutavimenye? Sona ka vintu buli vyo tuvimenye? Inkani iyakukonkapo yikwiza ukwamula amalalusyo agha.
ULWIMBO 57 Kupharazgira Ŵanthu ŵa Mitundu Yose
b Pakunena ivya Adamu, u Eva nu Kayini, ennyachitembe cha Mulindilili icha Chitumbuka Janiwale 1, 2013, p. 12.
c Amazyu aghakuti ‘umwana uwakunanganika’ gho bakabombezya pa Yohani 17.12 ghakang’anamulagha ukuti nanti u Yudasi afwa akwiza ukufwila zila kwa bwila na bwila sona atakwiza pakuzyuka. Ennya inkani iyakuti “Kasi Kwananga Kwambura Kugowokereka Ni Vichi?” pa jw.org.