INKHANI IYAKUMANYILA 46
ULWIMBO 49 Kukondweska Mtima wa Yehova
Bakamu ka Mungabomba Ngati Bavwilizyi Muchipanga?
‘Yo akupa akuhoboka nkhani ukuchila yo akupokela.’—IMBO 20.35.
IFUNDO INKHULU
Inthi tumanyile mo tungabatulila abakamu bo boziwe ukuti babe bavwilizyi muchipanga.
1. Ka umutumiwa u Pabuli akabennyanga bulibuli abavwilizyi?
ABAVWILIZYI bakubomba imbombo izyakulondiwa sana muchipanga. Tutakukayikila ukuti umutumiwa u Pabuli akabennyanga abanavuli abasubaliwa aba ukuti bakulondiwa hee. Umwakufwanikizya, pa kabalilo ko akabasimbilagha ukalata Abakilisitu aba ku Filipi, akabalamuka umwapalubazu abavwilizyi na basongo.—Filipi 1.1.
2. Ka umukamu yumo izina lyache Luis akwiyivwa bulibuli pakuba mwavwilizyi muchipanga?
2 Abakamu abinji bakuba bakuhoboka sana nanthi baba bavwilizyi muchipanga. Umwakufwanikizya, u Devan akaba mwavwilizyi muchipanga po akaba ni myaka 18. Sona umukamu yumo izina lyache u Luis akasaliwa ukuba mwavwilizyi muchipanga po akaba ni myaka iya muma 50. Umukamu u Luis akanena ukuti, “Nkhwiyivwa ukuti lusako sana ukubomba ngati mwavwilizyi muchipanga, nkhaninkhani nanthi nkhwinong’onela ulughano lo abakamu na bayemba bandangizya kwa kabalilo akatali!”
3. Nkhimba inthi tunenezannye malalusyo buli?
3 Nanthi mwe mukamu uwakoziwa sona muchili ukuba mwavwilizyi muchipanga, ka mungabomba ichoni? Choni cho chingabavwa ukuti mube bavwilizyi? Sona fundo buli izya mu Masimbo zyo mukulondiwa ukukwanilisya? Munkhani iyi, inti twennye amaansala agha malalusyo agha. Loli ichabwandilo, za tunenezannye imbombo zyo abavwilizyi bakubomba.
KA MBOMBO BULI ZYO ABAVWILIZYI BAKUBOMBA?
4. Nkhimba abavwilizyi bakubomba mbombo buli? (Ennya sona ichithuzi.)
4 Umwavwilizyi akuba mukamu uwakoziwa yo akusaliwa nu muzimu ubuzelu ukuti abavwanje abasongo ba chipanga pakubomba imbombo izyakulondiwa muchipanga. Abavwilizyi bamo bakwenelezya ukuti abalumbilili bali ni vigaba ivyakulumbililako na mabuku aghakubombezya imbombo pakulumbilila. Bamo bakwavwapo pakuswefya nu kuyannya Inyumba ya Bumwene. Sona abavwilizyi bakwavwapo pakubelenga bo biza pa nkomana nu kupwelelela ivibombelo vyo tukubombezya imbombo pa nkomano. Ukunena ubwanaloli, abavwilizyi bakubomba imbombo izyakulondiwa sana muchipanga. Abavwilizyi banavuli babuzimu, bamughanite u Yehova ni fundo zyache sona babaghanite sana abakamu na bayemba. (Mata. 22.37-39) Ka umukamu uwakoziwa angabomba bulibuli ukuti abe mwavwilizyi?
Abavwilizyi bakumweghelela u Yesu ichifukwa chakuti bakwiyipa ukuti bababombele abanji (Ennya indime 4)
5. Nkhimba umukamu angabomba bulibuli ukuti abe mwavwilizyi?
5 Ibayibolo likulongosola vyo abakamu bangabomba ukuti babe bavwilizyi. (1 Timo. 3.8-10, 12, 13) Mungakwanisya ukuba bavwilizyi nanthi mungamanyila ifundo izya mu Masimbo nu kubikapo umoyo ukuti mukwanilisye vyo zikunena. Loli ichabwandilo, mukulondiwa ukubikapo umoyo ukwennya mo mukubombela ivinthu ukuti mukwanilisye vyo mukulonda.
CHONI CHO MUKULONDA UKUTI MUBE BAVWILIZYI?
6. Choni cho chingabavwa ukuti mubabombelaghe abakamu na bayemba? (Matayi 20.28; ennya icha pachifwambo.)
6 U Yesu Kilisitu chifwanikizyo ichiza sana pa nkhani yakumughana u Baba wache na banthu. Ulughano ulu lukamwavwa ukuti ababombelaghe abanji imbombo zyo zikabonekagha ukuti zyapasi. (Belenga Matayi 20.28; Yoha. 13.5, 14, 15) Nanthi muli nu lughano, u Yehova inthi abasaye nu kubavwa ukuti mube bavwilizyi muchipanga.—1 Koli. 16.14; 1 Pita. 5.5.
U Yesu akubamanyisya abatumiwa bache ukuti babombaye ivinthu umwakwiyisya, mumalo mwakulonda amabudindo aghapamwanya (Ennya indime 6)
7. Choni cho umukamu atakulondiwa ukuba wakwiyennya?
7 Muchisu ichi, abanthu bakulimbikisya umuzimu uwakwiyennya ukuti bapamwanya nkhani ukuchila abanji. Mwigulu lya Yehova te momo vibeleye. Umukamu yo ali nu lughano ngati lo u Yesu akaba nalo, atakubombezya amaka ghache nu budindo bo ali nabo ukuti abonekaghe wapamwanya nkhani ukuchila abanji. Nanthi muchipanga mungaba umunthu yumo uwa nyinong’ono ngati izi, anganda ukukana ukubomba imbombo zimo zyo zikulondiwa pakupwelelela ing’ozi zya Yehova zyo zikuboneka ukuti zyapasi. Angennya ukuti imbombo izi zyapasi nkhani. (Yoha. 10.12) U Yehova atakumusaya umunthu aliwesi yo ali nu moyo uwakwiyennya pamo uwakulimbana na banthu.—1 Koli. 10.24, 33; 13.4, 5.
8. Ka u Yesu akabapa bulongozi buli abatumiwa bache?
8 Akabalilo kamo, abanthu bo u Yesu akabaghanagha nkhani bope bakabombapo ivinthu umwakwiyennya. Ennya vyo abatumiwa babili aba Yesu, u Yakobo nu Yohani bakabomba. Bakamulaba u Yesu ukuti ize abape amalo aghapamwanya mu Bumwene bwache. U Yesu atakabapala pa vyo bakamulaba. Mumalo mwache, akabalongosolela abatumiwa bache bosi 12 ukuti: ‘Nanthi umunthu yumo akulonda pakuba we songo, kokuti abanje mubombi uwa bosi.’ (Mali. 10.35-37, 43, 44) Abakamu bo bali nu moyo uwakulonda ukubabombela abanji, bakwavwa ichipanga muzila izyakulekanalekana.—1 Tesa. 2.8.
CHONI CHO CHINGABAVWA UKUTI MUBE NU MOYO UWAKUBAVWA ABAKAMU NA BAYEMBA?
9. Choni cho chingabavwa ukuti mube nu moyo uwakubavwa abakamu na bayemba?
9 Tutakukayikila ukuti mumughanite u Yehova sona mukulonda ukubavwa abanji. Loli akabalilo kamo mutangaba ni chinyonywa ichakuba umwavwilizyi. Choni cho chingabavwa ukuti mube nu moyo uwakubavwa abakamu na bayemba? Mwinong’onele mo mungahobokela nanthi mungababombelagha abakamu na bayemba ngati mwavwilizyi. U Yesu akati: ‘Yo akupa akuhoboka nkhani ukuchila yo akupokela.’ (Imbo. 20.35) U Yesu atakanena bulo, loli momo wepe akabombelagha. Akahobokagha sana nanthi akubavwa abanji, po numwe bulo mungaba bakuhoboka.
10. Ka u Yesu akalangizya bulibuli ukuti akahobokagha pakubavwa abanji? (Maliko 6.31-34)
10 Ennya ichifwanikizyo cho chikulangizya ukuti u Yesu akahobokagha nanthi akubavwa abanji. (Belenga Maliko 6.31-34.) Akabalilo kamo, u Yesu na batumiwa bache bakalita sana. Bakalondagha babuke kwabene ukuti baye batuzye. Loli ichilundilo icha banthu chocho chikandila ukufika kumalo ghala sona chikalindililagha ukuti u Yesu achimanyisye. U Yesu nge akanena ukuti nalita ichifukwa umwene na batumiwa bache “batakaba na kabalilo akakulyela.” Pamo nge u Yesu akabamanyisya bulo ichinthu choka pamo vibili nu kubabuzya ukuti babwelaghe. Loli ichifukwa chakuti akaba nu lughano, ‘akanda pakubamanyisya ivinthu ivyinji.’ (Mali. 6.35) Atakabomba ivi mwachibelezya, loli ‘akaba ni chililizi na banthu bala.’ Akalondagha ukubamanyisya ichifukwa chakuti akabaghanagha. U Yesu akahobokagha ichifukwa chakuti akababombelagha abanji.
11. Ka u Yesu akabavwanga bulibuli abanthu muzila izyakupambanapambana? (Ennya sona ichithuzi.)
11 Pa kabalilo ko u Yesu akabalumbililagha abanthu aba, akababombela ivyinji ukuchila ukubamanyisya bulo. Akabapa sona ivinthu ivyakulondiwa ivya ku mubili. Akapanga ichiswigho ichakuti pabe ichakulya ichakukwana nu kubabuzya abamanyili bache ukuti babagabile abanthu. (Mali. 6.41) Pakubomba bunubu, u Yesu akabamanyisya abamanyili bache mo bangabombela ukuti babavwe abanji. Sona akabamanyisya ukuti bakulondiwa ukubabombela abanji muzila izyakupambanapambana ngati mo abavwilizyi bope bakulondiwa ukubombela akabalilo kosi. Inong’onela mo abamanyili babaghiye ukuti bakahobokela pakubapa abanthu ichakulya ichi mupaka ‘abanthu bosi bala bakalya nu kwikuta’! (Mali. 6.42) Ichi chifwanikizyo choka bulo cho chikulangizya mo u Yesu akalangizizyanga ukuti akubika ivinthu ivya banji pa bwandilo. Akabalilo kosi ko akaba nu bumi pachisu ichapasi, akabavwanga abanji. (Mata. 4.23; 8.16) U Yesu akahobokagha sana nanthi akubamanyisya abanji nu kubapa ivinthu ivyakumubili vyo bakulondiwa. Tutakukayikila ukuti numwe bulo, mungaba bakuhoboka nanthi mungiyipa nu moyo ghosi ukuti mube bavwilizyi.
Ukumughana u Yehova nu kuba nu moyo uwakubabombela abanji, kungabavwa ukuti mubombe ivyinji muchipanga (Ennya indime 11) a
12. Choni cho mutakulondiwa ukwennya ukuti nachimochimo cho mungabomba muchipanga?
12 Nanthi mukwennya ukuti mute na maluso ghamo, mutakanyokele kwisinda. Tutakukayikila ukuti muli ni nkhalo zimo zyo zingavwa ichipanga. Mungapindula sana nanthi mungamanyila umwakubikapo umoyo ifundo zyo u Pabuli akasimba pa 1 Aba Kolinti 12.12-30. Amazyu agha Pabuli agha ghakulangizya ukuti ngati mubombi wa Yehova aliwesi, numwe bulo muli ni vinthu vimo ivyakulondiwa sana ivyakuti mungabomba muchipanga. Nanthi pa kabalilo aka, mutakubomba ngati mwavwilizyi muchipanga, mutakawe amaka. Mumalo mwache, mubombe chilichosi cho mungakwanisya pakumubombela u Yehova na banji. Mube bakusimikizya ukuti abasongo bakwennya mo mukubombela imbombo yiliyosi yo bakubapa.—Loma 12.4-8.
13. Ka umwanavuli yo akulonda ukuba nu budindo akulondiwa ukubomba choni?
13 Inong’onela ichifukwa cho mukulondiwa ukubikapo umoyo ukuti mube mwavwilizyi muchipanga. Abakilisitu bosi bakuzibombezya imbombo ifundo zimo zyo zikumwavwa umunthu ukuti abe mwavwilizyi. Ubwanaloli bwakuti, Abakilisitu bosi bakulondiwa ukupalamila kwa Yehova, ukuba bakuhoboka ichifukwa cha kupa sona bakulondiwa ukulangizya ichifwanikizyo ichiza. Nkhimba umukamu angabomba bulibuli ukuti abe mwavwilizyi?
MO MUNGABOMBELA UKUTI MUBE BAVWILIZYI
14. Ka ukuleka ‘ukuba wamaluli’ kukung’anamula choni? (1 Timoti 3.8-10, 12)
14 Za tunenezannye ifundo zimo zyo zikwaghiwa pa 1 Timoti 3.8-10, 12. (Belenga.) Umwavwilizyi wa chipanga ‘atakulondiwa ukuba wamaluli,’ NW. Amazyu agha ghangang’anamula sona ukuti “umusubaliwa,” pamo “yo abanthu bangamuchindika.” Ivi vitakung’anamula ukuti apotwange nu kuseka na banthu. (Ndumbi. 3.1, 4) Loli ennyanje ukuti chakulondiwa sana ukukwanilisya ubudindo bwache. Nanthi muli ni mbili iyakuti mwe basubaliwa sona muli nu muchizi, ichipanga chingabachindika.
15. Ka ‘ukusita ukunena pabilipabili’ sona ‘ukwagha iphindu umwabuzimbuli’ vikung’anamula choni?
15 ‘Uwakusita ukunena pabilipabili,’ ivi vikung’anamula ukuti anenaghe ubwanaloli sona abanje musubaliwa. Abombaghe vyo anena sona atakabazimbulaghe abanji. (Mbupi. 3.32) ‘Atakulondiwa ukwagha iphindu umwabuzimbuli,’ ivi vikung’anamula ukuti abanje musubaliwa pa nkhani izya ndalama pamo pa bizinesi. Mutakabanje pa bumanyani na bakamu na bayemba ukuti mwaghilepo indalama.
16. (a) Nkhimba ukuleka ‘ukungw’ela nkhani uvinyo’ chikung’anamula choni? (b) Ka ukuba nu “mabyebye umwiza” chikung’anamula choni?
16 ‘Batakangw’elaghe nkhani uvinyo,’ ivi vikung’anamula ukuti batakulondiwa ukungw’ela nkhani ipele pamo ukuba ni mbili iyakuti bo bachakolwa. Babanje nu “mabyebye umwiza” ukung’anamula ukuti bakulondiwa ukubomba ivinthu umwakukolelana ni fundo zya Yehova. Napo mwe bambula ukufikapo, loli mungahoboka nu mutende gho ghukubapo ichifukwa chakuba pa bumanyani ubwiza nu Chala.
17. Ka amazyu ghakuti “bayeliwanje tasi” ghakung’anamula choni? (1 Timoti 3.10; Ennya sona ichithuzi.)
17 “Bayeliwanje tasi,” ivi vikung’anamula ukuti bakulondiwa ukulangizya tasi ukuti basubaliwa ukuti babape ubudindo. Nanthi abasongo babapa ivyakubomba, mukulondiwa ukubikapo umoyo ukukonkha ubulongozi ubwa mo mungayimbombela imbombo iyo. Mwenelezye ukuti mwivwisya mo mungabombela imbombo yo babapa nu kuyimalizya pa kabalilo kache. Nanthi mukubomba imbombo yo babapa nu moyo ghosi, abanji muchipanga bangennya nu kwennya ukuti mungakwanisya ukuba nu budindo. Mwe basongo, mubikaghepo umoyo pakubamanyisya abakamu abakoziwa. (Belenga 1 Timoti 3.10.) Ka muchipanga chinyu muli abakamu abachinyamata abakoziwa ukongelezyapo bo bali ni myaka ukwandila 10 ukufika 14? Nkhimba bakulangizya ukuti bakumanyila pabene? Ka bakwamulapo pa nkhomano sona bakwingila mu bulumbilili? Nanthi vili bunubu, mungabapa ivyakubomba vyo vikukolelana ni myaka yo bali nayo na mo ivinthu vibeleye pa bumi bwabo. Nanthi mungabomba bunubu, abakamu abachinyamata aba bangalangizya ukuti bangakwanisya ubudindo bo mungabapa. Pisinda pache, bangaba bavwilizyi napo batakwanisizye imyaka 20.
Abasongo nanthi bakubapa abakamu abakoziwa ivyakubomba, bakulangizya ukuti ‘bakubayezya’ waghe bangakwanisya ubudindo (Ennya indime 17)
18. Nkhimba ‘ukuba basita kafukwa’ chikung’anamula choni”?
18 ‘Babe basita kafukwa,’ ivi vikung’anamula ukuti batakulondiwa ukuba ni nkhalo imbibi. Napo vili bunubu, akabalilo kamo Umukilisitu bangamutamanthila. Abanthu bakamutamanthila sana u Yesu polelo akanenenla zila ukuti bo bakumukonkha bope bakwiza ukubatamanthila. (Yoha. 15.20) Loli, nanthi mungabukilila ukuba ni nkhalo inyiza ngati mo u Yesu akabombela, mukwiza ukuba ni mbili inyiza muchipanga.—Mata. 11.19.
19. Ka amazyu aghakuti “abanje nu muchi weka” kukung’anamula choni?
19 “Abanje nu muchi weka.” Nanthi muli pasendwa, mubaghiye ukuba nu muchi weka ukuyana na mo u Yehova akalondelagha pabwandilo. (Mata. 19.3-9) Umwanavuli uwachikilisitu atakulondiwa ukubomba ubwamalaya. (Hebe. 13.4) Ivi vikung’anamula ukuti akulondiwa ukubukilila ukuba musubaliwa kwa muchi wache sona atakulondiwa ukukopana na bakolo abanji.—Jobu 31.1.
20. Ka umukamu angapwelelela bulibuli “akiza” imbumba yache?
20 “Abalelaye akiza abana bache nu kusungilila akiza inyumba yache.” Nanthi mwe mutu wa mbumba, mwennyanje ukuti ubudindo bwinyu bwakulondiwa sana. Akabalilo kosi mupangaghe ukwiputa ukwa pa mbumba. Mwingilaghe mu bulumbilili na aliwesi uwa mumbumba yinyu. Mubavwe abana binyu ukuti bamughanaghe u Yehova. (Efe. 6.4) Umunthu yo akupwelelela akiza imbumba yache, akulangizya ukuti angapwelelela sona ichipanga.—Yanisya nu 1 Timoti 3.5.
21. Ka mungabomba ichoni nanthi pa kabalilo aka te mwe bavwilizyi?
21 Nanthi te mwe bavwilizyi muchipanga, twapela twalamba muyinong’onele inkhani iyi nu kumulaba u Yehova ukuti abavwe. Mumanyile ivinthu vyo vikulondiwa ukuti mube bavwilizyi nu kubikapo umoyo ukuti muvikwanilisye. Mwinong’onelepo pa mo mumughaniye u Yehova na bakamu na bayemba. Mube ni chinyonywa ichakulonda ukubabombela. (1 Pita. 4.8, 10) Mungaba bakuhoboka sana nanthi mungaba bavwilizyi muchipanga. Nge u Yehova asaya ukuyezyayezya kwinyu ukuti mukwanisye ukubomba ngati mwavwilizyi muchipanga!—Filipi 2.13.
ULWIMBO 17 “Nkhukhumba”
a AMAZYU AGHAKULONGOSOLA ICHITHUZI: Kumongo, u Yesu akubabombela abamanyili bache umwakwiyisya; kundyelo, umwavwilizyi uwa chipanga akumwavwa umukamu umugosi.
